Botirjon ERGASHEV | rasmiy
ЭҲ, ЁШЛИГИМ
Улғайганим сайин пастлаб боряпман,
Орқага кетяпман юрсам олдинга.
Лаҳзамни йилларга ташлаб боряпман,
Эҳ ёшлигим, тенг экансан олтинга.
Хира ақлим тиниқлашгани сари,
Тиниқ кўзим хиралашиб кетмоқда.
Соғайишин кутган бемор сингари,
Эҳ ёшлигим, қадринг ёмон ўтмоқда.
Оқ-қоранинг фарқин билган пайтимда,
Энди бундан ҳаётимга наф йўқдир.
Кўпни кўриб, бугун ёзган байтимда,
Эҳ ёшлигим, сендагидай гап йўқдир.
Пешонада тақдиримнинг ҳар куни,
Билмам унда не оқибат ёзиқлик.
Даврингдаги шиддатларим ўрнини,
Эҳ ёшлигим, эгаллади босиқлик.
Кеч англадим азиз экансан жондай,
Хира кўзларимни ёшлаб кетдинг-а.
Севиб, сўнгра ташлаб кетган жонондай,
Эҳ ёшлигим, мени ташлаб кетдинг-а.
Бу кун номим сал танишдир элимга,
Қанча тундан тонг каби отиб келдим.
Минг афсуски, шундай ёруғ кунимга,
Эҳ ёшлигим, сени йўқотиб келдим.
@Botirjon_Ergashev
#Kutilmagan_kutganim
Akmal Mirzoga ming rahmat. Go‘zal, savob ishga sherik qilgani uchun.
@Botirjon_Ergashev
#ANONS
Бугун соат 20:05 да Ўзбекистон телеканалида "Ҳаёт ва хаёл йўллари"да яна бир бор кўришамиз.
Вақт ажратиб кўрсангиз, кўрсатув муаллифи Сурайё Мансурова бошчилигида ҳаммамиз хурсанд бўламиз.
Кўргач, фикр ва мулоҳазаларингизни изоҳларда ёзиб қолдиринг, бу биз учун аҳамиятли.
@Botirjon_Ergashev
ЎШАНГАЧА...
Аллоҳ Ўзи асрасин сизни,
Ўзни нафсга отиб юборманг!
Жаннатдаги зўр ўрнингизни,
Жаҳаннамга сотиб юборманг!
Нафс қутқуси бошларга бало,
Иймонсотар бўлманг ҳеч қачон.
Агар шундай бўлса мабодо,
Савдогарсиз жудаям ёмон.
Бундай хато савдо бу бошга
Турли-туман савдолар солгай.
Аҳмоқ бошни урганча тошга,
Аттанг, аттанг, аттанглаб қолгай.
Фойда бермас сўнгги пушаймон,
Армонгамас, иймонга тўлинг!
Мангу қолай десангиз омон,
Сиз жаннатга харидор бўлинг!
Шайтон оғир кўрсатар, лекин,
Енгилхарид, гўё парсиз сиз.
Масжид бепул, ибодат текин,
Энг омадли савдогарсиз сиз!
Жон омонат – узилгудек барг,
Бир кун тупроқ бўлгувсидир тан.
Ўшангача омад этмай тарк,
Савдонгизни берсин Яратган!
2023 йил 4 январь
✍️
Ботиржон Эргашев
#Diqqat_diqqat
BARCHA ISTOVCHILARNI TAKLIF ETAMIZ, MARHAMAT!
@Botirjon_Ergashev
КЕЧИРМА, ЖОНИМ!
Бир ҳамюртимиз фарзандларининг онаси – жуфти ҳалолини ишлаш учун Туркиядан бўлган яхши таклиф сабаб у ерга юборибди. Аёли қиладиган иш бир гавжум қаҳвахонада хўрандалардан қолган столни йиғиштириб, идиш-товоқларни ювиш экан.
