Mutolaa olami

* * *
Sen uzoq yashaysan,
Hammadan ziyod.
Hali toychoqlaring o‘ynab yuribdi.
Meni-chi, shum ajal eshikda, hayhot,
Egarlangan otday kutib turibdi.
Sen balki baxtlisan,
Umringda ko‘klam,
Tunlar rang oladi hali sochingdan.
Men-chi, nazaringda yovqur bo‘lsam ham
Bir kunda to‘rt fasl kechar boshimdan.
Yuz yil yashab o‘tar dunyodan birov,
Fursat manglayiga sololmas izlar.
Yo‘q, yo‘q, yillar emas umrga egov,
Uni yemiradi beomon hislar..
A. Oripov
@mutolaa_olami

#rasm
shu yerda tursin.
Hech birimiz bu dunyoga istab kelmagan boʻlsak ham, umrning badali koʻp.
Har kuni qizimni 2-3 marta aylantirishga olib chiqaman. Va har safar shu kishilarni koʻraman. Yoshi bir joyga borib qolgan, oʻziga eʼtibor va parvarish kerak boʻlgan otaxon har kuni muttasil oʻgʻlini(?) aylantiradi, hech qachon aravachani boshqa kishi yetaklaganini koʻrmadim.
Yaqinda ilmiy ishim boʻyicha muammo chiqib qolib, 3 yillik mehnatim havoga uchay deb turganida ochigʻi, yashagim ham kelmay qolgandi. Oʻshanda kechki payt yana shu kishilarni koʻrdik. Ota oʻgʻliga suv ichirayotgandi. Suvni 1-2 qultum ichguncha anchasi kiyimlariga ham toʻkilib ketdi. Oʻsha kun kechasi bilan koʻz yoshlarimni toʻxtatolmadim. Axir mendagi muammolar qanchalik arzimas, koʻz yoshlarim qanchalar yengil..
Har kimning mushkullari oson boʻlsin, suratdagi qahramon otaning ham!

— insonni eng tez tark etadigan hissiyot qaysi?
— kim yoki nimadandir minnatdorlik hissi.
©

#Huzur
nashriyoti juma kuni ilk doʻkonining ochilish marosimini oʻtkazar ekan, boramizmi?)
Uzr, taklifnoma yashin tezligida qizimning qoʻliga tushib qolgandi. Aytishadi-ku, har qanday gʻijim qogʻoz/kitob/daftar ortida bir shumtaka bolakay bor, deb:)

​
#Qoʻzichoqlar_sukunati
Tomas Harris
Kitobni 2-3 kun oldin tugatdim, asar barcha detektiv ruhdagi kitoblar kabi serharakat syujet yoʻnalishiga ega. Hech qanday maʼnaviy ozuqani oʻylamay, shunchaki, miriqib kitob oʻqishni istab qoladigan vaziyatlar uchun yaxshi variant deyish mumkin. Ammo yuqori saviyali detektiv asarlar qatoriga qoʻsholmadim ochigʻi. Barcha voqealar, yechimlar zoʻraki ravishda bosh qahramon oldida toʻplangandek tasavvur uygʻotadi. Yaʼni butun jinoyat-qidiruv tizimida faqat bir talaba qizninggina jinoyatlarni ocha olishi, faqat ugina manyakning manzilini topib bora olishi(shuncha harbiy imkoniyat boʻlaturib) boshqalar uchun vaqt va harakat toʻxtatib qoʻyilgan-u, faqat u yelib-yugurib ishlagandek tasavvur uygʻotadi oʻquvchida. Balki, tarjima darajasi ham sababdir bunga. Chunki kitobning eski versiyasini sotib olib qoʻyibman: anchagina tahrirtalab ekan.
Men kitoblarni fikrning goʻzal ifodalari, chiroyli nutqlari uchun ham oʻqiyman. Bu jihatdan asarni maqtay olmas ekanman. 1-2 tagina iqtibosdan tashqari mulohazali fikrlarni uchratmadim.
Ammo kitob stress va zerikish muhitida juda yaxshi oʻqiladi. Shunaqa vaziyatlarda oʻqib qoʻysangiz boʻladi.
Kitob boʻyicha kino ham suratga olingan ekan. Katta-katta koʻrib chiqaman va maʼqul koʻrsam, sizga ham ulashaman.
Siz qanday kitoblar oʻqidingiz, tavsiya qilasizmi?
@mutolaa_olami

Sukunat ham mazax qilishga qodir..

