قصائد ناصر الوبير

٣٩٢
🔵
قصيدة
أحبك كأني أول مرة أحب إنسان
محيت القديم وصرت في قلبي الحاضر
وجودك بعمري يشبه لنعمة النسيان
تنسيني أحزاني على قلبي الصابر
كسر قلبي الماضي ودعيت الله الرحمن
وجيت بحياتي يا حياتي جبر خاطر
تأخر وصولك بس عوضتني حرمان
سنين العمر وشعوري وحظي العاثر
خذ القلب عرشك دامك الحاكم السلطان
يلوق لسموك بأنك الناهي الآمر
وأنا ما أبي منك غير لاجيتك الولهان
تضم الضلوع بحضنك الدافي الآسر
يا خوفي على قلبي من الحب والإدمان
أحب إني أعيشه ولا أهتم للآخر
ما بين أجحد إحساسي أو أجي لك الولهان
عرفت إني متعلق وبس روحي تكابر
أنا خايف بحبك لأن قلبي العشقان
ومن القلب هي دايم تجي غلطة الشاطر
حبيبي تراك أغلى بشر يسكن الوجدان
وحبيبي تراك آخر وطن يسكنه ناصر
.

٣٩١
🔵
أبيات
صوت المطر كنه بلهفه يغني بك
يعذب من الصبح، والله إني أولابك
اللي يجيب المطر ياليته يجيبك
من بعد طول الفراق ووحشة غيابك
.

٣٩٠
🔵
أبيات
مابقى الا طلتك كل من حولي رحل
ضمني في كل ضلع بعد هجرك برد
اعتبرني أي شي في حياتك أو مثل
أي هدية بالزمن لا تباع ولا ترد
.

٣٨٩
🔵
أبيات
الليل هذا .. ليل سبعه وعشرين
والدين شي .. وهمتك شي اخر
وسط المقابر ناس لو ترجع الحين
مافرطت لحظه .. بعشر الأواخر
.

٣٨٨
🔵
أبيات
العمر ياخذني على نفس الذنوب
والبوح في سجن الحنايا كاتمه
شابت مشاعرنا على نفس الدروب
ياربّ غفرانك .. وحسن الخاتمه
.

٣٨٧
🔵
أبيات
من كثر ما حنّا غريبين نجمع
أفكار من فقر المشاعر جريحة
وقت النصيحه ما لنا خلق نسمع
لكنّا نسمع زين وقت الفضيحة
.

٣٨٦
🔵
أبيات
تعال علم لهفتي تصبر شويّ
ما قمت أصدق بأنها مسألة وقت
واللي رفع سابع سما ما ابي شي
بس إني لـ شوفة عيونك اشتقت
.

٣٨٥
🔵
أييات
‏( الشعر ) ماقصر معي .. قدم أشياء
أبرك من وجيهً ذبحني قرفها ..
شف حالتي وشلون من بعد الأضواء
( ناسً تقدرني ، وأنا ما عرفها ) .. !
.

٣٨٤
🔵
أبيات
المجتمع .. زادت عليه المشاكل
والناس ماتدري من اللي سرقها
به ناس من كيس العلاقات تاكل
وبه ناس تاكل رزقها من عرقها
.

٣٨٣
🔵
أبيات
للبعد ( أعذار ) وللوصل ( عذرين )
يا شوق يا أنك على الحاجة أتّوق
وأنا بتجربتي معك أعرفك زين
أقطع يدي منّا إذا جابك الشوق
.