СҮННӨТ ЖОЛУ

https://www.instagram.com/reel/DXcVZQpALDD/?igsh=MTNpOHpiM2F2MnJyZA==

https://youtu.be/maVZBFU2p8E?si=PAkn_zujJQGI-KxM

https://youtu.be/r_-IPqWhiCA?si=JLxrqIwm5SmmFZnX

Инсан бир жылда эки жолу бир жылдык орозо кармагандай сооп ала алат
Абу Катада (Аллах андан ыраазы болсун) риваят кылган хадисте, Пайгамбарыбыз ﷺ айткан:
«Ар бир айда үч күн орозо кармоо жана Рамазандан Рамазанга чейин орозо кармоо — бул толук бир жылдык орозо болуп саналат».
📚
(Сахих Муслим, №1162)
Абу Аййуб ал-Ансари (Аллах андан ыраазы болсун) риваят кылган хадисте, Пайгамбарыбыз ﷺ айткан:
«Ким Рамазан орозосун кармап, андан соң ага Шаввал айынан алты күндү уласа, ал (сообу боюнча) жыл бою орозо кармагандай болот».
📚
(Сахих Муслим, №1164)
Атактуу аалым Абдулмухсин ал-Аббад (Аллах аны амандыкта сактасын) мындай дейт:
«Инсан бир жылда эки жолу жыл бою орозо кармагандай соопко ээ боло алат:
Биринчиси
: Хадисте келгендей, ар айда үч күн орозо кармоо менен жылдык соопко жетет.
Экинчиси:
Рамазанды кармап, артынан Шаввалдан алты күндү улоо менен дагы бир жылдык соопко жетет.
Ошентип, ал бир жылдын ичинде эки жолу жыл бою орозо кармагандын соообуна ээ болот».
Булак: (Сахих Бухари сабагынан: 11-ражаб, 1439-х.)
Эмне үчүн мындай сооп берилет?
Исламдагы негизги эреже боюнча: «Ар бир жакшылыкка эсе сооп берилет» (Ан-Ам сүрөсү, 160-аят).
Айдагы 3 күн: 3 × 10 = 30 күн (бир ай).
Рамазан (30 күн) + Шаввал (6 күн): 36 × 10 = 360 күн (бир жыл).
Бул мүмкүнчүлүктү колдон чыгарбоо ар бир момун үчүн чоң олжо!
✏️
Нурбек Аширмухаммад уулу
https://t.me/sunnotjolu/1451