Inson oʻzini boshqalardan koʻra tezroq kechiradi. Boshqalarni esa oʻzidan koʻra tezroq ovuta oladi..
Depressiya va suitsidning asosiy sababi ham oʻzini ovuta olmaslik aslida.

​​
Kitob shunday narsaki, negadir bu sohani hamma yaxshi bilaman deb o'ylaydi. Holbuki yillar davomida kitobning orqasidan kun ko'rgan, yuzlab kitoblarni nashr qilganlarning ham soha haqida yetarlicha bilimi yo'qligiga ko'p bor guvoh bo'ldim. Chinakam kitobxon kitobning sifatini juda yaxshi farqlaydi. O'z navbatida unga kitob mazmunan emas, moddiyan ham qadrli. U kitobni ushlaganda zavqlanishni, qaraganda ko'z quvnashini, kitob uzoq xizmat qilishini xohlaydi. Shu bois muqovaga, ishlatilgan qog'ozga, yelimga, tikilgan ipga, shriftlarga, sahifalashga, imlo va uslubiy xatolargacha e'tibor beradi. O'ziga nima kerakligini aniq bilgan iste'molchi ishlab chiqaruvchi e'tibor qilmagan jihatlarni ham ilg'aydi. Eng yaxshi va to'g'ri bahoni oxir-oqibatda iste'molchi beradi. Bizning kontekstda bu iste'molchi kitobxonlar.
1000 Kitob loyihasi jadal suratlarda boshlandi. Ammo o'tgan yil adog'ida loyiha ichida va atrofida qator gap-so'zlar urchidi. Kim haq, kim nohaq, bu boshqa masala. Mana shu dilxiraliklar fonida loyiha menejeri Xurshid Yo'ldoshev shartnomani uzaytirmadi va loyihadan ketdi. Loyiha menejeri sifatida Eldor Asanov ish boshladi.
Kuni kecha kitoblarning signal variantlari e'lon qilindi va jamoatchilikning keskin e'tiroziga sabab bo'ldi. Bir qarashda ular abituriyentlarning printerdan chiqarib oladigan test kitobchalariga o'xshab ketardi. Balki kitoblar ko'ringanichalik sifatsiz emasdir, ammo vah deydigan darajada zo'r ham emas. Xalqning milliardlab puli sarflangan loyiha doirasida bundan ancha sifatli kitoblarni kutgandi bu xalq.
Bugun biz bukblogerlar, kitobxonlar hatto xususiy nashriyotlardan ham sifatli kitob talab qilyapmiz. Vaholanki ular har bir tiyinni o'z cho'ntaklaridan sarflashyapti, shunda ham iste'molchi sifatida har tomonlama sifatli, "shkarniy" kitob talab qilyapmiz. Ha, kitobning mazmuni muhim, ammo ustimizni yopsa bo'ldi deb qop kiyib yurmaymiz, qorin to'ysa bo'ldi deb qozonning o'zidan ovqat yemaymiz, shakl va mazmun bir butun narsa, bu qushning ikki qanotiga o'xshaydi, ikkisini bir-biridan ajratib, birini boshqasidan ustun qo'yib bo'lmaydi.
Mana shuning kabi e'tirozlar yangragach loyiha menejeri e'tirozchilarni "hasharotlar", "chichqoqlar" deb haqoratlagani internet tarmog'iga sizdirildi. Bu yuqoridagi masaladan alohida olganda ham juda-juda xunuk holat. Xalq avvalo soliq to'lovchi sifatida, shu bilan birga kitobxon sifatida mahsulotning sifatli bo'lishini talab qilishga va u haqida fikr bildirishga haqli. Fikr egalarini haqoratlash esa na olimlik etikasiga, na davlat xodimi etikasiga to'g'ri keladi.
Chiqishi kutilayotgan kitoblar sifati yomon bo'lmasa-da, shu bozorlardagi odatiy kitoblar darajasida bo'lishi mumkin. Ammo bunday kitob chiqarish uchun milliardlab pul sarflash shart emas, bundan-da a'lo sifatdagi kitoblarni xususiy nashriyotlar o'z hisobidan kunda, kunora chiqarib yotibdi. Shuncha pul ketdimi, shunga yarasha uzoqdan ko'rganda ham vah deydigan kitob chiqarish kerak. Chiqarolmadingizmi, unda e'tirozlarga loyiqsiz.

