الشاعر الحاج ثائر الربيعي

الامام العباس ع
+++++++++
اعتذر بچيتك… تنحني خليتك
بلهفه لوداعي اجــيت
چف يحظنك مالگيت
تنحني خليتك.
++++++
صحتك ادركني اخي اعذرني جرحتك
طاح اخوك وچفك اصفگته سمعتك
امن المخيم للنهر وصلت دمعــتك
اعليه محني وماگمتلك لا شبگتك
آني انزل ادموعك
وسفه واحني ضلوعك
انهض واوگع بقيــت
چف يحضنك مالگيت
تنحني خليتك
+++++++++
لا يصــير ابّالك وتعرفني انتــه
اتقبّل اچفوفي او بلل بيهن نظرته
بس وحگ الزهره شلته وما شربته
الخاطر اسكينه اغرفت ماي وشمرته
عالدرب ادريها
جيتي اتّانيها
حيل من هاي استحيت
چــف يحضنك مالكيت
تنحني خليتك
++++++++
اشلون من طاح العلم زينب وضعها
آه صاحت گلي خو محد
سمعها
اشكبره لغيابي نزل زينب دمعها
يعني هم مثلك بعد محني ضلعها
من تنشدك وينه
گلها صابــو عيــنه
الهالسبب عنها بطيت
چف يحضنك مالگيت
تنحني خليتك
+++++++++
ويّه طيحت چفي الايسر عالوطــيه
يُمّه هــا عبــاس صاحتني الزچيه
العشره وي حسين خلصت هاي هيه
ياخو زينب لو مشت زينب سبيه
من يسد امچانك
يحترگ صيوانك
ناحت الزهره وبچيت
چف يحضنك مالگيت
تنحني خليتك
++++++++
اسهام عن الجود بعيوني شگفتها
اتبده وي الماي كل حيلي بوكتها
امن الفرس من اوگعت چلمه سمعتها
طاح عباس وشماتتهم عشتها
ضل وحيد احسينه
نحرگ اصواوينه
امن القهر خويه هويت
چف يحضنك مالكيت
تنحني خليتك
+++++++
حيرة الماعنده اخو اعرفها حيره
ينولي اسهام وحجر اعرف مصيره
وللحوافر ينفرش جسمه حصيره
اوداعت الله هايه نظرتنه الاخيره
نلتقي اعله ارماحنه
والحرم گـدامـنه
للسبي وكلما مشيت
چف يحضنك مالگيت
تنحني خليتك
++++++++
ثائر الربيعي

نزله لمسلم عليه السلام
طوعه لو شفتيني
حمره صارت عيني
ذكري عباس
+++++++
خوف لا يضهر ابد
كل بني هاشم بعد
حمره تصبح عينها
من يمر بينه الزعل
اي وحق خير العمل
المعضله گاضينها
عدنه يسهل كل صعب
الكوفه اگلبها گلب
وترتعش حيطانها
طوعه بس عينيني
بجربتﭲ روّيني
وذكري عباس
++++++++++
بسم ابو الحمله علي
حشّميني وهلهلي
لا يهمّچ جيشهم
بصوتي احبسها حبس
كل لسنهم تنخرس
اطلابه بيني وبينهم
راح اگصهم بالسره
ما اخلي شي وره
طوعه وتشوفينهم
من تطيح ابطالهم
ترتعب احوالهم
ذكري عباس
++++++++++
عندي دين ومعتقد
ما اهم الكل عدد
الملگه يصبح عيدي
حته لو مالي نصير
ما اهم اولا احير
دامه سيفي بايدي
يركع بروس العده
وانتي خلّچ شاهده
بس حسب تحديدي
حشّمي او وصيني
وبالفحل ذَكريني
وذكري عباس
++++++++
الموته وحده بالعمر
والمواقف تنذكر
وانذكر وياها
مسلم اهنا موقفه
اگلبوب مكسوره شفه
ابعملته السواها
الوحده افناها فني
الوادم اگباله شني
بسيفه من لاگاها
وذكرچ انتي اويايه
طوعة شالت مايه
وذكري عباس
+++++------
بهيچي موقف ارتجي
