فَذكِّر بالقرآن🕊🦋

كل ما تحس إنك تعبت أو صبرك قَل افتكر مقولة سيدنا عُمر بن الخطاب : "لو عُرِضَت الأقدار على الإنسان لاختار القدر الذي اختاره الله له"
حقيقي جُملة مُطمئنة لأبعد الحدود، كل إنسان فينا واخد رزقه كامل، حتى في الابتلاءات ربنا بيدّينا على قد طاقتنا.

‏لا أحَد يَتَقَبَّلُكَ مُنطَفِئ !
= اللهُ يَتَقبّلُك ، بَل وَيُضيئكَ أيضاً

"يا شيخ يعني ايه (أعوذ بعظمتك ان أغتال من تحتي)؟
ج:
من ضمن أدعية أذكار الصباح و المساء دعاء كبير عن العافية و يتختم بالإستعاذة دي، طب يعني ايه أُغتال من تحتي ؟
يعني
أنت لمّا بتقف على أرض بتكون مطمن و واثق في ثباتها فكأنه تشبيه إن يارب ميجيش الغدر من أكتر مكان أنا مطمن له، سواء من اشخاص قريبة أو بعيدة أو خطوة اخدها
استعاذة يومية بتطلب فيها الأمان للي تطمن له، و ده دليل ضعفنا و إن عنينا كتير بتتخدع، فـ ثق بربك لا بنفسك.

والله يا جماعة هي أقدار تُساق إلينا ونُساق إليها،
ومهما فركنا ومهما عملنا فالأمر كله لله وحده
إن رَضيتم رُضيتم وأمر الله نافذ
وإن سخطتم بُليتم وأمر الله نافذ
فاللهم هِب لنا من الأقدار أحسنها وأجملها.))
💕

بمناسبة الكليات وجملة: أهي اللي لقيتها قدامي، ومجموعي جايبها داخلتها، اعمل ايه يعني
المهندس أحمد عامر في درس السيرة النبوية، كان بيحكي عن مرضعة سيدنا محمد ﷺ، وهي السيدة حليمة السعدية، وإن هي قالت جملة أنا مش قادر اتخطها لحد دلوقتي: " والله ما أخذته إلا أني لم أجد غيره"
وده بسبب إن سيدنا محمد ﷺ، كان يتيم الأب، فـ مكنش حد عايز ياخده، لكن علشان متروحش من غير رضيع، خدته
انت متخيل إن ربنا كتب لها إنها تبقى مرضعة النبي ﷺ، وتنال الشرف ده، وتحل عليها بركاته وهي متعرفش، هي اخدته لمجرد إنه مفيش غيره
فـ أنت محدش سرق حلمك ولا كليتك، وانت مدخلتش الكلية دي لمجرد إن مفيش غيرها، أو اللي مجموعك جابها، لا والله ربنا مختارها ليك انت بالذات، لإنه عالم إن ده أنسب حاجة ليك، ومش شرط تعرف الكلام ده دلوقتي
المهم تبقى واثق
"إن الخير فيما اختاره الله"

على فكرة، عادي جدًا إن ربنا يرزقك بحاجات كتير حلوة في نفس الوقت
تعليم كويس، وجواز ناجح، وشغل أو كارير مميز، ورزق واسع، وذرية صالحة، وعيلة كبيرة بتحبك وتحبهم، ويبقي عندك من نعم الدنيا وأسباب الراحة اللِّي وصلت لها البشرية
وعادي جدًا كمان إنك تعيش سعيد، وقلبك متعلق بربنا، ولسانك دايمًا بيحمده ويذكره، وتبقي ابتلاءاتك قليلة
ممكن ربنا يجمعلك بين النعم والسكينة وحسن العبادة، ودي ببساطة اسمها؛ عافية.

شوفت أي حاجة كويسة أو أي حاجة بتعجبك أو نفسك فيها تقول "اللهم بارك"
لما قلت كدا لحد زعل كدا وقال: يعني أنا عيني وحشة؟
هو ده المعنى اللي واصل لك؟ ده أمر نبوي من خير الخلق صلى الله عليه وسلم
أنت عادي جدا ممكن تحسد حد وأنت مش واخد بالك ، فامنع نزيف حسناتك
ادعي بالبركة ، خليها على لسانك في أي حاجة ، دي أهم نصيحة ممكن أنصحها لكم

عايزاكي تجيبي ورقة وقلم وتسألي نفسك.
إيه غايتك من الدنيا ؟
حددي الغايات والهدف وانشغلي واشتغلي عليهم، هتملي وقتك وهتؤجري عليه.
كل إنسان مات بيتمنى يرجع ساعة يزود عمله الصالح.
فانشغلي بعمل صالح وإحتسبي الأجر وتوكلي على الله.
خلي غايتك الأولى في الدنيا هي محبة الله لكِ
لو اشتغلتي على الحتة دي فانتِ  هتعملي كل شيء صالح وهتجاهدي كتير وهتبقي مبسوطة مهما كنتِ تعبانة عشان الغاية عظيمة.

هقولك نصيحة لا تقدر بثمن .. والله ..
لما تلاقي نفسك قاعد مهموم .. وبتفكر تفكير سلبي ..
بسرعة اعمل حاجة من اتنين ..
يا تقوم تصلي .. لأن النبي عليه الصلاة والسلام كان بيعمل كده .. كان إذا حزبه أمر فزع إلى الصلاة .. وكان بيقول .. وجعلت قرة عيني في الصلاة ..
يا تمسك سبحتك وتقعد تذكر ربنا .. لأن ربنا بيقول .. من شغله ذكري عن مسألتي أعطيته أفضل ما أعطي السائلين .. وبيقول.. فاذكروني أذكركم ..
صدقني .. لو عملت كده علطول .. هتلاقي حياتك اتغيرت للأفضل .. والهموم اتزاحت من عليك .. وربنا يسر لك كل الأمور المتعسرة .. وهون عليك الأمور الصعاب .

ليه فلان عنده وأنا لأ؟ وليه حياتها أسهل من حياتي؟!
الأسئلة دي بتستنزف روحك... لأنك بتقارن رحلتك برحلة غيرك.
الحقيقة إن ربنا ما جعلش حياة الناس نسخة واحدة؛ لكل واحد:
ـ اختباره.
ـ ورزقه.
ـ وطريقه.
ولذلك قال النبي ﷺ:
💬
«انْظُرُوا إِلَى مَنْ هُوَ أَسْفَلَ مِنْكُمْ، وَلَا تَنْظُرُوا إِلَى مَنْ هُوَ فَوْقَكُمْ، فَهُوَ أَجْدَرُ أَنْ لَا تَزْدَرُوا نِعْمَةَ اللَّهِ عَلَيْكُمْ»
🤍
سيبك من المقارنات اللي بتسرق عمرك، ووجّه طاقتك للي في إيدك.
بدل ما تسأل: "ليه ده حصل وده ما حصلش؟"
اسأل: "إزاي أرضى، وأتوكل، وأسعى؟"
🌿