ᥫ᭡.
ياخي شكراً على كل الظروف السعيده
والله يعوضني في طيبي وطيب فـالي
احسب اني معك واصل حدودٍ بعيده
واثرني اركض لحالي .. وواصل لحالي
لا تـدور ترى ماغـير نسخة وحـيده
تلقى غيري ولكـن منت لاقي بـدالي
الفقـيده ماهو الي يموت .. الفقـيده
غاليٍ صار مع الايام ماهـوب غـالي
من مجريات الوقت لادارت رحاه
صرنا نحسّ ان الطمأنينه كمين
حتى الحزن يبي من الواقع نجاه
ما يزبن الا ، في صدور الطيبين!
اللي عيونه ما تشوف الا .. عناه
ماعاد يثرّ في محانيه " الحنين
من صدّ عن غاليه .. لا بين جفاه
يقدر يصدّ من الملذات اجمعين
نتيجة الخذلان , يا ظبي الفلاّه
تلويحة كفوف وبقايا راحلين
اللي عطيناه الثقه .. ربي عطاه
فرصه وحيده ماتكررها السنين
حنّا ثقتنا غاليه .. مثل ( الحياه )
ما تنعطى للشخص نفسه مرتين !
قصيدة الليلة:
"فمان الله و دموع الشجاع مجرّي الهيّاب
تراها ما تهون إلا على اللي موته مصيبه
على فقدٍ ما يرفاه الرجا في رجعة الغيّاب
فراق اللي تناوشه الفنا و الغيبه الغيبه
لو إنك يا حبيبي غالي و دمعك له ألف حساب
و غيرك في البنات البيض ما أعجبني و لا لي به
خذيت من الفرس و الصقر و الدله شبه جذاب
وصوفٍ لو تمعنها قوي الدين تغوي به
عيون و رزه و عودٍ ما تستر فتنته بثياب
و وجهٍ لو تحدى البدر حط البدر في جيبه
عسى الله ما يعاقبني لوني ماني بكذاب
و لا يجعلني اللي ذكر ذنبه من عذاريبه
صحيح إن الموادع حط في قلب الشقي مخلاب
لكن يفداك قلبي يا أول و اخر معازيبه
أعرف إن الجروح جروح ما فيها جروح عذاب
لكن شيءٍ بيبقى منك لو هو جرح ودي به
هذا اخر ما سمع مني و عينه دمعها صباب
و قفى و الحزن في خافقي يلحق مشاهيبه
لو اللي يلحق العاشق من الفرقا عليه يثاب
ما والله أغبط اللي معتكف شهرين في طيبه
و إذا قلت إن هواها في خفوقي فص ملح و ذاب
و طيت ديارها .. و أفتر قلبي في محاديبه
و إذا مس الحنين اقصى عروق القلب مس أطناب
عرفت إنه يمثل سجته و إن الوفا عيبه
أنا مثل الكسير اللي يشوف إن كسر رجله طاب
و لا يدري إن عاد الكسر باقي لين تمشي به
يا ليت اللي يروح يروح و يسكّر وراه الباب
ما يترك باب ذكرى تخطف العاشق و تدوي به
يا بحر الكوت لك مني سلام و مقتفيه عتاب
على شاطيك كن الحزن ينطحني بترحيبه
تذكرت العيون الناعسات و سلهمة الأهداب
تقول إن في حورها واحد يسولف عن الهيبه
جعل يسقى علي ليلٍ جمع في ضفتك الأحباب
هذاك الليل من بدّت ليال العمر يا طيبه
عسى ربٍ جمعني به و حنا من بعضنا أغراب
يسجّجني غلاه الذرب و لا زيد ياتي به "
يا قلبي لا تحايل لـ المقفي واقصر المشوار
تهيّا لـ الغياب ولا يردك لـ اللقى نوحي
اذا هاذي بداية حبنا , كله تعب واضرار
اكيد نهايته صعبه وانا خايف على روحي !
بعد زاد الوله والشوق جيتك لكن اللي صار ؟
حسافه ليه هديتي بعد ما جيتك صروحي !
يا قرة عين من حبك , تراني حافظ الاسرار
لا يمكن تطلع الاسرار في جدي وفـ مزوحي
يجيني طاري التشتيت , والفرقا بدون انذار
امانه معك اذا الفرقا تريح خاطرك روحي !!
اذا قلبك يعاهد , فـ المحبه ما يبور وبار
انا يوم احفظ عهود المحبه ويش مصلوحي ؟
تشوفين الزمان المر , فيني يوم لف ودار
علامك مثله تسوين ما ضمدتي جروحي ؟
لا تبدين العذر ما فـ المحبه والوصال اعذار
انا عن وصلٍ ينقص مقامي مبعد شبوحي !!
