Kabul News TV
د چین او د روسیې ولسمشرانو په گډون د شاوخوا ۲۲ هیوادونو مشران او چگپوړي چارواکي په هند کې د BRICS په سرمشریزې کې د گډون لپاره نوي ډیلي سره راغونډ شوي.
تمه ده چې د BRICS هیوادونو کلنۍ سرمشریزه کې چې نن او سبا ده، د ایران او یوکراین پر جنگونو، د منځني ختیځ وضعیت او یو شمیر نورو مسائلو په اړه بحث وشي.
د ځینو هندي رسنیو د راپورونو له مخې د سرمشریزې په پای کې به گډه اعلامیه هم خپره شي.
سعودي عربستان د دې هیواد پر شرق - غرب نفتو پایپ لاین باندې برید تائید کړی.
د سعودي عربستان د بهرنیو چارو وزارت په یوې اعلامیې کې ویلي چې دا پایپ لاین په ریاض او مدینه سیمو کې د عراق له خاورې توغول شویو بې پیلوټه الوتکو په برید کې زیانمن شوی او دا مهال غیر فعال دی.
د سعودي عربستان شرق - غرب پایپ لاین د ایران او امریکا د جنگ تر پیل وروسته د نفتو د صادرلو لپاره مهم بدیل گرځیدلی و.
سعودي عربستان به د دې پایپ لاین له لارې هره ورځ ۵ میلیونه بیرله نفت سور سمندر ته منتقل کول چې له هغه ځایه به بیا د ټانکرونو په واسطه نورو هیوادونو ته صادر کیدل.
الجزایر له متحده عربي اماراتو سره خپلې دیپلوماتیکې اړیکې په بشپړ ډول پرې کړي او د یاد هیواد سفیر ته یې له الجزایر څخه د وتلو امر کړی دی.
الجزایر همداراز خپل هوایي حریم د متحده عربي اماراتو اړوند ټولو الوتکو پر مخ تړلی دی.
د دې هیواد د بهرنیو چارو وزارت ویلي تر کلونو دیپلوماتیکو هڅو وروسته یې د متحده عربي اماراتو د تحریکوونکو او خصمانه اقداماتو په غبرگون کې دا گام اخیستی دی.
د لاهور عالي محکمې د پاکستان طبي شورا هغه فرمان ځنډولی چې له مخې یې د طب څانگې افغان محصلین له پاکستان څخه ایستل کیدل او د دې هیواد په طبي پوهنتونونو کې د افغان محصلینو پر منلو بندیز وضع کیده.
محکمې دا پریکړه داسې مهال کړې چې د پاکستان په یو شمیر طبي پوهنتونونو کې هم استادانو او هم محصلینو د افغان محصلینو په ملاتړ لاریونونه کړي دي.
د هوا پیژندنې ادارې نن په بدخشان، نورستان، کونړ، لغمان، ننگرهار، لوگر، وردگو، پکتیا، خوست او پکتیکا ولایتونو کې د شدید باران، تالندې، توپانونو او سیلابونو اټکل کړی دی.
د یمن حوثیانو د خپلو عملیاتو په دوام کې تر المخا وروسته د باب المندب تنگي په مینځ کې «بریم» جزیره هم نیولې ده.
«بریم» جزیرې چې باب المندب تنگی په دوو برخو ویشلی د دې تنگي او سور سمندر د کنټرول لپاره تر ټولو حساسه نقطه پیژندل کیږي.
د معلوماتو له مخي حوثیان د دې جزیرې نیولو سره اوس د کښتیو په نښه کولو لپاره د اوږد واټن راکټونو کارولو ته اړتیا نلري بلکي لنډ واټنه راکټونه هم کارولی شي.
حوثیانو د «بریم» ترڅنگ ذوباب ښار او یو شمیر نورې سیمې هم نیولې دي.
د یمن حوثیان په حیرانوونکو نظامي عملیاتو کې د سعودي ایتلاف ځواکونو ته سختې ماتې ورکړي او باب المندب ته نږدې «المخا» بندري ښار یې هم نیولی دی.
المخا ښار د باب المندب او سور سمندر د کنټرول لپاره تر ټولو مهمو نقطو څخه شمیرل کیږي. د راپورونو پر اساس د سعودي عربستان هوایي بمباریو سره سره د حوثیانو عملیات جریان لري او د سعودي ایتلاف ځواکونه په نورو سیمو کې هم د تسلیمۍ اعلان کړی دی.
ولسمشر ډونلد ټرمپ ویلي که جمهوري غوښتونکي د امریکا په منځنهالو ټاکنو کې بریالي شي هر بالغ امریکایي وگړي ته به د ۵ زرو ډالرو جایزه ورکړي.
د راپورونو له مخې که جمهوري غوښتونکي بریالي شي او ټرمپ په خپلې ژمنې ولاړ وي، هر بالغ امریکایي ته د ۵ زرو ورکول به د امریکا د اقتصاد لپاره ۱.۲ تریلیونه ډالر تمام شي.
ټرمپ د تکزاس ایالت په دالاس ښار کې یو ځل بیا له خپلو پلویانو غوښتي څو د انتخاباتو پر مهال داسې تصور وکړي چې کانگرس ته د جمهوري غوښتونکو کاندیدانو ته نه بلکې اصلاً ده ته رایه ورکوي.
ټرمپ تر دې وړاندې خپلو پلویانو ته ویلي وو که دیموکراتان په منځمهالو ټاکنو کې بریالي شي نوموړی به استیضاح شي.
پر ټرمپ په امریکا کې د ایران د جنگ، د بیو لوړوالي او مهاجرینو خلاف پالیسیو له امله نیوکې زیاتې شوي دي.
د پاکستان «کینگ ادوارد» طبي پوهنتون ۲۰ افغان محصلین، چې ۷ تنه یې د خپلو زده کړو په وروستي کال کې وو، له پوهنتون او لیلیې څخه ایستلي دي.
پوهنتون د پاکستان د طبي شورا امر ته په اشارې سره یادو محصلینو ته یوازې ۲۴ ساعته وخت ورکړی چې له پوهنتونه ووځي او افغانستان ته ستانه شي.
د بښنې نړیوال سازمان د پاکستان دا پرېکړه «له تبعیض څخه ډکه» بللې او ویلي یې دي چې دا اقدام به پر افغان ښځینه محصلینو تر ټولو ډېر منفي اغېز ولري ځکه چې افغانستان ته تر ستنیدو وروسته به دوی ا.ا د بندیز له امله له خپلو زده کړو په بشپړ ډول محروم پاتې شي.
ترکي رسنیو د پاکستاني سرچینو په حواله لیکلي چې پاکستان ښایي د سعودي عربستان په غوښتنه په نږدې راتلونکي کې پر حوثیانو هوایي بمبارۍ پیل کړي او خپل دا اقدام په عامه توگه اعلان هم کړي.
دا په داسې حال کې ده چې د پاکستان دفاع وزیر خواجه آصف هم په خپلو وروستیو څرگندونو کې ویلي چې پر سعودي عربستان برید د مکې دفاعي تړون فعالولی شي. د آصف په وینا د مکې دفاعي تړون له مخې پر یوه غړي برید پر ټولو د برید معنی لري.