قصيدة وشاعر 💙 📜 "
مرتضى مطشر
الهوى اليعبر من گذلتك
اينوم المطلوب ثار ...
والگطن من ينملخ يشبه ضحكتك من تلاعب بالزغار
والتراب المو حلو
من يسحگه جدمك
ينخلط لونه بحمار
من گلتلك ضاملك شي ورا ضهري وباوعتلي
مادري بضهري عليك شلون دار
عيونك مسوايه للناس التحب تصفن هواي
ووجهك مخرب وجوه الناس كلها بعيني خايب
مدري من يا طين فاخر
ربك ملون بشرتك
لون وجهك مدري شنهي
لا بياض ولا شكَار ولا سمار
والحواجب چنهن سيوف يتشاقن
والحلگ حايوز مايدري بشقاهن يحجي حار
والخدود يخبلن بگد مستحاهن
وشعرك المخبوص يشبه شعب طالع من حصار
انت لو صارت غرفتك ضلمه كلش
عود هم تفتح البرده ؟
لو زنودك تكَلب الغرفه نهار
مظفر النواب
على گد البريسم
وكانت رائحة إنتظارها يوقظها المطرُ والليلُ والرصاص ،
صفنت يملثّم بالموزَر ،
والغارة تگودك للغارة
ولن بيرغ وأيدي اعلى الصفنة ،
ولو گامت ريح اتطگ ناره ،
وصفين الدگ بعضدينك ،
مشطين اتزِت العبّارة ،
مودّع بالبارود العنبر ،
يالعينك شگ الله بخنجر ،
وحزامك عالبشت الماطر
عربيد امناطر عالوَروَر ،
ومروز الريحان اتهَمهَم ،
لذيالك حتى الذبلانة ،
حتى المكسور بخاطرها
وعطشانة تگلك عطشانة ،
وزناد الكسريّة ايتوّز ،
وإتضكك بحزام المِرعز
يالممشاك بهونه وتردس
عِزبة وشباچي من إرداسك وحده إيعرّس ،
هونك ، هونك ، كلش هونك ،
عدوانك بالزور إنطاره
فييني بصدّات عيونك ،
جيتك أركض للدغّارة
خِذني بچفينك للمفرگ ،
أشبع موت وذبني حجارة ،
صدّاتك شذرات المَحزَم ،
والخَزرة بريسم وبشارة ،
وتسهرلك كسريّة اتهلهل
بعيون المخفر هدّارة ،
ومن ديرة لديرة نوصيلك
وازلام بذچرك تتبارى ،
وعيونك تحلى بلا هِدنة ،
وريجك طعم خيارة شاطي ورشة مِزنة ،
ويتشگگ طَلع الزهدية ،
من تشوفك ضَك امشابگنا ،
وتتندى سواجي المهجورة ،
وثوبي اتلف عليك طيوره ،
وتستعدل روحي المديورة ،
وضِكني الجمرة بضَك الدَلّة
وطَعم الهيلة يطگ بچفك
والشمّامة وورد العِلّة ،
وعرس أمك وأمي ويتلاگن ،
والسبعة يذبّن ميتهن ،
بالگمرة وخِشلك يالهاون
والگمرة بـ ميّتنا اتغزر ،
وتضكك بحزام المرعز ،
وگمرات اتلاثة ولا بيّن
طارش منك نمشي لناره ،
وخزامة عرسي اعلى الشرجي
تشمشم بارودك وأخباره ،
وأهجس كسريتك بالهندس
هونك ، هونك ، كلش هونك
عدوانك بالشط إنطارة ،
خلّي الشبگة بعمر الوردة
وشبگه النوبة وشبگه النوبة
وحَد ما نذبل حَدر الغترة
وسچة كحلك دگها بعيني
يموت احسابي وتطفى العَبرة
وكل شهگة التشهگها بصدري
تدگلك عشرة ،
يالساكت والتحچي طيوفك ،
وأتدافع انا وكل گلبي نريد نشوفك ،
وأشبع منك ..
