BnSamy

*️⃣
إنت عايز نظام يعرف يقفش التهرب وغسيل الأموال والفساد، لكن مش متخيل إن نفس النظام لما يتعمل هيقدر يبص على دخلك وإنفاقك ويقوللك: معلش، الحساب هنا مش راكب. عايز كل حاجة Digital لما الـDigital يسهل عليك حياتك، لكن أول ما الـDigital يخلي المنظومة تعرف إنت دخلت كام وصرفت كام، تقول إيه ده هما مالهم؟
⬅️
فإحنا في الآخر عايزين حاجة مش موجودة. عايزين حياة الماضي ومزايا الكوسة، ومزايا المستقبل والنظام، الاتنين مع بعض، من غير عيوب أي واحد فيهم ومن غير ما ندفع أي cost.
*️⃣
عايزين النظام ييجي يشيل كل عيوب الفوضى، لكن يسيبلنا كل المزايا اللي إحنا خدناها من الفوضى. عايزين قوانين، بس الاستثناء بتاعنا يفضل. عايزين لوائح، بس لما اللائحة تضايقني أنا تبقى بيروقراطية. عايزين مكافحة واسطة، بس الواسطة بتاعتي تفضل شغالة.
*️⃣
وده مش معناه إن أي قانون الدولة تحطه يبقى صح، ولا إن أي ضريبة تبقى عادلة، ولا إن المواطن ما يحاسبش الدولة على خدماتها وإنفاقها. بالعكس حاسبها وناقشها واعترض على القانون الغلط والضريبة الغلط، لكن دي حتة تانية خالص، مش دي اللي أنا بتكلم فيها.
⬅️
اللي أنا بتكلم فيه إن إحنا كلنا بنقول إن إحنا عايزين النظام، لكن إحنا فعليا مش متخيلين تكلفة النظام.
*️⃣
النظام ليه تكلفة، اللوائح ليها تكلفة، القانون ليه تكلفة. ومش تكلفة فلوس بس، تكلفة إن حاجات كنت بتعرف تعملها مش هتعرف تعملها، وإن استثناءات كنت مستفيد منها هتختفي، وإن القانون اللي إنت عايزه يتطبق على الناس هيتطبق عليك إنت كمان.
*️⃣
فالسؤال في الآخر بسيط: هل إنت فعلا عايز النظام؟ هل إنت فعلا عايز اللوائح؟ هل إنت فعلا عايز القوانين؟
⬅️
لو قلت آه، تمام... هل إنت مستعد تدفع التكلفة؟
وأسيبك مع مقولة بحبها:
Be careful what you wish for, you just might get it.

طيب أقولكم حاجة هتزعلكم مني عشان ضد التيار شوية؟
*️⃣
على مدى سنين طويلة إحنا عشنا وسط قدر كبير من الفوضى وعدم النظام والفساد، ومع الوقت الفوضى دي مبقتش بالنسبالنا مجرد عيوب، بالعكس، بقى فيها مزايا إحنا نفسنا بنستفيد منها. عدم وجود النظام بيديك مساحة حركة أوسع، يخليك تتجنب شوية إجراءات، تخلص حاجات أسرع، تعدي حاجات المفروض ما تتعديش، ومع الوقت بتتعود على ده وبتعتبره الطبيعي.
*️⃣
بس بييجي وقت وبندفع تمن الفوضى دي، ولما نيجي ندفع التمن نقف نقول: إيه ده؟ فين النظام؟ إزاي ده حصل؟ وإحنا أصلا طول الوقت قاعدين نردد إن إحنا عايزين نظام، عايزين لوائح، عايزين قوانين، عايزين نبقى زي الدول المحترمة وكل حاجة ماشية بسيستم.
⬅️
بس السؤال بقى بجد، وعايزك تسأل نفسك السؤال ده بجد: هو إحنا فعلا عايزين كده؟ ولا إحنا عايزين بس مزايا النظام، من غير ما ندفع تمن النظام؟
*️⃣
يعني مثلا إنت رايح وسط البلد، الدنيا زحمة ومفيش ركنة، تلاقي سايس حاجز حتة ويطلعلك ركنة، تديله 20 جنيه ويركنك يا سيدي. أو إنت ساكن في منطقة زحمة، تنزل تحط طوبتين قدام البيت وتحجز الركنة بتاعتك. هو ده قانوني؟ إنت اشتريت الشارع؟ لأ، إنت اشتريت شقتك، إنما خارج جدران شقتك مالكش سلطة، مفيش حاجة اسمها دي الركنة بتاعتي عشان قدام بيتي، بس دي من الفوضى.
