قصيدة وشاعر 💙 📜 "
فيصل الحچيمي
أرسم شَمس واتعَده
واشگگ خوفي واكتل ظلمة السرداب
اسوي مرايتي اخيالي وابوس الدم
واصوغ من الفرح چم باب
اذا ينكسر جنح الطير اشَخبط فوگ حريتي
واضم لون الشجر وابعد سواجي الگاع
اسافر بالبواچي بعيد مادام الارموش شراع
هذا انه طبيبي الچف اليندل شوغة عيوني
ولك ضوي يشيب الشمس خاف تموت
عبرني وراي سنين
عبرني الدمع خرمش خدود الطين
ردت من دون حزني امشي
واشاقي المري المصلوبه
اثاري الحزن بجيوبي
وانا الماعرف يمشي وفارغه جيوبه
چا يمتى النهار يفزز الظلمه
شتلگاك بيمن يافرح لو جيت
من ثغر الروازين التراب يبوس اصابيعي
حدر كل فَيّ تعب خليت
هذا انه ندى اعله الجام ماجاسوني اليحبون
تهت والگادني مجنون
انچفه حلمي ولك ياظيم
كل نجمه جستها بعيني باعت روحها اعله الغيم
الهوى الماضحك الشباچ ماينشم
حزن كل الفخاتي المالگن غبشه اعله عيني التم
يشيعني الهوى دخان
من صدر الگهاوي اطلع جزيت الناس
ماضايگ حلاة الوين
هذا انه بواچي بمشتهات العين
صوت صياح مدري المن البروحي
شيلم حزني شيدليني
اعله نفخت ريح باعتني الارفوف ارماد
بيني وبين گلبي اتوسل بجرحي
ولك ماباقي شي ونموت
ولك ياتعب يالتمشي بشراييني صفار بتوت
ولك هدني الشمس ماتت
ولك خيط العناكب گطعته ضنوني
بعد للگمره ماافك باب
انا كون اشتعل عمرين
مايطفي حچي السرداب
صح تعبان بس ادري الهوى من يموت
ياخذ راحته الدخان
حسن عاشور
يا نعش حلمي الهويته
يا گبر حبنا اللي فوگه انشتلت شموع الأماني
دورت حبنا ولگيته دموع بعيون الأغاني
انا سكتة البيها الف حچاية ملتهية اويَ ذچرچ ،
انا صينية وتنطرچ ،
وانت حنّة الما يمر بحشاي عطرچ ،
چنت اظن من عندي قط ما يگدر يبوگچ لميع الـ بالصواني ،
دورت حبنا ولگيته دموع بعيون الأغاني
يالقميص الأسود الما ذبّه شِعري
يا بياض الشيب الـ بـ ايد النوايب صبغ شَعري
يالخيال الگعد فوگ متون فِكري ،
حزني يشبه حزن سوباط العنب بـ ايام صفري ،
چنت أظنن انا أنتِ وأنتِ اني
دورت حبنا ولگيته دموع بعيون الأغاني
يالنسى العشرة الطويلة وما نسيته
يالحچي الما مِلّه ويوّنس الگلب كلما حچيته،
يا أذية بيت شِعري الذي بطابوگ السهر لأجلچ بنيته ،
يا دمع ما ينگطع مهما بچيته ،
يا نخل موش انا راعيه وسگيته ،
صحت وين الشوگ؟ ولـ أورق الشعر همّچ خذاني ،
دورت حبنا ولگيته دموع بعيون الأغاني .
امجد قاسم
{ ما درينه }
الصفنه تاكل .. بالليالي
ودمعة الحسرة انتشينه
ما درينه…
اصبانه ذمه..
ولسه ما وفينه .. دينه
ما درينه ..
العوز آفه وبالمتن ..
مستافي … بينه…
ما درينه..
الوكت … موت
وبالوجه ما يثني عينه
وما درينه..
الدنيا… موج
ومات سفان السفينة
ممحله ومبعد دربهه
ومرود الليل .. أنكسر
كافي بس الصفنه تحجي
واحنه نشتم … بالقدر
وكافي نترجه الگماري
وطافي فانوس الگمر
وشجنينه؟..
ماتت شموع الليالي
ودخنت صدور العلينه
ذاك يرعي وهذا يبزل
ذاك المقايض يمينه
وذاك مات وهذا تاه
وذاك گاعد عالكراسي
يباوع ويضحك علينه
ويا سنينه…
الروح شبجت بالليالي
وفرشت الدمعه حصيره
لا أهل لتباري … همهه
ولا وكت صاحي بضميره
لا طمع مدت .. متنهه
ولا حوت من الزغيره
ولا حبيب يراوح الهه
ولا حلت شعر الظفيره
ديره ما من عدهه ديره
وفاهيه شيوخ العشيره
وما روينه…
شفنه عرج الياس ذابل
يا دمع يروي .. السگينه
وشفنه نخل الليل يركض
عابر اعله الراس .. طينه
وشفنه معضدهه برگبنه
وغافيه بسد … المدينه
وما اجينه ..
