بالوحي نُرَبِّي - سمر إبراهيم

التدريج التصاعدي:
وإنتي بتشجعيه على طاعة جديدة أو على إنه يستغنى وقت طويل عن موبايله إللي متعلق بيه مثلا أو إنه يبطل يشرب عصاير مضرة أو حاجة حلوة فيها سكريات غلط عليه مثلا، أو إنه يبدأ يخشن شوية في عادات الأكل -زي ما اتكلمنا عن دة في اللقطة إللي قبل دي: "الخشونة في الأكل"-  درجي له التطبيق من الأقل للأكتر..
يعني مثلا يخصم من وقت اللعب على موبايله أول أسبوع نص ساعة.. ثم تاني أسبوع يخصم نص ساعة كمان فيبقوا ساعة، لحد ما يوصل للعدد المسموح بيه.. -ما يزيدش عن ساعتين في اليوم على موبايله.
ومثلا لو بياكل كل يوم 2 باكو من البسكوت اللي مفروض نمنعه، يخليها أول أسبوع يشيل باكو واحد فقط من اليوم، ثم تاني أسبوع يشيل باكو من يومين ورا بعض، وهكذا لحد ما يوصل لباكو واحد ف الأسبوع أو يبطله خالص..
▪️
وأشهر مثال على دة قصة تدريج تحريم الخمر على الصحابة، ومعروف شدة تعلقهم بيها كان إزاي:
أول مرحلة كانت {يَسْأَلُونَكَ عَنِ الْخَمْرِ وَالْمَيْسِرِ قُلْ فِيهِمَا إِثْمٌ كَبِيرٌ وَمَنَافِعُ لِلنَّاسِ وَإِثْمُهُمَا أَكْبَرُ مِنْ نَفْعِهِمَا}، فقال بعضهم: لا حاجة لنا فيما فيه إثم كبير، واستمر البعض.
فجت تاني مرحلة {لَا تَقْرَبُوا الصَّلَاةَ وَأَنْتُمْ سُكَارَى}، فقال بعضهم: لا حاجة لنا فيما يشغلنا عن الصلاة، فتركها البعض وتركها البعض داخل الصلاة فقط.
فجت تالت مرحلة والأخيرة {يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنْصَابُ وَالْأَزْلَامُ رِجْسٌ مِنْ عَمَلِ الشَّيْطَانِ فَاجْتَنِبُوهُ...} إلى آخر الآيات: {..فَهَلْ أَنْتُمْ مُنْتَهُونَ}..
وطبعا قبل مراحل التحريم التلاتة كانت الآية إللي فيها التفريق اللافت للنظر، بين الرزق الحسن والمُسكِرات التي تُذهِب العقل: {مِن ثَمَرَاتِ النَّخِيلِ وَالْأَعْنَابِ تَتَّخِذُونَ مِنْهُ سَكَرًا وَرِزْقًا حَسَنًا}، والإشارة اللطيفة في آخر الآية {..إِنَّ فِي ذَٰلِكَ لَآيَةً لِّقَوْمٍ ((يَعْقِلُونَ))..}.. كل دة يعلمنا التمهيد قبل الأمور الصعبة على النفس، والتدريج فيها لتمكين ابنك من القوة فيها وإتمامها..
وطبعا كل دة يكون فيما عدا الحرام والحلال، فالنبي ﷺ قال: "ما نهيتُكم عنه فاجتنبوه"  يعني المطلوب فيه = إقلاع فوري..
إلا لو أمر حرام/حلال بيجاهد فيه نفسه بشدة وضعيف إنه يتمه لآخره صح، وحسة إنه مش هيعرف يوصل للتمام دة إلا من خلال تدريج التطبيق العملي فيه = فساعتها لا حرج من التدرج معه في التطبيق من باب {فَاتَّقُوا اللَّهَ مَا اسْتَطَعْتُمْ}..
مع التأكيد عليه ساعتها إن دة ((تدريج في تطبيقه هو للحكم)) مش ((تدريج في الحكم نفسه)) سواء في حرمة الشيء أو وجوبه، لإن ما ثبتت حرمته وثبت وجوبه = لا تدريج للحكم فيه ليوم الدين.. (ويُراجَع كلامُ ابن تيمية في هذا الأمر كما أورد ذلك بالتفصيل موقع الإسلام سؤال وجواب)../ في التعليقات..
.....الخلاصة....
أي شيء في أوله صعب، لكن بالتدريج بيبقى أهون..
فاستعن بالله ولا تعجز..
#
لقطات_تربوية
#
أسماءمحمدلبيب
أمةالله-عفا الله عنها

المقالة رقم 381
#
لقطة
57
#
التربية_بالتدريج_تنازليًا
#
وتصاعديًا
التدريج التنازلي (فيه معنى التخفيف):
وإنتي بتشجعي ابنك على عمل من العبادات أو المهام المنزلية أو الواجب المدرسي وتحسي إنه مستكتر حجمها أو عددها  فهميه إنها كانت أكتر من كدة وإنك شيلتي عنه منها -وتكوني بالفعل في نيتك عاملة دة من قبلها..
▪️
زي بالظبط تخفيف الله عز وجل، لعدد المطلوب قتالهم في المعركة من 10 قدام المسلم الواحد - لـ 2 قدام المسلم الواحد: {الآن خفف الله عنكم وعلم أن فيكم ضعفا}.. كانت الأول {إن يكن منكم عشرون صابرون يغلبوا مائتين.. وإن يكن منكم مائة يغلبوا ألفا من الذين كفروا} ..
يعني المسلم الواحد يقف قدام 10 من الكفار، فلا يفر من القتال..  فنزل التخفيف من 10 لـ2، وبقى المسلم يقف يقاتل 2 من الكفار ولا يجوز له أن يفر..
