فهد العيبان

‏جِعلْ السّحاب اللي محاويله على الارض الدماث
‏يباغت هْمومي على غفله مثل ضيفٍ هَشَل
‏يجتثّ سيله ماتبقى لك ورى الصدر إجتثاث
‏ حتى ولو ينشل معاليقي ليا حوّل نشل
‏ياللي تشيل الهمّ ، وتحطّه .. مثل قطعة أثاث
‏حطّ اللي تحطّه على صدري ، وشلْ اللي تشل
‏ماعاد تفرق سوّ ماودّك ، ورِح دون إكتراث
‏متبلّد احساسي لوْ تغلغل يديك ، وتنتشل
‏قلبٍ عثت فيه الجروح الدّاميه ، والحزنْ عاث
لعلّ يمنًى سبّبت هذا فْـ قلبي ماتشل
‏كم صاح لك يوم انّك مقفّي ، وكم فيك استغاث
‏خلٍ على طرد المقفّي ماتندّم ، وافتشل
‏إِليا قبل .. لا مرّه ، ولا مرّتين ، ولا ثلاث
‏ومْحاولاته كلّبوها معْك باءت بالفشل

‏عسى غيمٍ على دار الحبيب رْكام
‏تلوح بْروقه ، وترجف مراعيده
‏يفزّز كل ذاوي من نفل ، وخْزام
‏ويطرق عوده الغَضّ .. وجراهيده
‏تسيل ، ولا تجَفّل قايد الاريام
‏هدير الما يدندن له تهاويده
‏يذكرّني صبيب الغيم فيه شْمام
‏لاحوّل من سماه ، وْسال في بيده
‏مقاطير المطر على شفيف الجام
‏محاويل الدموع بـ ناعم خْديده
‏أبو قدٍّ تِقل ماخِلق فيه عْظام
‏وجودي ليتني سلسال في جيده
‏يا قوّه يوم قفّى يسحب الاقدام
‏وخلّى صدري لْـ حرّة تناهيده
‏وخلّاني على الآمال ، والاحلام
‏معلّق في رجا الله ثم مواعيده
‏يضحّكني من يقول العوض قدّام
‏وانا في كل يوم ارقب معاويده
‏وَنَس كل العمر عشته زمان العام
‏يا ليت انّ الزمن ينعاد ، واعيده
‏يمرْ مْن البشر مايشبه الانسام
‏خبرتوا من مسك نسمة هوا بيده !؟
‏ومع ذلك انا عندي يقينٍ تام
‏يقينٍ مَحَض ما يحتاج تأكيده
‏احسّ بْيرجع بْيومٍ من الأيام
‏متى هاليوم هذا ..؟ صعْب تحديده

‏حبيبي ولو صرت أتّمادى عَلي مسموح
‏ورايك صواب ، يحق لك فيه تتزمّت
‏ولكن عليك الله وامانه قبل لا تروح
‏تداوي جروحٍ لا لفحها الهوا شمّت
‏رِح الله حسيبك كان زدت الجروح جْروح
‏انا اليوم فرصة كل عاذل ، ومتشمّت
‏عذاب الفراق ، ولا وصال بْطلوع الروح
‏فرحت بلقاك ، وفرحتي فيك ما تمّت

‏قِدْ ضاع في غبْ الوساع المساويد
‏قلبٍ عجز ياصل لـ يابس ضفافك
‏من عقْب ماهو يقطع البيد .. والبيد
‏جفافها ماكنّه الّا جفافك
‏والله لو انّ الراحه فْـ راحة الايد
‏ماشفتني قدامك ، ولا خلافك
‏لكن وش اسوّي بقلبٍ مقيريد
‏يغليك ، وانت لـ دمّ الاجواد سافك
‏متعلّقٍ بين النحر ، واتلع الجيد
‏ولا طرا في باله انّه يعافك
‏تزعل ، وتنضب عاذيات المواريد
‏على حبيبٍ يرتجيك ، ويخافك
‏وعلى رضى قلبك تفزّ الجراهيد
‏وان لاح برّاق الحيا من رهافك
‏يميل عودك ، واتّدلّى عناقيد
‏ثمرْك .. وآحنّ لـ مواسم قطافك
‏ لا صدفةٍ جابتْك .. ولا مواعيد
‏يبدو لي ان هذا هو آخر مطافك
‏يا سِعد عينٍ تلمحك في ضحى العيد
‏ترفل بنفنوفٍ توشّى عفافك
‏يا موقّف الدنيا ، واهلها على حيد
‏مافيه احد قدْ مرّ جنبك ، وطافك
‏محسود من شافك من بعيد لـ بعيد
‏وشلون عاد اللي من قريب شافك !