يمي ابو فاضل يجي
وخل نهز اكوانها
بچفي وبچف الگمر
انسوي باهل الكوفه طر
ونحكم ابميزانها
من فعلنه تستمد
شيعه باچر تستعد
والنصر عنوانها
ورطه لو جربوهم
كربله بگلوبهم
وذكري عباس
++++++++++
كوفه مضرب للمول
كلمن ايوالي الفحل
مايلين اعنادها
ابيا علي اتثور التفگ
صبر بيهم لو زهگ
ابلا حدود ابلادها
قائد البيهم وگع
منهج الغيره وضع
ايده عالحگ سادها
ماتطيح الرايه
ناطيتنه احچايه
وذكري عباس
ثائر الربيعي

الانصار
ترجف قهر نافع چنت وين
ليش اسكتت وامنزل العين
گلهم حديث اسمعته
بين الاحسين واخته
بين الصواويين
++++++++++
شفت وعساني لاشفت
من خلف الاحسين اطلعت
يتمشه خلف اخيامه
سل سيفه بس مو للحرب
شوك الشيلعه امن الدرب
باچر تسحگه ايتامه
حس گلبه زينب رادته رد مسرع الملگاها
ٱحرس عله الخيمه اوگفت واسمع حواره وياها
لا سامع اتمنيته ما دار
چان الحچي عنكم يلنصار
ماتنحچي سالفته
بين الاحسين واخته
وامنزل العين
+++++++++
زينب يلنصار ابقلق
صوت ابوجل بيها نطق
منها الحچي شل حالي
بالعبره تحچيها اسمعت
اصحابك الها استخبرت
بس لاتعوفك تالي
گالتله هالليله فرق ومصباح يوم العاشر
خوفي مثل مسلم بعد تتلافت ولا ناصر
اصحابي گلها نعم الاصحاب
يستأنسون الموت الاحباب
واحدهم ايشد همته
بين الاحسين واخته
وامنزل العين
++++++++
هضمت حبيب امن الخبر
ضل يفرك اچفوفه قهر
شيخ الانصر وناده
اولكم انه مستعد
هسه قبل باچر نهد
وانفرح اخت الساده
شال ايده ابن ظاهر يشد لحواجبه العصابه
يستعرض إباب الخيم ناده الجميع اصحابه
چلمتنه وحده البت علي صاح
خدامچ احنه ونفدي لرواح
ياجون هوّس انته
بين الاحسين واخته
وامنزل العين
+++++++++
يابت علي امنين الوجل
إتطمني يا بـت الفـحل
ناطين اخوچ احچايه
باچر تشوفين الصدگ
گلبه العليكم محترگ
وللحره هز الرايه
گالتله منكم والنعم همي الاحسين ودينه
كل هلّله هلّله ابنصرته گروله باچر عينه
الصيحه علت مابيت الاخيام
وعباس اجاها امفرع الهام
والگاع ماشايلته
بين الاحسين واخته
وامنزل العين
+++++++++
يركض اجه حافي البدر
تتجادح اعيونه وحمر
ابچفيته شد احزامه
حي انه گلها وما متت
ابغيري تنخيتي اسمعت
وبحرگه هز صمصامه
حي آنه واشتم الهوى لاتجي بصدرچ حسره
مايوصل اخيامچ بشر يم الخدر والزهره
واتسابقوا كلهم عله الموت
ياهو القبل للمعركه ايفوت
والفجر بيين وكته
بين الاحسين واخته
وامنزل العين
+++++++++
هاشم والانصار التقوا
عالحمله لوله اتسابقوا
لنصاره گالو احنه
عفنه الاهل عفنه النسه
وعابس حچاها بواهسه
حب الحسين الجنه
عاقل الينجن بالولي الهل ساعه من زغري ادعي
بلا سيف اهد اولا رمح واشمر عليهم درعي
وصوت ام وهب صاحت يعباس
من ابني باچر اشمر الراس
وگدامك اشمر جثته
بين الاحسين واخته