▪️
وزي بالظبط تخفيفه عز وجل الصلوات المفروضة من خمسين فرض لخمسة وعشرين ثم لخمسة فقط -من الكُل—-> للنُص—> للخُمس- ليلة الإسراء والمعراج (وإن كان دا تدريج قبل بدء العمل، يعني تفيف مسبق، مش تدريج بعد بدء التنفيذ، ففيه معنى التفيف أكتر من التدريج، لكن نموذج صور تدريج):
قال النبي ﷺ: "فَرَضَ اللَّهُ عَلَى أُمَّتِي خَمْسِينَ صَلَاةً، فَرَجَعْتُ بِذَلِكَ -يعني نزل للسماء التالية- حَتَّى آتِيَ عَلَى مُوسَى، فَقَالَ مُوسَى: مَاذَا افْتَرَضَ رَبُّكَ عَلَى أُمَّتِكَ؟.. قُلْتُ: فَرَضَ عَلَيَّ خَمْسِينَ صَلَاةً، قَالَ: فَارْجِعْ إِلَى رَبِّكَ، ((فَإِنَّ أُمَّتَكَ لَا تُطِيقُ ذَلِكَ))، فَرَاجَعْتُ رَبِّي، فَوَضَعَ عَنِّي ((شَطْرَهَا))، فَرَجَعْتُ إِلَى مُوسَى فَأَخْبَرْتُهُ، فَقَالَ: ارْجِعْ إِلَى رَبِّكَ، ((فَإِنَّ أُمَّتَكَ لَا تُطِيقُ ذَلِكَ))، فَرَاجَعْتُ رَبِّي، فَقَالَ: هِيَ ((خَمْسٌ)) وَهِيَ ((خَمْسُونَ)) -يعني خمسة في العدد وخمسون في الأجر- لَا يُبَدَّلُ الْقَوْلُ لَدَيَّ، فَرَجَعْتُ إِلَى مُوسَى، فَقَالَ: ارْجِعْ إِلَى رَبِّكَ، فَقُلْتُ: قَدِ اسْتَحْيَيْتُ مِنْ رَبِّي.."*/البخاري ..
وعلميه يستحي عند مرحلة معينة أسوةً بنبيه الكريم ﷺ.. #
فن_التحفيز_بالتخفيف
...
▪️
وزي بالظبط تخفيفه عز وجل على الأمة شرط الاتزام بطريقة وحرف واحد فقط لقراءة القرآن، فجاءت الأحرف السبعة تخفيفا من الشرط ده وتوسعة على الألسن في القراءة..
= يا أُبَيُّ أُرْسِلَ إلَيَّ أَنِ اقْرَأِ القُرْآنَ علَى حَرْفٍ، فَرَدَدْتُ إلَيْهِ أَنْ هَوِّنْ علَى أُمَّتِي، فَرَدَّ إلَيَّ الثَّانِيَةَ اقْرَأْهُ علَى حَرْفَيْنِ، فَرَدَدْتُ إلَيْهِ أَنْ هَوِّنْ علَى أُمَّتِي، فَرَدَّ إلَيَّ الثَّالِثَةَ اقْرَأْهُ علَى سَبْعَةِ أَحْرُفٍ، فَلَكَ بكُلِّ رَدَّةٍ رَدَدْتُكَهَا مَسْأَلَةٌ تَسْأَلُنِيهَا، فَقُلتُ: اللَّهُمَّ اغْفِرْ لِأُمَّتِي، اللَّهُمَّ اغْفِرْ لِأُمَّتِي، وَأَخَّرْتُ الثَّالِثَةَ لِيَومٍ يَرْغَبُ إلَيَّ الخَلْقُ كُلُّهُمْ، حتَّى إبْرَاهِيمُ صَلَّى اللَّهُ عليه وَسَلَّمَ*(صحيح مسلم)
= أَقْرَأَنِي جِبْرِيلُ عليه السَّلامُ علَى حَرْفٍ، فَراجَعْتُهُ، فَلَمْ أزَلْ أسْتَزِيدُهُ فَيَزِيدُنِي حتَّى انْتَهَى إلى سَبْعَةِ أحْرُفٍ*(صحيح مسلم)

ولما يبقى عندكم ضيوف والأكل على الأدّ شوية = يمسك إيده عن الغرف الكتير لحد ما الضيوف تغرف كويس وبعدها يغرف أقل من وجبته الطبيعية عشان لو الضيف حب ياكل تاني = يشبع براحته.. دة ضيف، ولو ما شبعش = يبقى دين علينا.. تخيلوا!! : ((ليلَةُ الضَّيْفِ واجبَةٌ على كلِّ مسلِمٍ، فإنْ أصبحَ بفنائِهِ مَحْرُومًا = كان دَيْنًا له عليه..إنْ شاءَ اقْتَضاهُ؛ وإنْ شاءَ تَرَكَهُ))*صحيح.. ((من كان يؤمن بالله واليوم الآخر فليكرم ضيفه)).. وكله يقين إن طعامُ الاثنينِ يكفي الثلاثةَ والأربعةَ/وإن ربنا هيكرمه بإكرامه لضيفه /ولإنه كدة قوي ومسيطر على جوعه وشهواته ((والمؤمن القوي خير وأحب إلى الله من المؤمن الضعيف)).. / ولإنه بعد ما الناس تمشي أو تقوم من على الأكل هيعرف ياكل براحته..
ياكل في أي طبق نضيف ويساع أكله، وخلاص، ما يقعدش يتعلق بالطبق الفلاني وينقي المعلقة الفلانية ويتمسك بالكوب الفلاني أبو سبونج بوب وبرق بنزين، ولو مصمم وعامل أزمة ولسة صغير عن 8 سنين مثلا = نفهمه إن "خلاص هنسيبك براحتك عشان إنت لسة صغير، الرجالة الكبار مش بيعملوا كدة"، وتسيبيه.. يبقى محتار إنتي بتعذريه والا بتحسريه على حاله .. وحبة حبة بتروح لحالها مع تطبيقك لباقي منظومة الخشونة والرجولة إللي هنتكلم عنها في مقالي ((العيال والخشونة والرجولة)) إن شاء الله....
...الخلاصة...
من حقه يسيب أكل مش حابب ياكله زي ما قلنا في لقطة "الضب" إللي النبي مش بيحب ياكله..
ومن حقه يوقف أكل لما يشبع زي ما قلنا في لقطة "هتخلص طبقك كله"
ومن حقه يعرف إيه الأكل إللي محطوط قدامه ونعلمه إن التحري ده السنة أيوة: ((كان رسول الله ﷺ لا يأكل شيئا حتى يعلمَ ما هو))-(رواه مسلم)، لكن نفهمه إن ده بيكون لو بياكل عند حد غريب أو في بلد غريبة مثلا أو في مطعم عجيب، إنما وسط أهله بلاش يقعد يسأل ده معمول إزاي وجواه إيه ويقعد يفصص ويفعص في الأكل ويقرف نفسه منه ويتمايص على النعمة.. لأ.. يسمّي وياكل بدون بَطَر طالما أكل كويس ويحمد ربنا، إلا الأكل إللي نفسه بتتقفل منه فقط..
