الشاعر كرار حسين الكربلائي

اريد انساك
#كرار_حسين_الكربلائي
#ملا_باسم_الكربلائي

اقره يناعي الرزيه
العسكري داره خليه
دمعة جبريل
بمصابه تسيل
وناحت لفگده الزچيه
العسكري داره خليه
...
مطرت الدنيه مصايب واختفت شمس الاماني
سورة التوحيد تبچي وناحت السبع المثاني
العسكري بحر السماحه وبالعلم ما إله ثاني
هالليله بديار الغرب
مهظوم مسموم الگلب
وعيونه ظلت عالدرب
من ألم هجره يعاني
من جفن هاجر منامه
يبعث دموعه لعمامه
خلي ايحضرون
يمه ويبچون
هاشم يأهل الحميه
العسكري داره خليه
...
هّجرو من وطن جده واجه لسامره وسكنها
والثره اليسحگ عليها ذهب يتعادل ثمنها
شبعت الناس بزمانه وصار للامه وطنها
من فاطمه عاشر ضوه
بنفاسه تسبيح الهوه
من ساحله الدين ارتوه
وصان عفتها وسننها
للنبي هاي العشيره
صفو كل واحد بديره
قنديل الكون
مخطوف اللون
غابت انواره الزهيه
العسكري داره خليه
...
آه يا ذيج المدارس من تلاوتها خليه
ماكو حس لا نفس بيها بيوت وحي الله ونبيه
العسكري بآخر انفاسه سلم المهدي الوصيه
والمنتظر من غسله
بفيض الدموع الهامله
لن يستمع ون اعتله
التفت لن هاي الزچيه
أم وتعنت لبنها
مگبعه بهمها وحزنها
بخاطر مكسور
يم نعشه تدور
وتگله رحت منديه
العسكري داري خليه
...
من بعد عين ابو المهدي اعلن المهدي غيابه
صار چم عام بمغيبه لجيته تنطر احبابه
معذبين بليل هجره وهو هم عايش عذابه
بالباب ضلع امه انكسر
جد اله مگطوع النحر
وعمات سابيها الدهر
بغرب گعدن بالخرابه
آخر انوار الامامه
اسمه بسجل الامامه
يمته الموعود
للثار يعود
بدنيته اول رزيه
العسكري داره خليه
...
لابد يعود ابو صالح ياخذ من اعداه حيفه
بعينه خزرة علي جده وشمرة العباس سيفه
وراية اهل البيت تعله ويهدم بيوت السقيفه
ونعيش كلنه برحمته
خدام كلنه بدولته
وللناس يفرش سفرته
والحسن يفتح مضيفه
ونوصل الارض المدينه
يبني البقيع بيمينه
بظهوره يبات
الذيب ويه الشات
لوالده ننصب عزيه
العسكري داره خاليه
...
خادم الحسين ( عليه السلام)
كرار حسين الكربلائي
( ابو كميل)

بهالمصيبه عنده مأتم صاحب الزمان
العسكري راح وتيتم صاحب الزمان
بدمعه وبنحيب
ودّع الحبيب
...
المهدي هالليله جمره تفور بصدره
كلنه نادينه الله يعظم أجره
هذي اول مصيبه يشوف بعمره
والده الغالي بيده يوسده بگبره
نحضر اليوم بعزاءه ويلي عالغريب
المهدي نسمع ندائه ويلي عالغريب
جرحه ما يطيب
ودّع الحبيب
...
العسكري اتجرع السم تهدم حيله
المعتمد سمه يوم الحشر يا ويله
ليش ما نلطم وننحب ونبچيله
الكون يبچي لمصابه دمه هالليله
ناحت اليوم الوسيعه وناحت السمه
الناعي صوّت بالفجيعه وناحت السمه
واجب النحيب
ودّع الحبيب
...
من نصب تعزيه لن يشاهد حرمه
عالنعش طاحت وبالمصيبه اتشمه
فاطمه الزهره حضرت تنادي يُمه
سم چبدتك احسه بدليلي سمه
حضرت بسامره تبچي فاطمه البتول
من ضلعها گوه تحچي فاطمه البتول
المنتظر غريب
ودّع الحبيب
...
فاطمه اتگله يالمهدي انظر وضعي
هذا عاشر ولد يمه ابچي وانعي
صار چم مره يبني ايتهشم ضلعي
لياوكت يبقه يوليدي يهمل دمعي
ثاري من عندك اريده بسيفك الامل
والصفعني تگطع ايده بسيفك الامل
يسعر اللهيب
ودع الحبيب
...
وبعد عندك مصيبه وجرح شيروفه
راس الحسين لهسه برماح نشوفه
وابو فاضل هوت عالشريعه اچفوفه
والأشد عمتك بالحبل مچتوفه
چم نحر بالغاضريه يندب العجل
وگلب مهظومه وسبيه يندب العجل
وچم جسد سليب
ودع الحبيب
...
خادم الحسين ( عليه السلام)
كرار حسين الكربلائي

