Mirzo Qodirov | Blog

Ramazon faqatgina cheklovlardan iborat emas. Bu oy aslida intizom oyi.
Bu yil IMAN’da Ramazon oyi uchun kampaniya tayyorlayotganda qiziq bir chellenj bilan yuzlashdik. Shunday g‘oya kerak ediki:
• u oddiy bir mavsumiy kampaniya bo‘lmasin.
- unda odamlar e’tiqodidan marketing vositasi sifatida foydalanilmasin.
• undagi kommunikatsiya «aqillilik qilish»ga o‘xshab qolmasin.
Ko‘pchilik Ramazon oyini oddiy cheklovlar sifatida ko‘radi: ovqat yemaslik, suv ichmaslik va h.k. Lekin chuqurroq qaraganimizda, Ramazon nafsni jilovini qo‘lga oladigan, o‘zni sarhisob qilib yo‘nalishni to‘g‘rilab oladigan oy. Bunda albattaki o‘zimiz uchun noqulay, lekin ayni vaqtda foydali savollarni beramiz
- Men kimman?
- Qayoqqa ketyapman?
- Nimani yaxshilashim mumkin?
Aynan shu yerda salbiy odatlar - ko‘pincha sezilmaydigan, ammo fe’l-atvorimizni shakllantiradigan kundalik xatti-harakatlar e’tiborimizni tortdi.
• g‘iybat
• hasad
• odamlarni xafa qilish
• yolg‘on so‘zlash va h.k.
O‘zimizga savol berdik:
Marketing yordamida ana shu ko‘pchiligimiz e’tiborga olmay yengil qaraydigan salbiy odatlar haqida eslatma qilib ularda o‘zlari uchun foydaliroq narsaga rag‘bat uyg‘ota olamizmi? Shu tariq asosiy g‘oya paydo bo‘ldi:
G‘iybat qilmang - investitsiya qiling.
Hasad qilmang - investitsiya qiling.
Isrof qilmang - investitsiya qiling.
Bu holatda investitsiya faqat pul emas. Bu tizimli kundalik moliyaviy odatni shakllantirish.
Aksariyat reklamalar "sotib ol" deb hayqirayotgan bir paytda sokinroq bo‘lishga qaror qildik. Agar banner sotishga urunmay, kuzatuvchi bilan suhbat qurishga harakat qilsa, uning e’tiborini tortish osonroq bo‘ladi.
- Birinchi e’tibor.
- Keyin kommunikatsiya/messej.
- Oxirida yechim yoki taklif.
Ammo kommunikatsiyani o‘zi yetarli emas. G‘oya haqiqatan ishlashi uchun ilovada ham ba’zi o‘zgarishlar qildik.
• har kuni sarmoya kiritishni avtomatlashtirish uchun avto-invest funksiyasini ishlab chiqdik;
• kunlik minimum investitsiyani 50 ming so‘mga tushirdik.
Shu tariqa kichik kundalik odat paydo bo‘ladi, insonda kapital shakllanib foyda olib kelishni boshlaydi.
Ba’zida baland ovozda gapirishning hojati yo‘q. Haqiqatan ham muhim narsalar haqida gapirsak shuni o‘zi yetadi.
Ha, bu ham marketing. Faqatgina tranzaksion metrikalar emas, balki mijozlar fikrlash tarzini shakllantiradigan, ularni uzoq muddatli munosabatga tayyorlaydigan marketing

Mana buni kreativ desa bo‘ladi
🥹
Manimcha ortiqcha izoh shart emas…

Marketing faoliyatini yuritishda qadriyat juda katta ahamiyatga egaligini tushunib yetibmanki, bu g‘oyani yanada ko‘proq mutaxassislarga yetkazish istagi hech tark etmaydi. 14-fevral kuni ham Tashkent Marketing Forum 2026’da «Islom moliyasi va marketing:…

Marketing faoliyatini yuritishda qadriyat juda katta ahamiyatga egaligini tushunib yetibmanki, bu g‘oyani yanada ko‘proq mutaxassislarga yetkazish istagi hech tark etmaydi.
14-fevral kuni ham Tashkent Marketing Forum 2026’da «Islom moliyasi va marketing: qadriyatlar asosidagi marketing qanday bo‘ladi?» mavzusida chiqish qilamiz
Mavzuga qiziquvchilar bo‘lsa, albatta, forumda kutaman! Barchamizga manfaatli qilsin.
Manzil: AZIMUT Grand Hotel Tashkent
Batafsil:
https://tmf26.marketing.uz/uz