لكن غير كدة من التنعم الزيادة عن الحاجة والكفاية، سواء في الأطعمة أو نصيبه منها أو نوعها أو التعامل فيها أو البَطَر والرفض لكل أكلة ((مش بيموت فيها))! = إياكم..
ده لو عاوزين تربوا ولادكم على #
الخشونة_في_الأكل
على خُطَى الهدي النبوي والسلف الصالح بإذن الله.
📍
📍
وطبعا نعمل حساب الحالات المرضية الاستثنائئية لإن أحيانا بيكون فيه اضطرابات طعام عصبية بتحتاج استشارة طبية وبتحتاج معاملة طبية مختلفة.
كلامنا هنا عن العادي.
#
لقطات_تربوية
#
أسماءمحمدلبيب
أمةالله-عفا الله عنها

علميه إننا في الأصل = بناكل عشان نكتسب طاقة ونعيش، والأكل من نعيم الدنيا طبعا وطيباتها إللي يتهوّن علينا الكدر والتعب، لكن ربنا جعله ممتع عشان نعرف قردته وإنعامه ونشكره لما نستمتع ونشتاق ونشتغل أكتر أكتر لنعيم الجنة الأحلى والأشهى والأبقى، لكن المتعة دي نفسها مش غاية في حد ذاتها عشان نستغرق فيها لحد ما نتعلق بالتنعم بيها بالشكل دة وحياتنا تقف على لقيمات تشغلنا عن حرث الآخرة.. ((بحسب ابن آدم لقيمات يقمن صلبَه))
عادي يستغنى عن الشوكة والسكينة.. خليه يقطع الأكل بسنانه عادي -آه والله فيه أنياب وقواطع داخل الفم ربنا خلقها لنا عشان نقطع بيها الأكل، تخيلوا- ويمسك الأكل بصوابعه عادي مش لازم الشوكة ، بالذات الحاجات إللي ممكن تتمسك بالإيد، زي البانيه والخيار والبطاطس المحمرة والكوفتة، مش يبقى ((قرفان)) يلمسهم بصوابعه..
السُّنة أصلا الأكل عموما بالأصابع الثلاثة، فعلى الأقل يمسك الأكلات دي بصوابعه مش بالشوكة -عشان يخشن ويسترجل كدة- ومفيش مشكلة ياكل الرفايع التانية بالمعلقة لو عاوز، ويلحس الأكل إللي بيكون على صوابعه التلاتة ما يرميهوش في المنديل، أي فتفوتة ممكن يكون هي إللي فيها البركة: ((النَّبِيَّ ﷺ كانَ يأْكلُ بثلاثِ أصابعَ، ولاَ يمسحُ يدَهُ حتَّى يلعقَها..))
عادي أقلب النسكافيه بمعقلة الشاي، وعادي أغرف الرز بمغرفة الخضار وألحوس الرز بلحسة صلصلة من أثر الخضار، عادي والله فيه إيه يا مسلمين! إحنا مش مستنيين فتافيت تيجي تصوّر معانا. كفاية إغراق للمسلمين في تفاصيل دنيا بايخة ياما أفسدت قلوب وعلاقات وأولويات وشدت أعصاب وأهدرت أوقات وكترت مواعين..
يلم الطبق كويس ما يسيبش فيه فتفوتة: ((وَأَمَرَنَا -النبي- أَنْ نَسْلُتَ الْقَصْعَةَ قَالَ: "فَإِنَّكُمْ لا تَدْرُونَ فِي أَيِّ طَعَامِكُمْ الْبَرَكَةُ"))*مسلم
يدوق الأكل قبل ما يقرر إنه ((مش عاوز)) يحبه..
ويفصص السمك لوحده وورك الفرخة لوحده..
ويوم في الأسبوع تاكلوا كلكم صنف واحد فقط طول النهار، وليكن تمر وماء فقط.. ليه يا ماما كدة؟ نقول تاني يا ابني: ((إياك والتنعُّم، فإن عباد الله ليسوا بالمتنعمين)).. ((حسبُك يا ابنَ آدَمَ لُقيمات-أُكُلات- يُقِمْنَ صُلبَك))..
ولو كان في زيارة عند ضيوف وفاضل في طبقه معلقة والا اتنين = ياكلهم حتى لو شبعان لإن الناس هترميهم.. وما يغرفش إلا على أد ما هياكل من الأول..
ولو مالوش نِفس ياكل هناك = ياكل ولو لقمتين تلاتة فقط ويبطل مياصة عشان السنة كدة عدم كسر خاطر المضيفين، العرب كانوا بيخافوا لو الضيف ما مدش إيده على الأكل، والناس بتتضايق لو عملنا كدة معاهم..
مش طول ماهو بياكل = يمسح بؤه وإيده بالمناديل عشان قرفان .. الأحسن والأخشن: تعلميه ياكل بنضافة بدون لغوصة قدر الإمكان، ويستعمل المنديل في لغوصة جامدة تستاهل فقط، وبعد ما هنخلص أكل خالص هنبقى نغسل بؤنا.. السُّنة مش أكتر من كدة..
ولو فيه أكل مش عاجبه = ما يعيّبش عليه ويتمايص ويقعد يقول يع أو مملح أو مش متسبّك أو محروق أو ملزق أو ناشف أو دِلِع أو معجّن..إلخ.. = يسيبه أو يقول مش عاوز، وياكل غيره وخلاص..
((مَا عَابَ النَّبِيُّ صلى الله عليه وسلم طَعَامًا قَطُّ، إنْ اشْتَهَاهُ أَكَلَهُ، وَإِنْ كَرِهَهُ تَرَكَهُ))*مسلم والبخاري - إلا لو أكل حرام طبعا..
لما لقمة تقع منه في الأرض في مكان جاف ونضيف -زي أرض بيته أو الفصل بتاعه أو على الزرع في النادي أو على الرملة = يرفعها وينفض عنها أي شيء ممكن يكون جه عليها ويسمي الله وياكلها..
((إِذَا سَقَطَتْ لُقْمَةُ أَحَدِكُمْ فَلْيُمِطْ عَنْهَا الْأَذَى وَلْيَأْكُلْهَا وَلَا يَدَعْهَا لِلشَّيْطَانِ))*مسلم
لو جعان = يصبر شوية لحد ما كل البيت يتجمع على الأكل لإن دة السُّنة والبركة، مش هيجرَى حاجة لو استحمل الجوع حبتين، كإنه صايم عادي يعني.. وممكن تديله خيارة أو طماطماية تصبيرة لو سنه صغير أوأكلته أصلا ضعيفة أو صعبان عليكي أو عارفة إنه لو أكلها مش هيشبع وهياكل معاكم لما تاكلوا.. #
والأحسن
يتعلم الصبر عن الطعام خصوصا لو بنية الخشونة والاقتداء بالهدي النبوي في الاجتماع على الأكل..
