الشاعر الحاج ثائر الربيعي
ياااسجاد ممشاه الضعن عجله
ابن امي اريد ابسرعه اوصله
***
دام انت يعمه تحدي بضعوني
وصّلني گبل لا تنعمي اعيوني
بهذا الحال اريدنهم يشوفوني
مابيه بعد والشوگ ماحمله
****
مشتاگه لاخوي احسين مشتاگه
كلشي اتحّمل وما احمل افراگه
مايشفى دليلي امن اوصل بناگه
لو بس حيل الي منانه اركضله
**
دربي هذا نفسه امشيته وامچتفه
ومدري بهضمه امشي هسه لو لهفه
ياوسفه اعلى خدري وياه الف وسفه
لو گلت اعله هذا دربي واندله
****
لأملاگه اطلبه ونوح يطلبني
ماوفيت موته بدمعتي ووني
من ودعته خاف امقصره حاسبني
فوگه ماطحت ودعته من هزله
****
هالمره اوافي ابن امي هالمره
بس كون ابقى عدله واوصل لگبره
لبچيله بچي ماسامعه بعمره
وبيدي الخاويه امن احبالي الطمله
*
خافن مامتت يم طشته بالگوه
فوگ اترابه اموتن كون عالخوه
الموته امن البچي فوگ الاخو تسوى
رحت اميسره واميسره ارجعله
علي الربيعي
السيده رقيه ع
ترجعلي راودني احساس
واگطعها يمك لنفاس
تاخذني يالغالي وياك
ماريده عمري بلياك
***
***
طفله اعله گد حالي العتب
ميهمني شيكون السبب
ما احتمل فرگه طويله
من ودعتني امن الخيم
بعيوني احس موتي انرسم
انفاسي بغيابك ثجيله
وهوايه عني اتاخرت
للي رفع راسك صحت
عنك يفارس خل اشيله
يجرح عتاب المجروح
بس لليفارگ مسموح
ارحم دليل الناداك
ما ريده عمري بلياك
***
***
تسئالني لطفال اشكثر
چي تكثر ادموعي الفجر
وصوب الرمح ارفع اديه
لابد اگلـلهم يرد
لعيوني مايحمل بعد
مايگدر ايفارگ رقيه
لو حته بس راس ونحر
لو صحته يندار النظر
طول الدرب عينه عليه
يسمعني من احچي وياه
وانظر دمعته ومبچاه
لو گتله يكتل فرگاك
ماريده عمري بلياك
***
***
بليل الخرابه ويا حلم
ما ادري بس عندي المهم
فزيت اصيح الغالي اريده
صحت الجميع العايله
گومونه خل نستقبله
يلله يسكنه ويا حميده
وچفوفي افتحها ابهله
نفس العطر ما بدله
الاشتمه لو نمت اعله ايده
ضليت اشمّن بالراس
ماضل كتر بي ينباس
يابويه هيچ اشخلاك
ماريده عمري بلياك
**
****
تعبانه وهواي اسهرت
من اشبگت راسك نمت
نبضاتي من شوگي سريعه
اشكيلك وتشبع بچي
لو هسه مو وكته الحچي
لكن احلفك بالوديعه
ارحملي موتي امن السهر
كاتلني يحسين القهر
ضاگت عله عيني الوسيعه
لو عمتي تاخذها وياي
اذّوها بااسوط هواي
إعذر كلامي الاذاك
ماريده عمري بلياك
***
***
زادت على ذل اليسر
يابويه دخلتنه القصر
اعيون الشماتهراتصد شفتها
طبينه وايزيد ابتشر
دلوني وين اخت الگمر
خلف الحرم لاذت شفتها
متقصد ابشفتك ضرب
صاحتلها عمتي بكل غضب
انشلت يمينك ماشلتها
ضربوها ناده الحراس
صاحت دخيل العباس
وانه احضنت عمتي هناك
ماريده عمري ابلياك
