الأسرة أمن وأمان

فيه فرق بين واحد يساعدك تكبر، وواحد يستفيد منك وأنت واقف مكانك.
الإنسان اللي فعلاً حريص عليك، مش هدفه إنك تفضل محتاج له طول عمرك.
هو عايزك مع الوقت تفهم أكتر، وتسأل أكتر، وتعرف تاخد قرارك بوعي، وتعرف كمان إمتى تحتاج تسأل أهل الخبرة.
مش بس يقول لك: اعمل كذا.
لكن يحاول يعلمك: ليه؟ وإيه الدليل؟ وإيه حدود الكلام؟
وأحياناً ممكن يقول لك:
استنى.
ما تتحركش دلوقتي.
أنت لسه ما تعرفش الصورة كاملة.
ممكن كلامه يضايقك، أو يحبط حماسك شوية، لكنه بيحاول يحميك من قرار ممكن تدفع ثمنه سنين.
أما العلاقة اللي محتاجة مراجعة، فهي اللي تلاقي نفسك فيها بعد فترة:
بتنفذ أكتر، لكن بتفهم أقل.
بتتحمس أكتر، لكن علمك ما زادش.
بتدافع عن الشخص أو الجماعة، لكن مش عارف تشرح ليه.
ولو سألت: ليه؟ أو فين الدليل؟
يتحول السؤال نفسه إلى مشكلة.
وهنا لازم تاخد بالك.
لأن مش كل واحد يخليك تحس إنك مهم يكون فعلاً بيبنيك.
ممكن واحد يقول لك:
أنت من رجال المرحلة.
الدين محتاجك.
الأمة مستنياك.
فتشعر إنك صاحب رسالة كبيرة، لكن بعد سنوات تكتشف إن حماسك زاد، بينما علمك وعقلك ومستقبلك ما اتبنوش بنفس الدرجة.
وعشان كده ما تحكمش على العلاقة من الكلام الجميل بس.
اسأل نفسك بعد فترة:
أنا اتعلمت إيه؟
هل بقيت أفهم أحسن؟
هل بقيت أقدر أفرق بين الدليل والشعار؟
هل بقيت أعرف أسأل من غير خوف؟
هل تعلمت علم أو صنعة أو مهارة؟
هل بقيت أقدر آخد قرار مسؤول؟
ولا أنا بس بقيت أسرع في تنفيذ المطلوب مني؟
ومهم كمان نفهم إن الاحتياج لحد مش عيب.
الطالب محتاج أستاذ.
والمريض محتاج طبيب.
والمبتدئ محتاج خبير.
المشكلة مش إنك تحتاج لحد.
المشكلة إن العلاقة تفضل تزود اعتمادك عليه من غير ما تزود أهليتك أنت.
ومش معنى إن حد قال لك رأيه مباشرة إنه بيستخدمك.
أحياناً الطبيب أو العالم أو الخبير لازم يقول لك بوضوح: الصواب هنا كذا.
لكن الفرق يظهر مع الوقت:
هل بيفهمك؟
هل بيسمح لك تسأل في الوقت المناسب؟
هل بيعلمك حدود كلامه؟
هل بيخليك متعلق بالحق، ولا متعلق بشخصه؟
دي هي النقطة.
العلاقة النافعة تبنيك أنت.
تزود علمك.
تزود وعيك.
تزود قدرتك على السؤال.
وتخليك أقدر على تحمل مسؤولية قرارك.
أما العلاقة اللي تخليك محتاج دائماً للتصفيق والتوجيه والأوامر، وتعتبر السؤال صعف ثقة في القيادة، فدي علاقة تستحق منك وقفة ومراجعة.
فما تسألش بس:
هل هو بيشجعني؟
اسأل:
هو بيبنيني… ولا بس بيستعمل طاقتي وبس؟
محمد سعد الأزهري
#سيرة_وسائر

شايفين الدول اللي بتحافظ على نفسها وعايزة تقوى بتعمل إيه؟
بيكون عندها استراتيجية، ولما تعرف إن ملف معين جزء من قوتها، بتاخد فيه قرار واضح وقوي، وتنفذه.
والتعليم واحد من أهم الملفات دي، لأنك في النهاية لا تبني دولة قوية من غير تعليم قوي.
الصين مثلاً لم تقل: مفيش مدارس خاصة.
قالت: افتح مدرسة خاصة، لكن في مرحلة التعليم الإلزامي الموضوع مش سوق مفتوح.
ربح المدرسة يكون معقول، وأي فائض فيه يرجع مرة أخرى لخدمة العملية التعليمية، لا يتحول إلى أرباح موزعة على المستثمرين.
أما خارج التعليم الإلزامي، فالمساحة أوسع.
والأوضح من كده ما فعلته مع الدروس الخصوصية في المواد الأساسية.
كان عندها سوق ضخم جداً، يقترب من مئة مليار دولار، ومع ذلك قررت في 2021 وقف الدروس الربحية في هذه المواد.
ليه؟
لأن عندها تصور لما تريد أن يكون عليه التعليم، ومستعدة لاتخاذ قرار كبير لحمايته، حتى لو اصطدم بمصالح اقتصادية ضخمة.
الدول لا تقوى بالأمنيات.
الدول تقوى حين تعرف أين توجد قوتها،
ثم تضع لها استراتيجية، وتتخذ القرار، وتملك القدرة على تنفيذه.
ولو عايزين نبقى أقوياء، فالتعليم مش ملف جانبي في الحكاية.. التعليم واحد من أهم الأماكن اللي بتبدأ منها الحكاية كلها.
محمد سعد الأزهري

🎙️
من لقاء «ساعة أمان»
🤍
تسجيل اللقاء، متضمنًا بعض الإجابات عن الاستشارات المرسلة من المتابعين، نسأل الله أن ينفع بها، وأن يجعلها سببًا للخير والطمأنينة.
وإن شاء الله، يكون لنا لقاءٌ آخر لاستكمال الإجابة عن بعض الاستشارات.
🤍

ننتظركم بعد الصلاة... ونتمنى أن نراكم معنا من بداية اللقاء، فموعدنا أجمل باجتماعكم.