Mufarrida|Bookblog
#mentugatgankitob
Kitob nomi: Hadis va hayot, 22-juz.
Sahifa: 331
Ma'lum sabablarga ko'ra, xalqimiz Allohdan, Rasululloh sollallohu alayhi vasallamdan, islomdan, iymondan, shariatdan, tariqatdan, tariximizdan va tarixiy shaxslarimizdan tamoman uzoqlashtirdi. O'ylab ko'ring, biz Muhammad sollallohu alayhi vasallam ummatining uchinchi xalifasi va shaxsi bo'lmish hazrati Usmon roziyollohu anhu haqlarida nima bilamiz (bilasiz) ?!
•Shayh Muhammad Sodiq Muhammad Yusuf.
Nabiy sollallohu alayhi vasallam:
"أَلاَ أَسْتَحِي مِنْ رَجُلٍ تَسْتَحْيِ مِنْهُ الْمَلاَئِكَة"
(رواه الامام مسلم)
ya'ni: “Farishtalar hayo qiladigan odamdan men hayo qilmas ekanmanmi?!” dedilar (Imom Muslim rivoyatlari).
Ushbu kitobda hazrati Usmon ibn Affon r.a ning hayotlari va fazilatlari, u kishining shaxsiyatlari o'zlaridan oldin o'tgan ikki xalifadan butunlay farq qilishining guvohi bo'lasiz. Ularning hammalari ham Muhammad alayhissalom madrasalarining peshqadam talabalaridir. Lekin shaxsiyatlarining turli xil bo'lgani tabiiy bir holat. Hazrati Usmon ibn Affon r.a ning hayotlarini o'rganish jarayonida esa ana shu tabiiy jarayondagi mo'jizani ko'ramiz. Hazrati Usmon ibn Affon raziyallohu anhu xalifaliklari davrida o‘zlaridan avvalgi xalifalarning ishlarini davom ettirib, musulmonlar ommasi uchun foydali bo‘lgan katta ishlarni amalga oshirdilar. Jumladan, Qur'ondan nusxalar ko‘chirtirib, barcha o‘lkalarga tarqatish, Masjidi Nabaviyni kengaytirish, musulmonlar uchun dengiz flotini tashkil etilishi, Juma namozida birinchi azonning ziyoda qilinishi, qo‘riqxonalar tashkil qilish, masjidlarni xushbo‘y qilish va muazzinlarga maosh belgilash kabi islohatlarni joriy qildilar.
Ali roziyallohu anhudan rivoyat qilinadi: «Nabiy sollallohu alayhi vasallam: «Men hikmat hovlisiman, Ali uning eshigidir», dedilar» (Imom Termiziy, Tabaroniy va Hokim rivoyat qilishgan.
Hazrati Ali sahobalarning eng ulug‘ olimlaridan edilar. Ali ibn Abu Tolib roziyallohu anhu Payg‘ambar sollallohu alayhi vasallamning huzurlarida u Zotga nozil bo‘lgan oyati karimalarni yozib borgan oz sonli kotiblaridan bo‘lish bilan birga, Rasululloh sollallohu alayhi vasallamdan Qur’oni Karimni to‘liq yod olgan va yod olganlarini u Zotga o‘qib berib, o‘tkazib olgan qorilardan biri ham edilar. Keyinchalik u kishi Qur’oni Karimni Nabiy sollallohu alayhi vasallamdan qanday qabul qilib olgan bo‘lsalar, boshqalarga ham xuddi o‘shanday qilib o‘tkazdilar. Ali ibn Abu Tolib karramallohu vajhahudan Qur’oni Karimni to‘liq yod olib, o‘tkazgan ulug‘ zotlar ichida Abul Asvad ad-Dualiy, Abu Abdurrahmon as-Silmiy, Abdurrahmon ibn Abu Laylo va boshqalar bor edilar. Qur’oni Karimning mashhur yetti qiroatidan biri bo‘lgan «Hamza qiroati» hazrati Ali ibn Abu Tolib roziyallohu anhudan ham rivoyat qilingan.