**
----
لوگتلي اجيت الشوفتج
وادري رقيه ابغايتج
عندج وعد وي العليله
اعلى الطفل من وصتج
گالت امانه ابرگبتج
قصدج لخييج تعتنيله
كلش الطفل ماباقي اله
رايدله اخت لتدلـله
وحشه يمر عبد الله ليله
راح اغمض اعيوني وهاي
طلعتها روحي البهداي
للزهره تاخذني ارجاك
ماريده عمري بلياك
ثائر الربيعي
اول ايام السبي
مشينه وفوگي راسك كاسر افياي
عفت جسمك ورانه عالرمح جاي
تگدر اتفارگ جسد
وما تفارگنه ابـد
عالرمح جاي
++++++++
بگلبي ياصبح اهدعش حط خنجره
عاليه ظهور الهـزل كلش ترى
رچبتهن من بقيت أخـر مـره
الچم امتوني امن اعاين ليوره
العيني راسك چنه لاح
والرمل من راسي طاح
صوتك وماضيعه هاذ
اهنا يهلنه تانو صاح
ترى السفره طويله والوكت حار
واجييت براسي افيي فوگ الازغار
حته عبد الله گعد
وما تفارگنه ابد
عالرمح جاي
+++++++++
راسك وراس الگمر من التقت
فتره عين ابعين نظرتكم بقت
ماكو ادين وبالرموش اتشابگت
بنظره وحده اعيونكم صوبي اجت
بثوبي غطيت الحبال
ياخجلتي وحالي حال
التفت عنكم واشوف
ابني يم روس الخوال
عجيبه نظرة ابني تختلف عون
عليهن چنت اشيله صد للمتون
دمي فوگاهن جمد
وما تفـارگنه ابـد
عالرمح جاي
++++++++
رتّبوها الروس تمشي اويه الهزل
اگبال كل ناگه رمح يمشن عدل
واحنه نمشي بالسره وي الحبل
عالرمح بگماطه مشدود الطفل
رتبوها امن الچبير
الروس والحد الزغير
الهاي گالتلي الرباب
ناگتي خلوها اخير
اويه عبد الله سويه امشي لشام
والوليله اعله رمحه هلبت اينام
يا دللول الولد
ماتفارگنه ابد
عالرمح جاي
++++++++
ناگه وحده سكنه وارقيه سوه
وي بناتك تمشي نفس المستوه
الهوى عالي وراسك برمحه التوه
وشعره من راسك اجتني اويه الهوى
بيها عطر امي لگيت
گمت اشم بيها وبچيت
شيلتچ يا يمه هاي
امتّربه وآنه انسبيت
شسولفلچ عليها صعدت النوگ
عزيزچ راسه يمي عالرمح فوگ
وادخل بمجلس بعد
ما تفارگنه ابد
عالرمح جاي
+++++++++
راس ابو فاضل مشه عني متر
خطوه خطوه يراقب بدرب اليسر
والشمس كلساعه تاخذني بكتر
عينه صوب اخيالي لوطال العصر
والحرس يتعمدون
فوگ ضلّي ايهوسون
شوف هاي الرايه هاي
اگباله بيها ايشگگون
رجف رمحه ولزمته اصبر يعباس
منو ايرده المكـانه بوگـعته الـراس
هشّمه ذاك العمد
وما تفارگنه ابـد
عالرمح جاي
++++++++++
ليل اجاني ودي انام وما يصح
ارقيه كل احچايه تفتحلي جرح
تبقى وي راسك تسولف للصبح
ليش مو عالگاع نايـم عالرمـح
بويه انزل ماكو خيل
اترضرضك والدنيه ليل
ابلا عمامه بويه ليش
وجرحك بگصتك طويل
شوكت ذيچ الخرابه اوصل واحاچيك
قبل ما روحي تطلع راح ابچيك
لو گلت سطرولي خد
ماتفارگنه ابد
عالرمح جاي
ثائر الربيعي
ليلة.الوحشه.
