قصائد سيد فاقد الموسوي مكتوبة
هاي هيه و بعد رهمت ماتجون
بس كسرتوا بخاطري
فوگ قطعة موتي اليخطها الغريب
چم أخو يحط مادري؟
هواي اخوتي و خير من ﷲ عمام
ليش فارغ چادري؟
آنه الغريبه المنكسر خاطرها
و شحّت ﷲ بالخير من چادرها
الوادم الغربه من تموت تزور أبوي
چا آنه بنته و محد يزوّرها
يالبعاد صحتكم
أجه الموت لأختكم
تثغبون ردتكم بويه بويه
تره الشام ظلمني
من الحسين حرمني
و بالقصور هظمني بويه بويه
زينب آنه ..(٢)
ــــــــــــــــــــــــــــــــــــــــــــــــــــــــــــــ
آنه آنه و ما أتغير من أموت
ميته بس مشتاگه
ﷲ كاتبلي أنسبي و ما أستراح
ما كتب نتلاگه
الدنيا مالت كلها من مات الحسين
ما أعتب عالناگه
غير اليموت و رادوا يدفنونه
ينزل أخو يقيس الگبر بمتونه
يحس بمعزته الميت ببين أعزاز
من يبچي أخوه عالگبر و يسكتونه
غريبه و سبيه
والحسين خطيه
منو يصيح عليّه زينب زينب
يالأحنان ثگيله
نعشها العقيله
الغرب من تشيله زينب زينب
زينب آنه ..(٢)
ــــــــــــــــــــــــــــــــــــــــــــــــــــــــــــــ
آنه ولدي بطولي بس فرني الزمان
و صار دمعي بطولي
آنه يم يا جثه منكم بچيت؟
ليش ما تبچولي؟
ما صحت لحگوني من بخيامي نار
هسه لا ألحگولي
💔
ياما شگفت حجار عنكم ياما
وساعه ألم جسم حسين ساعه أيتامه
ببين الخيول شكثر وصيت الروح
أعثر بعون و لا أعثر بعمامه
گضت موت زلمنا
ودوت نار بخيمنا
والسياط تلمنا صعبه صعبه
لمن طاح علمنا
الوكت ما رحمنا
بالقصور وگفنا صعبه صعبه
زينب آنه ..(٢)
ــــــــــــــــــــــــــــــــــــــــــــــــــــــــــــــ
وﷲ ما مرتاحه ساعه و روح أبوي
ولا منشفه دموعي
لهسه من الناگه والتل والركاض
يوجعنّي ضلوعي
من تجيني الظلمه تضوي بگلبي نار
ما مكلفه شموعي
أخذوني يمكم ياحسين أخذوني
بالشام هاي العرب ما يردوني
شمحلاها لو بينك و بيني العباس
والناس اليزورونك يزوروني
بعد مو سبيه
تجي وياي رقيه
تسيرون عليه يهلي يهلي
عليكم قريبه
بعد مو غريبه
العتب ما أجيبه يهلي يهلي
زينب آنه ..(٢)
ــــــــــــــــــــــــــــــــــــــــــــــــــــــــــــــ
- آنه الغريبه
الرادود | سيد فاقد الموسوي
الشاعر!؟؟
الكاتب | الميرزا محمد المياحي
علي ياتعبي و سهر الليل
علي ماربّيتك للخيل
يابو رسوم الحلوات
بيّه أتمنى السحگات علي علي
ــــــــــــــــــــــــــــــــــــــــــــــــــــــــــــــ
يوليدي حلو الطول
گدامي هل مكتول رايح دلالك
موش أنتَ ميت كون
ولا بالرمح مطعون آنه ببدالك
يالصوبتها الروح
أُمك عليك تنوح باگوا جمالك
" أتعيني " حاسب گبل
هسه ركضت عاونتك
" أتشيلني " أنت بطيحتي
شو يبني آنه الشلتك!
