Abdulla Oripov she'rlari

Ҳангома
Қор ёғарди бўралаб,
Қолишмасди довулдан.
Тўйга айтиб кетишди
Шундоқ қўшни овулдан.
Йўлга чиқди икки чол,
Тўйга бориш қарз бешак.
Бирови отга минди,
Бирови минди эшак.
Қор-чи, ҳамон ёғарди,
Ёғар эди гупиллаб.
Йўлни эшак бошлади,
От эргашди лўкиллаб.
Гапга тушди икки чол,
Суҳбат у ёқ-бу ёқдан.
Ўтган-кетган, баланд-паст,
Гоҳ калла, гоҳ туёқдан.
Суҳбат деган соз нарса,
Қолмасанг бас сургашиб.
Йўрғалар эшак ҳамон,
От боради эргашиб.
Аста-секин кун қайтар,
Уфқларда ўчган ранг.
Қор оралаб қайдадир
Бир юлдуз чақнар аранг.
Чоллар-чи, ҳамон йўлда,
Суҳбат ўша-ўшайди.
Бири деди: — Оқсоқол,
Кун ботганга ўхшайди.
Йўғ-э, уста, — дер бири—
Кўздан қолибсиз буткул.
Тўрт чақирим овулга
Наҳот юрсак бир кун йўл.
Аммо бу гап рост эди.
Юлдузлар чақнар бот-бот,
Олдинда эшак борар,
Орқада лўкиллар от.
Овулдан-чи, дарак йўқ,
Оппоқ эди қир-қия,
“Адашиб кетдикмикан,
Куппа-кундуз куни-я?
Гап босдими ё ғафлат,
Тавба, бу қандоқ ўйин?”
Қор тинди-ю, чолларнинг
Ичига кирди қуюн.
— Қора қишда тўй қилмай,
Баттар бўлгур нокас, гов.
Баччағарнинг аслида,
Феъли совуқ эди-ёв.
Қайдадир чўзиб-чўзиб
Увлаб қолди-ку қашқир,
Ким ҳам, айтинг, бундоқ чоқ
Ташвишга тушмас ахир?
Хусусан, кексайганда
Хафа бўлиб кетасан.
Айтайлик, ўша қашқир
Ғажиб кетса нетасан?
Қора совуқ тиш қайраб
Қовурғани эзарди.
Кенг сайҳонда икки чол
Йўл ахтариб кезарди.
Йўл қаёқда, тўрт тараф
Қалин, оппоқ қор эди.
Энг баттари — совуқда
Жон сақлаш душвор эди.
Қайтай деса изига,
Белги ҳам йўқ, из ҳам йўқ.
Қалтирайди икки чол,
Таскин ҳам йўқ, сўз ҳам йўқ.
Не бўлса ҳам топширдик
Яратганнинг ўзига!
Таваккал деб, от бошин
Қайирдилар изига.
Пешонада борини
Кўрар инсон деган зот.
Йўл солдилар қайгадир,
От бошин қўйиб озод.
Бир кор-ҳол бўлмай энди,
Уйни топиб борсак бас, —
Сургалади от ҳорғин,
Орқада эшак бесас.
То тонггача икки чол
Юрди, турди, суринди.
Узоқларда бир маҳал
Қора нарса кўринди.
Бўғоти бор, ҳайтовур,
Ўхшаб турар қишлоққа.
“Худога минг шукр”, деб
Юрдилар ўша ёққа.
Туман ичра дов-дарахт,
Турар эди ялтираб.
Тонгга яқин қишлоққа
Киришдилар қалтираб.
Тугаганди бардош ҳам,
Тугаганди бор сабот.
Етмай бир дарвозага
Тўхтаб қолди шўрлик от.
Жой сўрайлик, нарёғи
Бир гап бўлар, оқсоқол.
Қамчин билан тақа-туқ,
Дарвозани қоқди чол.
Изғирин-чи, изғирин,
Еру кўкда ҳорғин тус.
Бир кампир чиқди шу тоб,
Қўлида хира фонус.
Сўз бошлади чол титраб,
Ҳалқумига келиб жон:
Бир кечага бизларга
Жой берсангиз, янгажон.
Қора қуюн чарх уриб
Кўз олдини тутарди.
Кампир келиб яқинроқ
Фонусини кўтарди.
Ҳой, сенми бу, ер юткур,
Имонингдан кечдингми?
Алжирайсан ё тўйда
Ароқ-пароқ ичдингми?
Алқисса шу: от йўлни
Уй томон бурган экан.
Чол-чи, ўз кампиридан
Жой сўраб турган экан.
Абдулла Орипов
1972
@Abdulla_Oripov_sherlari