وامنزل العين
ثائر الربيعي

ام البنين ع
ما حملوني اويه الضعن
كسروني يا ام الحسن
بين اعتذاري شكوتي
دمعاتي يم گبرچ جرن
+++++++
طمّنيني يالزچيه بخدمت ابنچ هل وفيت
بدمعت اوداعي وكلمتي يمچ احچيها اجيت
وداعت اضلوعچ يزهره مو على اولادي بچيت
نيته يحضنّي ابو فاضل بالوداع وما رضيت
ودِعني گتله من بًعد
لا ينجرح گلبه ويصد
تاذي ابو الاكبر دمعتي
من امك اگليبه احن
+++++++++++
كبرت ولدي اعله مودچ ادري روحچ بالحسين
حته حيدر هيچي گلي سمعي يا ام البنين
ينلچم ضلع الزچيه حسين اذا دمعتله عين
ودعتهم ببتسامه اگبال ابو گلب الحنين
ما عندي بس هالاربعه
ويا مشوا للمشرعه
هلبت تحقق غايتي
وايردلي سالم للوطن
+++++++++++
امنيتي لو خلف الضعينه صوتچ ابعبره يصيح
اوياك اخذ ام البنين امن البچي اتگوم وتطيح
بلچن ايرد او يگلي اهناك نحتاجج صحيح
بكربله چفچ اريده ايضمّده اليوگع جريح
لو خالي رد الها المهر
بالخيمه تبقى ام الخدر
تحمي اليتامه وعيلتي
بخيامي من يتحرگن
++++++++++
يالزچيه تمضي فتره وانتظرهم مايجون
ماكو حيل ايضل عليه واتبع آثار الضعون
واوصل بوقت اليتامه امن العطش يتصارخون
ويشبگ العباس اخيه اگبالي من يتوادعون
وزينب تصد وما حچت
بس تحضن اسكينه وبچت
الزم عمود الخيمتي
وافزع بناته لو بچن
+++++++++
اسبگ الكافل واتاني عالنهر وبعيني اشوف
اتحرسك الزهره اندعيله لو تلاگه اويه الصفوف
عفيه بعد امك اگله لو كشف ذيچ الالوف
فدوه لچفوفك اصيحه لو شمر ماي الچفوف
تربيتي بي الها اثر
يوفي حليبي لو شمر
مايه واضل بهيبتي
لچفوفه من يتگطعن
++++++++
من يردلي الناعي ينعى اهل يثرب ابچي حيل
والله مو همي بنيني يالزچيه والكفيل
ايعدد اولادي واگله هذا مو همي الثجيل
حسين وينه ومن يگلي مات وي ادموعي اميل
وزينب تجي متألمه
من السبي بت فاطمه
خدر العقيله غايتي
ابچيله والطول الزمن
ثائر الربيعي

عاشوراء
يالمهدي محتاج اشكثر
من حزنك اتعلمني سر
تتقرح اجفوني حزن
يمته وكُبر بيه العمر
++++++++
چم عاشر بعاشر جزه
وچم مره جرحه منسمع
من زغري واني بهل عزا
ابچيله وبنفس الدمــع
مايگطع انفاسي البچي
وي خنصره من ينگطع
لا روحي مني تنسلب
لا اكسر ابلطمي ضلــع
إرقــيه ماتتــله قهر
وبعيني مامات النظر
لا سومر احداد الجفن
لا نزلت ادموعي حمر
++++++++
مقتول صبراً سيدي
هالكلمه تحتاج الشرح
فاتحهن اعيونه ويصد
بعده عدل وكت الذبح
يعني يحس بيهن الم
الف وتسع ميية جرح
ابيا نظره عاين للسِلب
نعرف طبع وجهه سمح
معناها حي او منگلب
وجهه على وجه الترب
يالمهدي ساكت لو يون
لمن بده ايحز الشمر
++++++++
مــرات انوحه للاجــر
ومـراتي لحسين احترگ
مو كلمه واتمر عابـره
رض الحوافر والسحگ
بلكي ولعل هاي السنه
ابچيله بالمبچه الصــدگ
وعيوني تبيض بالحزن