كون الطيرة تشوف الماي وتشبع منه
كون الترفة تحل گذلتها ،
وما تفتك بيبان الجنة ،
وتفتك چفوفي وتدعيلك
وردة خبّازك تتحنى ،
وحين أتمنى ، وحين أتمنى
ومامش حدر گليبي إعريضي ،
سكتة ظنّة ،
تضك شفافي وتلگط من اشفافك حنّة ،
وألبس خزامة من دموعي لنخل المفرگ ،
وأنتظرك ما بين دموعي
وگدام أسمك أحيا وأعرگ ،
وأنشد من أهل العبّارة ،
وأنشد طير الماي الأسود
وأنشدلك درب الصد ما رَد
وأنشد صبّي ،
وأنشد دخان الگيّارة ،
وكِعد النجمة ، وچف الگمرة
هنا يالـشاف اللهبة السودة
وغيبة الهلال اويَّ الحافر
ونجوم بطيّات الغترة ،
هنا يالشافك ،
يالتبرج وشلون نشوفك؟
يالتمطر وشلون نعوفك!
يالشايل حضنة اعلى چتوفك
تمرِگ بالحلوة بنومتها تصد عيونك ،
وانا اموصيتلك بعيوني ،
بياذيها ومامش من چارة
هونك ، هونك ، كلش هونك
روحي من اخلافك محتارة ،
شِجرن گمرات الصبحية ،
وعَط الچول بنفحة عنبر
وانا الما نَيْمَني عيوني ،
وكل ليلة ولنّك گالبني
وكاسر ماي الظنّة بروحي
ما تنزل وتبور ظنوني
ونزلت للشط كل امكحلة
تفر الجرفين بطرتها ،
وشبعانة سوالف ومشابگ
ليش انا بعشگك سِيّاحة وكلهن طابگ!
موش احلفنا وگِلنا نموت وما نتفارگ!
جا ليش بساع تفارگنا ،
چذاب امشينه امزعلينك
چا دلحگنا ،
انفكلك كل بيبان الجنة ،
وفوگ الجنة وفوگ الفوگ الفوگ الفوگ الجنة ،
نوب توهدن ، وياك اهواي اتوهدنه
لو رديت اعلگ دايرنا ،
وجيّاتك أفرش بيديهن ضحچة وحنة ،
وأفرشلك بالعِتبة شليلي ،
وثوبي الأسود يفتك حزنه ويفرح نيلي
وتَخضر الرَزّة من ادموعي ،
وضحچة وبچية تطگ بعيني
ولو رديت انت وذاك انت
وكسريتك فوگ تفيّيلي
أتبلل وأتفتفت بيدك
وبتالي زبونك المطرز ،
امسح ضحچاتي وبشليلك
موش امصدگه ، وموش امچذبه
وموش اگدر ، أگدر أحچيلك
بسنّچ ، بسّچ يا روحي
وهمانة ، ومامش من رَدّة ،
تظلين احبيّبة اعلى السدة
تظلين تگلبين عيونج ،
بالعبّارة وباليتعدى ،
وقِدّاحچ يتناثر منچ ،
والليلة چبيرة ومطّارة ،
هونچ ، هونچ ، كلش هونچ
للشامت يضحك مشواره ،
للمامش يضحك مشواره
عامر عاصي
ﺭﻭﺣﻲ ﺳﻠّﺔ ﺧﻮﺹ
ﻭﻫﻤﻮﻣﻚ ﺟﻤﺮ
ﻭﺍﺷﺘﻬﻴﺖ ﺍﻟﻠﻴﻠﺔ ﺃﺣﺒﻚ ﻣﻦ ﺟﺪﻳﺪ
نصير ﺳﺎﻛﻴﻦ ﺑﺠﺬﺭ
ﺇﻧﺘﻪ، ﻳﺎ ﻓﺮﺣﺔ ﻳﺘﻴﻤﺔ
ﺇﻧﺘﻪ ﻃﻴﻒ
ﻣﻌﻠّﻚ ﺍﻋﻠﻪ ﺫﻳﺎﻝ ﻏﻴﻤﻪ
ﻭﺁﻧﻪ ﻫﺎﻭﻱ ..
