Yevropa sarguzashtlari

#baby_language
Buxanka
Avstriyadan qaytganimizga roppa-rosa 1 yil bo'ldi shu oy. Monstrcha nemischani unutib,
o'zbekchada professional bo'lib ketdi
, deb yurgandik. Tushki uyqudan uyg'ongan monstrcha ertalab bo'ldi deb o'ylab:
- Mommy, tost qilib bering? Nimaga hech Venadagidek tost qilib bermayapsiz?!
- Bo'pti, qilaman. Bor do'kondan buxanka olib kel.
- Buxanka? Nima u?
- Tost qiladigan nonda shu.
Birinchi qavatda turamiz, yonimizdagi xonadon do'kon qilingan. Non-sutga monstrcha chiqib keladi.
- Ma, 5 ming ol. Qanchaligini so'ra, kam bo'lsa, kelib yana pul olib ketasan, ko'p bo'lsa qaytim beradi. Buxanka bo'lmasa hech narsa olma, boshqa do'kondan olib kelamiz, - dedi dadasi.
Do'konga ketgan monstrcha 2 daqiqada quruq qo'l bilan qaytdi:
-
Buxanka yo'q ekan. Rectangle (to'rtburchak) nonni ko'rsatib, "shu buxanka" dedi sotuvchi, lekin u buxankaga o'xshamadi, shunga olmadim.
- Qanaqa rectangle non? Avtobusga o'xshaydimi?
- Ha.
- O'sha buxanka, bor, olib kel.
- Buxankaga o'xshamaydi u! - dedi u va 1 daqiqada buxanka ko'tarib keldi. - Mana!
Tost nonni kesilgan bo'lak ko'rinishiga o'rgangan monstrcha "buxanka" tostning o'zbekcha tarjimasi va sotuvchi boshqa nonni "buxanka" deb aldamoqchi deb o'ylabdi
😆

#mood
Mazza qilib, iforidan rohatlanib qahva ichgim kelyapti.
Lekin Oyposh tug'ilganidan beri bir qultum ham qahva ichmadim. Kola ham ichmayapman. 6 oylikkacha chidab tursam, qo'shimcha ovqat yeya boshlaganda qahva ichmoqchiman. Chunki chaqaloq tanasi kofeinni hazm qilolmaydi va kofein uning tanasida to'planib borib, uyqusiga va ishtahasiga ta'sir qilishi mumkin ekan.
Monstrcha chaqaloqligida ertalab kuniga 1 marta qahva ichardim. Kechasi bilan ko'tartirib, uxlatmay chiqqanidan keyin qahva ichmaslik ilojsiz edi. Hozir esa o'ta xotirjam Oyposhxonim qahva tufayli monstrchadek bo'lib ketishidan qo'rqib ham nafsimni tiyib turibman.
Monstrcha shunchalik "dux"imizni olib qo'ygan
🥲

#monstrcha
Bugun monstrchani bog'chadan olgani borsam, tarbiyachisi faxriy yorliq tayyorlab turgan ekan. Endi har guruhdan 3 bolaga beradigan bo'lishibdi.
A'lo baholari va namunali xulqi uchunmish
🥴
Uyda ko'rsatmaysanmi shu xulqingni?! Har doim aytaman: uyda yaxshi bola bo'l, bog'chada yoki ko'chada bilganingni qilishing mumkin. Bu uyda asl yuzini ko'rsatadi-da, ko'chada mo'min-qobil.
***
Ravon o'qishni o'rgatish va o'zbekchasini yaxshilash uchun har kuni o'zbekcha ertak o'qib berayotgandik. Endi gapirishi ham ertaknamo bo'lib ketdi
😆
- Mommy, shaftolini yeyotganimda qo'limga qarasam, suvi tirsagimga oqib ketayotgan EMISh!
"Ekan" yoki o'tgan zamon qo'shimchasi o'rniga "emish"ni ishlatadi
😆
"Hammasini yeb qo'ygan emishman", "Falonchi aka 100 ta push-up qilgan emish" va hkz. Shu hafta lekin o'rniga "biroq"ni ishlatishni boshladi. Ishqilib bu ketishda bog'cha/maktabdagilar buni tushunmay qolmasa bo'ldi endi.