Кунларнинг бирида қаҳвахона хўжайини аёлдан уйлари тўзғиб кетгани, кунлик иш ҳақига қўшимча тўлаши ҳисобига уйини тозалаб беришини илтимос қилибди. Аёл рози бўлгач, хўжайин машинасида уйига олиб келибди. Уйда ҳеч ким йўқ экан. Хўжайин аёлни қолдириб, ўзи чиқиб кетибди. Аёл ишни бошлабди. Орадан ярим соатча фурсат ўтиб, қаҳвахона хўжайини қўлида елим пакетларда турли егулик ва салқин ичимликлар билан қайтиб келибди. Бир пасдан кейин ишга берилиб кетган аёл мундоқ эътибор берса, хўжайиннинг шашти бошқача, ўзига оч бўридай тикилиб турганмиш. Аёлнинг сезиб қолганини билгач, унга яқинлашиб, белидан қучмоқчи бўлибди, аёл эса ортга тисарилиб, бир тарсаки тушириб, “бошимда эрим бор”, нима қиляпсиз, деб ташқарига отилибди. Хўжайин карахт аҳволда қолибди. Аёл катта кўчага чиқиб, йўл четида қаҳвахона томон шаҳдам юриб кетаркан, аламдан инграб юборибди. Ортидан машинада каҳвахона хўжайини етиб келиб:
– Синглим, эрим бор, дедингми? Ростдан эринг борми?
– Ҳа!
– Нега унда сендек гўзал, оқила, вафодор аёлни ўзга юртга ишлагани юборди?
Илтимос, кечир мени, мен эринг йўқ бўлса керак, деб ўйлаб, хато қилдим.
– Хўп, эрим йўқ ҳам дейлик, барибир бу ишингиз гуноҳ эканини билмайсизми?
– Биламан, биламан! Бўлди, тавба қилдим, мени кечир! Истасанг, тиз чўкай,
истасанг, бугуноқ ойлигингни ўн ҳисса ошириб берай, агар хоҳласанг, эҳтиёжингдан зиёд пул бериб, учоққа чипта олиб, юртингга кузатиб юбораман, фақат мени кечирсанг бўлди, жон қардошим, деб обдан ялинибди.
У сўзида турди. Маошини ортиғи билан тўлаб, яна анчагина қўшимча пул бериб, аэропортга олиб бориб, кузатаркан:
– Эрингга айт, сени бошида кўтариб юрсин! Сен дунёдаги энг олижаноб, ардоқ ва ҳурматнинг энг гўзалига муносиб аёлсан! Қанийди ҳамма аёллар сенга ўхшаса. Кечирганинг учун раҳмат, бу қилмишим Худонинг ҳузурига қолганда ҳолим нима кечарди, билмайман! Раҳмат, синглим, оқ йўл, агар турмушингда моддий қийинчилик туғилса, менга тортинмай айт, сени синглим деб қабул қиламан, дебди.
Энг қизиғи, бўлиб ўтган кўнгилсиз воқеадан сўнг қаҳвахона хўжайини ўша аёл билан бирга ишлаган бошқа бир аёл орқали эрининг телефон рақамини ёзиб олган экан. Аёлни кузатиб юборгандан сўнг, бўлиб ўтган барча воқеани смс орқали эрига ёзиб юбориб, бундай аёлни қадрламасанг, охиратинг куяди, қардошим, деб таъкидлабди.
Қуйидаги шеър смс хабарни ўқиган эрнинг пушаймонлари.
Сени қисмат чоҳига отдим,
Кечирма, ёр, кечирма мени!
Хато қилдим, гуноҳга ботдим,
Кечирма, ёр, кечирма мени!
Бир жонимда афсуслар минг-минг,
Мен нодонга яна бош эгдинг,
Поклик билан қисматни енгдинг,
Кечирма, ёр, кечирма мени!
Чанг солганим рост – роҳатингга,
Лолман сабринг ҳам тоқатингга,
Арзимайман садоқатингга,
Кечирма, ёр, кечирма мени!
Пушаймонли нолам учун ҳам,
Кеч берган – гул, лолам учун,
Зор йиғлаган болам учун ҳам,
Кечирма, ёр, кечирма мени!
Эр бўлдиму эрлик қилмадим,
Шер жуфтимга шерлик қилмадим,
Тиллога тенг қадринг билмадим,
Кечирма, ёр, кечирма мени!
Сен ғолиб, мен ютмоқдаман, лек,
Синдим, қаддим тутмоқдаман, лек,
Кечиришинг кутмоқдаман, лек,
Кечирма, ёр, кечирма мени!
Жоним, десам энди чин дейман,
Меҳринг мангу ичиргин, дейман.
Тиз чўкканча кечиргин, дейман,
Кечирма, ёр, кечирма мени!
@Botirjon_Ergashev