ﻭﺁﻧﻪ ﺧﺎﻭﻱ
ﻭﺁﻧﺔ ﺟﺎﻫﻞ ﺑﺎﻉ ﻋﻤﺮﺓ ﻭﻳﻪ ﺍﻟﺘﺘﻦ
ﺑﻴﻦ ﺍﻟﻜﻬﺎﻭﻱ
ﻭﺷﻴﺒﺔ ﺷﻴﺒﺔ،
ﻛﺒﺮﻥ ﻫﻤﻮﻡ ﺍﻟﻠﻴﺎﻟﻲ
ﻭﺿﻔﺮﻥ ﺳﻨﻴﻨﻚ ﺿﻔﺮ
ﻭﻣﺮﺟﺤﺖ ﺭﻭﺣﻲ ﺑﻜﺼﺎﻳﺐ
ﻭﺑﻤﺼﺎﻳﺐ
ﻭﺑﺨﻠﻚ ﺻﺒّﻴﺮ، ﻋﻄﺸﺎﻥ ﺑﺜﻨﻴﺘﻚ
ﻭﻟﻮ،
ﻣﺎﺑﺎﺳﺖ ﺷﻔﺎﻑ ﺍﻟﺪﻳﻢ ﻣﻄﺮﺓ
ﻭﻟﻮ،
ﻣﺎﻇﻠّﺖ ﺑﻌﺪ ﺑﺎﻟﺮﻭﺡ ﻛﻄﺮﺓ
ﺑﺲ ﺍﺟﻴﺘﻚ
ﻭﺇﺷﺘﻬﻴﺖ ﺍﻟﻠﻴﻠﻪ ﺃﻣﻮﺕ ﺃﺑﺎﺏ ﺑﻴﺘﻚ
ﺁﺥ ﻣﻨﻲ .. ﺁﺥ ﻣﻨﻲ
ﺷﻜﺪ ﺗﻨﻴﺘﻚ
ﻭﺻﺒّﺖ ﻫﻤﻮﻡ ﺍﻟﻠﻴﺎﻟﻲ ﺩﻣﻮﻉ ﺩﻡ
ﺗﻨﺰﻝ ﻭﺃﻋﺘﻬﻪ
ﺍﻟﻌﻴﻦ، ﻭﺍﻟﺪﻣﻌﺔ ﺑﺮﻣﺸها
ﺍﻟﻮﺍﻟﺪﺓ ﺍﻟﻮﺩّﻋﺖ ﺑﺘﻬﻪ
ﻭﺃﻧﺘﻪ ﺍﻟﺨﻀﻴﺮﻩ، ﺍﻟﻤﺴﺞ،
ﻭﺍﻟﻬﺎﺷﻤﻲ ﺍﻟﻌﻴّﺪ ﺑﻌﻴﺪﻩ
ﻓﺮﺣﺔ ﺍﻟﺠﺎﻫﻞ ﺗﺮﺱ ﻋﻴﻨﻪ
ﻭﻳﺪﻑ ﻧﺒﻀﻪ ﺑﻮﺭﻳﺪﻩ
ﺇﻧﺘﻪ ﺍﻟﻮﻻﻳﺔ ﺍﻟﺠﺪﻳﺪﺓ
ﺍﻟﻮﺍﻋﺪﺕ ﺭﻭﺣﻲ .. ﻭﻧﺴﺘﻬﻪ
ﻭﺍﻧﺘﻪ ﺃﻫﻠﻨﻪ
ﻋﻴﻮﻧهم هدوة ﻣﺴﻴﺔ
ﻭﺍﻟﻔﺮﺡ ﺑﻴﻬﻦ ﺟﻨﺢ ﺯﺍﻫﻲ ﺑﺮﻓﻴﻔﻪ
ﻭﺍﻟﺴﻮﺍﻟﻒ ﻭﺍﻫﻠﻴﻪ
ﺃﻧﺜﺮﻫﻦ ﺑﻄﻲّ ﺍﻟﻜﺼﺐ
ﻭﺍﺳﻤﻊ ﻭﺣﻴﻔﻪ
ﻳﺎﺯﻟﻒ ﻛﻠّﺶ ﺗﺮﻑ ..
