Abdulla Oripov she'rlari

***
Men nechun sevaman O'zbekistonni,
Tuprog'in ko'zimga aylab to'tiyo?
Nechun Vatan deya yeru osmonni,
Muqaddas atayman, atayman tanho.
Aslida, dunyoda tanho nima bor,
Paxta o'smaydimi o'zga elda yo?
Yoki quyoshimi sevgimga sabab?
Axir quyoshli-ku butun Osiyo.
Men nechun sevaman O'zbekistonni?
Bog'larni jannat deb ko'z-ko'z etaman,
Nechun ardoqlarkan tuprog'ini men,
O'paman: “Tuprog'ing bebaho, Vatan”
Aslida tuproqni odil tabiat
Taqsim aylagan-ku yer yuziga teng.
Nechun bu tuproq deb yig'ladi Furqat,
O, Qashqar tuprog'i, qashshoqmiding sen?
Xo'sh nechun sevasan O'zbekistonni,
Sababini aytgin, desalar men ga,
Shoirona, go'zal so'zlardan oldin
Men ta’zim qilaman ona xalqimga.
Xalqim, tarix hukmi seni agarda,
Mangu muzliklarga eltgan bo'lsaydi.
Qorliklarni makon etgan bo'lsayding,
Mehrim bermasmidim o'sha muzlarga.
Vatanlar, vatanlar, mayli gullasin,
Bog' unsin mangulik muzda ham ammo,
YURTIM SENI FAQAT BOYLIKLARINGCHUN,
SEVGAN FARZAND BO'LSA KECHIRMAM ASLO.
Abdulla Oripov
@Abdulla_Oripov_sherlari

ТАРАҚҚИЁТ
Овчилар мақтанган қадим замонда
Бўза ва носвойнинг кайфини суриб:
— Фалон йил, фалон пайт, фалон довонда
Энг катта олқорни олганман уриб.
Энг юксак чўққини забт этган сайёҳ
Ғурур билан деган ўлганга қадар:
— Азиз набиралар, сиз билмайсиз, оҳ,
Мен ўша чўққида қучганман зафар.
Меъморлар ҳам яшар асрма-аср,
Уларнинг фахри ҳам шундан иборат:
— Мен бунёд этганман энг юксак қаср,
Менинг ижодимдир энг зўр иморат.
Тараққиёт экан, замонлар келиб,
Орзу босиб кетди бутун оламни.
Ҳозир мақтанишар: — Қўйингиз билиб,
Мен бадном қилганман энг зўр Одамни.
1989
Абдулла ОРИПОВ
@Abdulla_Oripov_sherlari

***
Баҳор кунларида кузнинг ҳавоси,
Танимни жунжитар оқшомги шамол.
Нега мунча ғамгин найнинг навоси,
Нега қалбим тўла ўкинч ва малол?
Барглар орасига тинмасдан сира
Ошно юлдузлардан тўкилади нур.
Билмайман, қийнайди қайси хотира,
Титроқ юлдуз каби музлаган шуур.
Мағлуб баҳодирнинг найзаси мисол
Маъюс эгилади терак учлари,
Барглар соясида ўйнайди беҳол
Уйқудаги қизнинг бедор тушлари.
Атрофимда ётар ғариб бир виқор,
Билмам, нега ўчди қалбим сафоси?
Нима ҳам қилардим, на иложим бор,
Баҳор кунларида кузнинг ҳавоси.
Абдулла Орипов

АБДУЛЛА ҚОДИРИЙНИНГ
СЎНГГИ САБОҒИ
Бирингиз Отабек, бирингиз Кумуш,
Доим яшнаб турсин севгингиз боғи.
Ҳақиқий муҳаббат билмасин сўлиш,
Устоз Қодирийнинг бу илк сабоғи.
Адиб юрагида аламлар қат-қат,
Лекин биттаси бор, ўчмасдир доғи:
Жонни тик озодлик йўлида фақат,
Бу эса устознинг сўнгги сабоғи.
1994
✍
Абдулла Орипов
@Abdulla_Oripov_sherlari

Assalomu alaykum!
Abdulla Oripov uy-muzeyi
ochilishi millatimiz adabiy-madaniy hayotidagi ulkan ahamiyatga ega voqea bo‘ldi. Uy-muzey ulug‘ shoir ijod laboratoriyasi bilan yaqindan tanishish imkonini berishi jihatidan ham qimmatlidir. Ustoz ijodkor uy-muzeyi ochilishi kunida
“Madaniyat va ma’rifat” telekanali
ga intervyu bergan edim. E’tiboringizga havola etishdan mamnunman.
Nurboy Jabborov
•┈•┈•❁✿❁•┈•┈•
Ассалому алайкум!
Абдулла Орипов уй-музейи
очилиши миллатимиз адабий-маданий ҳаётидаги улкан аҳамиятга эга воқеа бўлди. Уй-музей улуғ шоир ижод лабораторияси билан яқиндан танишиш имконини бериши жиҳатидан ҳам қимматлидир. Устоз ижодкор уй-музейи очилиши кунида
“Маданият ва маърифат” телеканали
га интервью берган эдим. Эътиборингизга ҳавола этишдан мамнунман.
Нурбой Жабборов
@Abdulla_Oripov_sherlari