​
#Murakami
#Norveg_oʻrmoni
Murakami ijodi bilan tanishish boʻldi bu kitob. Yutoqib oʻqidim, yozuvchi asar orqali voqelikni, ijtimoiy-psixologik vaziyatni, munosabatlarni shunday silliq anglatganki, 3 kun oldin tugatganimga qaramay, oʻziga xos tushkunlik haliyam tark etgani yoʻq.
Yashar ekanmiz, turli vaziyatlar, turli insonlar bilan qarshilashamiz. Atrofimizda kechinmalarimizga qadriyatlarimizga zid holatlar/kishilar bilan toʻqnashganda ularga moslasha olmaslik yoki moslashishga urinib-chiranish ruhiyatimizni haddan ziyod toliqtiradi. Oxir-oqibat irodasi kuchsiz(yoki qaysidir maʼnoda kuchli) kishilar suidsidni afzal koʻrishadi.
Aslida hayotdan voz kecha olish katta matonat talab qilishi toʻgʻri. Ammo men uchun bu ishning mutlaqo absurdligi shundaki, boshqalarning xudbinligi, atrofimizdagilarning bizni tushunmasligi ortidan oʻz hayotimizga nuqta qoʻyishimiz orqali oʻshalarga oʻxshab qolmaymizmi, bu ish orqali qaysidir yaqinimizga ruhiy zarba berib, ularning ham hayoti barbod boʻlishiga sababchi boʻlmaymizmi?
Bu didaktika emas. Bir tutam umrim davomida bu kabi niyatlar boʻlmagan deysizmi? Har birimizda boʻlgan. Nafaqat begonalar, yaqinlarimiz bilan ham yuzaga keladigan tushunmovchiliklar odamni boʻgʻib qoʻyadi. Ammo odam oʻz muammolariga yechim topa olmasa, oʻlimi orqali ham yana bir nechta muammolarga,  iztiroblarga sababchi boʻlish qanchalik toʻgʻri?
Asar ham ikki qahramonning hayotini tubdan oʻzgartirib yuborgan oʻlim bilan boshlanadi. Shu kabi voqealar bilan hazin yakunlanadi.
Fikrlarimni haliyam bir joyga yigʻolmagan boʻlsam ham, asarda eng havasimni keltirgan muhit Naoka davolangan muassasa boʻldi. Shu vaqtlarda bunday sihatgohlarga judayam ehtiyojim borkii.., aslida atrofimizda hech kim ruhan toʻliq sogʻlom emas, jisman-ku, aytmasa ham boʻladi. Shunday muassasa bizda ham boʻlsaydi, hayotimizga toksik taʼsir qilayotgan kishilar va voqealardan dam olish imkoni boʻlsa edi..
Umuman olganda, asarni oʻqing, albatta, ruhiyatingiz kuchli boʻlsa.
@mutolaa_olami

🔴
FILOLOGIYA VA TILLARNI O‘QITISH YO‘NALISHIGA QABUL DAVOM ETMOQDA
—
INGLIZ TILI, YAPON TILI, XITOY TILI, KOREYS TILI, TURK TILI, RUS TILI, NEMIS TILI, ARAB TILI
🟤
Filologiya va tillarni o‘qitish yo‘nalishi
– til tuzilmasi, lingvistika nazariyasi hamda pedagogik mahoratni o‘rgatish bilan birga, o‘quvchilarning nutq madaniyatini shakllantirishga xizmat qiladi.
🟤
Bundan tashqari, fakultetda quyidagi ta’lim yo‘nalishlari mavjud:
— O‘zbek tili va adabiyoti;
— Jurnalistika
.
🟤
Ushbu yo‘nalishlar bo‘yicha tahsil olayotgan talabalar:
— Tahliliy va ijodiy fikrlash ko‘nikmalarini rivojlantiradi;
— Media savodxonlik va zamonaviy axborot maydonida faol bo‘lishni o‘rganadi;
— Akademik yozuv va notiqlik mahoratini oshiradi.
_____________________
— Bakalavriat ta’lim yo‘nalishlari
—
Magistratura mutaxassisliklari
➖
Rasmiy qabul platformasi:
qabul.afu.uz
➖
Qabul boti:
@AfuQabulBot
☎️
+99878 122 75 57
🌐
@Alfraganus_callcenter
📌
Lokatsiya
😁
AFU
|
Telegram