🎭
She’riyat muxlislarini
“Millat” teatri va “Mutolaa”
hamkorligida qilinayotgan
ilk she’riy spektaklga taklif qilamiz:
Bu she’riy spektaklda mening, ya’ni
Nurmuhammad Abduzoirning
she’rlaridan foydalaniladi…
Kechaning asosiy qahramoni men emas, siz boʻlasiz! She’r boʻladi. Kelinglar, shahar shovqini bezgan quloqlarni, qalblarni ozgina vaqtga she’r uchun boʻshatamiz.
Rostini aytaman, kecha uchun biz — 10 dan koʻproq ijodkor qoʻlimizdan kelgancha harakat qilyapmiz.
Toʻgʻri, bugungi kunda, Toshkentda birovni hayratlantirish qiyin, lekin bu bir eksperiment, oʻxshasa, davom etadi.
She’riy kecha:
Nurmuhammad Abduzoir
—
“Hakala
Dukala
Cho’kala”
Chipta narxi:
100.000 so’m
Sana:
29-30 yanvar, 19:00
📍
“Millat teatri” (Alisher Navoiy 2k1
)
📞
Murojaat uchun: +998908570123
(Oʻlmas Temur)
Yoki telegram orqali
@Nurmuhammad_Abduzoirov
ga mana shu kun uchun chipta xarid qilmoqchiman deb yozsangiz ham boʻladi…
Bor-yoʻgʻi 40 ta oʻrindiq, barchangizni kutamiz!
She’riy spektakl e’lonini doʻstlaringizga ulashsangiz, xursand boʻlamiz
…
@Nurmuhammad_zoir

Абдулла Орипов
АЛВИДО, УСТОЗ
(Ғафур Ғулом хотирасига)
"Зўр карвон йўлида етим бўтадек
Интизор кўзларда ҳалқа-ҳалқа ёш..."
Сарбоним, қўлингдан кетдимикан эрк,
Сарбоним, не учун кўтармайсан бош.
Сўқир, ёвуз ўлим, минг дод дастингдан,
Зулматдай кирдингми шеър майдонига.
Ажал, сен найзангни санчдингми чиндан
Ўзбек шеъриятин паҳлавонига.
Олис фазоларга кетган ҳам қайтар,
Ботгувчи қуёш ҳам чиқар билмай ҳад.
Наҳот она халқим алвидо айтар
Бугун Ғафур Ғулом бошида абад?
Илк бора жигарим силқиди балким,
Лол қотган тилимга келмади калом.
Йиғла, онажоним, эй она халқим,
Бугун йўқ қошингда фарзанди Ғулом,
Дардли мусиқалар, ингрангиз бир-бир,
Ўзинг ҳам йиғла, эй, дилда қотган ғам.
Ёруғ бу оламда бормикан, ахир
Шоир вафотидан ортиқроқ мотам!
Зор йиғлаб навосиз қолмагай дунё,
Ўзи чора топмай йиғлагай алам.
Шогирдлар қўлидан тушмагай асло
Сенинг қўлларингдан тушган шу қалам.
1966
✍️
Абдулла Орипов
@Abdulla_Oripov_sherlari

ЎЗБЕК ГЕНЕРАЛЛАРИ
Икки генералим турар ёнма-ён,
Ўтли кўзларида жасорат зоҳир.
Улар Темурбекнинг наслидир шоён,
Бири Алишеру бири Баходир.
Ёвқур саркардалар-қўрқув билмаган,
Тинчликка маъсулдир ўлкаларида.
Икки амакимга насиб этмаган,
Юлдузлар чақнайди елкаларида.
Олис ўрмонларда қайси бир замон,
Дарахт кесар эди ўзбек аскари.
Жалолни эътироф этмаган даврон,
Унинг авлодин ҳам сурганди нари.
Садағаси кетай хўрлик сўзининг,
Ўзбегим сочилган гардларин топди.
Боболарин эслаб, яна ўзининг,
Қумондонин топди, мардларин топди.
Ҳеч ким орзу қилмас шамширни, бироқ,
Унингсиз дунёни асраш ҳам қийин.
Мен нечун қувониб шеър айтмай бу чоқ,
Ўзбегим генарал бўлгандан кейин.
А.ОРИПОВ
2008 йил.
14 январь.
@Abdulla_Oripov_sherlari

To'da
Ming yillardan buyon jami hayvonlar,
Bo'rilar, shoqollar, sherlar, arslonlar.
To'da-to'da bo'lib yashab kelishgan,
Birga ov qilishgan birga yeyishgan.
To'daning bosqini dahshat juda ham,
Mamontni yiqitgan bir to'da odam.
Agarda qo'zisa to'daning feli,
Unga teng kelolmas soylarning seli.
Xos unga yovuzlik, shavqatsizliklar,
Qorni to'q bo'lsa-da, toqatsizliklar.
Irsiyat so'zini aytishmas bekor,
Barchasi to hanuz yo'qolmagan, bor.
Bir hisni yashirib axir netaman,
To'dani ko'rganda qo'rqib ketaman.
📝
Abdulla Oripov
2015-6-yanvar
@Abdulla_Oripov_sherlari