طرّف الليل وبجنبي شناحٍ طروب
للدفا فوق صدري ميّلت راسها
كنها الشمس وضلوعي محاري غروب
حوّلت في غياهب سكرة نعاسها
وكن يوم احتضنها عن براد الهبوب
جالس اطيّب شماغي من انفاسها
عذبة الريق كاسيها عذاب القلوب
ليتها ما سقتني من طرف كاسها
لمعة البرق في عرض السحاب النصوب
في ثنايا ثـغـرهـا زان مـجلاسـها
جسمٍ معزل وعنقٍ جفته العيوب
لو سلم من ذهبها واطقم ألماسها
قبلة الله عـلى وجـهٍ يسد وينوب
عن إمهار الجزيره واطيّب افراسها
تلبس الجاذبيه والغنج لبس ثوب
وصيت أهلها عباةٍ تستر لباسها
كل عرقٍ جذبها نخبوي ومحسوب
فخمةٍ بـ الجمال وفخمه بـ ساسها
غيداً اخاف من شدة ترفها تذوب
لا طواها الحنين وطال هوجاسها
فتنة الروح نوب أقسى عليها ونوب
ممكن اطير لجل اطير عـماسها
قالت سنين عمري مقتفيها الشحوب
قلت أنا فـرحة سنينك ونـوماسها
ألعبي وإلك وجهي يالغزال اللعوب
لجلك أبيع دنيا وازهد بـ ناسها
باقي شوي واقصّر طوال الدروب
وآخذك للحياه ولذة احساسها
مـافيـه داعـي تهـل الدمع من شاني
بكره يقولون ليه الحب بكّيته
أنا تمنيت تذكرني وتنساني
وأنته ياليتك تمنى اللي تمنيـتـه
رسايلك جات بين أسمي وعنـوانـي
وتعلقت بين ضيعته و دلیته ..
بعض البشر لو يدوّرني مايلقاني
وبعض البشر لويجاذب سيرتي جيتـه
لا تنشغل خلّنـي يـاسـيـد خـلانـي
استسمحك وقتي اللي معك مضيّته
قل فارس الحلم خليته وخلاني ..
أو قول بالعكس خــلانـي وخـلـيـتـه
ياسيفي ودرعي وخيلي وميـدانـي
البيرق المنكسر لرضاك رزيته
أموت من ضيقتي مير الله أحياني
وجوارحي معك لاحيه.. ولا ميته ..
مع السلامه دام فالدعوه عناد
في ذمتي ماكسر علشانك عنادي
اخلصت لك بالحيل لاكن مافاد
الين شفت اني معك صدق غادي
محبتك صارت غرابيل وجهاد
ماهي على ضني وحسب اعتقادي
ماني على طرد المقفين معتاد
يعني قسم بالله ان غبت عادي
الشعور اللي ثلاث سنين ما حسيته
خايف يسيطر على قلبي و افلّ شراعي
كل موضوعٍ يثير الذكريات ألغيته
ودي أعيش الحياه بدون ضحك صناعي
لو دريت أن الحبيب أندم لامن حبيته
والله ما أستقبل رسايل من يدين الساعي
الهوى -بدايته- تعميك عن -تاليته-
أنشد اللي كان قلبه مثل عقله واعي
لين جاه الحب فجأه ثم سلب عافيته
ليتها حربٍ ضروس و نجدتي بذراعي
(الفراق) يخرّب الأحلام يخرب بيته
و السنين تمر و أنا ما أستعدت أوضاعي
أدري أن اقسى شعور اللي يجي تنهيته
لـ أقتنعت أن الليالي تستطيع إقناعي
ما قعد بيتٍ عن الحرمان ما سويته
وين أروح من البيوت اللي تزيد أوجاعي؟
الوصال أن كان ما جاني على توقيته
حط في بالك لا جاء بعدين ما له داعي:)
في حديث الليل من ذاتي لذاتي
ليت قلبي ما طرى الأوهام ليته
من بداية خوف ما زعزع ثباتي
لـ الطريق اللي بدا يوم انتهيته
وشرهة الحلم الكبير و تضحياتي
ولوم عقلٍ كم تماديت و عصيته
بـ استقامة كنت اواجه مغرياتي
و الهنا من يوم صافحته .. رثيته
يا حبيبي والحزن يعزف سكاتي
كيف اغنّي دمع ما عمري بكيته
ليه تنشدني عن آخر مجرياتي
ذابلٍ جفن الوصال و لا سقيته
جيت متبعثر من يلملم شتاتي
من يذكّرني .. بـ عمرٍ ما نسيته
" كنت عابر ليه تسكن ذكرياتي "
كنت راحل عن خفوقي ليه جيته
يا الرحيل اللي مع الأشواق .. ياتي
يا الغريب اللي غدى الخفّاق بيته
من يقول إن الظلام أربع جهاتي
نور أماني رجعتك ما قد طفيته
صورتي .. ظلّي تفاصيلي .. عصاتي
وجهتي ذاك المدى اللي ما جفيته
قبلتي ما عاتبت صمت إلتفاتي
خطوتي ما تحكي اللي ما حكيته
والله انّك كنت اماني وامنياتي
يا العذوبه والعذاب اللي جنيته
أنت فصلٍ لو تكرّر في حياتي
ما طويته ما طويته ما طويته
هذي ثلاث اعوام يا ام العكاريش
على رقيقات الورَق .. وَرْق نايح
ادرا على سمعتْك يانشوة الطيش
مثل ما اداري وجهي من الفضايح
ليش الليال المقبله والعمر ليش
وانا ملقّيها صدود المبايح
ومن قال ياعبدالله اللي جرا ويش؟
كلام ما يطري فبال القرايح ..
" أحلام ليلٍ كذّبتها.. مغابيش
وشمسٍ تنادي: ياااولد وين رايح "
شوفي طريقه ما تضوّي بتهميش
وانا على استعداد اعَكْس اللوايح
ياجوهرة زرق الدميّ المداهيش
العمر مرّه .. والليالي شحايح
ما اقول جدّك جاك نسلٍ من قريش
لكنّ تركع له كبار المدايح
ترثة شيوخٍ ذخرهم مايجي ديش
الله جعل خلقة.. شعوبٍ شرايح
عيالهم ما هم بهلكا معاطيش
فصحونهم ما يقلبون الذبايح..