سامره هذا اليوم نصبت عزيه
والعسكري يا ناس داره خليه
ويلي ... ويلي
غاب الامام العسكري الليله
...
يا شيعه هذا اليوم يوم المصيبه
وبعرشه رب الكون واسه حبيبه
للعسكري الموعود نسمع نحيبه
جمر الحزن بالروح يسعر لهيبه
ويلي ... ويلي
غاب الامام العسكري الليله
...
بالغربه چبده انصاب آه والف آه
هذا الجرح چتال يا گلب ينساه
ظل ينحب القران وآياته تنعاه
دين الله صوته يصيح يا حجة الله
ويلي ... ويلي
غاب الامام العسكري الليله
...
استشهد و كل الناس حضرت تودعه
وبلايه عمايمها طلعت تشيعه
يمه يصب جبريل دمعه اعله دمعه
والغالي من ايروح منهو اليرجعه
ويلي ... ويلي
غاب الامام العسكري الليله
...
هلبت يصح خيّال وبگلبه ناره
برض المدينه يصيح وين الغياره
هاشم ابنكم هاي خاليه ادياره
وين اليجرد السيف يطلب بثاره
ويلي ... ويلي
غاب الامام العسكري الليله
...
لاچن نگول اتهون من سكن گبره
بس الغريب حسين محد يحضره
عاري ثلث تيام ظل دامي نحره
والعسكري مات يجريله عبره
ويلي ... ويلي
غاب الامام العسكري الليله
...
خادم الحسين ( عليه السلام)
كرار حسين الكربلائي
( ابو كميل)

گومي بعجل يالزهره
للعسكري بسامره
ودّع حياته مسموم
...
انتي يامن ضلعچ الطاهر تهشّم
نوحي و بسامره گومي نصبي مأتم
فاطمه هالليله مهديكم تيتم
العسكري من غربته حيله تهدم
بالسم تگطع چبده
بروحه يعالج وحده
يوم المصايب هاليوم
...
العسكري يا فاطمه مشبوحه عينه
بروحه ظل يعالج ورادج تجينه
الگال عنچ فاطمه حجه علينه
يون والعالم سمع نوحه وانينه
حزنج يعيش بروحه
لضلعچ چبيره جروحه
بالباب ضلعچ مهشوم
...
فاطمه يا فاطمه بسرعه تعالي
عاشر اولادچ گصت بيه الليالي
گومي صيحي بالحزن جيتك يغالي
ليا وكت يبقه عليكم نوحي عالي
صوتج يبضعه ينادي
ودعت كل ويلادي
لو منذبح لو مسموم
...
العسكري لمن جرع كاس المنيه
لغيبته سامره نصبتله عزيه
والحسن يم الحسن داره خليه
وشيعوها جنازته اهل الحميه
المهدي ينوح لوحده
غير الصبر ماعنده
ومفارگه اعيونه النوم
...
المهدي لو شفتيه إِحچيله اعله وضعچ
سولفيله الصار يالزهره ويسمعچ
فاطمه يا فاطمه راويله ضلعچ
يشوف سطرة عينج من ايشوف دمعچ
احچيله طاح اجنيني
ويا يُمه سطره بعيني
مظلومه تحچي لمظلوم
...
يالزچيه احچيله عن الغاضريه
اشلون داست فوگ جده الاعوجيه
سولفيله عمته زينب سبيه
وبالخرابه اعله النحر ماتت رقيه
يمته يسل سيف البين
واينادي يا ثار احسين
ناطرنه يومه المعلوم
...
خادم الحسين ( عليه السلام)
كرار حسين الكربلائي
( ابو كميل)

يالعسكري جرحك ليل .. كل فجر ما بي يبدي
الله وياك .. يالفرگاك .. يتمني وانه المهدي
...
چانت الدنيه حلوه وسا مُره
مره مماتك غربه وسامره
يا ملك صاير موطنك سامره
انت الملك .. وشتمتلك
ارض وسمه .. بسمك مُلك
اكبر سلاطين الناس .. ابابك تگف وتجدي
...
يرباة عز للذل طبعكم يابه
للناس كل الخير چفكم يابه
المهدي عَله اجنازتك يصرخ يابه
بنص ضامري وبخاطري
نارك تشب يالعسكري
مو چبدك بسم ممرود .. بسمهم تمرد چبدي
..
لكل من يصيح ادركني توگف دارك
سر الحياة اشلون موتك دارك
يالعسكري ظلت خليه دارك
طيف ورحت .. واتيمتت
يا ريت من گبلك متت
يا والدي واتمنيت .. ينحفر يمك لحدي
...
حكم الظلم ميدوم دام الغي به
وادم تربت عالچذب والغيبه
من بعدك اعلن غيبتي والغَيبه
اتطوّل دهر عن البشر
ورايتي عد عمي الگمر
واندعي بجاه العباس .. ربي يگرّب وعدي
..
دنيانه بالهم والحزن عمتنه
بالطف مصيبه من البچي عمتنه
حسين انذبح وصعب سبي عمتنه
يمته تصح .. طلعة صبح
واهتف يثار المنذبح
يالعسكري بذاك اليوم .. تنشف مدامع خدي
..
من السقيفه الگلب يسعر بيداي
وبسيفي لترس من دماهم بيداي
اصلب الاول مع الثاني بيداي
سيفي اليشع .. بي ينگطع
چف الكسر اشرف ضلع
ولگبر امي الزهراء .. باهل المجالس احدي
...
خادم الحسين ( عليه السلام)
كرار حسين الكربلائي
( آبو كُميل)