قناة حيدر تركي الكربلائي

يا زهراء مشكورة

الفاطميه
فاطمــه يالخـــيرچ مغطــينه
شگــد نطيـتينه وبعد تنطينه
يم اضلوع مكسوره
يازهـــراء مشــكوره
يا ام الحسن
***
سمــاچ الواسعه تمـطر .. وجميلچ خـَجل الخدام
يالمــويـــوم وتبــطــلين .. خيــرچ عام يتبع عام
نعم بس مـَن نكون احنه .. وتحزمتي النه احزام
طـــن معقــــوله تنطــينه .. يالزهره النطاچ غرام
هــنه بس لطــمات واچم دمعه
اشحال اذا واحد كسرلچ ضلعه
مانتخيل الصوره
يازهراء مشكوره
يا ام الحسن
***
اذا حل موسم احزانچ .. كلشي انلبسه لون اسود
ويبرد كلشي بس حزنچ .. يالــــزهراء مــــايـــبرد
لو لطــم الصدر موشــي .. نلطملچ تره اعله الخد
ينـــــسد كلشي الا انتـي .. موضــوعچ فلا ينسد
يالثـــارات الضــلع گلــــناها
وداعة المحسن فلا ننساها
بالذاكره محفوره
يازهراء مشكوره
يا ام الحسن
***
الدنيه هموم متروسه .. وخدمكم كلمن وفهمه
اذا واحدنه راد ايـــزل .. ماكــو الغيــرچ يلزمه
اذا شفتينه مو زينــين .. ومانمتـلك إي حـكمه
اسلبي منه شتريـدين .. بس خلــيلنه الـخدمه
ننطرد بــس مانـروح الغيرچ
لان ماي اوجوهنا من خيرچ
يالبالخـير مأثوره
يازهراء مشكوره
يا ام الحسن
***
الـناس الرايــده تنــــطي .. تمن بس انتي متمنين
فقيــــره والديـــگ بابــچ .. اله يافاطـــمه تغــنين
طلــبنه هوايه من عندچ .. وابد من عدنه متملين
اتجوعين الحسن وحسين ..والنه فاطمه تشبعين
اشكثر رحمــه فاطـمه بدلالچ
عدله ميته وغامرتنه افضالچ
يم چفيـن منذوره
يازهراء مشكوره
يا ام الحسن
***
شمــــقدميـــبچ يــــلــــي .. قدمـــتي اغله متمــلكين
عطائـــچ نــوگف اگـــباله .. خجـــــلانين ومدنـــگين
بگلب وبضلع مكسورات..نصرتي الدين واهل
الدين
روس الناس علــــيتي .. وضل عالگاع راس حسين
ياحنينه ويامن امعلمه الحنان
يلي ميحدچ زمــان اولا مكان
يالبالفضل مذكوره
يازهــراء مشكوره
يا ام الحسن
***
حيدر تركي الكربلائي

الفاطميه
عزاؤنا قائم .. لأمنا فاطم
حتى ظهور القائم
***
اقسمـــنه بـفاطر والكوثر .. عالزهــرا مانتـــغير
نزغر يمها اشما نكبر
چفها الطاهر .. بخيره الوافر
ماخلاله .. واحد حاير
شلون انكف عن مجلسها .. فاطم احنه نقدسها
الدمعه الرايد يحبسها
خل يتفكر .. بكسرة حيدر
من رد خالي .. بالهم يعثر
وحزنهُ الدائم .. لأمنا فاطم
حتى ظهور القائم
***
امنه ومن حقها اعلينه .. وبمحنتها اتأذينه
لو دم اعليها ابچينه
منوافيها .. ومنجازيها
الزهرا امنه .. شما ننطيها
اشما سوينه وسوينه .. مايسوه شي حسينه
ميته وعدله وتنطينه
امنه الزهره .. مآوه الفقره
والمكسور .. الزهره اتجبره
قلبٌ وكف راحم .. لأمنا فاطم
حتى ظهور القائم
***
منصافح ايد القاتل .. بهالموقف لامنجامل
كلمه ويسمعها العاذل
فاطم امنه .. الهمها ايهمنه
لجل الزهرا .. ترخص دمنه
نحيّ امر الزهره البضعه .. والمدمع لامنگطعه
من هسه الوكت الرجعه
نلعن بيهم .. ونعاديهم
من اولهن .. حد تاليهم
تبت يدا الظالم .. لأمنا فاطم
حتى ظهور القائم
***
گالو كافي وفضوها .. قصة فاطم انسوها
في كل عام اتعيدوها
ماكليتو .. ولامليتو
وهاي الصفحه .. ماسديتو
انكل ونمل حاشانه احنه .. باب الزهرا
جارحنه
ويلاه يافاطم صحنه
ياقصتنه .. وياغصتنه
يالمنذورتلچ .. دمعتنه
ودمعنا اللاطم .. لامنا فاطم
حتى ظهور القائم
***
فضل الزهرا ماينرد .. لو مو بس نلبس اسود
لو نبچي ونلطم عالخد
مقصرين احنه .. شگد مانحنه
عالتنقذنه .. كل ماطحنه
مايوم اويانه مقصره .. المسطوره ام عين
الحمره
هيه البس بالشيعه ادره
حنيتها .. العلى شيعتها
بس ياوسفه .. الناس اخذتها
كم قُنفذٍ أثم .. لامنا فاطم
حتى ظهور القائم
***
حيدر تركي الكربلائي

