قناة الشيخ أحمد الأهواني
✍️
عاوزه تكون زوجة مطيعة وتكون بيت مستقر، بس الأقارب بيخببوها وبيبثوا في عقلها كلام النسـ.ـويات
ياأختنا...الأرحام الواجبة 5 أقسام
🖐
1/ الأب والأم
2/ الجد والجدة
3/ الأخ والأخت
4/ العم والعمة
5/ الخال والخالة
الأقسام دي هتوصليهم بالرغم من أفعالهم، وصلة الرحم مش محددة بعدد زيارات أو عدد مكالمات ولا لها طريقة ملزمة...فلو فيه حد من دول بيعمل معاكي كدا اقتصدي معاه .. وخلي علاقتكوا في حدود ضيقة متى أمكن
ما دون ذلك....لو قطعتي معاهم خالص حفاظًا على بيتك فلا شيء عليكِ
ولو الزوج بعد الزواج قَيَّد عليكي صلة أي حد من الفريقين، اسمعي له وأطيعي فهو أدرى بما يصلحك ويصلح بيته
وهقولك على حاجة كمان مهمة جدًا، اشرحي لزوجك فلانة دي قالتلك إيه، وعلانة دي انتي هتحجمي علاقتك بيها ليه
الزوج ياأختنا أدري بالمُدخلات اللي هتنفعك وهو يقدر يقيم العلاقات دي، ساعتها ممكن يمنعك عن حد انتي مش قادره تقدري كلامه، أو يسمح ليكي بآخر كلامه عادي كنتي هتقطعي معاه
واحذري من المخببات اللي كل همهم يحسدوكي على حياتك أو زوجك أو أولادك، كلمة حاضر اللي بتقوليها لزوجك دي نار بتقيد في قلبها كل ما تسمعها منك، بيحسدوكي على ما آتاكي الله من استقرار هما مش عارفين يوصلوله لإنهم عايشين عيشة الأنعام بلا عقل
(اسأل الله أن يصب عليكم الخير صبًا)
#تصحيح_مفاهيم_الزواج
✍️
هذا التعليق للأخت الفاضلة كثيرًا ما نراه عند الحديث عن آية القوامة أو آيات وأحاديث طاعة الزوج
والحقيقة، مع أننا نشترك مع الأخت في المفهوم العام من الفكرة المطروحة (ففعلًا، لا ينصلح حال امرأة بغير ولي يقوم بواجبه كما يجب)
إلا أن الأخوات يأخذن هذه الفكرة لنفس الفكرة النسـ.ـوية التي تنشرها المنافقات للتملص من الطاعة
الأصل العام أن المرأة المسلمة لا تنشغل عند واجباتها بحال الزوج ومعاصيه، ينبغي عليها أن تعلم أنها إنما تؤدي واجبها لله بدايةً، تفعل ما تفعله ابتغاء مرضاة الله
النسـ.ـوية ترسخ في أذهانهن هذه الشبهة التي صرنا نسمعها: (أنا مش بعترض على الطاعة أبدًا ياشيخ، بس مين هو الزوج القوام اللي هطيعه؟)
وهكذا، كل أخت تريد أن تعيش منفلتة فاسقة كغيرها من منافقات النسـ.ـويات ما عليها إلا أن تضع لزوجها بعض العراقيل التي ستبرر لها هذا الإنفلات من غير أن تسأل أهل العلم عن حال الزوج بدايةً
فهذه تقول لك: (زوجي بخيل)
وأخرى تقول لك: (زوجي لا يشاركني)
وثالثة تقول لك: (زوجي عصبي جدًا)
ورابعة تقول لك: (مبيجبليش حقي من فلانة اللي غلطت فيا من 20 سنة وإحنا مخطوبين)
😂
وهكذا...الطاعة التي هي سبيلها للجنة أو النار صار معيارها مزاج وتقلبات المرأة وفهمها لحال الحياة