وبالعبره يالمهدي اختنگ
حته اعمه واسمع تنحچي
هذا العمه اعيونه البچي
علمني كل ليل اليجن
ابچيله وانعاه الفجر
++++++++
يالمهدي مو بس عاطفه
بچيني لحسين ابعقل
فهّـمني الام السـبي
واشتعني حرمه عالهزل
من زغري دمعي بهل حجم
بيّه الحزن ما مكتمل
هم يكبر اتمنه الدمع
مثل الملامح والشكل
من يوگع ابچف ام حسن
تعرفني جارحني الضعن
دمي بدمعتك منعجن
بگلبي جمر لأم الخدر
+++++++++
من البس اسود والدمع
ما ينزل اسود للاسف
لا بلل اشفاف الطفل
المتفطره وريجه نشف
لا يعرض ابنحري سهم
لاگلبي مثل امه رجف
تارسله چف نحره دمه
دمعاتي ماتترسلي چف
چا يمته اتثقـف بـعـد
وارسم على خدودي مهد
وارفع سگف بيتي واحن
وابقى ابوضع مامستقر
++++++++
ثائر الربيعي

عيد الغدير الاغر
ضوه ضوه ضوه ضوه
نورك علي
هوى هوى هوى هوى
اولاية علي
هدايه الولايه
++++++++
لمّة احباب يبو حسين فرحنه انشيله
اكبر اعياد علينه يمر الليله
البياض ابطك الكون وگف كل حيله
والسراط القويم انته بس تأويله
نعم نعم.نعم نعم
الگال العلي
سلم سلم سلم سلم
الواله علي
بروايه الولايه
++++++++++
اسمك امنين يبوحسين ولو معروفه
علي والعالي انطاك جميله حروفه
باسمك آيات جلاله بعقيده انشوفه
الناطق الرسمي عالناس رفعها چفوفه
اسم اسم اسم اسم
اجمل علي
نجم نجم نجم نجم
لامع علي
ابسمايه الولايه
++++++++
مايهمني شني ايگول عليه ال لايم
هاكثر ليش يكرار بمحبتك هايم
اليفهمك يعرفك يحيدر لازم
ياهو مثلك يرد الشمس للوادم
صعب صعب صعب صعب
مثلك علي
احب احب احب احب
آنه وهلي
البدايه الولايه
+++++++
نحمد الله ونشكره وسجود اوياها
الاهله اطهار موالي الك والطاها
واليبغضوك نطفهم دغش تلگاها
حگنه من هاي يبو حسين فخر نتباها
فخر فخر فخر فخر.
انته علي
نهر نهر نهر نهر
حب ممتلي
النهايه الولايه
+++++++
ثائر الربيعي

استشهاد الجواد ع
حسرة غريب بصدري
وبعمر الاكبر عمري
واتلاثه ايام ابسطح
مرمي اواسي المنذبح
وبعمر الاكبر عمري
++++++++
هنيالـه لبمـوته الـه
حصة جرح من كربله
المايمه واحد من هله
وايغمض العين
انه الجواد الي جدت
بدموعي من عودي سمعت
ان كنت باكي او لو ردت
ابچي على حسين
موقف انعاد ابموتي
مبحوح يطلع صوتي
اتهون المصايب ادري
وبعمر الاكبر عمري
+++++++++
سم والعطش بيه حصل
ضل چبدي يتگطع وصل
بس راسي ما عني انفصل
لا گاطع اچفوف
صح اني مقتول انحِسِب
بموتي وعله حسين انتحب
آنه المتت ما منسلب
وبثوبي ملفوف
حر الشمس جربته
اثياب الجسد ساترته
لا يجري دم من نحري
وابعمر الاكبر عمري
+++++++++
من خلت السم بالعنب
بحرورته گلبي التهب
صحتلها سويتي العجب
وي اقرب الناس
إسگيني ماي وما رضت
وانسدت الباب ومشت
والغربه بعيوني بدت
وينك يعباس
اليوگع وحيد ابغربه
صوب اهله ينظر دربه