*️⃣
لو فيه سيستم حقيقي، السايس ده مش هيبقى موجود بالشكل ده، والطوبتين اللي تحت بيتك مش هيبقوا موجودين، والركنة مش هتفضل مستنياك. الركنات عليها ناس وإنت وحظك. والسايس اللي إنت بتشتمه عشان بيبلطج على الشارع، هو نفسه اللي إنت مبسوط بيه لما تنزل وسط البلد في عز الحر والزحمة ويطلعلك ركنة، ويمكن يسيبك صف تاني وياخد باله من العربية.
⬅️
يعني إنت هنا استفدت بالفلوس من الفوضى. فإنت عايز تشيل الفوضى، لكن الركنة اللي الفوضى كانت موفرهالك تفضل موجودة
😄
*️⃣
شوف بقى موضوع البطايق. إحنا متعودين إن صورة البطاقة بتمشي حاجات كتير جدا. جاي لك جواب من البنك، فيزا، شحنة، ورقة، أي حاجة، تسيب البطاقة مع حد يستلمهالك، ولا حتى تبعتله صورة البطاقة على واتساب وخلاص والدنيا بتمشي. ده مخالف للإجراءات أصلا، بس إحنا اتعودنا إنه بيمشي، وبصراحة ده مريحنا.
*️⃣
المشكلة إن نفس ثقافة إن صورة البطاقة "تمشي"، خلت ناس برضه تستخدم صورة البطاقة وتسجل خطوط تليفونات باسم ناس تانية، وتعمل معاملات باسم ناس تانية، والدنيا برضه "تمشي". وأول ما المشكلة تحصل نقول: إيه ده؟ فين النظام؟ إزاي حد قدر يعمل كده؟ حلو أوي، تعالى بقى نقفل الموضوع ده فعلا.
*️⃣
يا جدعان من النهاردة مفيش واحد يستخدم خط تليفون مش باسمه. هاه، تحبوا نعمل كده؟ هتطلعلك كمية ناس تقولك: لأ أصل ده خط مراتي، أصل ده باسم أبويا، أصل ده باسم أخويا، أصل دي أختي، أصل ده ابن عمي، أصل ده صاحبي، ووو؟
⬅️
من الآخر إنت عايز الفوضى، بس عايزها فوضى منظمة
😄
عايز مزايا التسيب تفضل موجودة، لكن الأضرار اللي ناتجة عن التسيب تتمنع. إنت مش هتعرف تعمل نظام يقولك: بص يا عم، أنا هسمح لك تعمل الحاجة الغلط عشان إنت بس حصريا، وباقي الناس لأ، أصل إنت نيتك كويسة، لكن همنع الشخص التاني عشان نيته وحشة.
*️⃣
نفس الحكاية في الهوية الرقمية. إحنا عايزين هوية رقمية، عايزين أعمل معاملاتي وأنا قاعد في البيت، أنقل ملكية، أأكد عملية، أخلص ورق، وكل حاجة بزرار. حلو أوي، أبسط أساس للمنظومة دي إن الدولة تعرف إن الشخص اللي بيأكد العملية ده هو إنت فعلا، وإن وسيلة التأكيد مرتبطة بيك إنت، طيب وإنت عندك ناس كتير جدا بتستخدم أرقام تليفونات مش باسمها، وفي ناس أصلا معندهاش رقم مسجل باسمها، هنعملها إزاي؟ تقول للناس لازم الخط يبقى باسمك، يقولك لأ، ليه التعقيد ده، ده قريبي؟ طب يا ابني إنت عايز الهوية الرقمية تشتغل إزاي؟
😄
*️⃣
إنت عايز مزايا النظام الرقمي: أمان، سرعة، معاملات من البيت، تأكيد هوية، حماية من التزوير. وفي نفس الوقت عايز تفضل محتفظ بمزايا المنظومة القديمة، إن الخط يبقى باسم أي حد والدنيا ماشية. الاتنين مع بعض مش هيركبوا.
*️⃣
تعالى بقى نتكلم في أكتر حاجة مفيش تقريبا واحد على كوكب الأرض بيحبها: الضرايب
😄
كلنا بنقول نفس الجملة: يا جماعة إحنا عايزين الضرايب تتطبق على الكل، محدش يتهرب، محدش يخبي دخل، وكل واحد يدفع اللي عليه. جميل جدا. بس فيه مشكلة صغيرة: مين "الكل" اللي في دماغنا؟
*️⃣
الكل في بالنا هو الشركات الكبيرة، رجال الأعمال، التجار، الممثلين، الناس اللي فوق يعني
😄
طب المواطن العادي؟!! إيه ده، وأنا أدفع ضرايب ليه؟ طيب هو إنت عندك شقة ومأجرها وبتاخد إيجار كل شهر، فين الضرايب اللي إنت دفعتها على الدخل ده؟ إنت اشتغلت سمسار وجبت لواحد شقة وخدت منه شهر، فين الضرايب اللي إنت دفعتها على الشهر اللي أخدته؟
*️⃣
إنت مأجر شاليه في الساحل، فين الضرايب اللي اتدفعت على الإيجار ده؟ واحد جاب شوية حاجات من موقع صيني ولا من العتبة وقعد يبيعهم على جروبات فيسبوك ويكسب منهم، تقول له ده نشاط تجاري، يقولك إيه ده إزاي؟ ده أنا حاجات بسيطة، معاملاتي صغيرة قوي.