لقاء مولاتي العقيله بمولاتي الزهراء ع عند الاجساد الطاهره
أنه والليل ودموعي.والمصيبه
والله وبوكتچ اجيتي.يالحبيبه
اعثر وإمي اعله بالي
لو تجي وتشوفه حالي
يالحبيبه
++++++++++
گضه العاشر نهاره وجن علي ليلي
ابچي اعله اليتامه وهيه تبچيلي
هاي المن حرگ رجليها تشكيلي
وذيچ ال عن اذنها وخدها تحچيلي
وحده وحده افتر عليهن نومتهن
فرصه اشوف جساد اخوتي الماشفتهن
ممشه ليل ابلايه والي
لو تجي وتشوفه حالي
يالحبيبه
+++++++++
اجر بجدامي جر وگوه امشيها
واتوچه اعله دمعة عيني لبچيها
كل عثره بجسد ياروحي احاچيها
اول تالي زينب هيچي تاليها
اسم الله صاحتلي اسمعتها وي عثرتي
ياهي هاي وهيه صاحت ياهي انتي
هايه إمي شك اجالي
لو تجي وتشوفه حالي
يالحبيبه
+++++++++
ظلام وخوف ما وحده اتعرف وحده
عليها امشي وبقت چم خطوه مبتعده
امگابل سكته كلمن دمعته ابخده
ومن شافت حجابي ولفّـته وشده
هيه گالت يمه زينب انتي بنتي
وآنه صحتلها يزهره هايه انتي
من بچيت بصوت عالي
لو تجي وتشوفه حالي
يالحبيبه
++++++++++
مو من صعدت التل حيل مابيه
هضيمه مو الم تتراجف ايديه
لحچايه انحچت خلتني محنيه
بت الزهره طلعت صاحوا اعليه
أحترگ بخيامي ودي والجبرني
حسين باقي احچايه عنده وينتظرني
يختي حاميلي عيالي
لو تجي وتشوفه حالي
يالحبيبه
++++++++++
وكت ماعدنه لا يكشف ضوه اعلينه
عله حسين بظلام اندوّر إمشينه
كل وحده ابجهه وين الولي وينه
تفارگنه وعله جسمه تلاگينه
كلمن وبيديـها وصله من ثيابه
عنه مشموره مسافه بالترابه
واشيلمها اوصاله تالي
لو تجي وتشوفه حالي
يالحبيبه
+++++++++
بچينه ويا دموع الي تكفيله
گالت يمه زينب روحي للعيله
يتيم اسمع بچيه يايمه روحيله
الله ايعينچ ابدرب السبي وليله
ابصحره شتنام الغريبه ابلايه خيمه
وعالرمح راسه الكفلكم ياهضيمه
انسي يازينب دلالي
لو تجي وتشوفه حالي
يالحبيبه
ثائر الربيعي
نعي ليلة الوحشه
اشوفج گاعده عمه وتصلين
شنهي اليوجعج ومنين تشكين
بس لا خاف جدمچ لايحته النار
وتشوغ الروح فوگه من تسحگين
لو صعدت التله هدت الحيل
صعبه بهذا عمرچ من تعثرين
لا ياعمه لا من هاي لا هاي
خذت حيلي يعمه امصيبة حسين
تگله
يعمه ما رحت للتله وياي
وتسمعها بلسانه چلمة الماي
ردت اسحب اسهامه وصاح بهداي
خليها اعله جسمي كاسره افياي
گتله اليوجعك ياجرح يحسين
خدرچ گال جرحي وطلعتچ هاي
چفه يشيله..ابوداعي ماگدر..چفه يشيله
مگطوع حيله..من.كثر النزف..مگطوع حيله
ونّـه طويله..ون من القهر..ونـه طويله
بنتي العليله.سلميلي عله..بنتي العليله
الامام الحسن ع
خالي مچانك يابو جسام
يحزام ظهري ابعازة حزام
ايدي اعله ايدك
وياي اريدك
+++++++
ودي اوياي حاضر يالحسن ودي
من يا حاجه الك خويه الحسن ابدي
وحدي ويا هضيمة چلمة الوحدي
حته ابني الطفل اخذوه من عندي