#life
Vaksinalar qimmat ekan
😭
Geksaksim bitta dozasi 850 ming so'm. Uni 4 marta olish kerak...
Ba'zi vaksinalar xususiy emlash markazlarida ham yo'q ekan. Ya'ni pulga ham ololmaysan. Masalan, meningitga qarshi olinadigan Bexsero hech qayerda yo'q.
Hamma vaksinani monstrchaniki bilan bir xil qilib olmoqchidim..

#baby
Chaqaloqni 1 oylik tekshiruvga olib borganimda, nevropatolog vahima qilib, "miyada gematomalar bor ekan, Penta-1 vaksinaga medotvod yozaman, olmaysizlar" dedi. O'sha payt tortishib o'tirgim kelmadi. Indamay ketdim.
Aslida tug'ruqdan keyin aksariyat bolalarda yengil gipoksiya va miyada mitti gematomachalar bo'ladi. Neysonografiya qilgan yoshi katta vrach ham vahimali narsa emazligini, o'zi so'rilib ketishini aytgandi. Natijalarni Gemini bilan muhokama qilsam, u ham bu narsa emlatmaslikka sabab bo'lmasligini va yana mutaxassis bilan bola rivojlanishi va simptomlari haqida gaplashib ko'rishni aytdi.
Bugun poliklinikaga 2 oylik emlashga chaqirishgandi: Rotavirus, poliomielit va pnevmoga qarshi emlashdi. Pentani o'rniga xususiy emlash markazida geksaksim olamiz, dedim. Hamshira vahimaga solmoqchi bo'ldi: "Geksaksim ham olmay turinglar, sizga bolani sog'ligi kerakmi? Gematoma bo'lsa, mumkinmas".
Bahslashib o'tirmasdan, jimgina xususiy emlatish markaziga borib geksaksim ham olib keldim
😏
Pediatr va nevrolog ko'rdi va emlashdi. Mayda gematomada emlash mumkin bo'lmasa, Komil Ispaniyada hech qaysi vaksinani olmasligi kerak edi.
Bu yerda soppa-sog' bolaga medotvod yozib, hoynahoy, o'zi "ulush" oladigan xususiy klinikaga bir dunyo analiz topshirishga yubormoqchi bo'ladimi-ey. Tuzukroq nevropatolog topishim kerak endi. Poliknikadagi keyingi oyda ham "medotvod"lasa, tuzukrog'iga borib tekshirtirgani borish kerak bo'ladi.

#life
Monstrcha dadasining birga bir kopiyasi edi. Hozir yuzi cho'zilib, ko'zlari kattalashib, bobosiga ham o'xshab ketyapti.
Oyposhshaxonim (ismi Oyposhshamas, suzilishiga Oyposh deyman
😆
) esa menga o'xshaydi. Kserokopiya. Faqat kiprigi kaltaligi va sochi dadasiniki. Kiprik o'stiradigan vositalardan izlashni boshlayveraymi? Effekti bormi?
😁

#mood
Ozarbayjonlik ayolning hazil videosini ko'rib qoldim. "Qaynonamning o'g'li" deb eri yegan-yechgan narsasini joyida tashlab ketaverganini ko'rsatgan: yerda yotgan paypoqlar, stolda qolgan ovqati yeyilgan idishlar va hkz.
"Mening o'g'lim" deb 5-6 yosh o'g'ilchasi kir paypoqni kirga, bo'shagan kosasini idish yuvish mashinasiga solib, o'zining narsalarini yig'ishtirib yurganini ko'rsatibdi.
O'ylab qarasam, bizning uyda mening o'g'lim "qaynanamning o'g'li"dan battar ekan
😆
Qaynonamning o'g'li hech kim yo'q payti ovqat yegan kosasini oshxonaga eltib qo'yadi. Meniki esa, indamasam, hamma xonalarga o'yinchog'-u kiyim-kechagini yoyib chiqadi. Kiyimlarini zo'rg'a urishib-urishib taxlataman:
"Nimaga man taxlashim kerak?! Daddy taxlamaydi-ku".
- Katta bo'lganingda xotiningga ko'p-ko'p pul berib, mehribonchilik qilsang, sani ham kiyimingni xotining taxlab qo'yar, balki.