⬅️
فين الضرايب يا برنس؟
😄
إحنا عايزين الضرايب تتطبق على "الكل"، بس الكل هنا معناها الناس التانية، مش أنا.
*️⃣
طب يا سلام، التاجر الكبير يقسم شغله عشر شركات صغيرة، وكل واحدة تقول أنا معاملاتي صغيرة. يعني في الآخر لازم يبقى فيه قواعد، والقواعد مش هتتبني على إن كل واحد شايف نفسه صغير أو إن معاملته دي مش مهمة أو إنه ما كانش ناوي أصلا يعمل نشاط.
*️⃣
وطبعًا أنا عارف إن فيه حد هيقوللي: بس يا محمد، أنا ما باخدش خدمات مقابل الضرايب دي، يبقى أنا أدفعها ليه أصلا؟ آه، هنا بقى فيه مشكلة جوهرية في فهم الضريبة نفسها. الضريبة مش تمن خدمة بتشتريها من الدولة، يعني الموضوع مش: السلام عليكم، أنا دفعت السنة دي 20 ألف جنيه ضرايب، يلا وروني بقى الخدمات اللي أنا أخدتها قصاد الـ20 ألف جنيه
😄
*️⃣
الضرايب من مظاهر إن الدولة عندها سلطة على المساحة اللي بتحكمها. ارجع 500 سنة لورا، ارجع 3000 سنة لورا، هتلاقي حاكم أو دولة بتحكم مساحة من الأرض، وبتفرض على الناس اللي عايشة وبتعمل نشاط جواها ضرايب أو جباية بشكل أو بآخر. الدولة دي بقى كويسة ولا وحشة، دي حكاية تانية.
*️⃣
دولة تستخدم الفلوس في طرق وري ومرافق وخدمات، ودولة تانية تلمها لصالح الإمبراطور، ودولة تالتة تعمل شوية من ده وشوية من ده. لكن الضريبة عمرها ما كانت فاتورة بتقول إنت دفعت 20 ألف، يبقى لازم تاخد 20 ألف خدمات بنفسك.
*️⃣
في الدول الحديثة بقى، ومع الديمقراطية والمحاسبة، المواطن بيقول للدولة: تمام، إنت خدتي مني الضريبة، معلش بقى وريني صرفتيها في إيه، وعايز تعليم وصحة وطرق وخدمات، وعايز أحاسبك لو صرفتيها غلط. لكن برضه مفيش علاقة واحد لواحد بين اللي إنت دفعته وبين الخدمة اللي وصلتلك إنت شخصيا.
*️⃣
ممكن واحد في أسوان يدفع ضرايب، والدولة السنة دي تبني كباري في القاهرة. الراجل في أسوان مش هيقول أنا ما اتبناش كوبري تحت بيتي السنة دي، رجعولي ضرايبي
😄
ومن حقه طبعا يسأل الدولة: ليه صرفتي هنا وما صرفتيش هنا؟ وهل التوزيع عادل؟ وهل أولوياتك صح؟ لكن دي خناقة مختلفة. لكن في النهاية يدفع.
⬅️
من حقك تحاسب الدولة على الضرايب، لكن مش معنى إن الخدمة اللي إنت شخصيا شايفها أقل من اللي دفعته إن الضريبة نفسها تبقى اختيارية.
*️⃣
ونفس الحكاية في الواسطة والمحسوبية. إحنا كلنا عايزين مكافحة الواسطة، عايزين محدش يدخل حد شغل عشان يعرف فلان، ولا حد يخلص ورقة عشان يعرف فلان، ولا حد ياخد دور حد. بس ابنك عايز يتنقل مدرسة؟ طب نشوف مين يعرف مين. الورقة هتاخد أسبوعين؟ كلم خالتك يمكن تعرف واحد يخليها 24 ساعة.
