Nodir Jonuzoq | she’r va shuur

#nazm
ONAM
Tovonimga kirgan tikanning uchi
Onam yuragiga borib qadalar.
Junjikib, chuchkirsam – tushda koʻrguvchi,
Sahardan duosi menga atalar.
Jismidin jon uzib ato qilganim,
Balki tugʻilganim – xato qilganim...
Yoshin mildiratib, ado qilganim,
Sogʻinchi koʻksida silqib, maddalar.
Garchand malikaday koʻrinar  begʻam,
Oltin bekaman, der, baxti but, bekam.
Onalar otaga aylanar ekan –
Xudoning qasriga ketsa dadalar.
Shoir yuragim bor, kim nima desin,
Har kim oʻz yoʻlida yugurib-yelsin.
Mengamas, onamga rahmingiz kelsin,
Sheʼrimdan bezor-u mendan zadalar.
Kuygan koʻkayimga puflayman goho,
Oʻchmasa, tutayman – uflayman goho.
Ochiq qalbimni ham qulflayman goho,
Koʻmilar oʻzimga bergan vaʼdalar...
Kelsa, olib kelar qishloq  gardini,
Yoʻlma-yoʻl taratib rayhon atrini.
Mendan yaxshi bilar onam qadrini
Boshiga soyabon oʻrik, sadalar.
Yoʻl qarab qarigan onajonginam!
Hech kimga taʼnam yoʻq, oʻzimga – ginam.
Koshki poyingizda boʻlsaydim  gilam,
Kerak boʻlmas edi taskin-daldalar...
Nodir Jonuzoq
📱
Telegram
📱
Instagram
📱
Veb-sayt
📱
Facebook