https://youtu.be/B_lkFAbknYU?si=0bKOrHZNBdJQ2wp0

Рамазандан кийинки
абал
Момундар жүрөктөр ибадат менен Аллахка карай умтулган, жакшылыктарда жарышкан улуу жана берекелүү мезгил менен коштошту. Кимдир бирөө Куранды хатм кылууга аракет кылса, башкасы бей-бечара, жетим-жесирлерден кабар алды, дагы бири намаз жана түнкү ибадаттарга көбүрөөк берилди. Ар ким өзүнүн абалына жараша жакшылыктарга умтулду. Алардын сооп-олжосу кандай гана улуу, алган пайдасы кандай гана чоң!
Эгерде мусулмандар кечирим жана тозоктун отунан кутулуу айы болгон Рамазан менен коштошкон болсо, алар жакшылык эшиктери менен коштошкон жок. Жакшылык мезгилдери жаңыланып, эшиктери биринен соң бири ачылып турат. Момун пенде өз өмүрүн пайдаланып, ар бир мүмкүнчүлүктү Аллахтын ыраазычылыгы үчүн колдонушу керек.
Ибадаттын кабыл болгонунун белгиси — андан кийин дагы бир ибадаттын уланышы. Аалымдар айткандай
: «Орозо жана андагы намаздардын кабыл болгонунун белгиси — пенденин Рамазандан кийинки абалы бейпилдик, шүгүрчүлүк жана кайрадан Аллахка карай умтулууда болушу».
Эгерде адам Рамазандан кийин ибадатты таштап, күнөөгө кайтса, бул жакшылыктын белгиси эмес. Мурунку улуу имамдар бири Рамазанда гана ибадат кылып, ал бүткөндө баарын таштап койгондор тууралуу: «Рамазанда гана Аллахты тааныган коом кандай жаман коом!» — деп айткан.
Рамазандын Раббиси — Шаввалдын жана башка бардык айлардын да Раббиси. Мурунку имамдар айткандай:
«Рамазанчы эмес, Раббаний (ар дайым Аллахка берилген) бол!».
Сенин ибадатың бир ай менен чектелбеши керек, бүткүл өмүрүң ибадат мезгили. Аллах Таала:
«Сага өлүм келгенге чейин Раббиңе ибадат кыл»
(Хижр, 99) — деп буюрган.
Элестетип көрүңүз:
Бир аял бир ай бою абдан бекем, кооз кездеме токуп, бүткөндөн кийин аны кайра өз колу менен үзгүлөп, бузуп салса, адамдар ал тууралуу эмне дешет? Бул акылсыздык эмеспи! Аллах Таала Куранда
: «Жибин бекем ийригенден кийин кайра чечип (бузуп) салган аял сыяктуу болбогула»
(Нахл, 92) — деп эскерткен. Рамазанда ибадатка көнүккөн напсиңизди кайрадан күнөөгө салып, эмгегиңизди жок кылып салбаңыз.
Рамазандын бүтүшү биздин өмүрүбүздүн да бүтүп жатканынан кабар берет. Ар бир өткөн күн, ай же жыл сизди өлүмгө жакындатып жатат. Өзүңүздү суракка тартыла электе суракка тартыңыз. Бүгүн — амал бар, бирок сурак жок; эртең — сурак бар, бирок амал кылуугу мүмкүнчүлүк жок.
Парз орозо бүтсө да, нафил орозолор бүткөн жок. Айына үч күн, Дүйшөмбү-Бейшемби, Ашура жана Арафа орозолору бар. Азыр болсо Шалвал айынын алты күн орозосунун убактысы. Пайгамбарыбыз ﷺ:
«Ким Рамазан орозосун кармап, андан соң ага Шалвалдан алты күндү уласа, ал жыл бою орозо кармагандай болот»
(Муслим). Бул орозо Рамазандын кабыл болгонунун белгиси жана кемчиликтерди толуктоочу болуп саналат.
Аллах Таала баарыбызды өлүм келгенге чейин дининде бекем, ибадаттарда туруктуу кылсын!
✏️
Нурбек Аширмухаммад уулу
https://t.me/sunnotjolu/1449

Салих ибн Ахмад ибн Ханбал мындай деген:
«Бир киши (чач-сакалын) боёп келди. Ошондо атам (Имам Ахмад): "Чындыгында, мен Сүннөттөн бир нерсени тирилтип жаткан кишини көрсөм, буга абдан кубанам", — деп айтты».
📚
(Сияр аълам ан-нубала, 11/335)
Имам Ахмад бул жерде кичинекей нерседе болсо да Сүннөткө амал кылуунун канчалык маанилүү экенин баяндап жатат. Андыктан, ар бир нерседе Сүннөттү тирилткенге аракет кылалы.
✏️
Нурбек А.У.
https://t.me/sunnotjolu/1448

Урматтуу мусулман бир туугандар!
Орозо айт майрамыңыздар маарек болсун!
تقبل الله منا ومنكم
«Такаббалаллаху минна ва минкум»
Аллах Таала бизден жана сиздерден (туткан орозолорубузду, кылган ибадаттарыбызды) кабыл кылсын!
Жубейр ибн Нуфейр (Аллах ага ырайым кылсын) минтип эскерген:
«Пайгамбарыбыздын (ﷺ) сахабалары айт күнү бири-бирине жолукканда: «Аллах бизден жана сизден кабыл кылсын», —
деп айтышчу».
📚
Булак: «Солат аль-ъидайн», аль-Махамили [Сахих].
Сүннөт Жолу
https://t.me/sunnotjolu/1447

Кулактандыруу
!!
Орозо Айт намазы эски аянтта окулат
Бишкек шаарынын тургундары жана конокторунун суранычы, КР Президентинин колдоосу менен Орозо айт намазы эртең, 20-мартта Турдакун Усубалиев атындагы аянтта (эски аянт) окула турган болду.
Саат 08:30 да Айт намазы окулат.
Ал эми аймактарда болсо Орозо Айт намазы жума окулуучу мечиттерде окулат.
https://t.me/sunnotjolu/1446