*️⃣
الواد عايز شغل؟ شوف عمه يعرف حد في الشركة. الطلب اترفض؟ طب نشوف مين يكلم مين. يعني إحنا عايزين نقضي على الواسطة، بس بعد ما نخلص طلبنا بالواسطة الأول
😄
لما واحد يخلص لغيري حاجة يبقى البلد كوسة، لما يخلصهالي أنا يبقى راجل خدوم وابن ناس.
⬅️
طب إنت عايز إيه بالظبط؟
*️⃣
أقولك حاجة، حتى في المدفوعات الرقمية نفس العقلية. تلاقي محل حاطط ماكينة فيزا، ييجي العميل يدفع يقوله هزود عليك 2%. تقوله طب ما تقول للناس مفيش فيزا أصلا. يقولك لأ، ما هم بيدفعوا الزيادة وبيشتروا. طب لو قلتله مفيش فيزا؟ يقولك فيه عميل مش هيشتري وهيمشي.
*️⃣
آه، يعني إنت لولا ماكينة الفيزا دي كان فيه عميل ممكن يمشي؟ آه. يبقى إنت استفدت من وجود ماكينة الفيزا؟ آه. بس مش عايز تدفع رسوم الاستفادة، اللي هي عمولة الفيزا. الماكينة جابتلك عميل كان ممكن ما يشتريش من عندك أصلا، لكن تكلفة الميزة دي إنت مش عايز تدفعها.
*️⃣
أنا مثلا أدخل محطة بنزين أقوله حط بألف جنيه، لو قالي الفيزا مش شغالة ممكن أقوله خلاص حط بـ200 جنيه. المحطة هنا خسرت بيع الـ800 جنيه الباقيين، مش عشان أنا ما كنتش محتاج بنزين، لكن عشان وسيلة الدفع اللي أنا عايزها مش موجودة.
*️⃣
أدخل سوبر ماركت وأشتري حاجات بـ5000 جنيه، أوصل للكاشير يقوللي الفيزا مش شغالة، ممكن جدا أسيب الحاجة وأمشي. صاحب السوبر ماركت كان ممكن يدفع مثلا 1.6% على العملية، يعني حوالي 80 جنيه، لكنه عشان يوفر الـ80 جنيه ممكن يخسر العملية كلها، وكان ممكن مثلا يكون مكسبه منها 500 جنيه.
⬅️
وهي دي العقلية بتاعتنا: إحنا عايزين الاستفادة من غير ما ندفع التمن. عايزين الميزة، لكن عايزينها مجانية.
*️⃣
ونفسها في فكرة النظام والرقمنة. إحنا عايزين الدولة تعمل سيستم، وكل حاجة تبقى Digital ومربوطة ببعضها. جميل جدا. طب خد بالك بقى إن السيستم ده ممكن يتقفشك بيه إنت كمان.
*️⃣
إنت بتقول للدولة إن دخلك السنوي كله 100 ألف جنيه، وفي نفس السنة اشتريت عربية، وخدت مراتك وعيالك وسافرت أسبوعين برا مصر، وروحت عمرة، وبتدفع مصاريف مدارس للعيال 300 ألف جنيه، وبتصرف وتصرف وتصرف. طب يا ابني الفلوس دي جات منين؟ مهو السيستم لو موجود في الدولة هيقفشك
😄

قبل يومين في بودكاست جديد نزل وهو ليه وضع خاص شويتين وغريب شوية
كلموني يوم الثلاثاء الماضي بتوع بودكاست بترولي (سعودي) اني اطلغ معاهم يوم الأربعاء مباشرة، اليوم كان مضغوط بين كشف عند دكتور صباحا ثم ميتنج مساءا فصورت بينهم
وسبحان الله أسرع بودكاست نزل، دا في بودكاست تاني مصوره مع حد بقالي شهر+ ولسه منزلش
فشوفوا البودكاست ولو حلو تمام ولو مش حلو فمعلش بقى راعوا الظروف الزمنية وغير الزمنية اللي كانت محيطة بالتصوير
https://youtu.be/g4Mi2ABvF6A?si=MHV-b22K_9bhKFwT

هو ليه احنا بنخاف من مخنا؟
*️⃣
لا يزال السؤال اللي بكتبه كل سنة مستمر، ليه بنخاف نواجهه مخنا، أي حد فينا عنده وقت فاضي هتلاقيه بيشوف شيء ما يعمله، في اللي يمسك موبايل، يفتح تليفزيون، يمسك كتاب، يقابل أصدقاء.. لكن كام واحد فينا يلاقي وقت فاضي فيقرر يقعد مع نفسه، يسرح بخياله في مخه ولا يجيب ورقة وقلم ويقعد يشخبط ويفكر... تقريباً محدش فينا بيعمل كده.