#life
Monstrcha 5,5 yosh. Ertalab chaqaloq uyg'onib, e'tiborni tortish uchun ozgina "A, ah, aa" deb qo'ysa:
- Mommy, chaqaloq yig'layapti. Olmaysanmi? Yoki bolasiga qaramaydigan ayamisan, a?!
Tuni bilan ota-o'g'il mazza qilib uxlaganda, bolani ko'tarib chiqqan, 1 oydan beri deyarli ko'chaga chiqmagan men:
- Ha, shunaqa ayaman, shekilli..
- Vaaay, ts, ts, ts..

#poliklinikada
Poliklinikadan chiqib, hovlisida o'tirsak, bir bolacha onasi bilan (2-2,5 yosh bo'lsa kerak) qon tahlili topshirib chiqdi. Barmoqchasiga paxta qo'ygan, tinimsiz yig'lab yotibdi. Onasi:
- Bo'ldi, mana qara, qon yo'q. Yarasi ham yo'q, tuzalib ketdi.
-Yooo'
😭
- Yig'lama, qara, chaqaloqcha uxlayapti ekan. Yig'lamasang, morojniy olib beraman.
- Mayojniiii, ettalabtanmi??? Aaaa...
- Ha, ertalabdan morojniy yeymiz!

#life
Ispaniya va O'zbekiston tug'ruqxonasining farqi bormi?
Ha, bittasida shifokorlar faqat ispancha gapirardi
😁
Monstrcha Covid-19 karantini avj olgan paytda Isppaniyada tug'ilgandi. Ikkinchi farzandimiz Toshkentdagi Akusherlik va ginekologiya institutida tug'ildi. Birinchisida tug'ruq payti turmush o'rtog'im yonimda edi, palataga olishgandan keyin ham birga qolgan. Bu safar ham shu imkoniyat borligi uchun yuqoridagi tug'ruqxonani tanladik.
Ammo bu imkoniyat kerak bo'lmadi, chunki tug'ruqxonaga borishimiz bilan birdan tug'ruq zaliga olishdi va epidural anesteziya (og'riq qoldirish uchun) qilishdan ma'no yo'qligini, dori ta'sir qilgunicha bola tug'ilib bo'lishini aytishdi. Epidural bilan hech narsani his qilmay ering bilan gaplashib tug'ish bilan "jonli" tug'ish mutlaqo boshqa-boshqa narsa ekan. O'layotganingni tomosha qilishini xohlamaysan, shekilli: "Выходи! Пусть он выйдет!" - "Ты же хотела чтоб он был рядом?" - "Нет, не хочу!!!"
Ispaniyada ham, Toshkentda ham tug'ruq sharoiti ham, palata ham deyarli bir xil. Toshkentda palatamiz hatto yaxshiroq edi, chunki 1 kishilik oddiyroq palatalar bandligi uchun super lyuks palatani oldik. Oshxona, dush, hojatxona palata ichida ekan. Muzlatgich, mikroto'lqinli pech, konditsioner, TV va hkz bor. Ispaniyada faqat dush va hojatxonada bor edi palatada.
Shifokor va hamshiralar muomalasi, tekshiruv va boshqalar ham a'lo darajada.
Narx borasida Ispaniya qimmatroq, albatta. U yerda faqat tug'ruqxonadagi hisob 3000 yevrodan oshiq chiqqan. Toshkentda esa tug'ruqxona kassasiga 8,5 million so'm, shifokorga "minnatdorchilik" uchun $350 ketdi. Jami $1100 ketgandir.
Epidural anesteziya bilan va anesteziyasiz tug'ruqdan keyin tiklanish farqi haqida keyingi postda yozaman. Balki shu borada bir qarorga kelolmayotgan bo'lsangiz, foydasi tegib qolar.