إلك يالأكبر يومن جيت
بدمع حاچيتك مارديت
الفاگد مثلك مصيوب
شما يكتل هم مغلوب
يا خنگة كل غروب علي علي ..(٢)
ــــــــــــــــــــــــــــــــــــــــــــــــــــــــــــــ
طايح و أجيت بساع
شلتك طحت بالگاع طحت آنه يمك
يمكن ثلث مرات
يمك أبوك المات من بيده لمّك
للخيمه أرجع بيش؟
شمخلي بيك الجيش! ياحسرة أُمك
بلا روحي اجيتك من طحت
حاچيني رجّع روحي
مجروح چنت على المشوا
صرت أكبر من جروحي
علي شيرجعني بليّاك؟
صحّت ميّت كون آنه وياك
ما طالب منك دوم
بويه أنهض هسه و گوم
يمكنّك ما مقسوم علي علي ..(٢)
ــــــــــــــــــــــــــــــــــــــــــــــــــــــــــــــ
بعدك صغير و شاب
خدّك عليه تراب وأنتَ شحلاتك
وي كولك أمتديت
معقوله ما فزيت يبني شغلاتك
أضحك أريد أرتاح
رَد گلبي يمك طاح يبچن خواتك
جامعهم بوجهك چنت
جدي ، و أبوي ، و عمك
من گد جمالك يا علي
من العين چنّه نضمك
صحّت عايفني و رايح وين
علي يا شلّعت گلب حسين
يالأكبر هذا فراگ؟
ما أدريبك تنباگ
أرحم گلبي المشتاگ علي علي ..(٢)
ــــــــــــــــــــــــــــــــــــــــــــــــــــــــــــــ
أمدلل الخوّان
بموتّته عطشان ذابل لگيته
سالم كتر مابيه
اليبچّيني أمتانيه آنه البچيته
الردته ذخر للشيب
بهالسرعه عنّي يغيب ما حسبيّته
بويه الهجر وي الإبن
السيف أرحم منّه
جدمي بعد مابي مشي
تگدر علي تدنّه ؟
💔
علي من مُهري و طحت عليك
حرت شما أركض أرجع ليك!
المثلك ما ينعاف
" بظلمه و وجهك ينشاف "
گلبي عليك شگد طاف علي علي ..(٢)
ــــــــــــــــــــــــــــــــــــــــــــــــــــــــــــــ
شما أبچي لك وأندار
تشبه علي الكرار بچفوفي شلتك
دم و طعن و جروح
يوليدي يا مذبوح وأَنتَ بكشختك
صواب الإبن كتّال
عمر الأبو لا طال " آه يا كسرتك "
يالـ من حلاتك يا علي
يمك تضيع الدُرّه
أَنتَ الوحيد بهالبشر
جروحه عبرن عُمره
علي ياروحي و لِبْ أحشاي
علي عطشانك مو للماي
يا حلمي الراح و ضاع
تبوگك من عندي الگاع
ما يحلى وياك وداع علي علي ..(٢)
ــــــــــــــــــــــــــــــــــــــــــــــــــــــــ
- يا أبو رسوم الحلوات
الرادود | سيد فاقد الموسوي
الشاعر | محمد البطحاوي
الكاتب | الميرزا محمد المياحي
📜
القصيدة: درب التجاره
🎤
اداء: سيد فاقد
🖋️
كلمات: حمزه الحسناوي
~~~~
درب التجاره الما بي خساره
من باب اهلنه لباب الزياره
~~~~
يا هيبة الزوار والله هيبه
هاي الشمس كل عاشگ علامه
احنه النحب حسين ومشينه
احنه النفوز بيوم القيامه
كل احنه واحد وحسين ابونه
محد يسولف باهله وعمامه
اخوان شيعه وشيعه
هذا الدرب منبيعه
بس الحسين نطيعه .. ما عدنه غيره
واليمشي راد ويانه
حي الله كلمن جانه
يحسبنه مثل اخوانه .. غيرتنه غيره
عامر مضيفك ما تطفه ناره
من باب اهلنه لباب الزياره
~~~~
قصرنه لو برواحنه خدمنه
دينك جبير وما نوفي دينك
لمن نخدمه الزاير نگله الف
انعم الله عليك وعلينه
ما ضل وكت للفرحه الجبيره
المهدي باجر زاير يجينه
الغيبه تخلص باجر
والمهدي يطلع زاير