*️⃣
الموضوع دا شاغلني من سنين وكل ما بسأل حد ألاقي أجابة وتفسير مختلف يمكن أهمهم
1️⃣
ناس عندها بلاوي ومشاكل كثير، فلو قعدت مع نفسك هتقلب عليك المواجع وممكن تخش في احباط ذاتي واكتئاب، هتفتكر المشاكل والديون والعقبات والازمات، طيب ليه أقلب على نفسي المواجع. فالنوع دا خايف يقابل مخه ويقعد معاها على انفراد عشان مخه هيسحله
2️⃣
ناس مخها فاضي، اه في ناس كده، ناس حياتها كلها تفاهات ومخها مبرمج من سنين انه بيستقبل بس تفاهات من ريلز طريفه على مسلسلات على تيك توك، ناس كبيرة اه بس لو قولت لها ممكن تقعد تشرح لي بعمق موضوع ما هتلاقي مفيييش... فمخه من جوا خليط بين أماكن فراغ تام، وبين السيرك القومي... فدول لو قعدوا مع نفسهم مش هيلاقوا موضوع بجد يفكروا فيه، او المشكلة الأكبر هما ميعرفوش يعني ايه يفكروا أصلاً.
3️⃣
الفريق الثالث هو محبي ادخال البيانات، ناس عكس الفريق الثاني، وقتها كله قراءة او مشاهدة شيء مفيد، فهو أي وقت يلاقيه فاضي يقولك فرصة أخلص الكتاب الفلاني ولا اشوف الكورس ولا الوثائقي وووو... النوع دا عنده مشكلة وهي إنه مش مقتنع انه مفروض يقعد شوية يفكر، هو شايف انه لازم يفضل يدخل في داتا... يا عم اقعد شوية رتب افكارك واربط المواضيع ببعض، لالا معنديش وقت اضيعه، ورايا حاجات كثير.
*️⃣
وقبل ما حد يحب يتفلسف عليا، أنا من النوع الأول يا سيدي، انتا بقى من أنهي نوع... ومقصدش تفضح نفسك، لالا اعرف وضعك ايه مع مخك، بداية العلاج تبدأ بالاعتراف بالمرض. احنا معظمنا لو اتعزل لوحده زي حبس انفرادي بدون تقنية، العودة للطبيعة بس انفرادي، غالباً هيتجنن.
صباح الفل

بالنسبة لحوار المدرسة اللي ولي أمر لقى نفسه واخد قرض تمويل تعليم بـ700 ألف جنيه، وحسبما قيل إنه ممضاش شيء.
*️⃣
أنا دايماً بنصح إنك بشكل منتظم تعمل استعلام ائتماني i-Score من موقع مصر الرقمية، هيكلفك 105 جنيه و70 قرش بس تبقى متابع وضعك، ولو طلعت من الحالات النادرة اللي موظف بنك ولا جهة استغل إنك مش واخد بالك ولبسك في كارت، ولا حتى زي ولي الأمر ما بيقول لبس في قرض ميعرفوش، كله هيبان.
*️⃣
طبعاً أنا لو بفهم ماركتنج كنت هقولك شوف الفيديو وأحط لينك الفيديو القديم وقت ما نزلت الميزة، ولا أروح مصور فيديو وأقول إزاي تحمي نفسك من الخداع واكتشف لو لبسوك قرض والجو اللي يشجع الناس تفتح فيديوهات وتجيب مشاهدات، بس أنا بطيخة
🍉
مليش في الجو دا وبهتم إن اللي يشوف يكون عشان عاوز فعلاً يشوف، مش عشان أنا قرطسته بعناوين جرايد وشاهد قبل الحذف...
*️⃣
خش مصر الرقمية وشوف تقرير الاستعلام الائتماني، لو فيه حاجة متعرفهاش اشتكي، طبعاً لو قالك مفيش تقرير أصلاً فدا معناه إن محدش ملبسك، ولا حتى انتا عمرك لبست نفسك في قرض ولا فيزا ولا حاجة تقسيط.. تبقى كائن مثالي قوي
😁
.
⬅️
⬅️
توضيح هام: الاستعلام الذاتي مش بيضر الاي سكور، استعلام الجهات هو اللي بيضرك، لان الذاتي معناها بطمن لكن الشركات معناها ببحث عن قرض.

المركزي متوقع التضخم هيزيد
😭
😭
بهدوء كده امبارح بالليل نزلت فيديو تحليلي لتقرير المركزي الاحدث اللي البنك قال فيه انه متوقع يحصل ارتفاع مؤقت في التضخم حاليا ثم هينزل مرة تانية
طيب يا ترى كده رايحين لزيادة الفايدة؟ احتمال مش صغير للأسف
😭
شوف الفيديو
https://youtu.be/8PSs2G_NZfw

النهاردة البنك المركزي نزل تقرير السياسة النقدية للربع التاني من 2026.. وطبعا هتلاقي عشروميت خبر عنه في المواقع الاقتصادية لكن أكتر حاجة لفتت نظري في التقرير كله كانت حاجة اسمها "الأجر الحقيقي".
