"من أنا؟" - Ahmed Yaser Roza

ليالي السفر الطويلة..

مسـاء الخير. .
سلسلة: "دليلك إلى طلاق ناجح" متاحة حاليًا كاملة على يوتيوب.
السلسلة 4 محاضـرات:
- المحاضـرة الأولى، محاضـرة مكنش متحضر إنها تدخل في السلسلة، لكـن هي دخلت معانا بعد شوية كلام مع الناس، وهي بعنوان: ما الذي يؤدي حقًا إلى إنجاح الزواج، بنتكلم فيها عن الصداقة، والزواج، وكيف يمكن تأسيس العلاقة ابتداءً.
- المحاضـرة من الثانية إلى الرابعة، كلهم في كيف يمكننا التنبؤ بالطلاق.
المحاضـرة الثانية، هي المحاضـرة اللي فيها المفهوم الأساسي اللي كان نفسي يدخل كل بيت، ويكون متاح للناس تتعرف عليه، واحد من أهم المفاهيم اللي ممكن تغير حياة الناس، وده علشـان هو منتشر بشكل مرعب جوا بيوتنا كلنا "فرسان الهلاك الأربعة"، أو الغزاة الأربعة زي ما ترجمته د. شاهندة.
إزاي النقد، في نهاية المطاف بيودينا إلى ازدراء الآخر، وإزاي الازدراء والنقد بيوصلونا للدفاعية، وإزاي كل ده بيخلي طرف يتجنب الطرف الآخر، ونبدأ مماطلة النهاية، لحد ما الموسيقى تختفي لوحدها في نهاية المطاف.
- المحاضـرة الثالثة، هي لم لكل اللي اتقال، لكـنها في حديث طويل شوية، عن مسألة الخيـانة، وفيها توسيع للمساحة دي بشكل أو بآخر، واتكلمنا فيها عن القيم، والاحتياجات، وإزاي الصراع الفتاك ده قد يودي بينا جميعًا إلى حتة منقدرش نتخيل إننا ممكن نكون فيها.
- ثم المحاضـرة الأخيرة، بنستعرض فيها باقي أشكال التنبؤ بالطلاق، لكـن كمان، المحاضـرة بعنوان: "نحو رؤية أكثر إنسـانية للرجال"، بنتكلم فيها عن الغمر العاطفي، والتجنب، وليه صعب على الرجالة احتمال الخلافات الزوجية، وإزاي المشـاعر بتأثر في أجسـاد الرجالة، بشكل مختلف عن الستات، وإزاي عدم تفهم كل طرف للآخر بيودي بالبيوت في النهاية.
المحاضـرات دي أرهقتني جدًا جدًا، وعدد ساعاتها كتير، يمكن في أجزاء مهمة، أثيرت في النقاش مع الحاضرين، لكـن الأساسيات كلها تقريبًا موجودة في الأربع محاضـرات. .
كعادة كل شغلي اللي بقدمه هنا. . الهدف هو "البيت".
أيًا ما كان الإطار اللي بنتكلم فيه، تربوي، نفسي، أو غيره. .
كل الحديث الواسع عن إساءات الطفولة، وكيف تنشأ الاضطرابات النفسية، وغيره، له هدف واحد. . الحفاظ على العيال : ) كل العيال، من أول صفر لحد 100 سنة.
المحاضـرات دي، وقناة اليوتيوب كاملة، هي صدقة لضي بشكل أساسي، ثم لباقي الناس
ربنا ينفع بيها يارب ويرزقنا الخير.

صباح الخيـر. .
النهاردة، السـاعة 1 ونصف تقريبًا (في حدودها)، بعد صلاة الجمعة، المحاضـرة الأخيرة في "دليلك لطلاق ناجح".
هنتكلم النهاردة عن:
- إزاي "الغمر العاطفي" بيقتل العلاقة الزوجية.
- لغة الجسد ودورها في التدليل إننا أقرب للطلاق.
- الرجالة ليه؟ ليه الرجالة ردود فعلهم على الأشيـاء فيها قدر كبير من التجنب.
- محاولات الإصلاح الفاشلة وأثرها في الطلاق.
- أخيرًا الذكريات السيئة، ودورها في إحداث الطلاق.
المحاضـرة مهمة للرجالة - مش بس للستات، فلو أي راجل حابب يحب طريقته في الخلاف، ربما تكون المحاضرة دي مدخل جيد.
شكرًا - اللينك هينزل على تليجرام، وهنا.

إن شاء الله، النهاردة، الساعة ٥ ونصف السيشن الأخيرة في دليلك لطلاق ناجح، هنراجع، ونكمل، ولو في فرصة لأسئلة هناخدها إن شاء الله، هنزل لينك الزوم قبلها علطول.
الحاضر يعلم الغائب
♥️