ويعيد يوم العاشر .. ثارك يجيبه
زينب ترد علويه
مو زينب المسبيه
ويرجع الترجيه .. وثارك يجيبه
ابنك ثگيل وما ينسه ثاره
من باب اهلنه لباب الزياره
~~~~
الدنيه كلها تطوف بضريحك
الدنيه كلها وكلش قليله
فاتحتك لحد يوم القيامه
وبس للثگال الفاتحه الثگيله
والصعبه سهله تصير اعله بابك
جم ميت انته موگفه اعله حيله
مو صعبه عندك هايه
تنطي المريض الرايه
ويطيب بالمشايه .. بس يعتنيلك
والما يجيك امشيله
بل ياعلي تشد حيله
مذبوح واتجيله .. بس يعتنيلك
كلشي انته بيدك صاير قراره
من باب اهلنه لباب الزياره
~~~~
جنهم بحر مو ناس من يجونه
لا من نهايه ولا من بدايه
تحسه قائد عام اليجيلك
لو جنه رايه لو بيده رايه
مو للثواب الشابگ ضريحك
بس انته غايه وما عدنه غايه
يا اول انته وتالي
ما عدنه غيرك غالي
يا راحتي وجتالي .. يا كل اهلنه
حسين يا محبوبي
يا غايتي ومطلوبي
بترابك امحي ذنوبي .. يا بعد اهلنه
هوه اليحبك اسمك شعاره
من باب اهلنه لباب الزياره
~~~~
حبك خذانه وعشنه المصيبه
وانته اليحبك ما يبقى حاير
حتى الفقير بوكت الزياره
تاجر تشوفه من يطبله زاير
عاش الحمام بخير بضريحك
ومسوي موكب فوگ المناير
دارت الدنيه ودارت
كلها بخدمتك صارت
والناس بيهم حارت .. خدمه عجيبه
احنه العشگنه عيونك
بس ما نوفي ديونك
گالولي بي خيعونك .. خدمه عجيبه
ما تطفي لاجلك هاي الحراره
من باب اهلنه لباب الزياره
••••••••••••••••••••
الذكرى السنويه السادسه الاستشهاد قادة النصر الشهيد ابو مهدي المهندس والشهيد قاسم سليماني
💔
اللهم أنا لانعلم منهم الا خيرا
قصيدة: خيمة بت علي
الرادود: سيد فاقد الموسوي
ـــــــــــــــــــــــــــــــــــــــــــــــــــــــ
من دوة خيمة بت علي والخيل حاطة بيها
طلعت ورجعها الفشل وين اليلحك عليها
وا زينباه وا زينباه
...
عباس لحك ع الخدر غير الخدر ما هامنه
نسوان وملاكه صعب وي زلم موش زلامنه
نرجع للمخيم زلم نطلع زلم كدامنه
و وجوهنه تريد الستر وتريد ليم جدامنه
من دوة خيمة بت علي والخيل حاطة بيها
طلعت ورجعها الفشل وين اليلحك عليها
وا زينباه وا زينباه
..
يطروش بلكي خيولكم لمحمد اديروهه
عصابتي أخذوها بعجل و بحضن اخوي ارموهه
وادلال عبدالمطلب فوك التراب اجفوهه
دارة على الحسين الزلم يا اهل العزم طشروهه
من دوة خيمة بت علي والخيل حاطة بيها
طلعت ورجعها الفشل وين اليلحك عليها
وا زينباه وا زينباه
...
يحسين اجتنه خيولكم وخيامكم حركوها
نسوانكم يا اهل الشرف بين الزلم مشوهه
زينب يا اهل زينب كبل هسه الغرب سموها
المسبيه و أخت المنذبح و الطلعت
و شافوهه
من دوة خيمة بت علي والخيل حاطة بيها
طلعت ورجعها الفشل وين اليلحك عليها
وا زينباه وا زينباه
...
وركاضنه وحرك الخيم كتالتك فرحانه
نركض نغيب من الرعب وطبول تتلكانه
كامن يعثرن بالجثث عطشانة يم عطشانة
يحسين لازم ترتوي مو تركض العطشانه
من دوة خيمة بت علي والخيل حاطة بيها
طلعت ورجعها الفشل وين اليلحك عليها
وا زينباه وا زينباه
...