#
Мустақиллик_34_йил
​​
📹
Самарқандга хуш келдингиз, Самарқандга!
Нодир ЖОНУЗОҚ,
шоир.
✅
@Zarnews_uz

TABRIK
Bugun Oʻzbekiston xalq shoiri Usmon Azim qutlugʻ 75 yoshini qarshi olmoqda. Oʻzining betakror ijodi bilan qalb va tafakkur dunyomizni boyitib kelayotgan, ruhimizda bedorlik qoʻngʻirogʻini chalib turgan ustoz adibimizni tavallud ayyomi bilan chin yurakdan tabriklaymiz. Baxtimizga doimo sogʻ-omon boʻlsinlar!
* * *
Oʻzingni ayama,
Beshafqat boʻlgin.
Joningga solib tur gohida burov.
Shunda
Topiladi
Xoin boʻlaging —
Unga rahm qilma,
Qatl et darrov.
Oʻzingni ayama,
Beshafqat boʻlgin.
Jang qil
Bila turib
Magʻlubiyatni.
Shunda
Chekinadi
Sotqin boʻlaging —
Mahv et sharmandani,
Mahv et uyatni.
Mayda-mayda boʻlma,
Mudom butun boʻl,
Oʻzingni oʻzingga qilmagin talosh.
Bir tan boʻl,
Bir soʻz boʻl,
Bitta tugun boʻl —
Faqat bitta yurak,
Faqat bitta bosh.
Ammo kurashlarda qurbonlik rasm,
Seni tashlab ketsa
Sen sevgan hayot,
Ming bitta tobutda taning yotmasin
Doʻstlaring koʻtargan
Bir tobutda yot!
*  *  *
Goh gujum shovullar, goh shitirlar tok,
Bu — bogʻda adashgan parishon shamol.
Bormisan olamda, yuribsanmi sogʻ,
Shamolday yoʻllarni yoʻqotgan ayol.
Sensiz — bahorlarim kuz boʻldi manim,
Men sensiz sargʻaydim,
Men sensiz kuydim,
Bir tirik gulxanga aylandi tanim,
Shu olov ichida bir seni suydim.
Sen — bogʻlar qoʻynida qiynalgan shamol,
Senga yoʻl bermaydi shoxlar chalkashib...
Yam-yashil bogʻlarda adashgan ayol,
Men olov ichida qoldim adashib.
* * *
Men uygʻonsam,
uyim uygʻongan boʻladi.
Oshxonada choy qoʻyayotgan boʻladi uyim,
“Koʻchaga
dori ichmasdan
chiqib ketmasin”, deb tashvishlanayotgan boʻladi.
“Kayfiyati koʻtarilsin” deb
biror qiziq gap tayyorlayotgandir ehtimol.
Ha, yana kiyimlarimni ham
dazmollab qoʻygan.
Uyim – bu toʻrt devor emas,
Uyim – jihozlar, buyumlar, kitoblar emas.
Uyim – mana shu ayol.
Uning ismi – Raʼno.
Koʻnglim yorishmogʻini istasam,
takror-takror aytaman
uning ismini.
Ellik yilki,
shu uyimni
koʻchadan
sogʻinib
qaytganim-qaytgandir.
–––––––––
Ўзингни аяма,
Бешафқат бўлгин.
Жонингга солиб тур гоҳида буров.
Шунда
Топилади
Хоин бўлагинг —
Унга раҳм қилма,
Қатл эт дарров.
Ўзингни аяма,
Бешафқат бўлгин.
Жанг қил
Била туриб
Мағлубиятни.
Шунда
Чекинади
Сотқин бўлагинг —
Маҳв эт шармандани,
Маҳв эт уятни.
Майда-майда бўлма,
Мудом бутун бўл,
Ўзингни ўзингга қилмагин талош.
Бир тан бўл,
Бир сўз бўл,
Битта тугун бўл —
Фақат битта юрак,
Фақат битта бош.
Аммо курашларда қурбонлик расм,
Сени ташлаб кетса
Сен севган ҳаёт,
Минг битта тобутда танинг ётмасин
Дўстларинг кўтарган
Бир тобутда ёт!
*  *  *
Гоҳ гужум шовуллар, гоҳ шитирлар ток,
Бу — боғда адашган паришон шамол.
Бормисан оламда, юрибсанми соғ,
Шамолдай йўлларни йўқотган аёл.
Сенсиз — баҳорларим куз бўлди маним,
Мен сенсиз сарғайдим,
Мен сенсиз куйдим,
Бир тирик гулханга айланди таним,
Шу олов ичида бир сени суйдим.
Сен — боғлар қўйнида қийналган шамол,
Сенга йўл бермайди шохлар чалкашиб...
Ям-яшил боғларда адашган аёл,
Мен олов ичида қолдим адашиб.
* * *
Мен уйғонсам,
уйим уйғонган бўлади.
Ошхонада чой қўяётган бўлади уйим,
“Кўчага
дори ичмасдан
чиқиб кетмасин”, деб ташвишланаётган бўлади.
“Кайфияти кўтарилсин” деб
бирор қизиқ гап тайёрлаётгандир эҳтимол.
Ҳа, яна кийимларимни ҳам
дазмоллаб қўйган.
Уйим – бу тўрт девор эмас,
Уйим – жиҳозлар, буюмлар, китоблар эмас.
Уйим – мана шу аёл.
Унинг исми – Раъно.
Кўнглим ёришмоғини истасам,
такрор-такрор айтаман
унинг исмини.
Эллик йилки,
шу уйимни
кўчадан
соғиниб
қайтганим-қайтгандир.
УСМОН АЗИМ
@n_jonuzoq

HAMDARDLIK
Oʻzbekiston Yozuvchilar uyushmasi aʼzosi, taniqli shoir Botirjon Ergashevga onasi
SORAXON AYA
ning
vafoti munosabati bilan chuqur hamdardlik bildiramiz.
@n_jonuzoq