Hazrati Alining xalifalik davri ulkan fitnalar zamoniga to‘g‘ri keldi. U kishi rahbar bo‘lganlarida Jamal va Siffiyn voqealari yuz berdi. Hazrati Ali turli toifachi va fitnachi guruhlarga qattiq qarshi turdilar, Islom birodarligini asrab qolish, fitnalarga barham berishda mislsiz matonat va jonbozlik ko‘rsatdilar. Ali ibn Abu Tolib karramallohu vajhahu fitnachi xavorijlar bilan turli yo‘llarni ishga solib, gaplashib ko‘rdilar, nasihat qildilar, ammo foydasi bo‘lmadi. Nihoyat, ularni yo‘lga solishdan umidlarini uzganlaridan so‘ng: «Agar bizga qarshi xuruj qilmasangiz, sizlarni masjidlarimizdan man qilmaymiz. Modomiki, qo‘llaringiz biz bilan ekan, sizlarni o‘ljadan mahrum qilmaymiz. Bizga qarshi urush qilmaguningizcha, biz sizga qarshi urush qilmaymiz», dedilar. Bu hazrati Ali ibn Abu Tolib roziyallohu anhuning nihoyatda bag‘rikeng inson ekanlariga yana bir dalildir. U kishi o‘zlarini kofir deb turgan qavmga ana shunday iltifotlarni ko‘rsatayotgan edilar.
#tavsiya
#mentugatgankitob
Kitob nomi: Hadis va hayot. 21-juz
Muallif: Shayh Muhammad Sodiq Muhammad Yusuf
Islom tarixining eng yorqin sahifalari, shubhasiz, Rasululloh sollallohu alayhi vasallamdan keyingi ikki buyuk xalifa Abu Bakr Siddiq va Umar ibn Xattob roziyallohu anhumoning hayoti bilan chambarchas bog‘liq. "Hadis va hayot" turkumining 21-juzi aynan shu ikki zotning siyratiga bag‘ishlangan bo‘lib, hadislar silsilasi orqali ma’naviy tarbiya bilan yuzlashtiradi. Muallif ushbu juzda Abu Bakr roziyallohu anhuning mislsiz sadoqati va Umar roziyallohu anhuning keskir adolatini hadislar tili bilan ochib beradi.
Bu ikki xislat jamiyatning ustuni ekani asar davomida asosiy g‘oya sifatida namoyon bo‘ladi. Kitobda keltirilgan har bir hadisning sharhi bugungi kun voqeligi bilan bog‘lanadi. Bu o‘quvchiga "sahobalar qanday yashagan ?" degan savoldan ko‘ra, "ularning hayotidan bugun qanday namuna olish mumkin ?" degan savolga javob topishga yordam beradi. Shayx hazratlariga xos bo‘lgan vazminlik va ilmiy aniqlik ushbu juzda ham saqlangan. Hech qanday mubolag‘asiz, ortiqcha hissiyotlarga berilmasdan, sof islomiy tahlil asosida yozilgani asarning qadrini oshiradi.
Nega bu kitobni o‘qish kerak ? Ushbu juz nafaqat diniy bilimni boyitadi, balki shaxsiy xarakter ustida ishlash uchun ham kuchli motivatsiya beradi. Abu Bakr roziyallohu anhuning muloyimligi ortidagi qat’iyat va Umar roziyallohu anhuning haybatli siymosi ostidagi rahm-shafqat har qanday zamon uchun haqiqiy yetakchilik namunasidir. "Hadis va hayot"ning 21-juzi saodat asri nafasini tuymoqchi bo‘lgan, iymoniy quvvat va ruhiy xotirjamlik izlayotgan har bir kitobxon uchun bebaho manbadir. Bu kitob bizga inson qadr-qimmati va e’tiqod yo‘lidagi sobitqadamlikni o‘rgatadi.
#mentugatgankitob
Kitob nomi: Men Yusuf
Muallif: Ayman Attum
Ushbu kitob Yusuf alayhissalomni hayotlari haqida bayon qiladi. Yusuf alayhissalomga kelgan sinovlar haqida o'rganmoqchi bo'lgan barcha kitobxonlarga tavsiya etaman.