ﺣﺪّ ﺍﻟﻤﻨﻴﺔ
ﻭﺁﻧﻪ ﻧﺎﺣﻞ .. ﻭﺁﻧﻪ ﺫﺍﺑﻞ
ﻭﺁﻧﻪ ظيم ﺃﺳﻮﺩ ﻣﺜﻞ ﻟﻮﻥ ﺍﻟﻤﻜﺎﺣﻞ
ﺁﻧﻪ ﻛﻞ ﻛﻄﺮﺓ ﻋﺮﻙ حدر ﺍﻟﻤﻐﺎﺯﻝ
ﻭﺁﻧﻪ ﻛﻞ ﻋﻴﺪ ﺃﺻﻄﺒﺢ ﺑﺪﻣﻮﻉ ﺟﺎﻫﻞ
ﻭﺃﻧﺘﻪ ﺑﺴﺘﻪ
ﻳﺎﻃﻌﻢ ﺻﺎﺝ ﺍﻟﺸﺘﻪ،
ﻭﺩﻭﺭﺓ ﺭﻏﻴﻔﻪ
ﺃﻧﺘﻪ ﻭﺟﻪ ﺃﻣﻲ ..
ﺍﻟﺘﻨﺎﻡ ﻣﺘﺎﻧﻴﻪ ..
ﺍﺑّﺎﺏ ﺍﻟﺼﺮﻳﻔﻪ
ﺃﻭ ﻭﺟﻬﻲ ﺻﻮﺭﺓ ﻣﻌﻠّﻜﻪ
ﺑﺤﻴﻄﺎﻥ ﻏﺮﺑﺔ
ﺗﻮﺟﻊ ﺿﻠﻮﻋﻲ ﺍﻟﺒﺴﺎﻣﻴﺮ ﻭﺗﻨﻴﺘﻚ
ﻭﻏﻄّﻪ ﻭﺟﻬﻲ ﺗﺮﺍﺏ ﺍﻷﻳﺎﻡ ﻭﺗﻨﻴﺘﻚ
ﻭﻋﻠّﻜﺘﻨﻲ ﺧﻴﻮﻁ ﺷﻮﻙ .. ﻭﻣﺎ ﻧﺴﻴﺘﻚ
ﺁﺥ ﻣﻨﻲ .. ﺁﺥ ﻣﻨﻲ
ﺷﻜﺪ ﺗﻨﻴﺘﻚ
.....................
سمّي روحي
الليلة ما لِيّاش اسمْ
الليلة وحشة
ظنوني صارن طِلِّسِمْ
ظلمة
وعيون الذيابة بكل كتر
بالظلام تناثرن
بيدر جمر
الليلة ما لِيّاش اسم خَضِّر بديّه
خَضِّر بعيني البچيتك منها دم
مر على متوني التخاون من هِدِم
وحدي اجيت، أو وحدي شفتك منهدم
وهدّمت روحي .. وبنيتك
آخ مني
آخ مني
شگد تنيتك
.......
ليش من تغفه حماماتك
يفز بيه جنح
ليش كلما اشتهيك
تعثر جفوني بصبح؟
ليش؟
كلما تغفه ليش
نصيح ليش
وانجرح ..
روحي دمعة
وناي هور
روحي بور
ملح ،
وانته الماي نيتك
تموت ..
وشفافك منيتك
آخ مني
آخ مني
شگد تنيتك
.......
يمكن اشتميت بثيابك صفنتي،
الصفنة راي
والشياه التفگد الراعي
تلمها دموع ناي
وآنه أندلّ بالمدينه
شوكنه الضاع من ادينه
واعترف:
كل الحچي الگلته چذب،
آنه سبيتك
آآآخ
يا صبر الندا
شگد حلوة نيتك
آخ يا حفنة ندا شگد اشتهيتك
وآخ مني
آخ مني
شگد تنيتك
هاشم الخزاعي
عبد يبني
صلاتك وين؟!
دينك وين ؟!
ربك وين؟!
كحل وتوسد برمده
چا امك تظل للدوم
وصيفه
وجارتك عبده؟!
عبد حتى الجراد امرار
هم يتخير الوردة!!
عبد والغتر نفس اللون
عبد والنزف نفس اللون
دمك لو طفح هده!