وصار حال المرأة المسلمة في زماننا كحال الموظف "السَكللي" اللي مبيديش الشغل حقه بالرغم من قبوله بالشغلانة نفسها وكلما حدثناه عن إتقان العمل يحتج علينا بقوله: (على أد فلوسهم ياشيخ)
⭐
فعلى المرأة المسلم ألا يشغلها أبدًا كل هذا، وأن تكون له كفاطمة وإن لم يكن عَليًا، وألا تنشغل بالمشغبات التي تدور من حولها، وإن أرادت أن تعلم هل الزوج مُقصر أم لا ألا تنفك عن أهل العلم الناصحين لها وله
#بهذا_تنصلح_البيوت
🏡
#تصحيح_مفاهيم_الزواج
❤
✍️
بارك الله في الأخت الفاضلة ورزقها سعادة الدارين
هذا هو المستوى الذي ينبغي على المسلمة أن تبلغه، تقف عند كل نصيحة وتتعلم لتُصلح ما قد أُفسِدَ من فطرتها
الأصل في فطرة المرأة خضوعها لزوجها، وعيشها تحت قوامته وولايته عليها، لذا فقد حرصت الشريعة على أن تكون المرأة دومًا تحت ولي يتولى شئونها ويرعاها
قال تعالى: {الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَىٰ بَعْضٍ وَبِمَا أَنفَقُوا مِنْ أَمْوَالِهِمْ}
لذا، فقد حرصت الفكرة النسـ.ـوية منذ نشأتها على هدم هذا الأصل، وإظهار أن الخضوع للقَيم فيه شيء من المذلة والإنكسار، فبدأوا في بث سمومهم في عقول النساء لتنفلت المسلمة عن إطار حمايتها
فانهدمت الأسرة لما خرج الصغير عن گنَف الكبير الذي يحتويه
وبضرب هذا المثال يتبين لكم الأمر جليًا
👇
يمكنك استيعاب هذا الخضوع في حياة البنت في ظل گنَف والدها، لا أعتقد أحدها يعترض على هذا
البنت اللي بتشوف نفسها على والدها، أو حاطه راسها براس والدها، أو بتعتبر نفسها نِد له، دي في المجتمع تسمي "قليلة الرباية"
هذا الولي "الأب" تَم السكوت عن الخضوع له بعض الشيء لتمرير مصيبة أخرى في عقل الفتاة
وهي...(الأب مش هو الزوج)
الخضوع للأب محدش بيعترض عليه، لكن الزوج (لأ)
علشان عدم الخضوع للزوج سيتسبب في هدم الأسرة بالكامل بعد تزويجها
💔
وبننسى إن الأب هو نفسه اللي سلم الولاية للزوج بمجرد العقد فصار الزوج هو القوام الجديد وأمره عليها أَوجَب من أمر والدها (الولي السابق)
الواجب على المسلمة أن تعي هذا المخطط جيدًا، وأن ترتمي دومًا تحت گنَف سيدها الزوج️، وتخضع له ظاهرًا وباطنًا، وما كان في حق والدها سيكون في حق زوجها وأكثر
وأن هذا الخضوع قد يصل لأعلى درجاته لو تأملنا كلام النبي ﷺ الذي قال (لو كنتُ آمرًا أحدًا أن يسجدَ لأحدٍ، لأمرتُ المرأةَ أن تسجدَ لزوجِها؛ لعِظَمِ حقِّهِ عليها)[صححه الألباني]
فأي مذلة تأتي للمسلمة من انصياعها لأوامر الله ورسوله؟
الموضوع عاوز منك 1/ إستعانة بالله 2/ قراءة الكثير والكثير عن فضل طاعة الزوج 3/ التوبة من كل فكرة نسوية تهدم هذه الأصول
#فإنما_هو_جنتك_ونارك
🔥
#تصحيح_مفاهيم_الزواج