20-июль – устоз Эшқобил ШУКУР таваллуд топган кун!
Ўзбек адабиётининг таниқли вакили, шоир ва носир, Ўзбекистонда хизмат кўрсатган маданият ходими, “Маънавий ҳаёт” журналининг бош муҳаррири Эшқобил Шукур 1962 йил 20 июлда Сурхондарё вилоятининг Қумқўрғон туманида, Боймоқли қишлоғида туғилган.
«Юракни ўрганиш», «Сочлари сумбул-сумбул», «Тунги гуллар», «Яшил қушлар», «Ҳамал айвони», «Кўҳна боғ ривоятлари», «Кўз юмиб кўрганларим», «Бобосўз изидан», «Аср афсоналари» китобларининг муаллифи. Эшқобил Шукур қаламидан тўкилган шеърий ва насрий сатрларнинг ҳар бирига халқ достонлари, эртак, афсоналари, қадим ривоятларининг руҳи сингиб кетган. Шоир халқ оғзаки ижодидаги тимсолларни ўзига хос талқин қилади. Унинг «Ибтидо хатоси» достони асосида машҳур композитор Икром Акбаров опера саҳналаштирган, «Баҳоуддин Нақшбанд»достони асосида реквием-оратория яратилган. Муҳим мавзулардаги адабий мақолалари жамоатчилик эътиборини қозонган.
Эшқобил Шукур ижодининг илк давридаёқ назарга тушиб, 1992 йилда Ўзбекистон Ёшлар иттифоқининг Усмон Носир номидаги мукофотига сазовор бўлади. Сўнг 2008 йилда Туркияда Маҳмуд Қошғарийнинг 1000 йиллиги муносабати билан «Туркий дунё туркий тиллар шарафи» мукофотига эга бўлган. 2012 йилда Ўзбекистон Республикасида хизмат кўрсатган маданият ходими унвони билан тақдирланган. Унинг ижодий, маърифий-маънавий фаолияти «Олтин қалам» халқаро мукофотига ҳам лойиқ топилган. 2022 йилда Истанбулда бўлиб ўтган Туркий халқлар шеърияти халқаро фестивалида 20 дан ортиқ мамлакатлар вакиллари қатнашган катта маданий тадбирда фестивалнинг Бош мукофотини қўлга киритади.
Севимли шоиримизни кўп минг сонли ўқувчилари ва канал кузатувчилари номидан табриклаймиз! Узоқ умр, мустаҳкам соғлиқ ва сўнмас илҳом тилаб қоламиз!
ВАТАН
(қадимги боланинг қадимги қўшиғи)
Оқ ўтовни нортуя
етти марта айланса,
чангароқ осмонида
етти гўзал сайланса…
Қизил тандир тоб еса,
кунларим пишса ҳил-ҳил.
Тунларим кулиб турса,
ой билан ўйнаса дил.
Ўзим қалдирғоч бўлсам,
сўзим суюнчи бўлса,
кўнглимда титраб ўсган
қамишлар найчи бўлса.
Момомдай даштларимнинг
Жони, эркаси бўлсам.
Бу даштлар менга тўлса,
Мен бу даштларга тўлсам.
Ўзим қалдирғоч бўлсам,
Сўзим суюнчи бўлса…
✍
Эшқобил ШУКУР
@Eshqobil_Shukur_ijodi

HAMDARDLIK
El suygan adib, “Jadid” gazetasi bosh muharriri, Oʻzbekiston xalq shoiri, ustoz
Iqbol Mirzo
ga onasi
MOʻTABARXON AYA
ning
vafoti munosabati bilan chuqur hamdardlik bildiramiz.
To shoir soʻzining maʼnosi soʻnmas,
Nafosat gulbogʻin raʼnosi soʻlmas.
U tirik! Va unga jism-u jon bergan
Shoirning ota-yu onasi oʻlmas!!
@n_jonuzoq

​​
RUH
Qayda qalb chamanzor – yashnar anda ruh,
Ingragay nahs-u nafs bosgan tanda ruh.
Qoraygan joningni bekita olmas
Shohona libos ham – boʻlsa janda ruh…
———————
РУҲ
Қайда қалб чаманзор – яшнар анда руҳ,
Инграгай наҳсу нафс босган танда руҳ.
Қорайган жонингни бекита олмас
Шоҳона либос ҳам – бўлса жанда руҳ…
11.07.2025
@n_jonuzoq

​​
XABAR
Yuksak maʼvolardan bir xabar keldi,
Quloqmas, u qalbimga qadar keldi.
Qah-qaha zabtidan yumilsa koʻzlar,
Shodlikka oʻralib gʻam-kadar keldi.
Boylik, shon, martaba purkasa olov,
Uch boshli ajdarday zoʻr xatar keldi.
Chumoli nafsingni qilmasang pisand,
U devga aylanib, yuz battar keldi.
Oʻnging – tush, tushlaring chindir aslida:
Uygʻoq qoʻngʻirogʻ-u ham xatlar keldi.
Kerilma, zavolga yuz tutgan oxir
Ne-ne alp bilag-u, tik qadlar keldi.
Nodiri davronman, falonman, dema,
Davronkim, nomingni rost atar, keldi…
––––––––
ХАБАР
Юксак маъволардан бир хабар келди,
Қулоқмас, у қалбимга қадар келди.
Қаҳ-қаҳа забтидан юмилса кўзлар,
Шодликка ўралиб ғам-кадар келди.
Бойлик, шон, мартаба пуркаса олов,
Уч бошли аждардай зўр хатар келди.
Чумоли нафсингни қилмасанг писанд,
У девга айланиб, юз баттар келди.
Ўнгинг – туш, тушларинг чиндир аслида:
Уйғоқ қўнғироғу ҳам хатлар келди.
Керилма, заволга юз тутган охир
Не-не алп билагу, тик қадлар келди.
Нодири давронман, фалонман, дема,
Давронким, номингни рост атар, келди…
11.07.2025
@n_jonuzoq