عبد والمطر شلك بيه؟!
اذا حسيت روحك نار
بيش تفيدك الغيمة؟!
ذب جورك على المجمر!
واذا حسيت روحك ماي
لا تتواعد بهيمه!
خلك بالگصص تكبر
وحذاري من الگصصهم بور
ترى ماي الگصص مرات
باول عتب يتبخر!
ومو دوم العفو مريود!
نوبات الجبان يعف !
خل سطرتك چف اسمر!
واذا رد خاطرك مكسور واتخير غصن لو سيف؟
كون بنحر يتجبر!
“”عبد واصغر!
گدام الشريف اصغر
وگدام الصريفة اصغر
عبد وانت ابن ابوك بهاي
وگة ردان الگصيرة تصير موش الزند يتگصر!””
وكلها تموت! .. كلها تروح!
العلم والناس والسادة!
وانت تظل على البيان عگال وشيلة وگلادة!
لهسا الگاع من تشتاگ
ترسملك حرب وتصير
حدر خدودك وسادة!!
وتمر السنين وماكو كل قادة!
وتزتت الملحة وماكو كل قادة!
ويعلمونك على الموت
ويكلولك تلثم!
ويوصفولك الجنة
بالك
تره الحور العين مصيادة
.........................................................،...........،.،....
عبدالله راهي
سهران وألم بالشوف..
مدري شطايح بروحي تعب لو واحد يغني؟
لو ظلمه ومسافة خوف..
روحي تفك فرحها بساع بس تاخذ حزنها جفوف..
روحي ومدري وين تريد ليليه اعله ديره تطوف..
أحب ربعي وأحب امي التكلي شبيك
ياوحشت رسايلنه العمرها زغير..
انه وأنته مدري منين بس الكل شعار نصير.
جبيره الشاره البروحك..
اخاف من الشعر ينسه ويذم بين العمر صبحك..
زغيره العافيه بلياك
يلمتبدي برسومي أغاني وسالفه وجرحك..
انه لباب المتانيك..
انه الطيف المتانيك ترمش حته اكلك جاي..
تجيني ويه العطش كطره وأصوغنك شعب من ماي..
حيطان وسهر متبدي ع الشباج
بس يتنفس الشاعر اذا ماصايغ الشباج..
أحس ثورة شعب بيه ونثايه تنوح..
مدري شيجري يم كلبي احس روحي تجيس بروح..
خوف يشد ظلام العين
ويكسر الظوه اعله الباب..
وناس تحب ضحكتي وياك نعمه وعندي لون احباب..
حيدر الفتلاوي
استسهلت كلشي على روحي
او وهدنت سباح كلبي بمشتهاتي
انت لو كايلي احبك
چا ظفرت الشمس سجاده الصلاتي
وانت ..
لو تدري الچفوف
تجيس كلشي يصير غيمه
والعطش صيرورة الله بنص لهاتي
وانت ..
لو تدري الشعر والليل يتجى اعله حيلي وخوفي صوت وحزني سكته
وانت ..
تدري الساجيه بذمة الماي
وانت ماي الدنيا كله
( وماكدرت اتكلي انت )
واني ردتك مو ( شمس )
شباچ رازونه
ولو فتحة قفل واحسبها گمره
جان لميت السنابل
والشعر سويته طوگ
وصغت من الفجر شذره
وجان اخذت اولايتي وصوت المأذن
والنقاط البسمك نسويها حضره
بس شكلك
وانت تدري
ابنادم الينباگ حيله من المرايا
يضيع عمره
بس شكلك
ثاري بيه من التعب گمره بواچي
وجنت اگول الدنيا سفره
ياحريمه
البارحه چفوفي غريبه
والمرايه الشايله وجوه القصايد
ماعرفت عيوني بيها يموت باچر
البارحه
شسويتوا بيه
وبابكم طبطب عليه
وشال كلشي بخاطري وسواني شاعر
امنيتي ..
