Журналистика.уз
🎤
Vaqt.uz
жамоаси янги ходимларни ишга таклиф қилмоқда
Vaqt.uz
таҳририяти журналист ва муҳаррир лавозимлари учун танлов эълон қилди.
Журналист лавозимига номзодлардан ўзбек тилида саводли ёзиш, рус ва инглиз тилларини билиш, камида икки йиллик тажриба ҳамда тезкор ахборот билан ишлаш кўникмаси талаб этилади.
Муҳаррир вазифасига эса материалларни таҳрирлаш, фактчекинг, журналистлар билан ишлаш ва контент сифатини назорат қилиш тажрибасига эга мутахассислар изланмоқда.
Номзодлар камида уч йиллик иш тажрибасига эга бўлиши лозим.
Таҳририят томонидан муносиб маош, 5 кунлик иш ҳафтаси, Тошкент марказидаги офис ва профессионал жамоада ишлаш имконияти таклиф этилмоқда.
🎟
Қизиққан номзодлар резюмеларини Telegram орқали
@Farkhadovna_Madinabonu
манзилига юборишлари мумкин.
Батафсил маълумот:
https://vaqt.uz/uz?n=27319
@jurnalistikauzbek
📌
Санани календарингизга қайд этинг!
🌿
Атроф-муҳитни муҳофаза қилиш ва жамоатчилик иштироки: Орхус конвенцияси имкониятлари
🗓
2026 йил 16 июнь
🕐
13:00–16:00 (Тошкент вақти)
🔗
Рўйхатдан ўтиш:
https://us06web.zoom.us/webinar/register/WN_tFuZeBoiQxWA4azIidXCLQ
Ҳурматли ҳамкасблар,
Сизни Орхус конвенцияси ва унинг атроф-муҳитни муҳофаза қилиш соҳасидаги аҳамиятига бағишланган онлайн вебинарда иштирок этишга таклиф этамиз.
Вебинар давомида Орхус конвенциясининг асосий тамойиллари, фуқароларнинг экологик ахборот олиш ҳуқуқи, қарор қабул қилиш жараёнларида иштирок этиши ҳамда экологик масалалар бўйича адолатга мурожаат қилиш имкониятлари ҳақида сўз юритилади.
Шунингдек, Ўзбекистонда атроф-муҳитга таъсирни баҳолаш жараёнларининг ҳуқуқий асослари, жамоатчилик иштироки, очиқлик ва шаффофлик талаблари муҳокама қилинади. Иштирокчилар жамоатчилик эшитувлари қандай ташкил этилиши, экологик ахборотдан фойдаланиш тартиби ва амалиётда учрайдиган асосий муаммолар ҳақида қўшимча билимга эга бўладилар.
Вебинар экспертлар маърузалари билан бир қаторда муҳокамалар, савол-жавоблар ва қисқа интерактив викторинани ҳам ўз ичига олади.
🎙
Маърузачилар:
▪️
Артур Григорян
— эколог-ҳуқуқшунос, CEE Bankwatch Network ташкилотининг кончилик саноати масалалари бўйича эксперти, Ecoright нодавлат нотижорат ташкилоти раҳбари (Арманистон).
▪️
Наргис Косимова
— филология фанлари доктори, профессор, эко-журналист, «Эколог» жамоат бирлашмаси директори (Ўзбекистон).
▪️
Сергей Куратов
— «Яшил нажот» экологик жамияти раиси, 2005 йилдан буён Қозоғистонда Орхус конвенцияси нормаларини қўллаш бўйича фаол иш олиб бормоқда.
📢
Вебинарда иштирок этиш учун рўйхатдан ўтишга ва муҳокамаларга қўшилишга таклиф этамиз.
🔗
Рўйхатдан ўтиш ҳаволаси:
https://us06web.zoom.us/webinar/register/WN_tFuZeBoiQxWA4azIidXCLQ
Сизнинг иштирокингизни кутамиз.
📩
Қўшимча маълумот учун:
Полина Веретелникова
CEE Bankwatch ташкилотининг Марказий Осиё бўйича координатори
centralasia@bankwatch.org
Ҳафталик ҳудудий масъуллар билан очиқ мулоқот қилиб олиш имконини ҳам яратаяпти
Журналистлар айтишича, газетачилар билан учрашувларга ҳудудлар раҳбарлари доим ҳам эътибор билан қарашмайди...
Жиззах шаҳрида ўтаётган медиаҳафталикда вилоят ҳокими ўринбосари Сардор Шукруллаев журналистлар қандай дарслар ўтаётгани билан қизиқди ва биз билан учрашди.
Учрашувда айтилганидек, айрим туман газеталари ҳозир бор-йўғи 1600 нусха атрофида чиқяпти. Обуна камайса, бу биринчи навбатда таҳририят ходимларининг ойлигига, газетанинг вақтида чиқишига ва унинг яшаб қолишига таъсир қилади, деди газетчилар.