ودموعي عالخد تجري
وبعمر الاكبر عمري
++++++++++
لا صوت اصيح وينسمع
اوگف واطيح وانجمع
شتـذكر ابهذا الوضع
وتزيد الاجروح
موتي دنه مني احس
آخر مواسات التمس
داري بسطحها وبالشمس
خل تطلع الروح
حته الدرج بي عثره
وبگلبي حسره وجمره
لا وين رايح فكري
وابعمر الاكبر عمري
+++++++++
كل بايه اعثر وانتچي
واخذلي شوط امن البچي
عن صعدت التل الحچي
يكسر بلعضام
اتسند وحيلي گضه
والسم وسط چبدي مضه
اعضامي احسها امرضرضه
ويا ثگل الاجدام
ما وحده صاحت ليه
حرگو خيامي اعليه
اوگف واطيح ابقهري
وبعمر الاكبر عمري
+++++++
بحرورة السم والضمه
متمدد الوجه السمه
حضرتني امي فاطمه
محنيه لضلوع
گالتلي ما فوگك ستر
اشنيتك ييمه بهالامر
گتلها لا بيـه بـتر
لا صبعي مگطوع
گالتلي ياهنيالك
ابموتك حسين ابالك
گلتلها همي وذخري
ابعمر الاكبر عمري
ثائر الربيعي
+++++++++

الامام الصادق ع
لسان حال بنت الامام الصادق ع
شگد سولفت عن حرگ الاخيام
ودارت علـينـه بـويـه الايـام
شفته الحرگ بعيوني
بس لا بعد يسبوني
+++++++++++
بحرگ الخيم بس الحرم هيچ اسمعت من عندك
هسه الحمد لله عدل بعدك ولذنه بسدك
ماعدنه چويات اطمئن ليش الدموع بخدك
تتمنه اخو مثل الگمر من شفت روحك وحدك
تركض علينه امفرع الراس
لمن صحت وينك يعباس
وآنه الزمتها امتوني
بس لا بعد يسبوني
++++++++++++
بعيوني اشوفك بس گلت عني تظم الآمك
اتهمس بصدرك گمت مامش كسر بعضامك
لا سامح الله لو متت وجسمك تخيطه اسهامك
ماعدنه زينب بالسبي ياهو اليلم ايتامك
بويه اطمئن ما ابچي عالماي
عندي المهم تبقى اننه وياي
لو عالهزل ركبوني
بس لا بعد يسبوني
+++++++++++
تدري آنه من شفت اللهب بالخطوه صارت عثره
ويه الحرم ما روكضت من حجره وادخل حجره
بمچاني اموت احسن گلت لاخدي چف ايسطره
خو هسه اموت اولا رمح راسك عيوني تنظره
يكسر گلب حال النساوين
بالي مشه لعيال الاحسين
بهالموقف وبچوني
بس لا بعد يسبوني
++++++++++++
والكاظم اعليه ركض ياخويه وينك صحته
جاني وصحت بعدك عدل لو بعده ذبحك وكته
لا تگصد الصوب النهر جرح النهر سامعته
اسكينه لا ماي ارتوت لا عمها رد الاخته
خل يحترگ خل يوگع البيت
بس تبقى انته گبالي ياريت
من ترحل ايسلبوني
بس لا بعد يسبوني
++++++++++
مو احنه اهل بيت النبي والواجب ايقدرونه
بيتك مزار اهل العلم شمسوي ويحرگونه
يالصادق ونفرظ متت عندك گبر يبنونه
مثل الحُسين بكربله واحبابك ايزورونه
گبرك بعـد هـم مثلـه ينـزار
بي حضره لو بس رمله وحجار
وزوارك ايذكروني
بس لابعد يسبوني
ثائر الوبيعي

جرح الامير ع
ناظر اختك يالحسن لينه وصِل
نـزلـوني منـها اذانـي الخـجـل
+++++++++
ابنيتي واعرفها شكثر متألمـه
وگفت اعله الباب تشبه فاطمه
مسحو عن الشيب يولادي الدمه
حيل خطفت لونها شلتني شل