اعــد اعــزاز يـــادهـــري .. اشبعدلاك
شـَـبعد تقـتـرب منــي .. اشبي عدلاك
خذت محسن خذت امي .. اشبعدلاك
اخــذنـي اويــاهــم اشتـنـتظر بـــيه
-----------------
هـــم يـــوم ويجـي بــويه واره امي
ومن حجره لحجره اركض وره امي
چــفـــك يــــــوم يابــــويه وره امي
السبـــعه التمــــن وطــــاحن عــليه
…… ..
الدمـــع نهـــران لمصابچ جريناه
والآهـــاتـــچ التـــوجـــع جريناه
ييــــمه لـــمن بســــمارچ جريناه
طلع وياه مــن ضلـــعچ اشويه
---------------
حيدر تركي الكربلائي

الفاطميه
رديت وانـه ابگلبي حسره
والبيـت بـي ريحـة الزهره
امنتذكر .. اتحـسر .. اتــنطر
المــوت
______
السمه احس طاحت عليه وهدمت بنياني
انــه مــن طبــيت بــيتي ومــحد اتلــگاني
صحت يافاطمه وينــچ والـصـده حاچاني
تــوَك الزهــره ادفنـــتها گــال لـي وبچاني
انهاريت ماضل حيل بيه
وَنيـت عــالزهـره الزچيه
اتـعـثر .. اتحـسر .. اتنــطر
المــوت
______
چنت مــن بيــتي اطـبه اتــرد الــي عافــيتي
هسه احـسن روحـي تطــلع لو دخلـت البيتي
الله وحده هـــوه يــدري ويعــلم ابوضــعيتي
امنيتي بس الموت هسه اوين احصل امنيتي
اتمنيت يخلص هسه عمري
وياريت يــمها ايصير گبري
وما اگدر .. اتحـسر .. اتنــطر
المــوت
______
امـن انظـر الوجه الزچــيه فاطمه گدامي
لــو جـبل طـايـح عــليه انـسه كـل آلامي
راحت وراحـت وراهـا فرحـتي واحلامي
عـلي وبـگد رحـمــة الله للـوديعـه ضامي
مديت دمــعاتي عـــلى الباب
وخطيت حزني بوجه التراب
واتطشر .. اتحسر .. اتنطر
المــوت
______
سورة الاحــزان اقــره واشهگ ابهالسوره
انه كل مابيتي اطـبه والگه طافي ابنوره
زهرتي راحت يوسفه اضـلوعها مـكسوره
وبالگبــر حسيـت بيها  عالوجـه مسطوره
خليت فوگ اخـدودها ادموع
وناديت بلكي اتطيب الضلوع
اتصور .. اتحسر .. اتنطر
المــوت
______
لمــن زيــنـب ناشــدتنــي ويــن امـي رايـــحه
الاعمه شاف دموع عينـي من كــثر ماواضحه
اعليها كلشي گمت اسمعه اوياي يقره الفاتحه
ابكل ركن من بـيتي اسمـع صوت ونه ونايحه
احتاريت زينب شرد اگلها
حسيت هالمـحنه اشثگلها
واتوذر .. اتحسر .. اتنطر
المــوت
______
تمت والحمد لله
حيدر تركي الكربلائي