Абдулла Орипов
ТЕМУР
Ҳар қанча фахр этсанг арзийди, ўзбек,
Балқибсан бир зотнинг юксак шонида.
Темурбек юлдузи Олтин қозиқдек
Чарақлар буюклар каҳкашонида.
Во ажаб, ёлғиз бир Занжирсаройнинг
Ўчини Ўрдадан ола билган зот.
Турон деб аталмиш каттакон жойнинг
Бағрига шунча йил сиғмабди, наҳот?!
Жаҳонни мўғуллар истилосидан
Қўтқариб қололган барлосий ботир –
Қочолмай тақдирнинг тақозосидан
Фотиҳ деб ном олмиш ўзи ҳам охир.
Энг улуғ бинолар мужассам бўлмиш
Оламда тенги йўқ Самарқанд-ку бор:
Темурбек жанг-жадал шавқига тўлмиш,
Қўлида шамширу тагида тулпор.
Ҳукми олий билан этмиш намоён
“Куч бу – адолатда”, деган сўзларин.
Қон тўкмиш Жаҳонгир гоҳо беомон
Ёвлари тикмасдан қонли кўзларин.
Отани боладан тирик айриб,
Тожу тахт талоши қизиркан борҳо.
Султон не зотларнинг қўлин қайириб,
Муҳташам салтанат айламиш барпо.
Аллоҳим бахш этмиш шунчалар шукуҳ,
Комилу етукдир шажара, зоти.
Бир ён Бибихоним, бир ёнда Шоҳруҳ,
Бир ёнда Улуғбек — синмас қаноти.
Не бахтким, туққан юрт бўлганда озод,
Муборак Ватанга қайтиб келмишсиз.
Қулоқ тутгайми, деб ноаҳил авлод,
Ташаккур, бизларни кўзга илмишсиз.
Ҳамон ер юзида шайтон туғёни,
Тилларда дуо-ю дилларда зарда.
Кўриб бу ноқису нотинч дунёни
Қайта босардингиз балки, саркарда.
Саъйи ниятларда руҳингиз сардор,
Ёвузлик чекингай, ўчгай ёмонлик.
Дастингиз шамширга бормасин зинҳор,
Ҳазрат, барчамизга тиланг омонлик!
✍️
1993 йил 30 август
@Abdulla_Oripov_sherlari

####
Assalomu alaykum hurmatli kanalimiz aʼzolari, ustozning sheʼriyatiga befarq bo‘lmagan sheʼrsevarlar. Ikki oy maboynida kanalga sheʼr joylolmadim. Ming bora uzr so‘rayman. Telgramim hakkerlar hujimiga uchragandan keyin blokka tushib qolgan edi. Blokdan chiqish uchun bir necha oy vaqt ketarkan. Uzoqroq cho‘zilgan tanaffusda ustozni hurmatini qilib, kanaldan chiqib ketmaganlaringiz uchun barchangizga tashakkur. Bundan keyin ham ishonamanki siz sheʼrsevarlar kanalni rivojiga o‘z hissangizni qo‘shasizlar degan umiddamiz.
Ustozni oxirati obod bo‘lsin
🤲
@Abdulla_Oripov_
sherlari
Talab va taklif uchun:
@Xojayor_SH

ФАСЛЛАРИМ
Етаклашиб қатор ва қатор,
Йўлдан ўтди етмиш беш баҳор.
У баҳорлар меники эди,
Болам, бари сеники энди.
Йўлдан ўтди ёз билан куз ҳам,
Улар менга бўлганлар ҳамдам.
Иккови ҳам меники эди,
Эгалик қил, сеники энди.
Ортда қолди чаманлар, боғлар,
Йўл сўнгида кўринди тоғлар.
Музликларга бориб етдим мен,
Фақат қишни ола кетдим мен.
✍️
Абдулла Орипов
🎙
Худойберди Тўйчиев
@Abdulla_Oripov_sherlari

BOBUR
Men-ku, oddiy odam,
Shundoq bo‘lsa ham
Shukr, bas, degancha g‘animlarim bor.
Shart emas ularga ta’rif chinakam,
Biri jununsifat, birovi hushyor.
Biroviga yoqmas jindek jur’atim,
Biroviga yoqmas men yurgan yo‘lak.
Nogoh biror joyda chiqsa suvratim
Biri uxlay olmay qiynalsa kerak.
Biz shunday o‘tamiz,
Ya’ni kun ko‘rib...
Maydagina kuchsiz, maydagina zo‘r.
Hayotning mana shu burjidan turib,
Men Sizni o‘yladim, hazrati Bobur.
Siz - zobit, dastini cho‘zgan dunyoga,
Siz - shoir, mangu bir alanga yoqqan.
Nainki bandalar, Sizning siymoga
Ne-ne saltanatlar kek bilan boqqan.
Bahodirlik ichra yor Sizga Humoy,
Siz ulug‘ zotlarning izin bosgan er.
Nazmiy sajdagohda Sizga, hoynahoy,
Imomlikka o‘tgay faqat Alisher.
Ha, yolg‘iz she’r qoldi, boshqasi, abas,
Yetti iqlim aro doston naqlingiz.
Ne baxt, parchin bo‘lib toj degan qafas,
Bizga yetib keldi olmos aqlingiz.
Ayting, ne topdingiz Siz kezib dunyo,
Hanuz boqisharlar sho‘rishga to‘lib.
Shoirsiz, yaxshisi, qolingiz, Mirzo,
Mushfiq yurtingizda bir shoir bo‘lib.
1983
Abdulla Oripov
@Abdulla_Oripov_sherlari

,,ALISHERNING ONASI"
✍️
Abdulla Oripov sheʼri.
Koson tuman 33- maktab
3 - B sinf o'quvchisi
🎙
Qurbonmurodov Sharofiddin o'qidi.
@Abdulla_Oripov_sherlari