لا ضل اخو يسندلي لچتاف
خايف خدرنه الغالي ينشاف
لچمات ازيدك
وياي اريدك
*
وينك يالحسن منك ردت فزعه
صوتي امن العطش كون احچي وتسمّعه
يم باب الخيم ام الطفل تنعه
يالطير الچنت من زادك اتشّبعه
گطعو يمنه حامل الجود
وليهسه سكنه امتانيه ايعود
وانت اشيعيدك
وياي اريدك
**++++++++
يالوياك آني امن اازغر رابي
اتشاركني ردت ياخويه بمصابي
راحت كل اخوتي وطاحت اصحابي
تربي اعله الخيام اعيون سلابي
مو مشكلة ذباحي والموت
خايف عله التل اسمع الصوت
الحگ عضيدك
وياي اريدك
*
تصبح لو طحت يم الخيم لمّه
وزينب يالحسن ياهو البقه اتحشمه
چلمة سلبوني وتجرح الچلمه
وجسمي اعله التراب امخضب بدمه
اتمنى اصيح ادركني بالحال
وتتمدد اوياي اعله لرمال
جيدي اعله جيدك
وياي اريدك
*
جاسم لو تشوفه ابلامته جاني
يستأذن يريد وما قبلت اني
ثوبك منرلبسها اهواي بچاني
من ودعته چلمة خويه بلساني
ماقصر بتضحيته جسام
من دمه حنّت امه لخيام
نازف وريدك
وياي اريدك
آخر نظره يوم العاشر
تحچي اشكثر نظرات الاوداع
اويه ام الخدر بس خلصت بساع
بالوگعه من ميموني
فاتحها چنت اعيوني
++++++++
امن أول حجر لآخر سهم
ياخويه اسمع بالخيم
كلشي گلب زينب عِلَم
وصورتها تمشي اگبالي
كل جسمي لچمات انترس
وابيا علي اسحب نفس
نَزَّلني من ظهره الفرس
رد اعله زينب خالي
يا هو البقى وراجعله فزّاع
يركض يلمني من عله الگاع
يسندلي كون امتوني
فاتحها چنت اعيوني
++++++++++
صانع وساده امن الترب
لاحت سواده اعله الدرب
مشيتها يقراها الگلب
مني تريد املاگه
بس اوگف ابطولي ردت
اسم الله كل وگعه اسمعت
واشطلعچ زينب صحت
گالت الگ مشتاگه
هذا انت گالت خويه يحسين
ماتنعرف ذاك الحسن وين
يابعد لونك لوني
فاتحها چنت اعيوني
+++++++++
گلتلها غيرني الضمه
واعضامي كلها امهشمه
حاچيني يا بت فاطمه
بنظراتي گمت اسئألها
هل انتي زينب ياتُرى
شكلچ شجاا واشغييره
لو صعدت التل للمره
اگبال العدو تكتلها
محنيه ليش وما بقى حيل
الله يعينچ من يجي الليل
ايتامي لو رادوني
فاتحها چنت اعيوني
+++++++++
كل دمي بعروگي نزف
كل حيلي ما يرفعله چف
لحظة وداع وللاسف
صوت وحچي ما عندي
اسوالفنه صارت بس دمع
مفهومه بس ماتنسمع
بكل دمعه منها انوجع
تمسح رمل عن خدي
سلّم عله امي گالت اوياك
هلبت اموت بسرعه والگاك
لا عالهزل يسبوني
فاتحه چنت اعيوني
++++++++++
عني مشت تخطي بحذر
ما ناطيه الجسمي الظهر
والراسي چان آخر نظر
موجود بعده بجسمي
وهنا بده صوت اعتله
رِيحوا الحسين ابمقتله
شفت الشمر صدري اعتله
لا باقي واحد يمي
بيه اثنعش طعنه احسب حساب
الوجهي گلبني فوگ الاتراب
من الظِهر ذبحوني
فاتحها چنت اعيوني
+++++++++
ثائر الربيعي
الامام العباس ع
+++++++++
اعتذر بچيتك… تنحني خليتك
بلهفه لوداعي اجــيت
چف يحظنك مالگيت
تنحني خليتك.
