Mohammed ElGhaleez

السلام عليكم ورحمة الله وبركاته
صباح الخير يا شباب
يقول ابن الجوزي رحمه الله: "يا نفس، اتعبي قليلًا، تستريحي في الفردوس كثيرًا."
الطاعة محتاجة مجاهدة، والطريق مش دايمًا هيكون سهل!
غض البصر، والصدق، ومقاومة هواك، وترك حاجة نفسك عايزاها عشان ربنا..
كل الحاجات دي وغيرها أحيانًا بتحتاج منك تعب وصبر..
لكن محتاج تفتكر إن التعب ده مش دائم..
وإن الدنيا كلها مهما طالت قصيرة، وإن كل مجاهدة بتبذلها لله، وكل مرة بتختار فيها رضاه على هوى نفسك، ليها غاية أعظم من كل راحة ممكن تدركها هنا..
فمتستغربش لما تلاقي إنك بتجاهد نفسك في الطاعة، أو بتقاوم شهوة، أو بتصبر على حاجة نفسك مش عايزاها..
دي طبيعة الطريق..
فاصبر على مشقة الطاعة، ومتخليش لذة مؤقتة تحرمك من نعيم أبقى..
وكل ما تحس إن الطريق تقيل، فكّر نفسك بقول الله عز وجل: ﴿...إِنَّمَا هَٰذِهِ الْحَيَاةُ الدُّنْيَا مَتَاعٌ وَإِنَّ الْآخِرَةَ هِيَ دَارُ الْقَرَارِ﴾.
t.me/moh_elghaleez

لكل مبتلى بالعادة السرية ..
#قصتنا
#محمد_الغليظ

حق أخوك المسلم عليك إنك تحترمه وتدي كل حد مكانته اللائقة به..
فمعاملة الكبير مش زي الصغير، ومعاملة الأب مش زي معاملة الابن، وكذلك أصحاب المكانة سواء دينية أو علمية أو حتى إجتماعية.
قال ﷺ: "ليس منَّا مَن لم يُوقِّرْ كبيرَنا، ويرحَمْ صغيرَنا"..
وعن ابنِ طاوُسٍ، عن أبيه، قال: "من السُّنَّةِ أن يُوَقَّرَ أربعةٌ: العالِمُ، وذو الشَّيبةِ، والسُّلطانُ، والوالِدُ"..
ودا يكون بإنك تحترمهم وتتأدب معاهم في القول والفعل زي إنك تقوم عشان يقعدوا في المجلس أو في المواصلات مثلًا لو مافيش مكان.
وتبدأ إنت بالسلام عليهم، ومتعليش صوتك في الكلام معاهم، وعدم الإساءة أو الأذى أو الانتقاص منهم، ومعاملتهم بالرفق والحِلم ولين القول.
ومن صور احترام أخوك المسلم:
▪
︎ إنكم لو كنتم تلاتة؛ فمتتكلمش بوشوشة وصوت منخفض مع واحد والتاني مش معاكم في الحوار لأن الرسول ﷺ وصّى بكدا وقال: "إِذَا كُنْتُمْ ثَلَاثَةً فَلَا يَتَنَاجَى اثْنَانِ دُونَ صَاحِبِهِمَا؛ فَإِنَّ ذَلِكَ يُحْزِنُهُ".
▪
︎ مراعاة الحقوق اللي النبي ﷺ وصّي بيها في حديثه: "حَقُّ الْمُسْلِمِ عَلَى الْمُسْلِمِ سِتٌّ: إِذَا لَقِيتَهُ فَسَلِّمْ عَلَيْهِ، وإِذَا دَعَاكَ فَأَجِبْهُ، وإِذَا اسْتَنْصَحَكَ فَانْصَحْهُ، وإِذَا عَطَسَ فَحَمِدَ اللَّهَ فَسَمِّتْهُ، وإِذَا مَرِضَ فَعُدْهُ، وإِذَا مَاتَ فَاتْبَعْهُ".
▪
︎ تقدير ظروف الآخرين، والرفق بالمخطئ أو قليل العلم وتعليمه ونصحه من غير جرح مشاعره أو التقليل منه.
▪
︎ احترام الضعفاء والمساكين والخدم وحُسن التعامل معاهم، واحترام الجار والحفاظ على حقه.
وخليك عارف إن من أكبر عوائق احترام الآخرين الكِبر وسوء الخُلُق، وإهمال تربية الأبناء على احترام الآخرين.
فلازم تعوّد نفسك وتربي أولادك على اتباع هدي النبي ﷺ في كل شيء.
وتتعود تحب لأخيك ما تحب لنفسك، فزي ما إنت تحب الناس تحترمك وتقدرك = احترم غيرك وقدره، فالنبي ﷺ قال: "لا يُؤمِنُ أحَدُكم حتَّى يُحِبَّ لأخيه ما يُحِبُّ لنفسِه".
#خياركم
t.me/moh_elghaleez