Oxirgi 3 oy ichida 100 ga yaqin rezyume bilan tanishdim, 30 ga yaqin inson bilan interview o‘tkazdim.
Bu jarayonda ma’lum bir xulosalar paydo bo‘ldi va bugungi mavzuni muhokamasiga undadi.
Barchaga manfaatli qilsin

Oxirgi paytda Uklon haqida juda ko‘p o‘yladim oxirgi kampaniyasidan keyin. Ba’zi fikrlarim bilan bo‘lishgim keldi.
Bu reklama emas, to‘g‘risi
🤣

Yaqinda bir narsa haqida o‘ylab qoldim. Gap freelance va agentliklar haqida.
Hozir dekabr, har yilgidek 2026-yil uchun umumiy biznes strategiyasi ustida ishlayapmiz. O‘tgan yillar davomida yig‘ilgan tajriba asosida 2026-yilda nima qilishimiz kerakligi haqida nisbatan ravshan tushuncha bor: qaysi yo‘nalishga ko‘proq e’tibor berish kerak, byudjet qaysi kanallarga qanday taqsimlanishi kerak va h.k.
Strategiya muvaffaqiyati, nazarimda, 2 ta asosiy narsaga bog‘liq: to‘g‘ri qo‘yilgan maqsad va unga erishishning to‘g‘ri tanlangan usuli. Hozirgi fikrlashim va tajribam asosida shu narsani aytishim mumkinki, yuqoridagi ikki narsani outsource jamoalar aksar holatda hal qila olmaydi. Sababi bu ikki narsani uddalash uchun biznes haqida yetarli ma’lumot yo‘q.
Kimdir aytishi mumkin, ish boshlashdan avval analiz qilamiz, shunda hamma ma’lumot olinadi deb. Ammo bu analizlar qanday qilinishini hammamiz yaxshi bilamiz)).
Ichki holatni to‘liq ko‘ra olmaslik outsource (agentlik, frilans) marketing jamoalarning samaradorligini bir necha barobar tushirib yuboradi. Tashqi jamoalar bilan unumdor ish qilish uchun yoki shtatda albatta kuchli marketolog bo‘lishi kerak yoki biznes egasining o‘zi marketingdan yetarli darajada xabardor bo‘lishi lozim.
Misol uchun biz biror agentlikni jalb qilsak va desakki: «2026-yil uchun shuncha byudjetimiz bor, nimalar qilsak bo‘ladi?» – yuzlab g‘oyalar yeg‘ishimiz mumkin. Ammo bu g‘oyalar haqiqatda muvaffaqiyatga olib boradimi yo‘qmi? Hozirgi holatimiz uchun muvaffaqiyat nima o’zi? Maqsadchi? Asosiy masala shu. Bizda analiz uchun bir necha yuzlab terabayt ma’lumot bor. Bu narsani o‘rganib chiqishni hech bir agentlik bo‘yniga olmaydi. Bu holatda samaradorlik uchun mas’uliyat asosan kompaniya ichidagi odamlarda bo‘ladi – to‘g‘ri maqsadni belgilash va to‘g‘ri yo‘nalish berish.
Albatta, shtatda yaxshi mutaxassisni ushlab turish biznesga (kichik va o‘rta bizneslar uchun) ancha qimmatga tushishi mumkin. Lekin bu xuddi ROI va CAC masalasiga o‘xshaydi. Sizda CAC qancha kam bo‘lmasin, ROI salbiy bo‘lsa, buni bir tiyinlik ahamiyati yo‘q. Ammo ROI yaxshi holatda bo‘lsa, CAC ning qancha bo‘lishi ahamiyatsiz. Shu sabab bu yo‘nalishdagi chiqimlarga investitsiya sifatida qarash mumkin. Bugun bo‘lmasa ertaga albatta natija olib keladi
Shuncha gap bilan nima demoqchi bo‘ldim? Asosan biznes egalari uchun
Agar siz haqiqatan natijaga erishish istagida bo‘lsangiz, yoki jamoada shunday mutaxassis bo‘lishi uchun, yoki o‘zingizda mustahkam tushuncha bo‘lishi uchun investitsiyani ayamang. Shunda kim bilan ishlashingizdan qat’i nazar natijaga erishish ehtimoli kattaroq bo‘ladi.
P/S. Shtatga yaxshi marketolog topish ikkinchi eng qiyin masala
😂
Misol uchun, o‘zimizni jamoada Product Marketing Manager va Performace Marketer pozitsiyalarini 4-5 oydan beri yopa olganimiz yo‘q. So‘rov juda ko‘p, lekin sifatlilar juda kam yoki olib keladigan qiymatiga nisbatan overpriced.
Bu mutaxassislar uchun yaxshi signal. Erkinlik ortidan quvish o‘rniga zo‘r mutaxassis bo‘lish ustida ishlasangiz yaqin 5 yil ichida oldingizda juda katta imkoniyatlar ochilishi mumkin.