Сардор Шукруллаевнинг жавоб беришича, муаммонинг катта қисми газетани етказиб бериш тизимида. Илгари Жиззахда газеталарни бир нечта хусусий етказиб берувчи ташкилот тарқатган. Лекин айрим жойларда одамлар обуна бўлган, пул тўланган, аммо газета ўз вақтида етиб бормаган. Эндиликда газеталарни ишончли етказиш учун почта тизими билан ишлаш режа қилинмоқда.
Батафсил видеода
@jurnalistikauzbek
Сўз эркинлиги шундай вазиятларда синалади
Профилактик суҳбатлар даври ўтмадими?
Миролим Исажонов Мактабдаги ўқитувчи ва ўқувчи можароси ҳақидаги материалдан кейин Шайхонтоҳур тумани ИИБга чақиртирилгани айтилмоқда. Мақолада журналист Миролим Исажонов ички ишлар текширувида акс этмаган жиҳатларни олиб чиққан. Ички ишлар текширувидан фарқли бўлган мақолада ўқитувчидан жабр кўрган бола тилдан қолгани айтилади. Ички ишлар идораси текширувидан тушиб қолган фактларни очиқлаган журналист ички ишларга чақиртирилди, мақола эса сайтдан олиб ташланди.
Яъни журналист давлат идораси тақдим этган маълумотдан бошқа фактларни ўрганиб чиқиб оммага тақдим этишга ҳаққи бор. Журналист касбини моҳияти ҳам шунда. Бунинг учун журналист профилактик суҳбатларга чақиртирилиши сўз эркинлигига таҳдиддан бошқа нарса эмас. Бундан ташқари конституцияга кўра, адвокатсиз гапирмасликка ва сукут сақлаш ҳуқуқига эгамиз. Шундай экан профилактик суҳбат билан Ички ишлар конституцияга зид иш қилмаяптими?
Бу воқеадан кейин Олий Мажлис биносини тўлдириб ўтирган депутатлар ҳам тилга кириши керак назаримда. Масалан, депутат Илхом Абдуллаев…
@anora_sodiq
Gazeta.uz журналисти Миролим Исажонов билан боғлиқ вазиятга изоҳ берилиши керак! Журналист Миролим Исажонов бугун ИИБга чақирилган. Яқинларининг билдиришича, айни пайтгача у билан боғланишнинг имкони бўлмаяпти. Мен ўзим ҳам ҳозир боғланиб кўрдим, унинг телефони…
Gazeta.uz
журналисти Миролим Исажонов билан боғлиқ вазиятга изоҳ берилиши керак!
Журналист Миролим Исажонов бугун ИИБга чақирилган. Яқинларининг билдиришича, айни пайтгача у билан боғланишнинг имкони бўлмаяпти. Мен ўзим ҳам ҳозир боғланиб кўрдим, унинг телефони ишламаяпти.
Миролим Исажоновни касбий фаолияти орқали яхши биламиз. У ёш бўлишига қарамай, журналистика талаблари, факт билан ишлаш маданияти ва касбий масъулиятни яхши англаган мутахассислардан. Шу боис унинг атрофидаги ҳар қандай вазият очиқ, қонуний ва тушунарли тарзда изоҳланиши керак.
Бу ерда гап фақат бир журналист ҳақида эмас. Масала — журналистнинг ҳуқуқий мақоми, ахборот олиш ва тарқатиш эркинлиги, шунингдек, давлат органлари билан ОАВ ўртасидаги ишонч муҳити ҳақида кетмоқда. Агар журналист ҳуқуқни муҳофаза қилувчи органга чақирилган бўлса, бу жараён қонун доирасида, шаффоф ва белгиланган тартибда кечаётгани жамоатчиликка тушунтирилиши муҳим.
ИИБ ушбу ҳолат юзасидан тезкор муносабат билдириб, Миролим Исажонов қаерда экани, нима сабабдан чақирилгани ва унинг процессуал мақоми қандайлиги ҳақида аниқ ахборот бериши лозим.
Ҳамкасблар, журналистик ташкилотлар ва ҳуқуқ ҳимоячилари бу вазиятга бефарқ қарамаслиги керак. Чунки журналист хавфсизлиги — бутун ахборот майдони хавфсизлигининг муҳим кўрсаткичидир.
@jurnalistikauzbek
Телерадио йўналишида катта тажрибага эга журналист
Худойназар Дўстқобилов Журналистлар уюшмаси Тошкент шаҳар бўлими раиси этиб сайланди
Ўзбекистон журналистлар уюшмаси Тошкент шаҳар бўлимининг умумий йиғилиши бўлиб ўтди. Унда бўлимга янги раҳбар сайланди.
Йиғилиш қарорига кўра, ушбу лавозимни МТРК “O‘zbekiston 24” радиоканали бош муҳаррири Худойназар Дўстқобилов эгаллади.
Аввалроқ ижтимоий тармоқларда устоз журналист, сенатор Ҳусан Эрматов бу лавозимдан истеъфога чиққании ҳақида хабарлар тарқалган эди.