السلام عليكم ورحمة الله وبركاته
صباح الخير يا شباب
محتاج من وقت للتاني تقف مع نفسك وتراجع نيتك..
إنت بتعمل اللي بتعمله ده لمين؟
لأنك ممكن تعمل حاجة كويسة جدًا، وتتعب فيها، وتبذل مجهود كبير، والناس تشوفك شاطر، ومميز، وأحسن واحد..
لكن في النهاية، لو نيتك مكانتش لله، إيه اللي هيفضلك!!
عشان كده متشغلش نفسك طول الوقت إن الناس تشوفك إزاي، ولا إنهم يعجبوا بشغلك، ولا إنك تثبت إنك أحسن من غيرك..
واسأل نفسك دايمًا:
هل أنا بعمل ده عشان ربنا يرضى عني؟
ولا عشان الناس تشوفني وتُعجب بيا؟
وده مش معناه إنك متحبش إن شغلك يكون كويس، أو إنك متفرحش بكلمة حلوة من الناس..
لكن الخطر إن رضا الناس يبقى هو اللي بيحركك، وإنك تبدأ تعمل الحاجة عشان الناس تشوفك وتمدح فيك، مش عشان ربنا يرضى عنها!
فراجع نيتك دايمًا، وجدّدها، وكل ما تحس إن قلبك بدأ يتعلق بنظر الناس؛ ارجع بسرعة لله..
لأن في النهاية "إنما الأعمال بالنيات".
اللهم ارزقنا الإخلاص في النية والقول والعمل، واجعل أعمالنا كلها صالحة، ولوجهك خالصة، ولا تجعل لأحد فيها شيء.
t.me/moh_elghaleez

كيف أتعامل مع الحنين إلى الذنب؟
😢
#من_أسئلتكم
#قصتنا
#محمد_الغليظ

مش هقلل من كرامتي واعتذر!!
بعض الناس بتعتقد إن الاعتذار ذل!
لكن الحقيقة إن الاعتذار قوة وشجاعة
وإن إخضاع نفسك للحق دا هو الكرامة الحقيقية!
الاعتذار معناه إنك بتختار جانب الحق وبتهزم هوى النفس، وبتحترم حقوق الآخرين وحُرماتهم.
بتعتذر لما تخطئ في حق غيرك سواء كان غلطك مقصود أو غير مقصود، ولو العكس تقبل من الناس العُذر.
فلازم ثقافة الاعتذار والتماس العُذر تكون جزء أساسي في علاقتنا بالناس اللي حوالينا، وإلا لن تستقيم الحياة لأن الانسان مجبول على الخطأ!
والاستكبار عن الرجوع للحق من أسوأ الطُرق اللي ممكن حد يمشي فيها بسبب الكِبر والعُجب.
وقمة الإحسان إنك تعذر غيرك حتى لو مجاش اعتذر، وتقدّر ظروفه والأسباب اللي خلته يخطئ.
ومهم يكون اعتذارك صادق مش مجرد رفع للعتب وخلاص!
المنافقين كانوا دايمًا بيعتذروا للنبي ﷺ لكن عذرهم مكانش صادق؛ لأن مكانش فيه مبرر حقيقي لتقصيرهم وقعودهم وخذلانهم للمسلمين.
والرسول ﷺ عرَّف الكبر إنه "بَطَرُ الْحَقِّ وَغَمْطُ النَّاسِ"
= التكبر عن الإقرار بالحق، واحتقار الناس.
الشخص المُتكبر بيعمل كل حاجة عشان ميعتذرش أبدًا..
لدرجة إن فيه ناس ممكن تكدب عشان تخلق لنفسها مبررات تهرب بيها من الاعتذار، فتبقى عالجت الخطأ بخطأ أكبر!
وافتكر إن إبليس لما رفض السجود لآدم عليه السلام واستكبر لم يتراجع، ولكن قال مبررات ﴿أَنَا خَيْرٌ مِنْهُ خَلَقْتَنِي مِنْ نَارٍ وَخَلَقْتَهُ مِنْ طِينٍ} بدل ما يتوب لله عن خطأه.
الاعتذار بيطيّب القلوب، وبيحافظ على العلاقات وبيساعدك تتعامل فيها بشكل سَوي يرضي الله عز وجل، وهو طاعة لله تعالى قبل أن يكون استدامة للود.
وأخيرًا اعرف إن الأخلاق ملازمة لصاحبها؛ يعني بيتعامل بنفس الخُلُق سواء كان صاحب الحق أو العكس..
بيتعامل بنفس الخُلُق في رضاه وفي غضبه، مع الضعيف أو مع القوي.
أما تغيّر الخُلُق على حسب الأهواء والمصالح دا بيبعدها عن كونها لله، زي اللي لما بيكون صاحب حق بياخده كامل ولما يكون هو اللي عليه الحق يطلعه ناقص!
فخليك منصف وشجاع واعتذر عند الخطأ وربي ولادك على الخُلُق دا.
اللهم ارزقنا حُسن الخُلُق، وجنبنا مُنكرات الأخلاق والأهواء.
#خياركم
t.me/moh_elghaleez

السلام عليكم ورحمة الله وبركاته
صباح الخير يا شباب
من أعظم ما يمكن استشعاره وإنت بتدعي، إنك تفتكر إنك بتدعو ربًّا سميعًا واسعًا، لا يشغله نداء عن نداء، ولا دعاء عن دعاء..
كل واحد فينا ممكن يقف في نفس اللحظة ويدعي ربنا بحاجة مختلفة، وربنا سبحانه يسمع دعاء الجميع، ويعلم حاجة كل واحد، وما في قلب كل واحد..
سبحانه واسع الفضل، واسع الرحمة، واسع العطاء، ورحمته تسعنا جميعًا..
فادعُ بكل اللي في قلبك، من غير تردد، ومن غير ما تستصغر طلبك..
وافتكر إنك لما ترفع إيدك وتقول: "يا رب"، فأنت بتسأل من لا تنفد خزائنه، ولا يعجزه شيء، ولا يشغله شأن عن شأن..
فاطمئن!
ربنا سامعك، وعالم بحاجتك، وعالم بما في قلبك، ورحمته أوسع من كل ما تتمنى وتخاف..
اللهم ارزقنا حسن الدعاء، وصدق التوكل، واليقين بسعة فضلك ورحمتك.
t.me/moh_elghaleez

لما تتقوى بيك صدقني هتكمل
🤝🏻
#لا_تكن_لزوجتك_فتنة
#محمد_الغليظ