Xayrulla HAMIDOV ijodi /official
Ҳадеб нолийсан-ей, юрагим,
Кириб келди, деб қаро дамлар.
Тунда яхши кўринар, ахир,
Юлдузлардек ёруғ одамлар.
Қаронғулик бир неъмат асли,
Унда кечар ҳақиқат жанги.
Қуёш яна кўкка бўйласа,
Бир хиллашар ҳамманинг ранги.
@Xayrulla_Hamidov_adabiyot
АГАР...
Вужудинг қаърига ғалаён тутмай,
Жимитдек юрагинг ёниб кетмаса;
Тилингга калима каломи етмай,
Аслинг хаёлотдан тониб кетмаса;
Жасадинг мум бўлиб томмаса бир-бир,
Қалбингда чирсиллоқ сас туғилмаса;
Булбул ҳузурингда бўлмаса асир,
Тимсоҳнинг нафси ҳам дам буғилмаса,;
Руҳингда ғалати тўфон кечмаса,
Қалтираб қолмасанг лаҳза ичинда;
Қонингни майсалар шодон ичмаса,
Дилингда ўсмаса аччиқ ўсимта;
Юлдузлар тўкилиб тушмаса агар,
Қуёш доимгидек тиржайиб турса;
Мовий қўшиғини айтмаса ҳулкар,
Булутлар устингда бепарво юрса;
Ҳамон ер курраси сузаверса зич,
Учолмай йиғласа кўнгил варраги;
Ухлаган бирон кас уйғонмаса ҳеч,
Кучайса қайтанга баттар хурраги;
Шеър ёзма, биродар...
Илтимос, ёзма!!!
@Xayrulla_Hamidov_adabiyot
ХОТИРА
Булбуллар довдираб учмишдир бугун
Шеър жунунин туққан Ўш шаҳринда.
Сенга ҳавасдаман эй тупроқ, бугун
Шавкат Раҳмон ётар бағрингда.
Бугун баҳорларга айланмишдир куз,
Ардоқласа андоқ суюкли элинг —
Сентябрнинг ойдин кечасини биз
Шеърият куни деб атайлик, келинг!
@Xayrulla_Hamidov_adabiyot
Ҳозирча сунъий интеллект росмана шеър ёзолмаяпти. Лекин қўшиқчиларнинг бозорига жиддий зарба беряпти. Менинг шеъримни
қўшиқ
қилишибди, ўхшабди. Очиғи.
📹
https://youtu.be/F31DJVeMuEM
✅
@Xayrulla_Hamidov_adabiyot
ХУТБА
Болам, эшит, бу қалб хутбаси,
Куйма асло хавотирларда.
Бежизгамас - мардлар рутбаси
Улуғланар асотирларда.
Мард бўл, болам, мадрликда гап кўп,
Ҳал этиб ол умринг бошида.
Ғарибларнинг остонасин ўп,
Лек мағрур тур кибор қошида!
Номардлардан замин ҳам безор,
Самодаку, суймаслар мутлоқ.
Умр оздир, топ шундай шиор:
“Фақат мардлар сафида ўтмоқ!”
Номардга қўл чўзмагин, болам,
Йўқ аларнинг ҳеч тутуриғи.
Эртакларнинг елкасида ҳам
Борар фақат мардлар гуруҳи.
... Йўл бошида турибсан, болам,
Қанот бўлсин бобомнинг нақли:
“Ёзиб қолдир қонларинг билан –
ФАҚАТ МАРДЛАР ЯШАШГА ҲАҚЛИ!”
@Xayrulla_Hamidov_adabiyot
КЕСИШИШ
Хаёлларим энди унутган лаҳза,
Тушларим ҳам этмай қўйганда таъқиб,
Ҳаммасини яна эслатиб ларза --
Кўзгудан нурланиб келдинг-ку чиқиб.
Дардларим барглари хазон тўкилди,
Пойида сарғариб турган мен йўқсил.
Тақдирнинг бир гапи бордир шекилли,
Учраштираверар сен гулни нуқул.
Орзулар бу палла бутунлай маҳол,
Келажакка кўчган бир хотирасан.
Йўллари кесишган, аммо бемаҳал,
Бахтсиз бахтлилармиз, ўйлаб қарасам.
@Xayrulla_Hamidov_adabiyot
МАШРАБОНА
Кўзларим тушди нигоҳларингга,
Оловдан чўғли дудоғларингга!
