تكنولوبيا

الشهر اللي فات
تحديدا 6 يوليو
حصلت حاجة لأول مرة في التاريخ!
مجموعة من 6 درونز روسية من طراز Molniya استهدفت محطة بنزين في مدينة زابوريجيا جنوب شرق أوكرانيا..
بس بدل ما الدرونز تضرب البنزينة، ضربت حيطة بالغلط، وراح فيها 3 مدنيين!
ايه الغريب؟
ان الدرونز من لحظة ما طارت من القواعد الروسية، كانت ماشية بدماغها تماما..!!!!
أيوة، يعني مكنش بيتم التحكم فيها عن بعد..
هي كانت بتسوق نفسها بشكل كامل..
كانت بتتعرف على طريق مسار الرحلة بنفسها بشكل كامل من خلال الداتا اللي لقوها متخزنة جوا شرايح على الدرونز نفسها..
وكمان الدرونز كان فيها كاميرات وسينسورز عشان تعرف هي ماشية في الطريق صح من خلال انها بتحلل التضاريس والمواقع اللي طايرة فوقيها وتطابقها بالداتا اللي اتدربت عليها..
ده غير انهم لقوا كمان بيانات تدريب ليها علاقة بالتعرف على خزانات البنزين والبروبان، عشان يحددها فين بظبط، ويدخل.. بووووم!
كل ده كان بيحصل محليا Locally على الدرونز نفسها، من غير انترنت ولا اتصال مباشر بفريق بشر ولا تحكم عن بعد، عشان كدا برضو مكنش فيه أي هوائيات Antenna في الدرونز!
ازاي؟
اكتشفوا بعد تحليل درونز الهجوم، انها كلها فيها شريحة NVIDIA Jetson Orin ودي أصلا منتج استهلاكي عادي جدا بيتباع، لانه بيستخدم أصلا في الروبوتات والدرونز والمشروعات التعليمية في الجامعات والأبحاث، بس حركة صايعة جدا ان موسكو تستخدمه بشكل عسكري!
الغلطة حصلت فين؟
الدرونز خدت قرار في توقيت غلط وهي بتحول اتجاهها عشان تستهدف البنزينة، وخبطت في حيطة.. طبعا ده من لطف ربنا لان وقتها الخساير كانت هتبقى فادحة اكتر بكتير، بس أكيد ربنا يصبر أهل الضحايا.
العالم اتحول لمكان.. ر قـ مـ ـي غـ ـر يـ ـب!
🤖