اعرف احلام روحي اشجاسها
وغير هواها
ياگمر دايني صوتك
خل اشوف الدنيا من يركض وراها
ياگمر دايني صوتك
خل اشوف الناس من باگو ضواها
وانت تدري
ابنادم الينباگ شوفه
يصير كلشي ابخاطره
بشوفه ضنونه
انت لو كايلي ( احبك )
چا اندليت النهار
اشضاعله ومنخطف لونه
وچا عرفت
الروح من تعطش الوادم
تركض على اسمك تزوره
وچاعرفت
النهر من ينجاس گلبه
يخلص على الغيم مايه من النذوره
وچاعرفت
العين المعرگها طيفك
وانت تدري العين طيره
وين ماتعطش تطيح
چفي صبيرة محنه وصدري غار
وخلگي اخر وتد بچفوف المسيح
وشيمت حزني گلايد
والشوارع ناسها بوجهي سؤال
اچفوف بظهور المساحي
ياضياع الليل البراسي على ليش
وقشمرت روحي على غفوه
ومالكيت النوم صاحي
كافي ياروحي ولج مره استراحي
اني اخر نظره للسچه البعيده
وكل غنه السبعين اله من طيني خامه
وانه ذيج
السحنه المعلمها ابوي
اتموت من تعشك يغاتي
وبالزعل يوم القيامه..
حسين الحبتري
بين امسح دمعتي
و بين أرد مكسور
و بين اضحك جذب مابين البيه
مو بــس للـستر ..
منها واعرفـه الشال
وگفته أشـكـدهـا للـمـاعـدهـا ترچية
وجاملتك ..
وكفت كبالك بلا روح
انه وكبل النفس ما جنت اظن ليه
ورديــت بـخــلك
والــد بـأبـن جـنـاز
وتــوســـل گـمــت علـخطـوة رجلية
بعدك ما تعرف معزة اليمشون
ما ينطب البيت الماهو راعيه
والمدلل بزرته
وفرهداه الموت
بناته تظل عمر تشتم خواچيه
صينية الشمس ..
بيها ضوه مصبوب
وبوجه السمه النجمات مجفيه
وكادوني بوكتها
وضحكت الشمات
ودلتني على دربي كلوب معميه
عرفتك من كلتلك ملكه ميل وميل
كتلي موادع وما حسبت جيه
ومو شرط الحلو
بعينك حلو ينشاف
مو حلوه الولايه بعين بدويه
خيرك زايد معجبني ليش تبيع
الينباع بوزه عيونه اعله راعيه
ولا انت الفطن
حتى اقتنع مغلوب
ولا انا الغشيم اليمشي على النية
ولاشفتك تصيحه
دكله رد خسران
ما متعود اسولف غير طاريه
مدري شلون صارت
بس المهم رديت
ماخذني الدمع بس الحجي شويه
محسن الخياط
رحت گوه.. بجرح من سيف
بي ماضاج ...
خلگ السيف يتونس
رحت گوه.. صعدت صعود
اماطل ... والصعدته املس
رحت گوه ..
اذب روحي على العطشان
واليابس كبل سنتين بيه الحس
رحت گوه .. مثل كاغد
عتيج ..وملتف.. ومشكوك
ومعفس
اصوغ الونه بيها احجي
واخيط الحسره بيها البس
ومن شفت الخضر ماطاح
رديت اعله الميبس
نشدت الليل عن وجه الصبح ماكال
شاور وحشته وغلس
يمشحوف اعله ريح الليل
تاه معيبره وسيس
ضوه مطفي وشمع مخنوك
هلبت يوم يتنفس ..؟
وﻻرده وﻻهوسة حصاد
ومنجلك هوس
حرت بيك وحرت بيه
عمت عين الدخول
المايضوك الخس
وحگ ذاك اليعدي الليل
نايم كلشي ماهيس
انا جروحي جرح مايدري شمتاني
وجرح فاته الوكت ايس
وجرح ظل ياكل بروحه
انمرد والينمرد يلهس
شريت الجاي يشريني
وعليه مزاود الشدات يمهندس
يصوغه من حنين الكاع
من تغسل .. ومن تلبس
قلم من لون الكتابه
يحلو الذات والملبس
العمر بردي ويناتر بي
يعته الوكت يتهلس
اخافن جيتك تفوته
واخاف الباجي يسلس
ماتكعد .. !