Рамазан жана Тообо
Күнөө кылбаган инсан болбойт, бирок момундун өз күнөөлөрүнө болгон мамилеси бузуку (фажир) адамдыкындай эмес.
Момун адам өзүнүн күнөөлөрүнүн алдында — тактап айтканда, анын оордугун сезүүдө — төбөсүндө кулап кетчүдөй болуп турган тоонун астында отурган кишидей сезет. Анткени момун Аллах Тааланын улуулугун, анын кудуретин, Анын эч кимге муктаж эместигин жана бардык макулуктар Анын өзүнө гана муктаж экенин көрүп турат.
Ошондуктан ал Аллахтын алдында кичинекей эле күнөө «кичинекей» эмес экенин жакшы билет.
Ал эми фажир (бузуку, кайдыгер) адам өз күнөөлөрүнө тоготпоо менен карайт. Ал тургай эң чоң күнөөлөрдү да оңой жана жеңил көрөт. Анын күнөөгө болгон мамилеси — мурдуна конуп, колу менен шилтеп койсо учуп кеткен, эч кандай таасир калтырбаган чымын сыяктуу. Бул анын күнөөлөрү жеңил болгонунан эмес, анын Аллахка болгон ыйманынын алсыздыгынан.
Ошондуктан момун пенде күнөөлөрүнөн арылуу үчүн Аллах Таалага тообо кылууга шашылат. Анткени Аллах Таала тообо кылууга буйруп, мындай деген:
«Оо, ыйман келтиргендер! Аллахка чын ыкластан тообо кылгыла. Мүмкүн, Раббиңер силердин күнөөңөрдү кечирип, астынан дарыялар агып турган Бейиш бактарына киргизээр...»
(Тахрим сүрөсү, 8-аят).
«Чын ыкластан тообо кылуу»
дегендик — бул күнөөдөн толук арылуу, кылган ишине өкүнүү, ага экинчи кайтпоого бекем бел байлоо жана эгер бирөөнүн акысын жеген болсо, аны ээсине кайтарып берүү, же кечирим суроо аркылуу ишке ашкан чыныгы тообо.
Абдуллах ибн Масъуд (Аллах андан ыраазы болсун) жеткирген хадисте Пайгамбарыбыз (саллаллооху алайхи васаллам) мындай деген:
«Аллах Таала Өзүнүн момун пендесинин тообосуна, силердин араңардагы бир адамдан да көбүрөөк кубанат. Ал адам ээн талаада улоосу (төөсү) менен бараткан болот. Төөсүнүн үстүндө тамак-ашы, суусу бар эле. Ал бир аз уктап туруп, төөсү качып кеткенин көрөт. Аны издеп чарчап, аябай суусаганда: «Мен биринчи турган жериме барып, өлүмдү күтүп уктайын»,
—
дейт. Өлүмгө даярданып, башын колуна коюп уктайт. Ойгонсо, жанында төөсү, үстүндө иче турган суусу жана жей турган тамагы турат. Аллах Таала пендесинин тообо кылганына, бул кишинин жоготкон төөсүн тапкандагы кубанганынан да артык кубанат».
📚
(Бухари: 6308, Муслим: 2744)
Билип коюңуз, Аллах Таала күнөөлөр канчалык чоң жана көп болсо да, Өз пенделерин тообо кылууга чакырат. Улуу Аллах мындай дейт:
«Айткын: "Өздөрүнө зыян келтирген (күнөөгө баткан) пенделерим! Аллахтын ырайымынан үмүт үзбөгүлө! Чындыгында, Аллах бардык күнөөлөрдү кечирет. Ал — Кечиримдүү, Мээримдүү!"»
(Зумар сүрөсү, 53-аят).
Бул Аллахтын тыюусу — күнөөгө батып, «Аллах мени кечирбейт» деп үмүт үзүп жаткандар үчүн. Анткени Ага карай бет алган адамды Ал эч качан куру кол кайтарбайт.
Абу Муса (Аллах андан ыраазы болсун) Пайгамбарыбыздын (саллаллооху алайхи васаллам) мындай дегенин эскертет:
«Чындыгында, Аллах Таала күндүзү күнөө кылгандар тообо кылсын деп түнү менен Колун жайып (кечирим эшигин ачып) турат. Ал эми түнкүсүн күнөө кылгандар тообо кылсын деп, күндүзү Колун жайып турат. Бул күн батыштан чыкканга чейин (Кыяматка чейин) улана берет».
📚
(Муслим: 2759)
✏️
Нурбек Аширмухаммад уулу
https://t.me/sunnotjolu/1445