***
السؤال ابـنظره مـتوجـه الي
انت هذا المنحمل حيدر علي
حته لو چان اليشيـلك كافلي
ما اصدگ عيني غير انت الفحل
++++++++++
اقره من نظراتها اسوالف دمع
ينفهم حچي الدمع ماينسمع
چنها نظرة فاطمه بكسر الضلع
من تصد لعيوني مدمعها نزل
++++++++++
نزلوني خل اسير اعله الجدم
الخاطر اختك گادر اتحمل الم
ابگلبي احسها نظرة الحره سهم
ابقى اشبع موت من قبل الاجل
+++++++
سارع الها واحضن اختك يالگمر
يبني روح وخفف اعليها الخبر
گلها ما مات الفحل بـس انطبر
راجع الها خل يضل عدها امل
+++++++
هلّله كل هلله باختكم والخدر
كونه سالم مو مهم عدنه العمر
ليلة الوحشه تألـمني اشكـثر
اتگلي كافل خدري يابويه انكتل
+++++++
گـِلها ذيچ الساعه تلحگ عالبچي
عالهزيله ماكـو تچـوه وتـنتچي
تحچي المن ياهو ليسمعه الحچي
ماكو راي ايصير للماعدها اهل
+++++++++
ثائر الربيعي

وفاة السيده خديجه
اودعچ فاطمه يُمه  تعالي
ال امچ هايه آخرها الليالي
اول دمعه هاي
وهواي الي جاي
ال امچ هايه آخرها الليالي
++++++++
خلصت سنين العمر كلها عشتها
وانتي يُمه اسنينچ اگليله اعرفتها
ازغيره بس اهمومچ بدمعچ شفتها
امن الرسول امصيبتچ يمه سمعتها
يالينتهي عمرچ قتل/
لثمنطعش هم مايهل/
وابطنچ ايموت الحمل/
العصره ابوكتها
يتيـمه لا ابـو لا ام يتـيمـه
هظيمه بروحچ اتعيش الهظيمه
لو يمچ عساي
وهواي الي جاي
+++++++++
دمعه تفصل فاطمه ما بيني بينچ
من فگد امچ لحد وگعت جنينچ
ماتجف من البچي يالزهره عينچ
واليتم ما يـرحم ويـكثر ونينچ
ما لايگ اعليچ اليتم/
وگلبچ عليَه ينهظم/
يافاطمه بموت الحلم/
يكثر حنينچ
هذا اول جرح هاي البدايه
لدموع الحزن ماكو نهايه
لا صل لا فياي
وهواي الي جاي
+++++++
راح اموتن والرسول ابگلبه حسره
المرّه والحلوه گضينه اعليها عِشره
يُعرف اغيابي يطر گلبچ يزهره
الحالتچ والفرگتي بدلاله جمره
انتي وحيده امن البزر/
لو بيين بگلبچ كسر/
من البچي عيونچ حمر/
ياهو اليصبره
آنه ودمعتي فدوه الدموعچ
اموت اولا تلطميهن ضلوعچ
ينكسرن وراي
وهواي الي جاي
++++++++++
نامي اخر نومه الچ يمه اعله اديه
باقي عمرچ يگضي يالزهره اذيه
والرسول اخلافي صيريله تچيه
ام ابوچ انـتي تصيرين الزچيه
يذكرني ويهل الدمع/
والگبري من يعلگ شمع/
من يبچي صوته ينسمع/
ويحن عليه
ابأدينچ فاطـمه نشفي دمعته
ترد وحشة خديجه الزهره بنته
الحالتكم بچاي
وهواي الي جاي
+++++++++
هذا شهر الخير تگصينه صيامه
وادري اسم العيد يجرح باليتامه
راح اودعج راح اگلج بالسلامه
وادري باقي الليل عينج ماتنامه
يبقى الجرح اكبر جرح/
للضامي ذاك الينذبح/
راس العزيز اعله الرمح/
وحرگةخيامه
مصيبه ما اشد منها مصيبه
من ام الخدر تمشي غريبه
لا ضل عدها راي
وهواي الي جاي
ثائر الربيعي