“Yangi Oʻzbekiston” gazetasi tahririyatiga minnatdorlik bildiramiz.
🙏

​​
BALLI
Barakalla, yashil maydonga tushib,
Uchqur otday javlon urganga balli!
Boʻriday tashlanib, burgutday uchib,
Arslonday qad kerib turganga balli!
Futbol bu – ayovsiz jangdir har oni,
Goh oyoq, goh lozim yurak darmoni…
Bir zumda aridi elning armoni,
Baxtidan el baxti kulganga balli!
Kim maydonda yigʻlar, kimdir panada,
Kim baxtli, kim baxtsiz boʻlgay yanada,
Kutib ol, Meksika, AQSH, Kanada –
Yoʻlni ummon osha burganga balli!
Tarixda qolishni xohlagan oʻgʻlon,
Oʻzin ulugʻ ishga chogʻlagan oʻgʻlon,
Sohibqiron ismin oqlagan oʻgʻlon –
Gʻalaba zavqini surganga balli!
Raqiblar, biz taraf qarab qoʻyinglar,
Oʻzbekning zarbasin darsga yoʻyinglar,
Behuda siz bilgan gʻirrom oʻyinlar,
Adolat kuchini koʻrganga balli!
Goh kulib, goh dili kuygan ishqiboz,
Goh gʻurur, goh alam tuygan ishqiboz,
Yurtni telba-dalli suygan ishqiboz –
Vatan deb elma-el yurganga balli!
Davrim durdonasi    bularning bari,
Yetaklar har lahza shohsupa sari,
Gʻamxoʻr murabbiydir Millat Sarvari –
Yangi yurt, mamlakat qurganga balli!
Bu oddiy zafarmas – buyuk el yutdi,
Mardona shijoat, tanti feʼl yutdi,
Ona Oʻzbekiston, gʻoliblar yurti –
Eng ulugʻ, eng koʻrkam qoʻrgʻonga balli!
———————
БАЛЛИ
Баракалла, яшил майдонга тушиб,
Учқур отдай жавлон урганга балли!
Бўридай ташланиб, бургутдай учиб,
Арслондай қад кериб турганга балли!
Футбол бу – аёвсиз жангдир ҳар они,
Гоҳ оёқ, гоҳ лозим юрак дармони…
Бир зумда ариди элнинг армони,
Бахтидан эл бахти кулганга балли!
Ким майдонда йиғлар, кимдир панада,
Ким бахтли, ким бахтсиз бўлгай янада,
Кутиб ол, Мексика, АҚШ, Канада –
Йўлни уммон оша бурганга балли!
Тарихда қолишни хоҳлаган ўғлон,
Ўзин улуғ ишга чоғлаган ўғлон,
Соҳибқирон исмин оқлаган ўғлон –
Ғалаба завқини сурганга балли!
Рақиблар, биз тараф қараб қўйинглар,
Ўзбекнинг зарбасин дарсга йўйинглар,
Беҳуда сиз билган ғирром ўйинлар,
Адолат кучини кўрганга балли!
Гоҳ кулиб, гоҳ дили куйган ишқибоз,
Гоҳ ғурур, гоҳ алам туйган ишқибоз,
Юртни телба-далли суйган ишқибоз –
Ватан деб элма-эл юрганга балли!
Даврим дурдонаси    буларнинг бари,
Етаклар ҳар лаҳза шоҳсупа сари,
Ғамхўр мураббийдир Миллат Сарвари –
Янги юрт, мамлакат қурганга балли!
Бу оддий зафармас – буюк эл ютди,
Мардона шижоат, танти феъл ютди,
Она Ўзбекистон, ғолиблар юрти –
Энг улуғ, энг кўркам қўрғонга балли!
@n_jonuzoq