الفاطميه
الفاگـدله غـالي .. الليــالي .. ماتـعوفه بحـاله
___
تـوه العـمر صـار اربـعـه .. وداهـمني لـيل الفاجعه
بسم امي صاح واسمـعه .. والناظـر ايـهل مدمعه
جرح الگلب من ينفتح .. اوياه اسهر الحد الصبح
ليــلي يگــلي هالـجرح .. داويــه يـزيــنب بالمــلح
وجرحي البقالي .. الليالي .. ماتعوفه ابحاله
__
____
من البچي اعيوني انعـمن .. اعله الزهره من گد مابچن
ازغيره بعدهي ام الحسن .. ومالايـگ اعليــهــا الچــفن
مـن شالو امــي بالنــعـش .. المــاتم عــمرها اثمنـطعش
حيلي رگد جسمي ارتعش .. ودمعي على الگاع انفرش
الباقي تــوالي .. اللـيالي .. ماتعوفه ابحاله
__
__
زينــب زغــيـره اعــله الهـجر .. ومنــين اجــيب انــه الصبر
الحضن امي مشتاگه اشكثر .. الچانت تظمني اعله الصدر
صدر امـي مــن گــد ماتــرف .. يتــفايــض اعلــيــه عــطف
الحـــنــيـــة عدها تـخــتلـــف .. ماتـــنوصــف مــاتـــنوصف
الچـف الدعـالي .. الليالي .. ماتعوفه بحاله
___
اشگد ما اون رايدلي اون .. ميهمنــي لو طاح الجفن
وراسي لون يصـبح گطن .. للـزهــره ماعـوف الحزن
يبـقه البـچـي بـيه طـــبع .. عمري اخلصه اويه الدمع
يوميه راح انــه انــفـجع .. ويـومـيـه يتـكــسر ضــلع
يوميه والــي .. اللـيالي .. ماتعوفه الحالي
___
_
شينشف ادموعي التهل .. عــن امـي لـمـن انسئل
ثاري اليتم لامــوسهـل .. مـو هــين ومــاينــحــمل
ايعين الله گلب الفاگده .. للمـثلـي فـگــدت والـده
عن امها ياهو اتنـــاشده .. وامها ابلحدها اموسده
العنه سؤالي .. الليالي .. ماتعوفه ابحاله
___
___
للمقــبره الحـادي سـره .. بــأمـي وبقــيت امحيره
لـو مـا ابـويـــه حيـدره .. چـــا سـاكـنـه بالمـقــبره
چا هسه مدفونه ابگبر .. ابلايه امي شلي بهالعمر
وشلي وبحياتي وانتظر .. وزينــب يتانيـها اليسر
والي اعله بالي .. الليالي .. ماتعوفه ابحاله
___
___
تمت والحمد لله
حيدر تركي الكربلائي

الفاطميه
حُسن الخاتمه .. نظـرة فاطـمه
نظـرة فاطـمه .. حُسن الخاتمه
***
نعم يا أيها الخادم        يامـن تتبــع القائم
افــهم اعلم اتدبر رضا الله من رضا فاطم
التكثر دمعته اونه       ترضه فاطمه عنه
جزاء الهاي حــنيته اقل شي ترزقه الجنه
اعظــم مكـرمه .. نـظرة فاطمه
نظـرة فاطـمه .. حسن الخاتمه
***
فضل ام الحسن ذكره       وبالك تنكر العشره
اخسـر كلشي بس بالـك حبـها الطاهر اتخسره
ذوب ابابــهــا شمــعه       وطيـح اگبالها دمعه
اشـــما رادو يــنزلونك اســـمك فاطمــه ترفعه
نظرات الســمه .. نظـرة فاطمه
نظـرة فاطـمه .. حسن الخاتمه
***
الينطي الفاطمه الزهره    من دمعاته لو قطره
حــنينــه ام الحســن كلــش تبقه تلهــج بذكره
متزل ابــداً اجـدامه        بيــض اتصــير ايامه
والـــي يريــد يتــوفق ايحـــط الزهـــره گدامه
هـــيه اتقومه .. نظــرة فاطمه
نظـرة فاطـمه .. حسن الخاتمه
***
العاقبـته يــباريها        خل فاطــمه يبچيها
اتوافي الـطاهره معلوم كـل واحـد يوافيها
ام حسين معروفه     وبالمعروف موصوفه
الگـلــبه محتــرگ بالبــاب لو بالنار متعوفه
ينجي التعصمه .. نظرة فاطمه
نظـرة فاطـمه .. حسن الخاتمه
***
اليحضه بنظرة البضعه    هوايه يختلف وضعه
بحيث ولو حــچه احچــايه كـــل الوادم اتسمعه
تحــط خدامها بالعين    تحبهم مثل حب حسين
اشما تبچيـلها اعيـــونك كون اترد الـــك هالدين
تبــقه الراحمه .. نظــرة فاطمه
نظـرة فاطـمه .. حسن الخاتمه
****
حيدر تركي الكربلائي