++++++
صحتك ادركني اخي اعذرني جرحتك
طاح اخوك وچفك اصفگته سمعتك
امن المخيم للنهر وصلت دمعــتك
اعليه محني وماگمتلك لا شبگتك
آني انزل ادموعك
وسفه واحني ضلوعك
انهض واوگع بقيــت
چف يحضنك مالگيت
تنحني خليتك
+++++++++
لا يصــير ابّالك وتعرفني انتــه
اتقبّل اچفوفي او بلل بيهن نظرته
بس وحگ الزهره شلته وما شربته
الخاطر اسكينه اغرفت ماي وشمرته
عالدرب ادريها
جيتي اتّانيها
حيل من هاي استحيت
چــف يحضنك مالكيت
تنحني خليتك
++++++++
اشلون من طاح العلم زينب وضعها
آه صاحت گلي خو محد
سمعها
اشكبره لغيابي نزل زينب دمعها
يعني هم مثلك بعد محني ضلعها
من تنشدك وينه
گلها صابــو عيــنه
الهالسبب عنها بطيت
چف يحضنك مالگيت
تنحني خليتك
+++++++++
ويّه طيحت چفي الايسر عالوطــيه
يُمّه هــا عبــاس صاحتني الزچيه
العشره وي حسين خلصت هاي هيه
ياخو زينب لو مشت زينب سبيه
من يسد امچانك
يحترگ صيوانك
ناحت الزهره وبچيت
چف يحضنك مالگيت
تنحني خليتك
++++++++
اسهام عن الجود بعيوني شگفتها
اتبده وي الماي كل حيلي بوكتها
امن الفرس من اوگعت چلمه سمعتها
طاح عباس وشماتتهم عشتها
ضل وحيد احسينه
نحرگ اصواوينه
امن القهر خويه هويت
چف يحضنك مالكيت
تنحني خليتك
+++++++
حيرة الماعنده اخو اعرفها حيره
ينولي اسهام وحجر اعرف مصيره
وللحوافر ينفرش جسمه حصيره
اوداعت الله هايه نظرتنه الاخيره
نلتقي اعله ارماحنه
والحرم گـدامـنه
للسبي وكلما مشيت
چف يحضنك مالگيت
تنحني خليتك
++++++++
ثائر الربيعي
الانصار
ترجف قهر نافع چنت وين
ليش اسكتت وامنزل العين
گلهم حديث اسمعته
بين الاحسين واخته
بين الصواويين
++++++++++
شفت وعساني لاشفت
من خلف الاحسين اطلعت
يتمشه خلف اخيامه
سل سيفه بس مو للحرب
شوك اليشلعه امن الدرب
باچر تسحگه ايتامه
حس گلبه زينب رادته رد مسرع الملگاها
ٱحرس عله الخيمه اوگفت واسمع حواره وياها
لا سامع اتمنيته ما دار
چان الحچي عنكم يلنصار
ماتنحچي سالفته
بين الاحسين واخته
وامنزل العين
+++++++++
زينب يلنصار ابقلق
صوت ابوجل بيها نطق
منها الحچي شل حالي
بالعبره تحچيها اسمعت
اصحابك الها استخبرت
بس لاتعوفك تالي
گالتله هالليله فرق ومصباح يوم العاشر
خوفي مثل مسلم بعد تتلافت ولا ناصر
اصحابي گلها نعم الاصحاب
يستأنسون الموت الاحباب
واحدهم ايشد همته
بين الاحسين واخته
وامنزل العين
++++++++
هضمت حبيب امن الخبر
ضل يفرك اچفوفه قهر
شيخ الانصار وناده
اولكم انه مستعد
هسه قبل باچر نهد
وانفرح اخت الساده
شال ايده ابن ظاهر يشد لحواجبه العصابه
يستعرض إباب الخيم ناده الجميع اصحابه
چلمتنه وحده البت علي صاح
خدامچ احنه ونفدي لرواح
ياجون هوّس انته
بين الاحسين واخته