Худойназар Дўстқобилов 1974 йил Қашқадарё вилоятида туғилган. 1997 йилда Тошкент давлат университетини, 2001 йилда Ўзбекистон Республикаси Президенти ҳузуридаги Давлат ва жамият қурилиши академиясини тамомлаган.
У меҳнат фаолиятини Ўзтелерадиокомпаниянинг “Халқаро ҳаёт” бош муҳарририятида бошлаган. Кейинчалик “Ёшлар” каналида шарҳловчи, “Аср” ахборот-таҳлил муҳарририяти бош муҳаррири, “Адабиёт ва радиотеатр” бош муҳарририяти бош муҳаррири, “Ёшлар” радиоканали продюсери ва директор ўринбосари сифатида ишлаган.
Шунингдек, у “Toshkent” телеканали “Пойтахт” ахборот дастурлари бош муҳарририяти бош муҳаррири, МТРКнинг “Садо” газетаси бош муҳаррири, истиқболли медиалойиҳаларни ишлаб чиқиш бўлими етакчи мутахассиси, “O‘zbekiston” радиоканали “Маданий-маърифий, бадиий эшиттиришлар” муҳарририяти бош муҳаррири лавозимларида фаолият юритган.
2017–2025 йилларда “O‘zbekiston 24” телерадиоканалида директор ўринбосари, радио йўналиши бўйича масъул раҳбар сифатида ишлаган. 2026 йил февралдан эса “O‘zbekiston 24” радиоканали бош муҳаррири лавозимида фаолият юритиб келмоқда.
@jurnalistikauzbek
✔️
Jizzax media maydonida muhim loyiha boshlandi
✅
8–12-iyun kunlari Jizzaxda matbuot va axborot xizmati xodimlari, blogerlar hamda ijtimoiy tarmoq faollari uchun seminar-treninglar, master-klasslar va amaliy mashg‘ulotlar tashkil etilmoqda.
➡️
Dastur ishtirokchilarning media sohasidagi bilim va ko‘nikmalarini yanada oshirishga xizmat qiladi
Bizni kuzatib boring
🇺🇿
Telegram
🕊
Youtube
📺
Instagram
📱
Facebook
📱
Устоз Иброҳим Ғафуров сўнгги манзилга эртага кузатилади
Жаноза намози эртага, 7 июнь куни бомдод намозидан сўнг Ҳазрати имом (Ҳастимом) жоме масжидида ўқилади. Марҳум Тешик қопқоқ қабристонига қўйилади.
Бу ҳақида Ёзувчилар уюшмаси маълум қилди.
@jurnalistikauzbek
Илм фанда оғир жудолик - Ўзбекистон Қаҳрамони Иброҳим Ғафуров вафот этди
Ўзбекистон Қаҳрамони, таниқли адабиётшунос, ёзувчи, мунаққид ва таржимон Иброҳим Ғафуров вафот этди. Бу ҳақида олимнинг шогирдлари бизга маълум қилди.
Иброҳим Ғофуров 1937 йил 27 декабрда Тошкент шаҳрида туғилган. У ўзбек адабиёти, адабий танқиди ва таржима мактаби ривожига катта ҳисса қўшган ижодкорлардан бири эди. Шунингдек, жаҳон адабиётининг бир қатор йирик асарларини ўзбек тилига таржима қилиб, миллий китобхонлик муҳитига янги нафас олиб кирган. Хусусан, Фёдор Достоевскийнинг “Жиноят ва жазо”, “Телба”, “Қиморбоз”, Ги де Мопассаннинг “Азизим”, Эрнест Хемингуэйнинг “Алвидо, қурол”, “Чол ва денгиз” каби асарлари унинг таржималари орқали ўзбек китобхонига етиб борган.
Устоз ижодкор 1956–1961 йилларда ҳозирги Ўзбекистон Миллий университетининг филология факультетида таҳсил олган. Кейинги йилларда нашриёт соҳасида, адабий жараёнда, матбуот ва жамоатчилик ҳаётида фаол иштирок этган. Унинг мақолалари, адабий-танқидий қарашлари ва таржималари бир неча авлод қалам аҳли учун мактаб вазифасини ўтаган.
Иброҳим Ғафуров Ўзбекистонда хизмат кўрсатган санъат арбоби, Давлат мукофоти совриндори, “Дўстлик” ордени соҳиби ҳамда Ўзбекистон Қаҳрамони унвони билан тақдирланган. У нафақат таржимон, балки сўзга, адабиётга ва маънавиятга садоқат рамзи сифатида қадрланган.
Устознинг вафоти ўзбек адабиёти ва маънавияти учун катта йўқотишдир. Марҳумнинг оила аъзолари, яқинлари, шогирдлари ва барча адабиёт мухлисларига чуқур ҳамдардлик билдирамиз.
Telegram
| Instagram
I
You Tube
I
Facebook
I
X