*️⃣
مش إنت طول الوقت بتقول إن مرتبك زاد، بس مش بيجيب زي زمان؟ وإن دخلك زاد كرقم، لكن قدرتك الشرائية قلت؟ المرة دي بقى عندي رقم رسمي من الدولة بيعبرلك عن الإحساس ده فعليا
😅
*️⃣
البنك المركزي عنده مؤشر اسمه "مؤشر الأجور الحقيقية"، واعتبر مستوى الأجر الحقيقي في سنة 2010 هو الـBase = 100 نقطة. أو سيبك من النقط يا سيدي واعتبر الدخل بيشتري 100 سلعة...
*️⃣
يعني ببساطة مش مهم مرتبك بقى كام جنيه.. المهم المرتب ده بعد ارتفاع الأسعار يقدر يشتري لك إيه. لأن مرتبك ممكن يزيد رقميا، لكن قيمته الحقيقية تقل. وفعليا دا اللي حصل من بعد 2010 مشوفناش الـ100 دي تاني
😭
😭
.
*️⃣
في مارس 2021 المؤشر كان حوالي 83 نقطة، وفي مارس 2022 نزل لحوالي 79 نقطة. بعدها حصلت الضربة الأكبر.. مارس 2023 نزل المؤشر لحوالي 67 نقطة، وفي مارس 2024 وصل لحوالي 65 نقطة تقريبا ودي أقل نقطة للمؤشر
🟰
أسوأ وضع للأجور.
*️⃣
يعني القوة الشرائية للأجر كانت بتتآكل سنة بعد سنة... المهم التقرير قال من بعد مارس 2024 (التعويم) بدأ يحصل تعافي..
*️⃣
في مارس 2025 رجع المؤشر لحوالي 72 نقطة وعشان كده كتب التقرير وقال حصل تحسن 11% في مارس 2025 مقارنة مع مارس 2024... ثم في مارس 2026 وصل تقريبا لـ73 نقطة. يعني زيادة 1.3% في الأجر الحقيقي.
*️⃣
يعني آه.. الأجور الحقيقية اتحسنت عن القاع. لكن لسه ما رجعتش لمستويات ما قبل 2023.
⬅️
ودي أهم نقطة في الموضوع كله.. لما البنك المركزي يقول إن الأجور الحقيقية ارتفعت، ده مش معناه إن المواطن رجع لنفس مستوى معيشته القديم.
*️⃣
إحنا وقعنا جامد، وبعدها بدأنا نطلع.. لكن لسه أقل من 2022، وأقل من 2021، وأقل بوضوح من سنة الأساس 2010.
*️⃣
يعني مثلا ممكن تكون زمان بتقبض 1000 جنيه، ودلوقتي بتقبض 5000 أو 7000 جنيه. لكن فعليا الـ1000 جنيه وقتها كانت بتشتري لك حاجات أكتر من اللي الـ5000 أو الـ7000 جنيه بيشتروهالك دلوقتي.
*️⃣
وده بالظبط معنى "الأجر الحقيقي". مش مرتبك كام.. مرتبك يجيب إيه. والأهم إن البنك المركزي نفسه وصف اللي حصل مؤخرا بأنه "تعافي جزئي وتدريجي في القوة الشرائية".
*️⃣
يعني إحنا اتحسنا عن القاع.. لكن لسه ما رجعناش للمكان اللي كنا فيه قبل موجة التضخم الكبيرة.
*️⃣
بالمناسبة التقرير قال إن السبب إن التضخم كان بيزيد أسرع من نمو الأجور لحد يونيو 2024.
*️⃣
ملحوظة مهمة.. الأرقام اللي فوق تقريبية، لأن البنك المركزي حاطط مؤشر الأجور الحقيقية في Graph مش جدول أرقام. فأنا بقدر القيم من الرسم نفسه، لكن الاتجاه اللي البنك المركزي بيقوله واضح وهو: تحسن حصل.. لكن القوة الشرائية لسه أقل من مستويات ما قبل 2023.