Дард қўшин тузди енгмоққа мани,
Ўтсам рози бўл паноҳларингга!
Эшик олдида турибман йиллаб,
Киргиз маниям даргоҳларингга!
Зулфингда ўйнаб айтардим қўшиқ,
Айланиб қолсам тароғларингга...
Узук бўлсайдим, бир лаҳзагина
Сингиб кетардим бармоқларингга!
Кўзингдаги ёш бўлсайдим бир зум,
Тўймай оқардим яноқларингга.
Ошиғинг арзин тинглаб, вожиб эт,
Арзимаса ҳам тирноқларингга!
@Xayrulla_Hamidov_adabiyot
Чўлпон Пушкиннинг «Гул ва булбул» шеърини ўзбекчага ағдарган. Бу шеър Пушкиннинг шарқ шеърияти таъсирида яратган туркумига киради. Таржимоннинг маҳорати ҳақида аниқроқ тасаввурга эга бўлмоғимиз учун аслини ҳам, таржимани ҳам тўла келтирамиз:
В безмолвии садов, весной, во мгле ночей,
Поет над розою восточный соловей.
Но роза милая не чувствует, не внемлет,
И под влюбленный гимн колеблется и дремлет.
Не так ли ти поешь для хладной красоты?
Опомнись, о поэт, к чему стремишься ты?
Она не слушает, не чувствует поэта:
Глядишь, она цветет, взываешь — нет ответа.
Чўлпон шеърни бундай таржима қилган:
Баҳор чоғида холи боғда бир зулматли тун эрди,
Ғариб булбул фиғон айлаб, «гулим, раҳм айлагил» дерди.
Бироқ ул гул қулоқ солмас эди фарёду афғона,
Фақат ором оларди ноладин тўлғона-тўлғона.
Сени ҳеч севмаган бир гул учун, эй шоирим, сен ҳам
Ёнарсан, ўртанарсан, дод этарсан, тингламас бир дам,
Қўй энди, беҳуда дод этма оҳинг унга етмайди,
Қарайсан — яшнаган бир гул, фақат овоза бермайди.
Албатта, ўзбекчаси чиройлироқ. Аслидан. Чўлпон ана шунақа шоир бўлган.
@Xayrulla_Hamidov_adabiyot
САНИНГСИЗ
Сукунат қўйнида нураяпман жим,
Во дариғ, бу ғамга юрак кўникмас.
Сенингсиз умримни сўрайсан нечун,
Ҳолимнинг баёни эшитгуликмас:
Капалак қонидан симирсам тўйиб,
Қизғалдоқни ўтин ўрнида ёрсам.
Қовжироқ ялпизнинг илдизини еб,
Соғинч дарахтидан марварид қоқсам.
Кўнглимни ағдарар майин елвизак,
Сирпанчиқ туюлар бахтнинг йўллари.
Баҳорги ям-яшил сарғайган кузак
Умримнинг санингсиз кечган йиллари.
Саробат манзили кўринар тиниқ –
Фақир орзуларнинг синган шўъласи.
Наҳот шу кетишда ўтамиз ёниб,
Бизга насиб этмай севги жумласи???
Санингсиз шу қадар аянчли турмуш,
Гўё этилганман умримдан сургун.
Осмонда бўлсанг гар, кел, заминга туш,
Ерда бўлсанг агар кўриниш бергин!.
📚
@Xayrulla_Hamidov_adabiyot
Абдулазизга...
Талабалик даври... Дарслардан тониб,
Ёшликнинг еттинчи осмонларида,
Тўплар тепганимиз ёдимда ёниб,
Тошдунинг бетонли майдонларида...
Сўнг ҳаёт ирғитди ҳаммани ҳар ёқ,
Изиллаб йўл олдик қайга чорласа.
Шукрона йўлладик туширса таёқ,
Биз ўзи арзиймиз, дедик хорласа.
Кўксимизда турди қўлимиз доим,
Ҳижронлар охири мағлуб бўлдилар.
Энг қайсар касларга боқдик мулойим,
Улар-да бизларни ғолиб билдилар.
Йиқилсак, жимгина қўзғалдик яна,
Кўзга чўп суққанда моҳир шайтонлар,
Бизни танлайверди нуқул тантана...
Бизни пишитганди ўша майдонлар!!!
📚
@Xayrulla_Hamidov_adabiyot