Umr deganda ko‘z oldimizga juda katta, hech qachon tugamaydigan vaqt oralig‘i keladi a?
Resurslar haqida gapirsak, ular juda ko‘p: pul, mansab, obro‘-e’tibor, tanishlar. Lekin bular ichida bir bebahosi bor – vaqt.
Yaqinda Rustamaka bilan bir loyiha haqida gaplashgan edik. Shunda bir fikr aytdilar. Mixdek o‘rnashdi miyamga. «Bu loyihaga umrimni investitsiya qilmoqchi emasman» deb aytdilar. Nima qilsa ham investitsion kompaniya rahbarilar-da
😂
Xullas, nima fikr keldi?
O‘z vaqtimizni nimalarga investitsiya qilayotganimiz haqida hech o‘ylab ko‘rganmizmi? Hozir ijtimoiy tarmoq, Counter Strike va h.k. larni nazarda tutmayapman. Umuman olganda.
Masalan umrimizning 1/3 qismi ishda o‘tadi. Bizning sohada bu asosan biznes loyihalar. Loyiha bilan kelishuv qilishda bu loyihaga 6 oy, 1 yil umrimni investitsiya qilishga tayyormanmi degan savolni hech berib ko‘rganmizmi? Ertaga ROI qanday bo‘ladi? Faqat moliyaviy ROI emas, balki mijozlar, jamiyat, insoniyat oladigan ROI. Ikki dunyoda olinadigan ROI?
(ROI kiritilgan investitsiya olib keladigan foyda)
Yoki boshqa misol, atrofimizdagi insonlar. Kimga ko‘proq vaqt, e’tibor va mehr bersak ROI maksimal bo‘ladi?
Ancha o‘ylantiradigan savol va filtr bo‘ldi. Bundan avval shunga o‘xshash bir masalada ustozlar bilan maslahatlashganimda ham shunga o‘xshash javob olgandim. Qaysidir ma’noda IMAN’da qolishimga ham ana shu maslahatlar sabab bo‘lgan. Vaqtimni frilans yoki boshqa loyihalarga investitsiya qilishim ham mumkin edi, lekin uzoq muddatda ulardan olinadigan ROI juda kichik bo‘ladi. To‘g‘ri IMAN’da ham ROI katta bo‘lishi kafolatlanmagan, ammo investitsiya risksiz bo‘lmaydi))
Vaqt bo‘yicha oladigan qarorlarimiz ham xuddi investitsion loyihalarga o‘xshaydi. Tanlovlarimiz asosida turadigan filtr ana shu oddiy mantiqqa asoslansa, ya’ni qayerga investitsiya kiritilsa har tomonlama ROI eng balandi bo‘ladi degan savol asosida qaror qabul qilinsa, menimcha, adashishimiz ehtimoli ancha pasayadi.
Kechga tafakkur qilish uchun biroz fikrda))

Assalomu alaykum, yaxshilar!
Endi e’tibor berishni boshlabman, marketing bozori tinchib qoldimi oxirgi payt yoki menga shunday tuyulyaptimi?)

Qiziq bo‘lsa ))
https://www.linkedin.com/posts/mirzokodirov_were-hiring-a-performance-marketing-manager-activity-7391005878511980544-AmbS