الفقر دگ … ثايه النه
وللگبر … متعني لينه
ويا بلادي وشكثر بيك السلام
وشكثر بينه انت منصف
وشكثر بيك … انتظام
محلل الحب .. عالرهيه
وبس على الفقره حرام
وعندك التصرف ملوك
وعندك التخلي انتقام
واليتامه بلايه خبزه
تخمس بچف الامام
والله لو يسمع محمد
يكفر بدين … المنام
وما علينه…
الما يفرگس عوزه چفه
شلون يتگطر .. جبينه؟
والما يموت بزفه وگفه
شلون يتراوح .. حنينه؟
والما يعرف حسين موقف
يرتشي بدينار … دينه
ما ظن للوكت تتداور الچاره
اذا هم الگلب دخانته بناره
ضل دم الجرح ما يركد بداره
ورث من عمرنه الليل جم شمعات
گضن حيل اعله حيل بهلت انواره
شگد نطينه؟…
وشلن وحده اعله .. وحده
وشنهي من عدهن .. خذينه
وخلصن حروف … القوافي
وبالمدامع …. چملينه
ومن حلمنه تفز صرخته
وحتى لا ينكض .. بطينه
شگد عمرنه انباگ غبشه
وهم سكتنه … وما حچينه
ونسمع البستان .. عامر
بس عفن منه … الكلينه
وما درينه…
اصبانه ذمه …
ولسه ما وفينه .. دينه
وما درينه…
عزيز عسكر
البارحة أشتاگيتلك حيل
ونيتلك حد ما بچى الليل
حزنك كسر ظهر المواويل
ومن دلّتك فاض الوطن هيل
كل يوم أطب للبيت زعلان
وأنشد عليك فلان وفلان
شمسك طفت والخوف سجّان
صفنة غريب بعينها انسان
البارحة بچيتني هواي
من گتلك وما گمت وياي
دمعت روحي وخضرت ماي
بهداي اصيح وصيح بهداي
ياللامنا لَم التصاوير
اعلى اغصانا بهجرك ولا طير
يا خبزة الله وناس من خير
يالمنك تخاف النواطير
يـ أهل الگبور أرسومكم وين
خربت صدگ ما صارها سنين
هذا التراب مخرب الطين!
طفكم حزن وعيونه حسين
اسماعيل محمد اسماعيل
أنا بروحي آلشعر يلظُم بساتين
التدلّي عثوگها بوجه الشمس فَي
و آنه ابن الرميثه چفوف الأحرار
اللظمَو للعدو من رصاصهم زَي
أنا عبوده البو شمخي الخولتي تصير
و عمامي من آل عيسى
و بالأصل طَي
أنا المَكْوَر عراقي الأول الكون
طش من الكتابه اعله البشر ضَي
أنا ابن النار و المَي
أنا اثگُب بالغضب و بفرحتي يكون
أروي بضحكتي اشما مر عَلَي وَي
أنا الجيرانه اخوته و بلدته الطيب
الخلّت له الضمير بكل وكت حَي
أنا المرفوع راسه اويه الشمس نور
و مشى بعزة حياته و لا لواه غَي
أنا من الطِيب كل شَي
........................................ ........................
حيدر النوري
لما فجرك نده عيني
گلبي ضم جرحه عليك
ودرت وجهي امسح دموعي
وبقايا الشمع عالجف
وأطرد الحسبات والليل
وشبابيج القطرات المكدرة
انته تضحك
واني آكل للغربه هانت
وي ضحكتك كلت للما كلته هانت
لما فجرك نده شباجي الحزين
لملمت كل وردة متعوبة بغرفتي
وردت ألومك من فرحتي
صار كلشي البيه وده ينحجيلك
وأنه كبلك كون ضهري
وهاي الخطوط البجفي
وضحگتي المثلومة
والدخان البصدري ثكل
ورماد جم صورة
بعدها براسي تفتر
يسولفلك
جم عزيز بعيني كبلك بجه عيني
يا حبيب يا عذب يا طير خايف
أنت وي ما تغفه أبوس أيدك
وأكلك ..
لا تعودني عليك
يا حبيب لا تعلمني عليك
انه كبلك بعت كلشي
ومو الي ومنذور دمي
أنت تحلم بيه .. وأنه
جرحي ضم گلبي عليك
شتدري بيه ..
كبل لا شوفك
بهذا الليل الأضلم
والمطر والبرد والدم
والورك عينه على عشوشي
وتدفعه الريح والدم
شتدري بيه ..