Yusuf surasini shunchaki mo‘jizalar haqidagi qissa deb emas, o‘z hayotingizdagi og‘riqlarning davosi deb o‘qisangiz, hammasi o‘zgaradi. Inson ba’zan eng yaqinlaridan shunday zarba yeydiki, go‘yo dunyoda boshqa hech kimga ishonib bo‘lmaydigandek tuyuladi. Yusuf alayhissalomni ham o‘z jigarlari quduqqa tashlab ketishganda, u ham xuddi shunday yolg‘izlikni va adolatsizlikni his qilgan. Lekin o‘sha quduq Yusuf alayhissalomni yo‘q qilib yubormadi, aksincha, buyuk bir hayotning boshlanishi bo‘ldi. Hayotda hamma narsa biz xohlagandek bo‘lavermaydi. Ba’zan to‘g‘ri yashaganingiz, birovning haqiga tegmaganingiz uchun ham boshingizga tuhmatlar tushishi, xuddi Yusuf alayhissalom kabi yillar davomida zindonlarda ya’ni o‘zingiz istamagan, ruhingiz siqiladigan vaziyatlarda qolib ketishingiz mumkin asloda. Zulayho bilan bo'lgan voqea, imtihoni bizga shuni o‘rgatadiki, inson eng og‘ir damda ham nafsi va g‘ururini saqlab qolsa, Alloh uni hammadan baland qilib qo‘yadi.
Siz hozir qiynalayotgan, tushunilmayotgan yoki quduqning tubida turgandek his qilayotgan bo‘lsangiz, Ya’qub alayhissalomni eslang. U kishi farzand dog‘ida ko‘zlari ojiz bo‘lib qolguncha yig‘ladi, lekin bir marta bo‘lsa ham "Nega men?" demadi. Faqatgina: "Men dardimni Allohga aytyapman", dedi xolos. Haqiqiy samimiylik mana shunda dardni odamlarga doston qilishda emas, uni Bergan Zot bilan yuzma-yuz gaplashishda. Oxir-oqibat, Yusuf alayhissalom hamma narsaga erishdi kuchga ham, taxtga ham, uchrashuvga ham. Lekin uning eng katta g‘alabasi taxtga o‘tirgani emas, balki uni quduqqa tashlagan akalarini kechirgani edi. O‘ch olishga kuchi yetib turganida, ularning aybini yuziga solmay, "Bugun sizlarga malomat yo‘q" deya olish bu insoniy ruhning eng yuqori nuqtasi. Yusuf alayhissalom hikoyasidagi xulosa shunday, hayotingizdagi har bir quduq bu yuksaklikka chiqish uchun bir zinapoyadir. Niyatingizni toza tuting, sabr qiling va ishoning Yusuf alayhissalomni quduqdan chiqarib, Misr aziziga aylantirgan Zot, hozirgi og‘riqlaringizni ham albatta xayrli yakun bilan to‘ldiradi. Taqdirning yozig‘i har doim bizning orzularimizdan chiroyliroq bo‘ladi.
Kitob oʻqimasa va kitob hadya qilishni bilmasa. Joni omon boʻlsinu bizdan yiroq boʻlsin)
#mentugatgankitob
Kitob nomi: Arosat
Muallif: Kadir Akel
Muallifning har bir asarida voqealar bir hil emasligi va takrorlanmasligi meni hamisha hayron qoldiradi. Garchi barcha asarlarining zamirida taqvo va qalb amallari yotsa-da, har safar yondashuv butunlay boshqacha, jarayon juda qiziqarli. Bu kitobni bitta o‘tirishda o‘qib tugatish mumkin, tili juda yengil, ammo o‘zini taftish qilishga chog‘langan, ichki dunyosiga nazar solgan inson uchun hazmi ancha og‘ir. Asar voqealari yirik mebel fabrikasi egasi Barlosbeyning hayoti atrofida aylanadi. U ko‘pning haqqini yegan, nahs ishlardan tap tortmaydigan, Allohdan qo‘rqmaydigan zarra qadar vijdoni yo'q odam edi.