((قال بعض الصحابة: يا رسولَ اللَّهِ إنَّا نأكلُ ولا نَشبعُ قالَ: فلعلَّكُم تأكُلونَ متفرِّقينَ ؟ قالوا: نعَم، قالَ: فاجتَمعوا على طعامِكُم، واذكُروا اسمَ اللَّهِ علَيهِ، يبارَكْ لَكُم فيهِ))*صحيح ابن ماجه../ ((كلوا جميعًا ولا تفرَّقوا، فإِنَّ طعامَ الواحدِ يكفِي الاثنينِ، وطعامُ الاثنينِ يكفي الثلاثةَ والأربعةَ، كلوا جميعًا ولا تفرَّقوا، فإِنَّ البركَةَ في الجماعةِ))*صحيح الجامع

المقالة رقم 380
#
لقطة
56
#
الخشونة_في_الأكل
....علمي ابنك....
عادي لو هناكل النهاردة بواقي طبيخ على حبة بقالة.. دي نِعَم غيرنا مش لاقيها وبياكل من الزبالة.. ناكل ونحمد ربنا بصدق، زي ما النبي ﷺ علمنا: ((الحمد لله الذي أطعمني هذا ورزقنيه من غير حولٍ مني ولا قوة.. الحمد لله الذي أطعمنا وسقانا وكفانا وآوانا.. فكم ممن لا كافي له ولا مُؤوِي))..
عادي حتى لو البواقي دي كانت مكرونة و شعرية ومفيش لحوم جنبها.. يتحطوا على بعض عادي وناكل ونحمد ربنا.. ماحنا بناكلهم على بعض في الكشري عادي وبيبقى ((الله!.. كشري))..!..
عادي أكتر لو الأكل الموجود = عيش ناشف فقط هنغمسه بشوية خل!..
((قالت أم هانيء: دَخَلَ عَلَيَّ رَسُولُ اللَّهِ ﷺ فَقَالَ: هَلْ عِنْدَكُمْ شَيْءٌ؟ فَقُلْتُ: لَا، إِلَّا كِسَرٌ يَابِسَةٌ –حتت عيش ناشفة شوية- وَخَلٌّ.. فَقَالَ ﷺ: قَرِّبِيهِ –هاتيه-فَمَا أَقْفَرَ بَيْتٌ مِنْ أُدْمٍ -غُموس- فِيهِ خَلٌّ.. وفي حديث تاني: ((نِعْمَ الإِدامُ = الخَلُّ))..
قوليله إن النبي ﷺ لم يشبع من خبز الشعير حتى توفاه الله، وما شبع آل محمد ﷺ منذ قدم المدينة من طعام البُرّ ثلاث ليالٍ تِباعًا حتى قُبِض.. فيسترجل كدة ويسير على خُطى الرجال.. إحنا بعدنا أوي يا ابني..
عادي كمان ناكل مكرونة جنبها مسقعة وحبة جرجير/ أو لحمة باردة في الشتا / أو شوربة في الصيف!.. مفيش حاجة اسمها الأكل دة أكل صيفي أو شتوي أو مش لايق على بعضه.. #
حدث_ويحدث_بالفعل
..|| آه ممكن يكون من السُّنة الجمع بين نوعين طعام معين، لكن لو ما اجتمعوش = بناكل عادي ونشكر ربنا.. وأصلا ابنك بيعمل كدة بدون نية تطبيق سُنة، بيعمل دة مياصة وبَطَر، فلازم تفرقي عنده بين المقاصد..
عادي نقعد ناكل في طبخة 3أو4أو5 أيام أو أسبوع حتى وتكون بسيطة كمان مش فخمة أوي يعني.. مافيش حاجة اسمها لازم طبخة جديدة كل يوم..ولا حاجة اسمها هما يومين بس بناكل فيهم الطبخة وبعدها بنشوف لها صِرفة برة البيت عشان بنزهق..! قوليله إن النبي ﷺ كان يمكث الشهرين فأكثر لم توقد في بيته نار بل كان طعامه التمر والماء..
ما بالك لو أكلات فخيمة وغالية زي لما يقولك "أنا زهقت من البيض والفراخ واللحوم يا ماما! كل يوم كل يوم! = علميه إن دة بطَر على النعمة، ودة من صفات اليهود.. ربنا عز وجل كان بينزّل عليهم يوميًا رزق فخم جدًا وشهي وطيب من عنده -عز وجل- كل يوم وقت الغدا، عبارة عن فراخ مشوية وحاجة كدة زي العسل -مَنّ وسلوَى.. = قاموا قابلوا الفضل والإنعام دة بإيه...؟! = بالسُّخط والبَطَر وإظهار الملل وعدم التقدير للنعمة وزهق من تكرارها بل وسوء أدب مع ربنا -ادع لنا ربك!.. : {وَإِذْ قُلْتُمْ يَا مُوسَىٰ لَن نَّصْبِرَ عَلَىٰ ((طَعَامٍ وَاحِدٍ)).. فَادْعُ لَنَا رَبَّكَ يُخْرِجْ لَنَا مِمَّا تُنبِتُ الْأَرْضُ مِن بَقْلِهَا وَقِثَّائِهَا وَفُومِهَا وَعَدَسِهَا وَبَصَلِهَا.. قَالَ أَتَسْتَبْدِلُونَ الَّذِي هُوَ أَدْنَى بِالَّذِي هُوَ خَيْرٌ.}!! = الباقي في لقطة بعنوان "زهقت من البيض والفراخ.. كل يوم كل يوم!!" – قريبا بإذن الله..
عادي لو الأكل بِرِد حبتين = ناكله -طالما ما جرمزش ومحتاج يتسخن تاني #
خليك_راجل_وبطل_مياصة
، مش نسيب البطاطس المحمرة يا ماما عشان بردت خلاص! وعادي لو العيش بايت أو ناشف شوية = نطرِّيه وناكله زي مالنبي ﷺ كان بيعمل يا ولاد.. مش لازم كل حاجة كل مرة تكون طازة وريحتها مفحفحة على سِنجة عشرة عشان نقبل بالنعمة ونحمد ربنا ..