منين اجيت
والجنط هاي الأجرها شبيها
وعيوني ولمعها وخوفها وشحة دمعها
جفوف أدي والباب ذاك
گلبي بسنينه يدك عالباب ذاك
گلبي دامه يدك
يدك عالباب ذاك
يا حبيب يا عذب يا طير خايف
طير ابيضّ خايف ومبتل
نكت جنحه بسواد عيوني
وبگلبي وسبح بشطوط دمي
شتدري بيه
شكد شوارع شافت عيوني الغريبه
شكد مدن ووجوه محفوظة بقصصها
منين اجيت ووين رايح
انه ياروح الأغاني
مو الي ومنذور دمي
وأنه لو ما غربتي اباب المحطة
ما أشوف الضحكة دمعه
وما أشوف الجاي رايح
علي عمآد
ابكلشي التقينة
وانتهينة بكلمة
ابكلمن يروح بدربه راحت نعمه
اتعاندنه وي الهوه
وخسرنه هواي
ماندري فگرة الما يريد ايشمه
وضيعنه چم موعد .. وليل .. وضحكات
وزعلنه چم وردة وفراشة و نسمه
ورخصنه دمع عيونه
الچان ابروح
وانطينه للرادونه نبعد .. لزمه
ماندري
من عمر الشمع نار الخيط
ردينه كل واحد مشيع حلمه
المتروس فركه يدور الملگه بروح
مثل اليدور بالضحى اعله النجمه
الينهطر عمره ويسبگ اسنينه الشيب
ويشوف تعبه يضيع ينهد عزمه
مشكلتي
ما اكلك ابطعناتك وين !!
الما شوفه بي هده انولي وما احشمه
ماخذني المكابر واكلك مرتاح
والجرح ينزف واعلى اشافي البسمه
ما اريد ابين يم غيابك مكسور
من اوكف اكبالك جبل بي ثلمه
مجروح گلبي
وما يحس من ينجاس
بس الحچايه الما تعجبه تلچمه
ما اكلك شسويت بيه بفرگاك
اليسمعهه .. مو مثل اليعيش الصدمه
تمرني وكلت
هذا الهوا العايش بي
وانه من امر يمك تكلهم
شسمه ؟؟!!
شسمه !
هذا النسيته وجرحك يعيش ويا
هذا العشك وبروحه كفرة قسمه
هذا الجنت تغفه على اديه سفرة ليل
والچان يذبل لو نسيت تشمه
رجعلي حلمي ..
الباجر اتحاسب بي
الكلش بسيط الماكدرت تفهمه
يالواعدتني وخذت من عيني النوم
شتسوي باجر بالصبح من تعمه
من جفي جريت جفك معقول
ما كالك كلبك ايحبك زحمه
عايفلك انسان النده ايسولف بي
يوميه فوك الورد حلمه يرسمه
اشكد احب طبع الشبح يتلكه اسهام
اشكد اكره القوس اليضحي ابسهمه
عاجبني طبع الطير
يكبر ويطير
ماخله واحد عنده شمره ايعلمه
يالعلموك … وغيروك … وخلوك ؟
من تذكر الحطك بروحه تذمه
جافيت كلبي الما جفه ابكلشي وياك
اليبچي اعله مودك چي تركت القمه
عمري التطشر حفنه ارماد بريح
لا تعتقد غيرك انسان ايلمه
حسن قآسم
يـا روحـي بـ خضار صباي
مـن چـان ألعمر بـهداي .. مـا جيتي
چـا لـمن جزاچ ألشوف
وتـبده ألحلـم عـ ألشيب فـزيتي
چـا لمن رخـص گلبي
أعـله يـاهو ألچان .. حنيتي
مـا تدرين
يـم كل بـاب شـاتل عـين ومتانيـچ
أذبـل
وألـسنين تـخظر بـ طاريچ
لا هـلبت تـلمچ وأگـعد أتـمناچ
ولا سـر ينفضـح .. واحـچيچ
يـا روحي بـ توالي ألليل مـا أوصيـچ
مـا اوصيـچ
لـمي ألمشتهاچ مـتاع
تـره بـ تالي ألحزن حتـى ألدمع ينباع
لـيش
من أشـتهيتچ طيف
طـشيتي ألشمس بـ ألگاع
خـلينـه بـعد نـشتاگـ
يا روحي ألگلوب تـعيش من تنباگ
مـبيوگين أنه وياچ مبيوگين
خلينـه أعـله طـول ألليل مـتبدين
چم دوب ألعشگ سـكته
چم دوب ألـ يحب يعيش ذنبـه
بـ طول سالفتـه
يـا أول ذنب چم دوب
بـ سنين ألمفارگـ يـشرب ألدخان
ذبـلان الغـصن ضنيتـه بس ذبـلان