_ولو أنا وغيري مخرجناش للتعليم المختلط ونزلنا ميادين العمل، هنجيب منين الطبيبة المسلمة اللي هتكشف على نساء المسلمين ؟
=حضرتك بتشتغلي إيه؟
_طبيبة بيطري
✍️
فكرة إنك تنتظر مني أديك خطة علشان بيتك اللي فيه زوجة عاملة يستقيم، فكرة خيالية مش موجودة في الواقع مطلقًا
فمتحاولش تضحك على نفسك في محاولات التوفيق علشان إنت نفسك كرجل متقدرش تقوم بالدورين المطلوبين منها في نفس الوقت علشان تحقيق استقرارك
✍️
️بعد حوالي 20 عام من الزواج، الزوجة مبقتش عارفه تتعامل إزاي مع زوجها
عرضت عليا المشكلة في حضور واحد من إخواتها اللي كان جاي معاها گمَحرَم
دار بيني وبين الزوجة هذا الحوار
👇
_زوجي ياشيخ لما اتزوجني كان على أده خالص، وقفت جنبه والحمد لله دلوقتي بقى وضعه أحسن كتير من الأول، بقى عندنا أولاد وأولادنا كبروا ولولا وجود الأولاد أنا كنت اتطلقت من اللي بيعمله
=هو بيعمل إيه؟
_بقيت كل شوية يقع في إيدي حوار لعلاقات نسائية بيعملها، آخر حاجة كنت اكتشفت إنه متزوج عليا من كام سنة في السر ومخلف منها عيلين، هو مكنش كدا خالص
=وانتي عملتي إيه؟
_طلبت منه أروح أزورها معاه، وبالفعل رحت وقعدت معاها في بيتها علشان أعرف هو متزوجها ليه؟
=رحتي معاه زرتيها؟
_أنا شخصيتي قوية ومش بحب حد يكسرني، حاولت أكون متماسكة، لدرجة إني قلتلها انتي لو فاكره إني هخليه يطلقك تبقي غلطانة، لا أبدًا، أنا مش هعمل كدا، واكتفيت بالزيارة دي
اللي خلاني اتعجب منه يتزوج واحدة زي دي مُطلقة قبل كدا كذا مرة ليه ويسيبني!
=واتعاملتي معاه إزاي بعدها؟
_كنت بحاول أظهر إني متماسكة ومش شاغلني أي حاجة، بس أنا مش كدا خالص، وفي نفس الوقت قرار الطلاق مش بفكر فيه، العجيب إنه لسه بيتكلم مع نساء تاني مكتفاش بالزواج
زوج زي دا ممكن حاله ينصلح؟
=هو الزوج دا بيحبك؟ يعني ليه فكرة الطلاق مش مطروحة عنده هو كمان، هل علشان العيال؟
_بيحبني جدًا، وبيتمنى يرضيني بأي حاجة، وفعلًا أنا مش هنكر إني بحبه
=انتي وضعك إيه في معاملته؟
_بالرغم من كل دا أنا بطيعه، مبخرجش من البيت بغير إذنه ودايمًا أسمع كلامه
=بس غالبًا زوجك مش عاوز واحدة "مطيعة" أكثر من حاجته لواحدة "خاضعة"
_خاضعة؟ ما هو أنا بقولك إني بطيعه
=ياأختي، فكرة إنك تتكلمي عن قوة شخصيتك اللي بتخليكي تعملي حاجات ممكن نساء كتير ميعملوهاش ودي حاجة بالطبع محسوبة ليكي، فكرة تخليني أتخيل شوية حوارات في بيتك انتي مش واخده بالك منها في التعامل مع زوج "رَجُل" في المقام الأول
يعني مثلًا، أنا معتقد إنك انتي الوحيدة اللي زوجك لما يحب يفرض شخصيته بيشوف في عينيكي نظرة بتقول له من غير ما تشعري "هو إنت ناسي إنت كنت إيه وبقيت إيه"؟