قال النبي ﷺ لمعاذ بن جبل: ((إياك والتنعُّم، فإن عباد الله ليسوا بالمتنعمين))*/صححه الشيخ الألباني.|| وقال عمر ((اخشوشنوا))، وفي الأثر المنسوب إليه: ((اخشوشنوا فإن النعمة لا تدوم))..
عادي يا حبيبي لما تبقى عاوز تتعشى = تاكل الموجود.. مش تتشرط على ماما تقوم تعمل لك مكرونة بالصلصة الحمرا وإلا مش هتاكل  ، طالما الموجود أكل مقبول بالنسبة لك = كُل.. لإن جعان = يعني تاكل عشان تشبع وتتغذى.. مش لازم دايما متعة الأكل تكون 100% كل وجبة!.. هو التنعم -إللي المسلمين مَنهِيِّين عنه- إيه غير كدة؟؟... مش عاجبه = ينام جعان ساعتها، مش هيجراله أي شيء، اهدِي..
وقوليله قَولة عُمَر الذهبية ((أوَكُلّما اشتهيتَ = اشتريتَ!!)).. #
ربي_راجل_قبل_ما_تربي_كرش_راجل
... وقوليله بلاش بَطَر على النعمة ومياصة فارغة يا حبيبي، اخشن الله يرضى عنك عشان تعرف جاهد.. دة العافية من ((لباس الجوع)) إللي إحنا فيها ليل نهاردي أصلا = لا تُقَدَّر بثمن، فبلاش نستنزلها بالبطر.. {..وَضَرَبَ اللَّهُ مَثَلًا قَرْيَةً كَانَتْ آمِنَةً مُّطْمَئِنَّةً يَأْتِيهَا رِزْقُهَا رَغَدًا مِّن كُلِّ مَكَانٍ فَكَفَرَتْ بِأَنْعُمِ اللَّهِ فَأَذَاقَهَا اللَّهُ لِبَاسَ الْجُوعِ وَالْخَوْفِ بِمَا كَانُوا يَصْنَعُونَ}.. فيحمدوا ربنا {الَّذِي أَطْعَمَهُم مِّن جُوعٍ وَآمَنَهُم مِّنْ خَوْفٍ}..

المقالة رقم 379
#لقطة
55
لازقين فيكي ليل نهار وبيلفوا وراكي طول اليوم يشوفوكي هتقعدي فين ويقعدوا جنبك  وعاوزينك طول الوقت مركزة معاهم، وعاوزين كل اهتمامك = ودة بيخنقك ساعات وبيحسسك إنك بتتنفسي بصعوبة عشان نفسك تعملي حاجات كتير ((لنفسك)) ومش عارفة، ونفسك تقعدي لوحدك شوية أو في مكان هاديمريح للأعصاب بعيد عن أي التزام أو مسؤولية؟
اقري قصة الإمام بشر الحافي الزاهد، مع الإمام أحمد:
الإمام بشر الحافي عابد زاهد.. سُمي بالحافي لإنه كان له نعل فضل يلبسها سنين لحد ما دابت!، وكل ما دابت أكتر كان يخيطها، لحد ما اتقطعت تماما، فشاف إن الأفضل إنه يمشي حافي ويتصدق على مسكين بثمن النعل الجديد..! كلكم أكيد حسيتوا إنكم جنبه ولا حاجة !.. صح؟
من زهده الشديد وتفرغه للعبادة وتشبعه بالورع والخشية من التفريط، لم يتزوج..
لحد ما بقى نموذج للعابدِ المُتَرَقِّي في درجاتِ التقوَىِ إللي كل الناس تتمنى تبقى زيه.. ومع ذلك... عند وفاته، قال عنهُ الإمامُ أحمدُ بنُ حنبل:
"لو كان تَزَوَّجَ! فلو أنه تزوجَ لَتَمّ أمرُه".. لِعلمِ إمامِ السُّنّةِ الفقيهِ الحكيم، أن مَهَمةَ إنباتِ قلوبٍ مُسلمةٍ تَسجُدُ للهِ في أرضِه إلى يوم القيامة، إنما هو مِن معالِي الأمورِ وأعظمِ العبادات...
دة فضل القيام على شؤون ولادك الحياتية فقط، ما بالك بقى بفضل قيامك معاهم على غرس العقيدة والدين لنفسك وليهم، بصبر وحكمة ومجاهدة وإخلاص.....؟
يا أم يا حاضنة يا جميلة، ياللي ولادك هما شغلك الشاغل عشان تخرَّجي جيل من الأسوياء يرمم دمار الأمة:
...اصبري... وأبشري...
أمومتك كنز = اغرفي أد ما تقدري تشيلي...
#لقطات_تربوية
#أسماءمحمدلبيب
أمةالله-عفا الله عنها

المقالة رقم 378
#
لقطة
54
#
ابنك_وحرَجِك_من_العذر_الشهري_قدامه
أم عندها العذر الشرعي.. معودة ولادها على فضل صلاة الجماعة.. ابنها بيصلي معاها جماعة في البيت لما بابابه مش بيبقى موجود عشان ياخده للجماعة في الجامع.. كعادته بيناديها عشان يصلوا سوا، فقالت له: ((صلي إنت لوحدك أنا هصلي بعدين.. طب ليه مش دلوقتي يا ماما؟.. معلش أصلي تعبانة، فهصلي بعدك لما أرتاح))...
ويعدي الفرض.. والفرض إللي بعده.. واليوم إللي بعده وإللي بعده.. أسبوع كامل بالمنظر دة والولد مش بيشوف مامته كعادتها بتصلي، لا في أوقات الجماعة ولا في غيرها، وبيسألها يلاقي نفس الردود "المستهترة" أو حجج مشابهة ما تقنعش قلب طفل نقي بيوزن الكلام بدقة..
أصلها مكسوفة تقول له إنها عندها ((العذر الشرعي))..
يعني يا حبيبتي، بعد ما تعبتي في غرس فضل الجماعة في قلب ابنك، بتهدمي دة بإيديك كالتي نقضت غزلها من بعد ((قوة)) أنكاثًا، وبتعلميهم إهمال الجماعة و تأخير الصلاة بلا سبب منطقي؟
تفتكري سهل عليهم يشوفوا القدوة كدة وما يتستهتروش بالصلاة في يوم من الأيام؟
ناهيكِ عن إني هفترض طبعا إنك لما قلتي "هصلي بعدين/بعديكم" دة كان تعريض منك ولم يتحول لكذب بإنك عملتي نفسك بتصلي قدامهم عشان يسكتوا ولا قلتيلهم أنا صليت؟
ثم هتعملي دة طول الأسبوع..؟! طب ليه دة كل...؟
ليه دة كله..؟ {مَا يُرِيدُ اللَّهُ لِيَجْعَلَ عَلَيْكُم مِّنْ حَرَجٍ} .. {وَمَا جَعَلَ عَلَيْكُمْ فِي الدِّينِ مِنْ حَرَجٍ}...
