My core

تخيّل لو وجّهت نفس الطاقة التي تهدرها في الشك بنفسك نحو الإيمان الحقيقي بذاتك وبكل ما أنت قادر على تحقيقه.
تخيّل لو اعتدت أن ترى أفضل الاحتمالات بدل أسوأها :)

مارين بتحبكن و بتتمنالكن عام أخف وأهدى وأحن
🫀
بلشوا من جديد ولا تسمحوا لليأس ينال منكن، اكتشفوا حالكن واكتشفوا قدراتكن ولما بتتعبوا بسيطة....ارتاحوا واسمحوا لكلشي جواتكن يعبر بسلام. بتمنى كلشي عم تركضوا كرمالو تلاقوه بوفرة بهالسنة، بتمنى تقابلوا أشخاص يذكروكن قدي انتو قادرين وقدي انتو بتستاهلوا تكونوا سعيدين ومطمئنين، عيشوا الفرح قد ما كان صغير المهم اللحظة تكون صادقة! المهم قلبكن ينبض وتحسوا فيه... وبتمنى تزهروا بأماكن بتستاهل تشوف زهوركن والربيع اللي بقلبكن، وآخر شي بحب قولو:
كونوا مسالمين وسالمين على طول
🌸

العام اللي مرق غيّرني بطرق ما بتبين واضحة للناس، بس أثّرت بكل شي جواتي. يمكن ما حققت إنجازات كبيرة متل ما الناس بتقيس النجاح،
بس كبرت بهدوء… وتعلّمت.
تعلّمت أقعد مع نفسي من دون هرب،
وكمّل حتى لما يختفي الحماس بأيام ما كنت أقدر إعترف حتى إنها تقيلة، أيام كانت أصعب من إني أحكي عنها.
تعلّمت حط نفسي أولوية أكتر بدون ذنب أو الحاجة لتبرير نفسي،
تعلّمت أتحمّل نفسي بالأيام التقيلة بدون ما أستنى صديق يطبطب عليي أو تأكيد من حدا إني رح عديها وكون بخير.
أخدت خطوات كرمالي،
بوقت كان الأسهل أبقى ساكتة أو أرضي غيري... وأنا فخورة بهالقوة الهادية اللي خلتني أختار نفسي مرة بعد مرة.
بهالسنة، قلت لا لما حسّيت إنو الشي غلط، وبعدت لما كان البقاء يعني أخسر حالي. وتركت وراي نسخة عاشت فيني وأثرّت بروحي...
ابتعدت كتير عن السوشال ميديا، وصار ظهوري محدود حسب وقتي وطاقتي... بمتل هاد الوقت من سنة كنت عم اتلقى رسائل معايدات من صبايا كانوا موجودين هون، يمكن راحوا ويمكن ضلوا وعم يقرأوا كلامي... بدون ما أعرفكن شخصياً بعتلكن حُب وأمنيات لطيفة ورح تضلوا بقلبي انتو وكلامكن.
في كتير مشاعر حملتها معي من 2025:
حزن، امتنان، تعب، أمل
وفي مشاعر لهلق ما بعرف أوصفها،
بس مو كلشي بيحتاج توضيح أوقات الشعور بينحسّ على قد مو حقيقي وما بتقدر تعرّفو.
وداخلة عالسنة الجديدة وأنا واثقة إنو اللي صرتو وبنيتو بحالي شي كتير عظيم ومميّز.
وهالشي… حالياً، كافي.
🤍
🌱
✨

-القراءة الحاليّة لشهر ديسمبر-

فكرة (أنا انثى قوية)، هي أكثر فكرة بتتعبك ك أنثى وبتخليكِ طوال الوقت في مقاومة وتحدي ومتوترة.
لا حبيبتي ريلاكس
💕
🎶
🌸
أنتِ أنثى مليانة عاطفة ومشاعر وحب، أنتِ الجانب الحِسي والروحاني من الحياة، أنتِ الراحة والمتعة، أنتِ جانب الحياة اللطيف المرن،
وهذه هي قوتك.

التشافي لا يعني عدم تذكر ما حدث لك، التشافي هو أن تتذكر ما حدث تماماً ولكنه لم يعد يملك القدرة على التحكم فيك وبردود أفعالك. أن تستطيع أن تروي الحدث دون التأثر والتفاعل مع القصة من جديد.
🕊️