⬅️
⬅️
⬅️
⬅️
بكرة بقى هنزل فيديو كامل عن تقرير البنك المركزي الجديد.. والسؤال اللي أنا شايفه أهم من كل الأرقام اللي في التقرير:
⬅️
يا ترى إحنا داخلين الفترة الجاية على رفع فايدة تاني في مصر؟ ولا المركزي يقدر يستحمل موجة التضخم الجاية، يفضل يثبت، وبعدها يرجع يكمل خفض؟
هنشوف بكرة
👀
(الفيديو اتصور وليه التظبيط)

بمناسبة البنت اللي عملت محضر لابوها في القسم عشان أبوها منعها تروح فرح صاحبتها
*️⃣
افتكرت قصة لصديقي الانتيم ومش هعمله مينشن عشان الفضايح بس زمان يمكن من أكثر 20 سنة السفارة بتاعة بلده الثاني (مزودج الجنسية ب جنسية أوروبية) كلمته تطمن عليه بصفته من رعايا الدولة وكمان قاصر يعني عايش مع والده بمصر...
*️⃣
المهم قالوا له هو والدك بيعاملك كويس؟ هل بيضربك، هو قالهم لا كله تمام، فسألته من منطلق اني كنت مش فاهم، فقالي انهم عاوزين يعرفوا هل أبوه بيضربه أم لا ولو كان بيضربه هيبلغوا عنه الشرطة... فصاحبي قالي هو بابا عمره ما بيضربنا بس حتى لو كصل هبلغ على أبويا البوليس يعني.
*️⃣
بس يا سيدي ولفت الدنيا وشوفنا واحدة عاملة بلاغ في أبوها إنه مش عاوزها تروح الفرح، لا وايه امها معاها في البلاغ... هو مش فاهم ايه التهمة أصلاً... يعني لو مانعها تروح المدرسة فالتعليم الأساسي حق دستوري لكن الفرح بقى حق دستوري يعاقب عليه القانون.
*️⃣
الله يرحم والد صديق عزيز عليا كنت متفق مع صاحبي على مشوار في 2006 للمرور وبعدين أبوه اتخانق معاه وقاله قوم عد لي بلاط الشقة، صاحبي مرضاش فأبوه قاله مش هتنزل من البيت غير لما تعد لي بلاط الشقة... صاحبي عند وبالتالي المشوار بتاعنا اتلغي لإنه ممنوع من نزول الشارع... ما تقوم تعد بلاط الشقة يا عم. وملحوظة ابوه عاوز كام بلاطة راكبه يعني ميحسبش المساحة الشقة ويقسم على مساحة البلاطة، لا كل اوضه كام بلاطة كاملة وكام بلاطه نص ولا ربع وكده عشان الزوايا والتقيل
😂
. يشيل بقى البيت كله والدواليب والسجاجيد ويعد الشقة.
*️⃣
قل محضر في أبوها عشان تروح فرح... اااه يا زمن... الله يرحمك يا والدي اللي كنا لما نكذب واحنا عيال، مش يضربك لااا يحط لك معلقة شطة في بقك... عشان اللسان اللي كذب دا يتلسع... مفروض كنت ابلغ عنه بقى
😂
الله يرحمه فارقنا وانا مكنتش جبت 20 سنة وأمي برضك فارقتنا... يتيم الأب والأم، ارفعوا قواضي على أهلكم عشان فرح وبكره تحجروا عليهم...
نقول ايه، بس الغلط عليه، راجل معرفش يربي، ومعرفش يختار.

الهجوم الكبير عالساحل دفع جزء من رواد الساحل للانتقال لمدينتي المفضلة مرسى مطروح وحتى الدولة برضك بدأ خصخصة مطروح زي مشروع علم الروم... الفكرة دا دفع مطروح السنة دي لارتفاع أسعار خزعبلي فاق 100% لدرجة إني لأول مرة من سنين مروحش مطروح.
*️⃣
تخيل تلاقي السفرية السنوية بتاعتك هتبقي تكلفتها عليك قد تصل ل 8-10 الاف جنية يومياً... عارف إن رواد الساحل بالنسبة لهم ال 50 ألف جنية في أسبوع دول دلع وهما بيصرفوها عندهم في يوم عادي... لكن بالنسبة لي مش عادي، وبالنسبة لغالبية الشعب دا جنان رسمي، الحد الأدني الشهري للاجور بقى مصروف يوم.
*️⃣
أظن الموضوع لو واصل النمو بالشكل دا وهوبا نشوف الأسبوع ب 100 ألف جنية، هيكون الأرخص لي السفر خارج مصر، اه البحر بتاع مطروح ملوش منافس أصلاً بس ركوب الطيارة والسفر و الشوبنج الرخيص هيكون بديل كويس. ويا سلام لو ضربت عصفورين بحجر يعني سفرية شغل في فسحة. صباح التوفير.
*️⃣
تخيل ارتفاع أسعار مصر هيخلي جزء من الشعب يقرر استهلاك الدولار في السياحة العكسية، نسيب مصر لسكان Egypt والخليج.