چواك الريش يالنعام
گضيت العمر تتشمس
بنفسج ياضوه الواحة
يتكي الشام يملبس
سرج ليلو .. ومهر ادبس
لهسه وماعشكت عليك
وانت الطوك والمحبس
يطير الماي يانورس
اغنيلك ... ! شغنيلك ..؟
اغني شلون
وانا اخرس..!؟
..............،،،،.....................................................................
جبار رشيد
تعال امسح ادموعك
وارسم افراح
على اعيونك وخدك والشفايف
ومعليك بحزن
ذيج المواضيع
وراح اختارلك احلا السوالف
واعرفني وبعد
لا تعرف الناس
وانه وياك انساها الطوايف
ومعلينه بعد
بالرايح وجاي
ومعلينه ولو بس ابقه خايف
اخاف اعليك
من عين اليحسدوك
ومن اعيون تجار العواطف
والتفخيخي ..
خايف لا يمر بيك
وخايف لا تمر بحزام ناسف
يا بو اشراع الترف
يمهجج الريح
اضمك وين من عين العواصف
تعال بروحي ابدلك
شلي بالروح
اجازف بيها بيك وما اجازف
اشكد شايف عشك
واحبابنه هواي
بس مثلك عشك صدك مشايف
درب تفكيري
كثره البيه يمرون
ولكيتك بالدرب بس انت واكف
وشغلت الفكر كله
وصرت موضوع
وانت بهل الامر ما انته عارف
وكلت للـ روح احبك
والكلب كال
ماكو اشكال عدنه وما يخالف
وانه الصادك بحبك
واحلفت بيك
بطولك بالوجه بالعشك حالف
وميلادك محبتك
صارت اليوم
يضل كل يوم ميلادك يصادف
يابو نضرة التكتل
انت معذور
اذا تكتل بشر لتكول اسف
سر بيك وعجيب
وثكلك البيك
عليك من الجمال هواي ضايف
نهر حسنك يروي
اوجوه الاحزان
خذن منه اشكثر ما صار ناشف
الغبشه عيون وجهك
طلعتك خير
المشرق شوفتك والوكت كاشف
لحن صوتك لحن كل العصافير
وميعزفه ابد هيهات عازف
وجرح البيك
جن جرح الرياحين
كل ما تنلجم بالعطر نازف
وكلبك طين حري
وشيمته الكاع
وشايل طيب كل ذيج الصرايف
ومثل كلبك كلبنه
وشوفنه اشلون
نضحي بكلشي الك لمن نوالف
محمد الوسمي
جان ظني
العشرة حد الشيب تنظر
وحنة اصيرن للكصايب
وجان ظني
بيدج تلمين حزني
وبي تصبغين الشوارب
وجان ظني الموت يلفينه حبايب
وهبت الريح
اعله غفلة وعود عشرتنة انكسر
وغفت الثوب على متني
وانتي بيتج عالكمر
لا فتحتي الغيم برده
ولا نزلتي وي المطر
ناسي ما تعرف تلمني
وياهو جان بنيته اتركج
انا كائن مو حجر
ما كدرت اترك جكارة
شلون اتركلي بشر
حسرة الغركان تاخذ من حياته
وهيج تاخذني الصور
وهدل متني
وحسبتها يبدي بمتونه لون مات النهر
وين صرتي
وليش بس البيت ظل وانتي شلتي
انا ناطر بالمحطة وشايل سنيني بجنطتي
رجع تعبان القطار دكول ابوي
نزلت الركاب عيني وما مشيت
للامانة بيوم رحتي
جانت الكروة على صحتي
ميت انا وما عرفتي
وبوكت موتي احتفلتي
مثل ما يحتفل كلبي
بعيد ميلاد السنين
وميته رزنامة بغرفتي
رايد امشي بلاية جدمي
بلاية جدمه ويمشي ملهوف السهم
عكس خلكي
امشي والخطوات مني تبوك عمري
حالي من حال القلم
رايد ابچي بحضن روجة
حتى ما تعيرني عين
كون اسافر سفرة الدخان محد يدري وين
هل مضت سنتين اثاري وما تجين
امس من مريت يمكم دفعت الشباج عيني