وحشمت ألفلح وألماي
چـان بـ خاطري يـنزل عـليچ أفياي
وويـن أدري بـ خريفچ جاي
ويـن أدري مـن چـان ألعمر شـباچ
عـبرتچ ذنـب حـد ما خـلص عمري
ويـن ادري الدرب من ينسحگ يـغله
يـا روحي گـبل لا تنشف ألنهران
چـم نورس نزل عطشان
لـكن مـا گـدر يعله
چـم ليل أنـطفـه ويـه جرت ألكحله
مـا فززچ دمعـي ألطاح
وأنـه ألچـنت أفـز بطيحة ألگذلـه
لميني وي گذلـة شعرچ النعسان
لمت ليل بـ عيون ألغريب
ألمـا حـضالـه بـ عين
مـشه بيـه العمر جرفين
و انـه اولايتي جروفچ
يـا روحي
القصيده تـغار من تجيسني حروفچ
هـلبت يا ضريح ألشوف
بـيبان ألـضوه أطـوفـچ
وگلج أي يـطيف ألماي
غـيرچ ما حله بعيني
وادري شمـا صـغتلچ راي
ما ينصاغلج طيني
عقيل العرد
علي اتوضى بمحبة الناس
حَب الناس والمو ناس
وبصينية الفقرة علي حط روحه باگة ياس
علي بخيط الفجر جرحين
و اتگوى اعله جرحه ونام
ضمير وروح للإسلام
تمرة بشفة الصيام
ضحكة بشفة الايتام ، مسحة راس
ميزان الكرامة انت علي الما دنك راسك
ولا ميزان ربعك داس
علي شما يكثر الدخان
وجهك گمرة بالظلمة
وشمس لو غيّم الوهواس
اليشيلك يا علي بروحه،
حرام يجيس روحه الذل
اليشيلك يا علي بگلبه ،
يطيح الجبل يم راسه ولا يجفل
اليصيحك ياعلي وينخاك
يشيل الدنيا بمتونه افا متونه بحمل تهدل
اليغمض يا علي ويبچيك
قرآن بضميره ايهل
اضيعك بالفجر مجروح
اشوفك بالغروب اتطل
اسمعك بالحرب منجل
اشوفك بالحقل سنبل
تحصد زلم ذرعانك
وترجع بالزلم تشتل
علي يا ريفنا ونهران اهلنا الدهله والعنبر
يمگذل النخل والشلب والبستان يا ابو تراب
ياب المحنة الما تسد الباب
يا حيل الزلم بالعوز ، يا صبر النشامى الـ بالضَنَك ما غاب
يا حنة اعله بيبان البيوت الطين
يا شيلة نذر معگودة للغياب
يا سمسم عطايا ،اليرد من بابك
يرد امبشر اليطلب
يمامش ماش بالمحراب
مامش عذر بجيوبك ،ولا بعدين
محد تچى عليك وخاب
يا هاااك
اعله كبر السما وبعد ازّود
يكحلة بعين دنيانا
وذو الفقارك المرود
علي يمحلي وجه الليل
شو صاير الليل اسود
اليحبونك تلاحكهم
خصمهم واكف اعله الحد
كاظم اسماعيل الكاطع
نذر لــ اعلگ سنيني
بــ چيتك اشموع
واشتل كل سمه الهجران نجمات
اغيم
بــ الوفه وامطرلك اسبوع
ويصير الوفه بملگاك روچات
وانته بــ الگلب ريحان مزروع
تتحسر عليك شكثر نسمات
يل الطيفك رسم
بچفوني مطبوع
ليليه ايتوسد چفني ويبات
لو جابك وفاك بهاي الايام
وتشوف شكثر ناذرلك انذور
اشم طيفك بخور بحضره ايمام
واترس دنيتي من زلفك اعطور
مل صبر الگلب مابعد ينلام
وبحبال الصبر سنتين مشرور
ولو تدري
عليك شكثر محتام
جا سابگت جدمك ويه الطيور
اخافن بدلوا ريشك يـ نعام
تره سهام الشماته اتصيد الصگور
واخافن لا يشمونك يـ شمام
ولو بـ الليل گلبي اعليك ناطور
تر انه اعلگ اسنيني ب ليلك اشموع
ولو ليلك تكفه بــ ضوه الوجنات
اغيم بــ الوفه
وامطرلك اسبوع
ويصير الوفه بملگاك روجات
ترف يطفح هواك
بــ گلبي ويفيض
واوجن بحر همي ويبعد الكيش
وارد اعطش لــ عينك
عطشه الگيظ
وترف جنحان گلبي
وما يصح ريش
اسلي الروح نوبه بعشره البيض
ولنها بلا سمارك
روحي متعيش