والمشكلة أكبر لو عندك بنوتة كمان وبتعوديها على "العَنَت" دة..
بتعوديها إن "العذر الشرعي" دة ((عار مخجل))، وإن ماما لما تكون مش بتصلي ومش معرّفة الأمور دي إلا فقط لبنتها، فتيجي بنتها في يوم تقول لها يالا نصلي سوا يا ماما = فتقوم ماما تغمز لها في السر كدة عشان محدش ياخد باله من باقي أهل البيت سواء بابا أو الاخوات الصبيان...
إللي اتعلمته = إن الكلام دة مفيش دليل شرعي على صحته ولا كانت أمهات المؤمنين بتعمل كدة رغم اشتراكنا معاهم في نفس المسألة بملابساتها وعموم البلوى..
دة غير إنه بيعلم البنات يخجلوا من الأمر دة ويحسوا بعار، وتلاقي البنت بعد كدة تتكسف من أبوها وأخوها وزوجها...
وتنزوي وقت الحيض منعًا للإحراج وهروبا من إن حد يسألها فتضطر ترد..
وبتقوم تصلي الفجر لما باباها بيصحيها وتعمل نفسها بتصلي وهي هتموت من التعب..
كل دة عشان محدش يعرف ((العار!)) إللي اسمه عذر شرعي، رغم إن دة أمر لا يدعو للخجل أو التخفي أو الإنزواء عن الأهل إللي في بيت واحد...
فليه الحرج والعنت خصوصا لو هيترتب عليه مشاكل تربوية ونفسية؟...
أنا ولادي صبيان، ومع ذلك مفهماهم كل دة من و هم في أولى ابتدائي كالتالي:
مش هتصلي ليه يا ماما؟
عشان أنا في الوقت إللي ربنا قال فيه للبنات ما تصليش، ودي حاجة بتاعة النساء ليها علاقة بإنهم هما إللي بيشيلوا نونو في بطنهم لما بيكبروا، وهتفهمها أكتر لما تكبر إن شاء الله يا حبيبي وتاخدها في العلوم...
....ببساطة ....
طبعا الكلام دة فقط فيما يخص أهل البيت الواحد يعني والنساء والأقارب المقربين حسب ظروف كل أسرة.. يعني بين البنت وأهلها بلاش البنت تحس إنها عاملة عَمْلَة أو شايلة هَمّ تتكشف...
لكن مفيش مشكلة نزرع في البنات الحياء من إفشاء الأمر دة خارج الدايرة دي، بالذات مع الرجال الأغراب...
لكن من غير ما الحياء دة يمنعها من سؤال العلماء فيما يخص دينها في مسائل الحيض وخلافه، فالصحابيات إللي هما أشد حياءً منها لا شك ما كانش بيمنعهم حياءهم من استفتاء نساء ورجال الصحابة في أمور الحيض، بل دعت عائشة لمن لا يمنعها حياؤها من ذلك: "نِعْمَ النِّسَاءُ نِسَاءُ الأَنْصَارِ، لَمْ يَكُنْ يَمْنَعُهُنَّ الْحَيَاءُ أَنْ يَسْأَلْنَ عَنِ الدِّينِ وَيَتَفَقَّهْنَ فِيهِ"*رواه مسلم..
لكنهن كن يستبدلن التصريح المباشر والألفاظ المباشرة = بالتعريض والكناية.. فحياؤهن لم يمنعهن من السؤال في الدين، ومع ذلك يراعين الحياء عند طرح السؤال.. فعلمي بنتك توازن حياءها على مسطرة الصحابيات، خير النساء..
وطبعا فهمي ولادك –صبيان وبنات- بشكل مطلق إن ((ماما في العذر الشهري حاليا)) دة سر وأمانة بيننا ما يتقالش برة البيت خالص لأي حد بالذات قدام أصحاب بابا أو إخواته.. فترة كدة لحد ما يبكبروا ويعرفوا يميزوا مين يعرف ومين ما يعرفش..
#
لقطات_تربوية
#
أسماءمحمدلبيب
أمةالله-عفا الله عنها

⛱
ولو قالك مش عارف أو قال لك "عاوز أشوفها وخلاص" -فضول طبيعي يعني؟ = أكدي عليه كل اللي فات وكرريه كل شوية وقوليله إنت شفتها خلاص وأنا سيبتك تعرف شكلها وخلاص، ومش من الحياء إنك تكرر دة كل شوية..
⛱
ولو قال لك فيه حاجة بتهرشني بتضايقني..إلخ = خديه لطبيب يعالج المشكلة، وممكن ترشي له "بودرة تَلك" عليها، بتقلل الرطوبة إللي بتضايق في المنطقة دي وبتقلل اضطراره للعبث فيها بإيده، عن تجربة..
⛱
بجانب مصطلح "العورة"، علميه مصطلحات زي "غض البصر" و "المحارم" و "الحرمات" وإنه كولد يصرف بصره عن الأمور دي، ومالوش أي دعوة بحاجة البنات ولا لعب البنات إللي على النت -لعب تلبيس البنات وما أعرفش إيه- ولا كرتونات البنات.. زي ما قلنا في اللقطة التربوية "ابنك وعفة البصر من وهو صغير" -موجودة في تاني تعليق-.. فهميه بالراحة كدة وبتبسيط للمعنى والإشارة، وما تخافيش: هيفهم بالتكرار...
⛱
لو لاقيتيه بيبص على مناطق في جسمك بفضول، أو بيسألك إيه الفرق ووإلخ = بكل هدوء فهميه إن النظر بالشكل دة للعورات غلط، وما يعملش كدة لا مع ماما ولا مع أي نساء، وتفهميه بعدها إن ربنا خلق الذكر والأنثى كل واحد له طبيعة بدنية مختلفة لمهمة مختلفة لاستمرار الحياة، وهياخد تفاصيل دة أكتر في العلوم لما يكبر إن شاء الله..