Biroq Misr cho‘llarida asirga tushishi, yordamchisi Rif’at bilan bir parcha nonga zor, suvsiz va chorasiz qolishi uning butun dunyoqarashini ostin-ustun qilib yubordi. Inson tabiatidagi eng achchiq va o'yga toldiradigan haqiqat shuki, u faqat boshi berk ko‘chaga kirib, kulfat kelgandagina Robbini yodiga oladi. Go'yo barcha eshiklar yopilgandagina asl eshik borligini eslaymiz. Banda qancha gunoh va ma’siyatga botmasin, faqat o‘z manfaati uchun yoki ishi tushganida Unga yuzlanmasin, Alloh hech qachon "men faqatgina qiyinchilikda esingga tushamanmi?" deb bandasini haydamaydi. Biz o'zimizni kechira olmaydigan darajada xatolar qilsak ham, Uning rahmat yomg'irlari ustimizdan yog'ilaveradi. Bu asar menga tavbaning naqadar katta imkon ekanini yana bir bor eslatdi.
Barlosbeyning boylik va kibr cho‘qqisidan iymon va tavba halovatiga qaytishi turk adabiyotida ko‘p uchraydigan mavzu bo‘lsa-da, bu kitobning ta'siri boshqacha bo'ldi. Balki anchadan buyon bu yo'nalishda asar o'qimaganim uchundir, balki qalbim aynan shu eslatmaga muhtoj bo'lganidir. Kitobni yopar ekansan, beixtiyor o'z hayotingdagi "arosatlar" haqida o'ylay boshlaysan. Inson dunyo matohiga aldanib, eng muhimi o'z fitratini unutib qo'yishi naqadar oson, ammo o'sha fitratga qaytish yo'li har qanday cho'ldagi mashaqqatdan ham ustunroq ajr berishini his qildim. Har birimiz aslida o'sha cho'ldagi Barlosmiz, faqat kimdir buni ertaroq, kimdir esa kulfat kelganda anglab yetadi.
#mentugatgankitob
Kitob nomi: Rasululloh
▫
avlodlari.
Islomda ahli baytning o‘rni juda yuqori va ularni tanish har bir musulmon uchun zaruriy bilim sanaladi. Rasulullohning zurriyotlari u zotning axloqini, fe’l-atvorini va yashash tarzini bevosita o‘zlarida mujassam qilgan eng yaqin insonlardir. Ularning hayotini o‘rganish orqali biz siyratni mukammalroq tushunamiz. Chunki Payg‘ambarimizning oilaviy munosabatlari, farzand va nabira tarbiyasidagi uslublari biz uchun eng to‘g‘ri namunadir. Bugungi kunda insonlar o‘ziga turli soxta qahramonlarni namuna qilib olayotgan bir paytda, pokiza nasab egalarini tanish tarbiya uchun juda muhim.
Ularni tanish orqali biz Rasulullohga bo‘lgan muhabbatimizni amalda ko‘rsatamiz. Zotan, u zotning avlodlarini sevish va ularga hurmat ko‘rsatish iymonning bir qismidir. Kitobda bayon qilingan ma’lumotlar bizga haqiqiy taqvo va sadoqat qanday bo‘lishini ko‘rsatib beradi. Avlodlarni tanish bu dinimizning omonatlarini kimlar yetkazganini, Islom xonadoni qanday qadriyatlar ustiga qurilganini tushunishdir. Bu bilim bizni adashishdan saqlaydi va ma’naviy ildizlarimizga bog‘laydi.
Ushbu kitobda payg'ambarimiz avlodlari haqida mutolaa ila siyrat ilmiga doir ishonchli manbaalarga ega bo'lasiz biznillah.
Kitob sotib olishda quyidagi kabi niyat qilish kerak:
💡
undan foyda olishni niyat qiling, shunchaki chiroyi uchun, javobni bezab turishi uchun olmang.
💡
vaqtni yaxshilikda oʻtkazishni niyat qiling.
💡
ilmni yod olish uchun uni tarqatishni niyat qiling.
💡
kitob oʻqish bilan mashgʻul boʻlib, mish-mishlar, behuda xatti-harakatlardan uzoq bolishni niyat qiling.
💡
kitobni oqib turish uchun soʻragan odamga berishni niyat qiling, albatta, bunda olganda asrab-avaylab beradigan kishilarga beriladi.
©
Gʻiyosiddin Yusuf