Anon

واحد من أصعب الدروس اللي بتتعلمها لما تكبر ، هو إنك لازم تظهر وتواجه وتعمل اللي عليك مهما كان اللي شايله جواك ، اعمله وأنت حزين اعمله وأنت موجوع اعمله وأنت هلكان.. الحياه مش هتقف عشان تصعب عليها الحياه مكملة عشان كدا لازم انت كمان تكمل .

متبعتش الرسالة اللي عقلك بيلح عليك تبعتها في أوقات ضعفك، متحاولش ترجَّع حاجات ماتت، اللي مات مبيحياش، واللي فارقته من زمن حتى لو رجعتله دلوقتي فجأة، هتلاقي نفسك قُدّام شخص غريب متعرفوش، أنت اتغيرت وهو اتغيّر، وهتفضل تدور على شخص مبقاش موجود، سراب ملوش وجود غير في الماضي وخيالك؛ أصل صعب أوي نفترق سنين ونرجع عادي زي ما كُنّا، ولا حتى قريب من اللي كُنّا عليه.

‏في الأول هتبقى فاكر إن الحياة هَتُقف بعد الخُسارة اللي هتعيشها أو بعد ما تفارق شخصِِ ما، وهتفضل مُقتنع بالنظرية دي لغاية ما تلاقي يوم بيجيب التاني وشهر بيجُر التاني والحياة بتمشي وإنتَ مُجبر تمشي معاها، ومع أول عوض من ربنا ليك هتتجاوز أزمتك النفسية وهتفهم ساعتها إن عُمرها ما بتُقف على حد.
سحلة الحياة قادرة تنسيك اللي ما بيتنسيش .

أخدت وقت طويل عشان أفهم إن مش كل القصص اللي بنحلم بيها بتكمل، وإن فيه ووشوش بتدخل حياتنا مش عشان تفضل، لكن عشان تغير فينا حاجة وتمشي ، فيه اللي بيجي يعلمنا يعني إيه حنية، وفيه اللي بيجي يفكرنا بتمن تنازلنا عن نفسنا... عرفت في الآخر إن الفقد مش نهاية، ده باب بيفتح لينا طريق لنضج مكناش هنوصله من غير كسرة صغيرة في الآخر.. احنا مش محتاجين الكل يفضل، بس محتاجين نوصل لمرحلة الاكتفاء بالذات.

‏لو حد حب يقرب منك، وانت قابل ده .. ياريت متصعبهاش عليه، وده لمصلحتك انت ، لانه لو وصل مستنزف مش هيلاقي حاجة يقدمهالك، لان طاقته خلصت في رحلة الوصول، وبعدها هتقول اتمسكن لحد ما اتمكن وانت مش مدرك ان انت السبب وطاقته المهدرة دي كانت كلها ليك .

في حضور الشخص المناسب والإختيار الصح ، هتعرف وقتها انك رغااي اووي ، وسكوتك مكنش غير غربه وسط اللي حواليك ، هتعرف وقتها انك جواك عاطفه وحنيه تملي بيها الارض ، وكنت محافظ عليها للشخص الصح ، وانك حنين ومش قاسي زي اللي كنت عليها ، علشان بس ده حبك بجد وعرف يطلع كل الحلو اللي جواك

‏كل حاجه وارده تحصل من الشخص اللي ف حياتك.
وهنا أنت لازم تأقلم نفسك إنه مش بالضروره يكون نفس دماغك بالملي، أو نفس مشاعرك إنه يبقي فاهمك طول الوقت، ف عشان كدا متبقاش شخص بيعطي اكتر من الازم عشان متتصدمش من رده الفعل. طول ما مشاعرك هادية ورد فعلك هادي هتقدر تعيش حياتك بشكل ميصدمكش .

لو الغلطة تتعدّى عديها، لو المُشكلة ما تستاهلش بلاش تكبّرها، لو اللي قُدّامك اعتذر ما تسوقش فيها، هوّن يتهوّن عليك .. الحياة مش راحمة حد، والروتين والضغوطات مش سايبين حد في حاله فبلاش إحنا كمان نكمّل على بعض. في جُملة عظيمة بتقول: "بلاش الغلطة تمحي المحبّة، خلّي المحبّة تمحي الغلطة"

من ضمن المشاعر اللي بعتبرها سخيفة وقاسية أنك تبقي ملاحظ تغيير في علاقتك مع شخص عزيز عليك ومتبقاش قادر تلاقي سبب ، كل الحاجات عاديه قدامك ، مافيش مشكله ، مافيش ازمه قد تبدو تمام بس أنت حاسس أن في حاجه غلط

القلوب دايمًا بتحس، مهما اللي قُدامك اِتلوّن وعمل نفسه حبيب وصديق وأكتر حد بيحب الخير ليك .. قلبك هيكشفه، قلبك هيقرى كُل اللي جواه، سواء كان حُب أو كُره، طيبة وقلب أبيض ولا حِقد وغيرة، تقدر تضحك على أي حد إلا القلوب.
القلوب دايمًا بينها مراسيل، واللي ما بيخرجش من قلبكو مُستحيل يدخُل قلبنا.