‏حبيبي يوم تجرحني تراك اقديت
‏ ومن قال انّك المخطي فـ انا خصمه
‏عسى يغفر لك الله حتى لو اخطيت
‏ماغير الانبياء اللي لهم عصمه
‏فدتك النفس لو سوّيت ماسوّيت
‏بنفسٍ بعْد صدّك شبْه منفصمه
‏سنين احاول اتخطّاك بس ازريت
‏فراقك كان وقعه للظهر قصمه
‏عرفت مْن البشر فـ غيابك ، وحبّيت
‏لكن انت الوحيد اللي ترك بصمه

ياليل الشتا ساعتْك ياطولها طولاه
على واحدٍ طاولهْ همّه ، وتسهيده
بهمّه سرى ، والخاطر أدنات مايشعاه
تقل هرش بدوٍ بالخلا منطلق قيده
يمرّ الحنين القلب ، ويتلّه مْن اقصاه
وامرّ القصيد العذب ، واتلّه مْن ايده
مثل مايحٍ تلّ الدلو في جويد رْشاه
على جال عدٍ ماستشحّت مواريده
سقى دار مفلول الجدايل سحابٍ ماه
تنثّر غشينه لين سالت جراهيده
تدفّه هبوب الغرب ، ويجيك من منشاه
تهذرف بروقه ، واتخافق مراعيده
ولا يطري الا عنق ريمٍ .. ياوين انساه
وانا شفّ روحي بارقٍ يلمع فْـ جيده
ياذا الغيم الأدلم عاوده ، واسألك بالله
لامنّه سأل ، واغضى حيا في مساويده
دخيلك تعلمْه إنّ روحي على لاماه
رهينة وفاه ، وفي حراوي معاويده
يضيق المدى ، وادرّج اقدامي فْـ مرباه
هذا بيت ابوه ، وذي مداهيله ، وبيده
عليل النسيم يجيب طاريه ، وإنّ طرّاه
اجرّ النفس ، وازفر من الشوق تنهيده
ياحلوه ، وحلوْ ايامي اللي مضت ويّاه
حلالاه لوّ الوقت ينعاد ، واعيده
انا ودّي إنّ الما يعوّد على مجراه
لكن مستحيل ، وصعبه يعود ، وبعيده
وعدته بعيش العمْر متشبّث بذكراه
ولاني بـ من يوعد ، ويخلف مواعيده

والله ان القلب من غيبتك كنّه على
‏نارٍ تْصالي مجرّح معاليقه صَلي
‏قلت يمكن باقي بْقلبك شوية غلا
‏واثر ماباقي من الحب ولا شي لي
‏وين راحت مرحباك القديمه ، والهلا !؟
‏وش يردك لا تسلم ، وتتطمّن علي !؟
‏ماسمح قلبي من الشوق ياكود اولى
‏يوم جيتك ، واثر منتب حبيبي الاولي

ماجرح داجي العتمه سنا قنديل
ياهلا مرحبا ، والنفس مسترّه
في جبينك سرى بارق .. ونجم سهيل
فوق منحركْ يلمع كنّه الدرّه
وان فهقت بْيديك المترفات الليل
يستفيض الشفق من مفرق الغرّه
البدو شافوا فْغرّتْك جرّة سيل
وجات بضعونها تمشي على الجرّه
ماخلق ربي المنسوع للتجديل
نقّضه للنسيم البارد ، وثرّه
ويتماوح تقول انّه سبيب الخيل
لاسهجت قلب محبوبك على غِرّه
من كبر شرهة الدمعه على المنديل
طاحت الشمس من عين السما قرّه
كل ميّاس عود مْع النسيم يميل
ليت شعري لا طرّق عودك ، ومرّه
يستميلك لقلبٍ مابقا به حيل
فاقدك ليتك تزاورهْ ، وتبرّه
ذاق منْك الجروح ، وشاف منْك الويل
وانت ماكن فيك احساس بالمرّه