زمان لما كنت بروح أأجر ساعة في أي سايبر، كان دايما من الاختيارات الأساسية عندي في الألعاب هي لعبة GTA معشوقة الجماهير. ياما بهدلت الدنيا بشفرة PANZER بتاعة الدبابة أو LEAVEMEALONE وأنا بهرب من البوليس.
طبعا الكلام ده كان تقريبا في 2008 أو 2009 أو قبل كده كمان. وقتها الجرافيكس كان رايح في داهية وكل حاجة متواضعة جدا، والأجهزة كانت على قدها خالص، عشان كده مدى واقعية الجرافيكس ما كانتش أفضل حاجة.
شكل الشخصيات جوة اللعبة كان بسيط لدرجة إنك بالكاد تميز ملامح وش الشخصية، وحركات الجسم نفسها كانت واضحة جدا إنها مجرد لعبة.
لكن لما ببص دلوقتي على GTA 6 والإعلانات بتاعتها، الفرق مرعب.
إحنا مش بنتكلم بس عن مياه شكلها أحسن أو عربيات انعكاس الضوء عليها أكثر واقعية. إحنا بنتكلم عن بشر افتراضيين بقوا قريبين جدا من شكل البشر الحقيقيين: تفاصيل الجسم، الجلد، الشعر، تعبيرات الوجه، طريقة المشي والحركة والتلامس بين الشخصيات.
وده خلاني أفكر في حاجة أبعد شوية من مجرد تطور الجرافيكس.
GTA بالنسبة لي نوستالجيا جميلة جدا وذكريات حلوة، لكن في نفس الوقت التكنولوجيا وصلت لمرحلة بتجبرنا نعيد التفكير في الطريقة اللي بنتعامل بيها مع العالم الافتراضي نفسه.
لأن مثلا جزء كبير من GTA 6 بيدور في بيئة مستوحاة من فلوريدا وميامي، فطبيعي تشوف شواطئ وحمامات سباحة وشخصيات بملابس شديدة الانكشاف، وأجسام مصممة بتفاصيل أقرب جدا للحقيقة.
زمان كنت ممكن تشوف المشهد نفسه وما يفرقش معاك؛ لأن اللي قدامك واضح إنه شوية Pixels على شاشة.
لكن لما الـPixels دي تبقى شبه إنسان حقيقي إلى هذه الدرجة، هل يفضل تأثير المشهد عليك هو نفسه؟
وهنا الموضوع بالنسبة لي بقى مثيرا للتفكير.
لأننا دخلنا عصر المسافة فيه بين «الصورة» و«الحقيقة» بتصغر كل يوم.
مش بس في GTA.
في ألعاب الفيديو، والواقع الافتراضي، والذكاء الاصطناعي، وقريبا عوالم كاملة فيها بشر افتراضيون ممكن يبقوا أقرب إلى الحقيقيين مما نتخيل.
وده معناه إن السؤال الأخلاقي مش لازم يكون: هل الشخصية دي حقيقية ولا مرسومة؟
يمكن السؤال الأهم هو: ماذا تفعل هذه الصورة في الإنسان الذي يشاهدها؟
ولو إحنا في حياتنا الحقيقية عندنا حدود مرتبطة بالنظر والعري والعلاقات الجسدية، فهل مجرد تحويل نفس المشهد إلى جرافيكس شديد الواقعية يخليه فجأة خارج هذه الحدود؟
الأخطر كمان بالنسبة لي مش المشهد الواحد.
الأخطر هو الاعتياد.
إنك تشوف طول الوقت أجساما شبه عارية، وعلاقات وتلامسا وتصرفات كانت بالنسبة لمجتمعك في وقت ما غير معتادة، لحد ما تصبح بالنسبة لك مجرد Background عادي جدا وأنت بتلعب.
وهنا يمكن التطور الحقيقي في GTA 6 مش بس إن البحر بقى شكله حقيقي أو إن وشوش الشخصيات بقت مذهلة.
التطور الحقيقي إن العالم الافتراضي نفسه بقى قريب من الواقع بما يكفي إننا نحتاج نتعامل مع تأثيره علينا بجدية الواقع نفسه.
والحقيقة إن فكرة «الاعتياد» دي مش مجرد إحساس أو تخوف شخصي.
في دراسات كتير حاولت تفهم هل اللي بنشوفه باستمرار في العالم الرقمي ممكن يغير مع الوقت تصورنا عن إيه الطبيعي وإيه المقبول؟
واحدة من أكبر الدراسات في الموضوع جمعت نتائج 59 دراسة مختلفة عن تأثير المحتوى الجنسي في الميديا، ووجدت إن زيادة التعرض للمحتوى ده ارتبطت بمواقف أكثر تساهلا تجاه الجنس، وكمان بتغير تصور الشخص عن إيه اللي الناس حواليه شايفينه طبيعي أو مقبول.
يعني ببساطة، المشكلة مش بس في إنك تشوف حاجة.
المشكلة إنك مع التكرار ممكن تبدأ تحس إن «كل الناس كده أصلا»، وإن السلوك اللي كان بالنسبالك في الأول غريب أو بعيد عن ثقافتك أصبح مجرد جزء عادي جدا من الحياة.
وفي دراسة تانية تابع فيها الباحثون أكثر من ألف مراهق لفترة طويلة، وجدوا إن زيادة التعرض للمحتوى الجنسي أونلاين ارتبطت بعد فترة بزيادة اعتقاد المراهقين إن أصحابهم بيتقبلوا السلوكيات دي وإنها منتشرة بينهم وعاااادي وكووول!!!
ودي نقطة مهمة جدا.
لأن الإنسان مش بيحدد الطبيعي والمقبول بناء على أفكاره الداخلية بس، لكن كمان بناء على تصوره عن المجتمع حواليه.
فلو العالم اللي بتقضي فيه ساعات كل يوم بيقول لك بشكل مستمر إن نمط معين من اللبس أو العلاقات أو التلامس هو الوضع الطبيعي، وارد جدا إن إحساسك نفسه بكلمة «طبيعي» يبدأ يتغير شوية مع الوقت.
وفي تجربة تالتة أكثر إثارة، الباحثون خلوا مجموعة من الناس تلعب نفس لعبة الفيديو بالضبط، لكن غيروا حاجة واحدة بس: ملابس الشخصيات النسائية.
مجموعة لعبت بشخصيات بملابس أكثر كشفا وإبرازًا للجسم، ومجموعة تانية لعبت بالشخصيات نفسها لكن بملابس أقل إثارة.
وبعد اللعب، وجد الباحثون اختلافا في بعض السلوكيات والمواقف بين المجموعتين، وظهر عند المجموعة اللي تعرضت للشخصيات الأكثر Sexualized ميل أكبر لسلوكيات متحيزة جنسيا تجاه النساء.
طبعا الدراسات دي مش معناها إنك لو لعبت GTA هتصحى تاني يوم شخص مختلف.