Абдулла Орипов
ЯНГИ ЙИЛ
Меҳру муҳаббатга ташна кўнгилни
Ҳатто дақиқалар айлар экан зор.
Бир ўзим билурман, ҳар янги йилни
Қанчалик кутганман бўлиб интизор.
Ундан омонликни кутдим, аввало,
Сўнгра осойишта онларни кутдим.
Бир қултум сув билан бир ютум ҳаво,
Тандирдан узилган нонларни кутдим.
Кутдим, набиралар бўлишсин, деб жам,
Ҳар бирин лабида табассум қалқсин.
Ёғсин оппоқ қор ҳам гупиллаб шу дам,
Қишнинг қуёши ҳам ялтираб балқсин.
Қўни қўшнилару дўсту биродар
Бир-бирин қутласин қувончга тўлиб.
Кекса-ёш бағрини очиб баробар
Йилни қарши олсин жамулжам бўлиб.
Гина- кудуратлар орқада қолсин,
Янги яралгандай бу вужуд – бу тан.
Севиб ва авайлаб бағрига олсин
Ҳар битта фарзандин шу она Ватан.
Самовий нур билан чулғансин юрак,
Шоирлар байтида умидбахш нақл.
Ахир, ортиқчалик қилмаса керак,
Кибрга чегара, нодонга ақл.
Бўлса пешонада даврини сурсин,
Бандаси умрини этмасин исроф.
Қўзичоқ уч-тўрт кун ўйноқлаб юрсин,
Чўпон ва чўлиқдан кетмасин инсоф.
Жомга шароб қуйсанг лиммо-лим тўлгай,
Тагига тўкилгай ундан ортиғи.
Виждон ҳар лаҳзада қўриқчи бўлгай,
Насибанг – тақдирнинг туҳфа, тортиғи.
Учар осмонларда бахт деган бир қуш,
У юртлар устида қанотин қоқсин.
Ғам-ташвиш гўёки босириқ бир туш,
Бесамар хаёллар сувларга оқсин.
Кичкинтой набирам талпинар менга,
Шу соат у билан эрурман тенгқур.
Қуллуқ қилажакман, тириклик, сенга,
Берган куни учун Тангрига шукур.
✍
2015 йил 27 декабрь
t.me/abdullaorifijodi

Абдулла Орипов
Хуш келибсан, Янги йил!
Яна келдинг ҳадяга тўлиб,
Кутмоқдайдик сени интизор.
Қадамингдан миннатдор бўлиб
Зарра-зарра тўкилади қор.
Хафамасмиз бобо йилдан ҳам,
Қувонтирди у бизни қанча:
Конфетини кўришдик баҳам
Ва қўшиқлар ўргандик анча.
Ниҳол ўсди, қурилди қаср,
Фазоларга қилдик сафарлар.
Ўша йили туғилди ахир
Бизнинг қанча ўринбосарлар.
Сени асло унутмагай дил,
Хайр энди, хайр, йил бобо.
Симобдайин типирлар кўнгил,
Янги йилга энди марҳабо,
Энди уни қутлаб зиёда
Манзилига жадал элтамиз.
Кирмоқ учун кечки кинога
Ўн олтига тезроқ етамиз.
Йўл оламиз мактабга қатор
Бу йил энди биринчи карра.
Мактаб йўли, дўстлар, фазокор
Парвозидан кам эмас зарра.
Боғчаларга эмаклаб оз-оз
Яна келар янги қисмимиз.
Улғаяди ёшимиз бир оз,
Ўзгармайди аммо исмимиз.
1965
✍
Абдулла Орипов
@Abdulla_Oripov_sherlari

Абдулла Орипов
ЛОС-АНЖЕЛОС КЎЧАЛАРИДА
Манфаат кўрмаса сендан агарда,
Мушук ҳам офтобга чиқмас, дейди халқ.
Итдай ўлиб кетсанг ушбу шаҳарда,
Биров сени текин кўммаслиги ҳақ.
Салом ҳам манфаат, алик — манфаат,
Яхшилик бу жойда ғаройиб бир иш.
Кимгадир кўргазсанг агар марҳамат,
Сенинг номинг бўлар сарқит ва ўтмиш.
О, меҳру оқибат шу бўлса агар,
Боламга берсам гар таъма билан нон,
Майли мен хор бўлай элда дарбадар,
Ўтмишга айланиб қолай шу замон.
✍
1985
@Abdulla_Oripov_sherlari

***
Тўғрилик
Совчи дер: — Отахон, берингиз дуо,
Жуда тўғри йигит бўлғуси куёв.
Ота дер: — Тўғрилик яхши-ю, аммо
Бундайлар рўзғорин боқолмайди-ёв.
2008 йил 22 июль
✍
Абдулла Орипов
@Abdulla_Oripov_sherlari

,,Xotirotʼʼ
Abdulla Oripov
@Abdulla_Oripov_sherlari