وامنزل العين
+++++++++
يابت علي امنين الوجل
إتطمني يا بـت الفـحل
ناطين اخوچ احچايه
باچر تشوفين الصدگ
گلبه العليكم محترگ
وللحره هز الرايه
گالتله منكم والنعم همي الاحسين ودينه
كل هلّله هلّله ابنصرته گروله باچر عينه
الصيحه علت مابين الاخيام
وعباس اجاها امفرع الهام
والگاع ماشايلته
بين الاحسين واخته
وامنزل العين
+++++++++
يركض اجه حافي البدر
تتجادح اعيونه وحمر
ابچفيته شد احزامه
حي انه گلها وما متت
ابغيري تنخيتي اسمعت
وبحرگه هز صمصامه
حي آنه واشتم الهوى لاتجي بصدرچ حسره
مايوصل اخيامچ بشر يم الخدر والزهره
واتسابقوا كلهم عله الموت
ياهو القبل للمعركه ايفوت
والفجر بيين وكته
بين الاحسين واخته
وامنزل العين
+++++++++
هاشم والانصار التقوا
عالحمله لوله اتسابقوا
لنصاره گالو احنه
عفنه الاهل عفنه النسه
وعابس حچاها بواهسه
حب الحسين الجنه
عاقل الينجن بالولي الهل ساعه من زغري ادعي
بلا سيف اهد اولا رمح واشمر عليهم درعي
وصوت ام وهب صاحت يعباس
من ابني باچر اشمر الراس
وگدامك اشمر جثته
بين الاحسين واخته
وامنزل العين
ثائر الربيعي
نزله لمسلم عليه السلام
طوعه لو شفتيني
حمره صارت عيني
ذكري عباس
+++++++
خوف لا يضهر ابد
كل بني هاشم بعد
حمره تصبح عينها
من يمر بينه الزعل
اي وحق خير العمل
المعضله گاضينها
عدنه يسهل كل صعب
الكوفه اگلبها گلب
وترتعش حيطانها
طوعه بس عينيني
بجربتﭲ روّيني
وذكري عباس
++++++++++
بسم ابو الحمله علي
حشّميني وهلهلي
لا يهمّچ جيشهم
بصوتي احبسها حبس
كل لسنهم تنخرس
اطلابه بيني وبينهم
راح اگصهم بالسره
ما اخلي شي وره
طوعه وتشوفينهم
من تطيح ابطالهم
ترتعب احوالهم
ذكري عباس
++++++++++
عندي دين ومعتقد
ما اهم الكل عدد
الملگه يصبح عيدي
حته لو مالي نصير
ما اهم اولا احير
دامه سيفي بايدي
يركع بروس العده
وانتي خلّچ شاهده
بس حسب تحديدي
حشّمي او وصيني
وبالفحل ذَكريني
وذكري عباس
++++++++
الموته وحده بالعمر
والمواقف تنذكر
وانذكر وياها
مسلم اهنا موقفه
اگلبوب مكسوره شفه
ابعملته السواها
الوحده افناها فني
الوادم اگباله شني
بسيفه من لاگاها
وذكرچ انتي اويايه
طوعة شالت مايه
وذكري عباس
+++++------
بهيچي موقف ارتجي
يمي ابو فاضل يجي
وخل نهز اكوانها
بچفي وبچف الگمر
انسوي باهل الكوفه طر
ونحكم ابميزانها
من فعلنه تستمد
شيعه باچر تستعد
والنصر عنوانها
ورطه لو جربوهم
كربله بگلوبهم
وذكري عباس
++++++++++
كوفه مضرب للمول
كلمن ايوالي الفحل
مايلين اعنادها
ابيا علي اتثور التفگ
صبر بيهم لو زهگ
ابلا حدود ابلادها
قائد البيهم وگع
منهج الغيره وضع
ايده عالحگ سادها
ماتطيح الرايه
ناطيتنه احچايه
وذكري عباس
ثائر الربيعي