ولا معناها إن كل واحد هيشوف بنت ببيكيني جوة لعبة هتتغير قيمه تلقائيا.
التأثير النفسي والاجتماعي أعقد بكتير من كده.
لكن اللي بتقوله الدراسات هو إن فكرة إن «دي مجرد لعبة وملهاش أي تأثير» برضه مش دقيقة.
لأن عقل الإنسان مش بيحط كل اللي بيشوفه على الشاشة في صندوق منفصل تماما عن الواقع.
ومع التكرار، الحاجة اللي كانت لافتة للنظر ممكن تبقى عادية.
والحاجة اللي كانت غريبة ممكن تبقى مألوفة.
والحاجة اللي كانت خارج المعايير اللي اتربيت عليها ممكن تتحول بالتدريج إلى مجرد Background مش بتقف عنده أصلا.
وده بالضبط اللي بيخليني أبص لـGTA 6 بشكل مختلف.
مش بسبب مشهد واحد، ولا شخصية واحدة، ولا حتى بسبب البيكيني نفسه.
لكن بسبب عالم كامل مصمم بدرجة واقعية غير مسبوقة، ممكن تقضي جواه عشرات أو مئات الساعات، وكل ما التكنولوجيا تقربه أكتر من الحقيقة، يبقى السؤال عن تأثيره علينا أصعب إننا نتجاهله!
الخلاصة؟
خلي بالك من عقلك بيشوف ايه أونلاين،
وخلي بالك من ولادك
خلي بالك من ولادك
خلي بالك من ولادك!

‏لا الباقة مش عايزة تتجدد.. متقلقش
‏يادوب بس ⁩ وي واقعة!
😒

التايواني Yeh Yen-wei
مهندس تكنولوجيا شرايح السيليكون
كان شغال في شركة Nanaya للشرايح
من ٢٠٢٢.. بس السنة اللي فاتت كل حاجة اتغيرت..!
بدا يكلم شركات توظيف
عشان يلاقي فرص بمرتبات خرافية ف الصين
وعشان يتقل ميزانه عندهم قالهم معايا داتا خطيرة
معلومات سرية من جوا شركتي الحالية!
في فبراير اللي فات
اعلن استقالته بس فضل جوا الشركة لحد ابريل
بيسلم شغل وحركات..
وخلال المدة دي دخل ٣ اماكن حساسة ف الشركة
وكان معاه اكسس على انظمتها الداخلية
وقدر يصور ٣٢ صورة لنماذج وتقنيات رهيبة
تقوللي عدى الامن ازاي ومتمسكش؟
دخل خبى الكاميرا ف كيس شيبسي.. والله بجد
😅
كاميرا Insta360 X4 Air ف كيس شيبسي.. ودخل
صور وخلص ومشي.. بس هتنبهر اتقفش ازاي!!
فريق الIT ف الشركة لاحظ ان فيه جهاز غريب
دخل جوا الشركة واتوصل بالنيتورك الداخلية!!
واضح المهندس الناصح وصل الكاميرا بواي فاي الشركة عشان ينقل بقى ولا يعمل ايه..فاتقفش
وطابقوا توقيت توصيل الكاميرا في منطقة من الشركة بنيتورك معينة، بتوقيت وجود النجم جوا الشركة..
واتقفش واتروق عليه باحلى ١٠ سنين سجن
😁
مساءو

خرايط ChatGPT ف حتة تانية.. خالص!
ده عرف ان فيه فرعين لشيخ العرب ياجماعة
😅