⛱
كلميه كتير عن إن جسمه ملكه لوحده مش فُرجة للناس ومحدش يبص عليه بشكل مريب، ولا يقرب منه باللمس بطريقة غريبة ولا بالضرب أو التعرية -إلا الاستثناءات الحياتية المعروفة طبعا..
⛱
ولو حد حاول يقتحم عليه/عليها عورته بلمس أو بضرب أو بكشف = يبعد عنه ويجري يبلغك فورا هو مين.. ولو ما عرفش يجري أو ما كنتيش موجودة = يصوّت بصوت عالي ينادي أقرب حد.. ولو محدش سمعه = يضرب الشخص دة بكل قوته ويدافع عن عورته لإن العورة عِرض وشرف، وما يخافش لو مات في سبيل دة = هيكون شهيد شجاع عند ربنا وربنا هينتقم له من إللي ظلمه.. المهم ما يستسلمش/ما تستسلمش ولا يبقى جبان قصاد حفظ فرجه وعرضه وعورته {والذين هم لفروجهم حافظون} / ((من قُتِلَ دون نفسِه فهو شهيد))..
⛱
ولو فيه أولاد بيتخذوا موضوع العورات دة نكتة وسخرية = ينهاهم عن دة وما يصاحبهمش لحد ما يبلغك هما مين..
⛱
بالذات كمان الهزار والضحك على ((إخراج الريح))، وفهميه إن "إخراج الريح" دة عورة معنوية، و"عورات الجسد" عورة حسية، وكله نستحي منه ونستره، زي علمناهم في لقطة "تعمد إخراج الريح والضحك عليه"../*في التعليقات
⛱
علميه لما يقعد يكون قافل رجليه كويس –سواء ولد والا بنت- ولما يوطوا على الآخر على الأرض يجيبوا حاجة يحاولوا ينزلوا بالركب –زي النزلة إللي بننزلها للسجود كدة.. || مش يوطي بشكل يكون مخلي مقعدتهم في الأعلى وراسهم في الأسفل بطريقة مُبرزة لتفاصيل العورة ومدعاة لتطلع الأنظار إليها، ولما يلعب مايعملش حركات تبرزها، لأ يحترز دايما إن منطقة عورته ماتكونش متجسمة ومتسلطة لنظر الناس بشكل بارز زي الحركات المنحطة إللي في أفلام توم وجيري وكدة -_- ..
#باختصار
: يتعامل مع عورته على إنها سر بيستره عن العيون باللبس الواسع والهيئة الساترة..
⛱
عند تنقية اللبس إللي هيلبسه قدام الناس = علميه يختار الملابس الواسعة، لا الضيقة على العوارت ولا إللي وسطها واقع ومبين جزء من عورته أو صرته أو ملابسه الداخلية! ولا إللي شالحة فوق حدود العورة المغلظة -ما بين الصُّرة والركبة- ولا المقطّعة في مناطق العورات!..
⛱
وبنتك كذلك، بس بنزود عليها هيئة اللبس إللي بتسترها أكتر وتعودها على التدرج في الاحتشام تمهيدا للحجاب بشروطه الثمانية المتفق عليها.. واستعيني بمقالات زميلة الكفاح حبيبتي: د.شيما مشرف فيما يخص البنات = كفت ووفت فيها ربي يبارك لها../ في أول تعليق..
⛱
وهما بيلعبوا، لو الكورة مثلا جت في العورتين وضحكوا = فهميهم إن كدة عكس الحياء إللي هو من أهم شعب الإيمان، وإن دي ((العورة)) إللي مفروض نخجل لو حد جه جنبها ونستحي، مش نضحك!.
⛱
وطبعا ممنوع منعا باتا الهزار بالإيد على العورات زي ما بيحصل ضرب للمؤخرة في كرتونات توم وجيري بردو، وياما حذرنا منها إن محتواها معظمه للكبار فقط...
⛱
ونمنع من بدري خالص أي مواد مرئية فيها ااستهانة بالعورات..
⛱
وطبعا نعلمهم آداب الاستئذان والطرق على الأبواب، فقه الاستئذان كله للصغير والكبير.. افتحي آيات الاستئذان واقروا تفسيرها سوا وطبقوه يوميا بشكل عملي لحد ما يتعودوا..
#لقطات_تربوية
#أسماءمحمدلبيب
أمةالله-عفا الله عنها

المقالة رقم 377
#لقطة
53
#ابنك_وفقه_العورات
#ابنك_والحياء_في_العورات
⛱
من يوم ما ابنك يتم سنتين بالتقويم الهجري -تمام سن الرضاع- ما تظهريش أبدا أبدا أبدا عورتك قدامه، أقصد بيها: لا عورتك إللي فوق ولا العورة المغلظة.. على أساس إن دول هما العورتين إللي عند النساء، إللي مختلفين عن عورات الرجال/الصبيان..
⛱
وطبعا قبل تمام سن الرضاع بحبة معقولة = ما تظهريش عورتك المغلظة قدامه نهائي.. وافصليه عن أوضتك بدري بدري بمجرد ما يبقى مش بيحتاجك دوريا في الفترات الليلية.. (وكدة كدة دة أحسن لنموه النفسي فيما بعد وعدم تعلقه بيكي بشدة)..
⛱
من بعد السن دة: تقعدي قدامه لابسة لبس ساتر للعورتين دول كويس.. حتى لو لابسة لبس خفيف شوية عشان حر أو غيره = تبقى مظبطة هدوم تحت هدومك -يكونوا بنفس اللون أو لون يليق يعني براحتك- المهم يكونوا مقفلين وساترين المنطقتين بإحكام.ومستورين كويس وما يبانوش خالص تحت أي ظرف..
⛱
وبالتالي ما تاخديهوش معاكي الحمام بعد المرحلة دي..
⛱
وبالتالي ما ترضعيش ابنك الصغير قدام ابنك الكبير إللي سنه تجاوز السنتين.. خشي أوضتك وقوليلها "هأكّل أخوك وآجي".. ولو مش نافع نهائي تبعدي عن المكان، غطّي نفسك بخمار كإنك فقط بتنيمي أخوهم، وإدي ضهرك ليهم وإديهم حاجة تشغلهم عنك ونبهي عليهم محدش ييجي جنبك عشان أخوهم ينام وكدة...
⛱
وما تغيريش الحفاضة علنا كدة قدام الناس أو اخواته -إلا لو غصب عنك محتاجة مساعدة.. ولا تمشي بيه في البيت "بلبوص" -كما ولدته أمه- بتدوري على هدومه، لأ.. لفيه بفوطة بعد التشطيف وغيريله في مكان مستور عن العيون، وفهميه هو واخواته إن ((دي عورة)).. وطبعا الكلام أشد لو دي بنت مش ولد..