*️⃣
هتوحشيني يا مطروح
😭
أول مرة روحتك كان عندي 40 يوم وعندي صوري وقتها، وفي سن 9 سنين اتعورت هناك ولسه عندي العلامة في ايدي للنهاردة، وآخر مرة كانت 2025
💔
💔
وربنا يكرم ونشوف 2026 ايه قصتها دي، لكن 2027 خلاص القصة تكمل خارج مصر إن شاء الله
😢
😢
⬅️
⬅️
السؤال المهم، لما المصريين يفقدوا المتنفس السنوي الوحيد، الشحنة اللي بتديك طاقة للسنة، يا ترى البنية النفسية والذهنية والسلوكية للمواطن بتتزق عشان تروح فين... فكر كده ومد الخط لقدام متبصش للنهاردة
ملحوظة: أنا بتكلم عن تكلفة رحلة مش تكلفة إيجار وحدة.

عشان نخلص من حوار البنك الدولي يصرح 62.8 مليار دولار ديون مستحقة على مصر خلال 12 شهر
*️⃣
يا شباب أرجوكم متاخدوش معلومات من عناوين الأخبار؛ العنوان مكتوب يعمل ترافيك مش أكثر وجو جريدة النبأ في الأتوبيس "لو مولود بعد 1995 مش هتفهم قصدي غالباً". طيب لما تفتح الخبر هتلاقيه أولاً قديم؛ آه منشور جديد بس بيتكلم عن الماضي من 1 أبريل. الخبر بيقولك المبلغ متقسم Q2-2026 هندفع 24.39 مليار وQ3-2026 هنسدد 13.94 مليار وQ4-2026 هنسدد 13.7 مليار ثم Q1-2027 هنسدد 10.8 مليار دولار... كده يبقى القلق عندنا فعلياً من Q2-2026 هو المبلغ الأكبر، بل فعلياً بيساوي Q4-2026 + Q1-2027 معاً.
*️⃣
يعني نعدي Q2-2026 وخلاص الموضوع بقى خفيف... هو إيه Q2-2026 دا؟ دا يعني شهور أبريل ومايو ويونيو 2026... إيه دا عدى خلاص؟ دا كان فيهم حرب؛ حد حس بشيء؟ الأستاذ اللي هناك حس بشيء؟ دا إحنا فعلياً دلوقتي في نصف Q3-2026 يعني فعلياً كده يعتبر سددنا 31 مليار دولار خلال 4.5 شهر ومحدش حس بشيء... فاضل بقى 31 مليار دولار زيهم على 7.5 شهر.... يعني إنتا سددت 31 في 4 شهور ونص فيهم حرب ومحصلش قلق؛ هتيجي بقى تقلق من 31 في 7 شهور ونص؟
*️⃣
كل ما سبق دا بقى بفرض أصلاً إنك سددت؛ في جزء كبير من الفلوس دي ودائع خليجية بيتم تجديدها؛ وفي جزء ديون لصالح البنوك المحلية بس بالدولار فبنصدر أذون/سندات جديدة وندورها تاني... أنتم فاكرين علينا 62 مليار دولار يورو بوند ولازم يتسددوا بجد؟
*️⃣
للمرة العشرومية؛ لا تقلق حالياً من الدولار... إيه مستوى الحركة 10% دا اللي يقلقك؟ يعني تبقى مواطن عدى عليه سنين الدولار تحرك فيها 100% وشوية حركات 10% تقلق؟ الدولار مستقر حالياً... وحالياً دي أقصد بيها 2026 و2027... قبل ما تقولي يعني 2028 أقلق؛ هقولك مش لما توصلها أصلاً في الكوكب المجنون دا؟ مش يمكن تولع... ومتقوليش يعني لو ولعت أقلق عشان اللي يسأل السؤال دا مينفعش يترد عليه... غير كده إحنا مستقرين وكله تحت السيطرة.
*️⃣
متخليش مانشيتات بتنزل في المواقع لخلافات سياسية بين الدول تحركك؛ ومتخليش عناوين الأخبار تخليكم تخدعكم... وخرج الدولار من تفكيرك.. طيب مهو آخر 24 شهر عمل إيه؟ كان زي النهاردة من سنتين بـ49.35 والنهاردة 50.35 يعني زاد 2% في سنتين... إيه أخبار الأسعار آخر 24 شهر؟ هااا فهمت بقى... إنتا ضحكوا عليك وحسسوك إن الدولار هو السبب ولو سعره ثبت فخلاص الأسعار تمام.. إنتا صدقت فدي مشكلتك... خرج الدولار من تفكيرك لإنه مستقر وشوية هينزل كمان.