Kabul News TV
ایران په سعودي عربستان کې د امریکا ۵ تیل لیږدوونکې الوتکې له منځه وړي.
د راپورونو له مخې پیښه هغه وخت رامنځته شوې چې د ایران یو راکټ د امریکا په «شهزاده سلطان» هوایي اډې کې ۵ (KC-135) الوتکې په نښه کړي.
دا په داسې حال کې ده چې پرون هم د امریکا دوې تیل لیږدوونکې الوتکې په عراق کې په نښه او یوه یې نسکوره شوه.
په یادې پیښې کې د دې الوتکې ټوله خدمه هم ووژل شوه.
د بهرنیو چارو وزیر امیر خان متقي خپل چینایي سیال «وانگ یي» سره تلیفوني خبرې کړي.
پدې تماس کې امیر خان متقي پر افغانستان د پاکستان نظامي تیریو په اړه د ا.ا موقف څرگند کړی، ویلي یې دي چې افغانستان د خپل ولس او ځمکنۍ بشپړتیا څخه د دفاع حق لري خو په وینا یې د کړکیچ پراخیدو پر ځای د سیاسي حل ملاتړ کوي.
بلخوا «وانگ یي» ویلي د عامو خلکو او ملکي تأسیساتو په نښه کول ورته د منلو وړ نه دي او زیاته کړې یې ده چې نظامي اقدامات د ستونزو د حل لاره نه ده او له دې سره د کړکېچ سطحه نوره هم لوړیږي. نوموړي د افغانستان او پاکستان ترمنځ تفاهم رامنځته کولو لپاره د بیجینگ په چمتووالي هم ټینگار کړی.
د ا.ا هوایي ځواکونو پر افغانستان د پاکستاني الوتکو د بریدونو په ځواب کې نن د خیبرپښتونخوا په کوهاټ کې د پاکستاني پوځیانو پر ستراتیژیکو مرکزونه او تاسیساتو د بې پیلوټه الوتکې بریدونه کړي او پاکستاني لوري ته یې ځاني او مالي زیانونه اړولي دي.
پاکستان تیره شپه یو ځل بیا پر کابل، کندهار، پکتیا او پکتیکا او ځینو نورو سیمو هوایي بمبارۍ کړي.
د ا.ا ویاند ذبیح الله مجاهد ویلي په ځینو سیمو کې بریدونه د عامو خلکو په کورونو شوي چې له امله یې ښځو او ماشومانو خپل ژوند له لاسه ورکړی.
مجاهد زیاته کړې چې پاکستان همداراز کندهار کې هوایي میدان ته نږدې د کام ایر هوایي شرکت د تیلو ذخیره هم په نښه کړې.
د نوموړي په وینا یاد شرکت ملکي هوایي شرکتونو او د ملګرو ملتونو الوتکو ته د سون مواد تیاروي.
د امریکا یوې (KC-135) تیلو لیږدوونکې الوتکې د عراق په لویدیځ کې سقوط کړی.
د امریکا مرکزي قوماندانۍ ویلي پیښه د ایران خلاف نظامي عملیاتو په جریان کې شوې او زیاته کړې یې ده چې د دې الوتکې د ۶ تنو خدمې ژغورلو هڅې روانې دي.
د سنټکام په وینا په پیښې کې بله الوتکه هم شامله وه خو هغه په موفقانه ډول اسرائیلو ته رسیدلې ده.
سنټکام د دې الوتکو په نښه کیدل رد کړي خو د سقوط لامل په اړه یې هم څه ندي ویلي.
بیجینگ یو ځل بیا پر ایران د اسرائیلو او امریکا برید غندلی او د خلیج هیوادونو په نښه کیدو سره یې مخالفت ښودلی.
د چین بهرنیو چارو وزارت ویاند «گو جیاکون» ویلي «چین د خلیج پر هیوادونو د بریدونو ملاتړ نه کوي او پر ملکي او غیر نظامي هدفونو بریدونو غندنه کوي.»
«جیاکون» ویلي د بیجینگ لپاره لومړیتوب د پوځي عملیاتو سملاسي پای ته رسیدل او د شخړې د لا پراختیا څخه مخه نیول دي.
امریکا په پیښور کې خپله قونسلگرۍ په دایمي توگه تړي.
امریکایي (NBC) چینل ویلي د دې قونسلگرۍ ۷ نیم مییلیونه ډالر بودجه به په اسلام آباد کې د امریکا سفارت ته ورکړل شي.
دا قونسلگري پر افغانستان د شوروي اتحاد تر برید وروسته د امریکا له مهمو استازولیو څخه شمیرل کیدله.
په خوست کې د پاکستان توپخانې بریدونو کې د ماشومانو په گډون د یوې کورنۍ څلورو غړو خپل ژوند له لاسه ورکړی.
ا.ا ویلي پاکستان تیره شپه د خوست عليشېرو ـ تريزيو ولسوالۍ اړوند د صدقو کلي د بدرګې ګورګورې سیمه کې د خلکو په کورونو او د کوچیانو پر کیږدیو بریدونه کړي دي.
ا.ا زیاته کړې چې د دې بریدونو له امله د کوچیانو یوې کورنۍ دوو ماشومانو، یوې ښځې او یو نارینه ژوند له لاسه ورکړی او درۍ نور ماشومان ټپیان شوي دي.
د ملگرو ملتونو امنیت شورا د عربي هیوادونو لخوا وړاندې شوي هغه پریکړه لیک ته په اکثریت سره مثبته رایه ورکړه چې پر عربي هیوادونو یې د ایران بریدونه غندل. روسیې او چین رایه ورنکړه خو پاکستان د غیر دایمي غړي په توگه دې قطعنامې ته مثبته رایه ورکړه.
د جنوبي کوریا مخالفت سره سره امریکا له دې هیواده منځني ختیځ ته د خپل هوایي دفاع سیستمونو لیږد پیل کړی.
د جنوبي کوریا رسنیو یو شمیر عکسونه خپاره کړي چې ښیي امریکا له جنوبي کوریا څخه اسرائیلو ته د خپل هوایي دفاع «تاد» او «پاتریوت» سیستمونو لیږد پروسه پیل کړې.
په ۲۰۱۷ کال کې کله چې دا سیستمونه د امریکا لخوا په جنوبي کوریا کې مستقر شول «بیجینگ» اعتراض وکړ او له «سیول» سره یې اړیکې ترینگلې شوې، د دواړو لورو ترمنځ سوداگري تر ټولو ټیټې کچې ته ورسیده چې ورسره جنوبي کوریا میلیاردونه ډالر ضرر وکړ او جنوبي کوریا ته د چینیایي سیلانیانو په تگ محدودیتونه وضع شول.