دا طبعًا لو كنتي مبتقوليهاش بلسانك أساسًا
_فعلًا منكرش إن ساعات بيحصل مني كدا، إحنا ستات ومش كل حالنا بيكون واحد
=تمام، يبقى فكرة إنك مطيعة بتبوظها فكرة تانيه ظاهرة عندك وهي إنك زوجة " غير خاضعة" للزوج
الزوج في الحالة دي بقى يروح يعوض الخضوع برا البيت
يمشي مع دي عياذًا بالله ويتزوج دي، وكل دول بيمثلوا قدامه الخضوع لإنهم شافوه عند آخر محطة بس في حياته
_هما فعلًا بيعملوا كدا معاه، وأنا مستغربه
=متستغربيش، دي علاقات وإن ارتقت للزواج فهو زواج مصلحة في المقام الأول
_طيب وهو كدا صح؟
=ياأختي انتي بتتكلمي مع واحد انتي نفسك مكنتيش تقدري تتواصلي معاه غير بوجود أخوكي ده، كل دي بالنسبالي جرائم وموبقات، بس انتي دلوقتي عاوزه تفهمي اللي بيحصل وللا عاوزاني أكلم زوجك اللي مش قاعد معانا في الحرام والحلال؟
_لا طبعًا، فاهمه حضرتك، بس هو كدا مش مريض؟
=أيوا طبعًا، زوجك عنده "عُقدة نَقص"، هو بقى شايف نفسه شويتين لما ربنا أكرمه ووضعه بقى كويس، ونفسه في إشباع رغبة الست اللي تشوفه عند آخر محطة
_وأنا الست اللي هتطالبني بكدا؟
=أنا مش بطالبك بشيء، أنا بس هوضحلك نفسية الزوج، وانتي تقرري تعملي إيه، انتي قاعده دلوقتي علشان تكملي وللا تتطلقي؟
_لأ، قاعده علشان أكمل
=لو واحد قعد معايا وقاللي" زوجتي رغاية ياشيخ" بتتكلم كتير وزهقتني في عيشتي
تفتكري لو عاوز يكمل معاها ممكن أنصحه بإيه؟
_هتنصحه يتكلم معاها وييجي على نفسه
=تمام، يبقى علشان الزوج هيكمل بقى واجب عليه يعف زوجته في حاجة كلنا مش بنحبها زي "الرغي"، ولو متكلمش معاها ممكن تقع في الحرام لإنها بشر، ودا طبعًا مش عذر ليها
_مظبوط
=يبقى مفيش غير حل واحد قدامك، إنك تعفي زوجك بالخضوع
_طب أعملها إزاي؟
=هتجربي الطريقة دي كام شهر وتبلغيني بالنتيجة
زوجك في موقف معين هيحاول يشخط كدا وينطر ويظهر قوة شخصيته قدامك
انتي في العادي كنتي بتقفي قصاده والموضوع مبياخدش كام ثانية، صح؟
الزوجة ضحكت وقالتلي (حضرتك فهمت كل الكواليس دي إزاي)
😂
قلتلها: (ياأختي انتي مش قاعده مع شيخ الجامع)
😂
أخوها رد وقاللي: (طب وهي هتعمل إيه؟)
قلتله: (بدل ما تقف قصاده هتحاول تخصع لزوجها وتعمل خايفه وتقول له اللي تشوفه بس متزعقش ياحبيبي، أنا مقدرش أتعداك)
قاللي: (وهو ساعتها هيفهمها إيه؟)
قلتله: (الزوجة متركزش مع زوجها هيفهمها إيه لإنها بتعامل ربنا في المقام الأول مش الزوج)
قاللي: (طب وكدا مش هيسوق فيها؟)
قلتله: (أختك لو قعدت 10 سنين تمثل الدور دا وعاوزه ترجع لنقطة الصفر تاني هتقدر متقلقش، بس إنت بقى شوف الزوج دا هيبقى عامل إزاي)
أخوها بص لها وقال: (على فكرة كلام الشيخ غالبًا هينجح مع زوجك بنسبة 70 ٪)