⛱
وطبعا ما تصوريهوش وهو عريان كدة صور للذكرى تتحط في ألبومات الصور! .. ولو لقيتي صور عندك فيها عوراته = لوني العورات بقلم ماركر إسود وما تخليش حد منهم -ولا غيرهم!- يتفرج عليها من باب الضحك!..
⛱
عززي أوي أوي قيم الستر عنده، وابدئي استخدمي كلمة "عورة" من أول يوم لحواراتك معاه.. ما تقوليلوش عليها "توتة" وما أعرفش إيه.. قولي فقط: ((عورة)) وهو هيحفظ ويفهم...
⛱
لفظة "عورة" = فيها تغليظ للحرمة وتفخيم للحياء..
⛱
علميه يقول "بسم الله" عند خلع هدومه، وفهميه يقولها عشان بتستر ما بين أعين الجن فما يشوفوش عورتك..
⛱
وعلميه لو لقى باب مقفول يخبط، لإن ممكن حد يكون جوة بيغير هدومه وكاشف عورته، ولإن في زماننا دة = مظنة انكشاف العورات غالبا بتكون خلف الأبواب المغلقة، وأي نعم آية الاستئذان خصصت ثلاث أوقات فقط للأطفال ليستأذنوا = لكن دة دفعاً للحرج عنهم بما إنهم كثيروا الطواف في كل البيت، لكن العلة كانت ((ثلاث عورات لكم))، فأي وقت ينطبق عليه العلة ((عورة)) غير الأوقات الثلاثة دول = وجب التنبيه فيه على الأطفال الاستئذان.. ثم بعد البلوغ يستأذنوا في كل وقت زي الكبار..
⛱
خليه يستحمى لوحده بعد سن 7سنوات مثلا وما تحميهوش إنتي، حتى لو هيكروت ومش هينضف نفسه بنسبة 100%، طنشي نوعًا ما في سبيل إنك تنمي حسّ الحياء عندهم، ومرة على التانية يتعلموا ينضفوا صح لوحدهم..
⛱
وممكن تعلميه قبلها بفترة وهو بالمايوه في البانيو وتتابعيه لحد ما تطمني إنه بقى بينضف كويس = تسيبيه بقى يستحمى لوحده..
⛱
ولو هتلبّسيه أو هتخشي عليه وهو بيستحمى أو بيلبس هدومه، قوليله "أنا هغمض عيني أهو حاااضر حاااضر، عارفة عارفة.. مش هبص خااالص أنا عارفة إن إنت مؤدب وعندك حياء وبتحافظ على عورتك من العيون"..
👈
يعني ((تلقين بالإيحاء النفسي))..
⛱
علميه إن "العورة" دي الشيطان هو اللي بيجب إن المسلم يبينها ويعريها -وحفظيه الآية: {فَوَسْوَسَ لَهُمَا الشَّيْطَانُ لِيُبْدِيَ لَهُمَا مَا وُورِيَ عَنْهُمَا مِن سَوْآتِهِمَا}..
⛱
واحكيله قصة الآية التانية: {فَبَدَتْ لَهُمَا سَوْآتُهُمَا وَطَفِقَا يَخْصِفَانِ عَلَيْهِمَا مِن وَرَقِ الْجَنَّةِ}، وإن التعرّي وكشف العورة -في غير حلال الله بالأسباب الشرعية- بيبقى عقاب، مش لعبة ولا حاجة تفرّح، وإن الستر هو الأجمل.. هيسألك إيه الأسباب الشرعية؟ = قوليله: عند طبيب مثلا أو بين الزوجين..إلخ
⛱
حتى لو قاعد ((لوحده))، علميه إن الحياء من الله أولى وأوجب..
☘️
☘️
الصحابة سألوا النبي في مرة: ((يا رسول الله، عَوراتنا ما نأتي منها وما نَذَر؟ قال: احفظ عَورتَك إلَّا مِن زَوجتِك أو ما مَلَكَت يَمينُك.... حتى قالوا: يا رسول الله، فإنْ كان أَحدُنا خالِيًا؟ -يعني لوحده- قال:
☝️
((الله أَحَقُّ أنْ يُستَحْيَا مِنه مِن الناس))/*حديث صحيح..
⛱
لو بيحب يتفرج على عورته وواخد الأمر دة لعبة = اتكلمي معاه الأول بالراحة واسأليه هو بيعمل كدة ليه؟.. دة هدي النبي صلى الله عليه وسلم: بيسأل الأول عن السبب.. (زي قصته مع الطفل إللي بيرمي حجارة على النخل إللي هنبقى نحكيها إن شاء الله، وغيرها..)

🌀
فهموهم على أد عقولهم الأسباب الشرعية لدة وثواب دة عند ربنا وحب ربنا للحياء وحفظ البصر والفرج، بالتدريج...
🌀
وأكيد هيبقى فيه أحيانا ممانعة ومشاكسة ومشاغبة، لكن بالتمرين والصبر والحب والدعاء والقدوة هينسجموا مع توجيهاتك إن شاء الله طالما التعويد من صغرهم على المنظومة كلها بدون تناقض للتوجيهات مع القدوة..
#بكلمك_عن_تجربة
..
#أبشري_واصبري_وإن_عليك_إلا_البلاغ
..
..
🌿
الحياء نبتة بتحتاج غرس من بدري وسقاية مستمرة
🌿
..
و ابنك على ما تعوديه وتربيه
👌
..
وحسبنا الله في الكفرة وأعوانهم إللي متعمدين يحشروا ست في كل حاجة عشان يهتكوا حُجُب حياء ولادنا ويناتنا ويفسدوا فطرتهم النقية بتكرار النظر للعورات..
-----------------
** وطبعا دا كلام ممكن تستغربوه في زماننا دة، بس النبي ﷺ علمنا "بدأ الإسلام غريبا ويعود غريبا = فطوبى للغرباء".. وطوبى لمن قبض على الجمر واحتسب الأجر من الله..
**وإن شاء الله فيه لقطة تانية مخصوص عن "العوارات" فقط..
*هامش: ماندالا: بسميها للولاد "زخارف فنية" مش ماندالا، عشان كلمة ماندالا كلمة وثنية..
#لقطات_تربوية
#أسماءمحمدلبيب
أمةالله-عفا الله عنها