“Yoshlik” jurnali
#iqtibos
Adabiyot, umuman, haqiqiy san’at – insoniyatning tuzalmas dardi. Va uning mezonlari hech qachon o‘zgarmaydi: oq – qora, yaxshi – yomon, adolat – qabohat, muhabbat – nafrat...
.
Murod Muhammad Do‘st
✅
Telegram
🌐
Instagram
🌐
Veb-sayt
✅
Facebook
#hikoya
Karquloq
Loysupada uyulib turgan eski-tuski poyabzallardan birini usta charm fartugining etagiga soldi-da, mum surtilgan shordozni juvoldizga o‘tkaza boshladi. Supaga soya berib turgan zardoli barglarining shabadada sekingina shitirlashi go‘yoki shivirlab gurung berayotgandek, usta esa boshini egib uni tinglamoqda. Goho pishib yetilgan meva uning diqqatini bo‘lib har-har zamon yerga “tap” etib tushgach, yangi qabrga o‘xshab do‘ppayib qoladi. Supa chetidagi ola-cholpoq soyada mushuk old oyoqlari bilan charm qiytig‘ini turtkilab sichqon bilan o‘ynayotgandek irg‘ishlab umbaloq oshadi.
🔗
batafsil
✅
Telegram
🌐
Instagram
🌐
Veb-sayt
✅
Facebook
#shoir_qalbi
***
Garchi sizday shaharlik qizning
bo‘lsam-da men bugun volasi.
Men tengingiz emasman sizning,
men bir ovloq qishloq bolasi.
Men pildiroq emasman, o, bas,
davrangizda pildirolmayman.
Sizga o‘xshab tusholmayman raqs,
o‘rischa-da chuldirolmayman.
Qo‘shiq aytib o‘rganmaganman
olifta, bez basharalarga.
She’rlar o‘qib xo‘rlanmaganman
qoyalarga, sharsharalarga.
Buloq suvini ichib hovuchda,
o‘z holimdan orlanganim yo‘q.
Adolatga, bilimga, kuchga
ishonib hech xorlanganim yo‘q.
Gitarani suymaydi jinnim,
menga yoqar dutor-u tanbur.
Ko‘m-ko‘k o‘tloq, gilam kabi chim
va bahoriy shabboda hur-hur.
Yulduzlarga boqish ham yoqar,
yoqar bulbul va qaldirg‘ochlar.
Xayolimga munchoqlar taqar
qirqkokillar va chilvirsochlar.
Garchi kuylar shaharlik qizni
yuragimning oshiq nolasi...
Men tengingiz emasman sizning,
men qishloqning soda bolasi...
Sulaymon Rahmon
1972
📱
Telegram
📱
Instagram
📱
Veb-sayt
📱
Facebook
#arxiv
Yangi tashkil etilgan “Yoshlik” jurnali jamoasi.
Chapdan, oʻtirganlar: Erkin Aʼzam, Erkin Vohidov, Abdulla Sher, V. Urusova, Emili Roʻziboyev, Sulaymon Rahmon, Saʼdulla Soyoyev, Gulchehra Joʻrayeva; turganlar: Xayriddin Sultonov, Botirova, Guljahon Mardonova, Nosir Muhammad (1982-yil).
📱
Telegram
📱
Instagram
📱
Veb-sayt
📱
Facebook
#tavallud
Bugun – shoir Bek Alining tavallud topgan kuni!
Buncha tergaysiz meni, sud zalimi bu dunyo,
Bitta shoirdan shuncha qo‘rqadimi bu dunyo.
Qachon, qayda, ne uchun, qay gunohga botganman,
Qaysi buzuq ayolning eshigida yotganman.
Kimni so‘kdim, kim bilan mushtlashganman yarim tun,
Shularning tafsiloti asqatarmi siz uchun.
Nega ko‘zim baqraygan, nafrat kimga nisbatan,
Qadahni sindirgan payt ko‘nglim nima istagan.
Ishga kech borishlardan nima edi muddao,
Hamkasblarim ham bundan bexabarmi mutlaqo,
Karmonimni yo‘qotib, nahot bo‘lmadim o‘sal,
Hayotim chirkin, lekin, nechun she’rlarim go‘zal.
Ota bo‘lib bolamga ko‘rsatdim ne karomat,
Adibman deb, har kuni qilayapman malomat.
To‘rtta she’r yozar-yozmas kibr emishman rosa,
Qancha do‘stdan ayrildim qila olmay murosa.
Tag‘in qilgan emishman yolg‘iz ichishni odat,
Ota-onam besh mahal qilganida ibodat.
Men ham o‘g‘il-qizlarni erta bir kun uylayman,
Nahotki bolalardan qaytishidan qo‘rqmayman.
Bular o‘n yildan ko‘proq cho‘zilgan tergov ishi,
Ega, kesimga to‘la hayotimning ravishi.
Ichimdan xo‘rlik kelar, yig‘i to‘lar bo‘g‘zimga,
Hayot yo‘lim oq-qora ko‘rinadi ko‘zimga.
Do‘stlar, qani adolat, shuncha kam yashadimmi,
Qo‘rqdimmi, hayiqdimmi, o‘zimni ayadimmi.
Shumi xotirangizda muhrlangan suratim,
Ey, sen buncha kamgap bo‘lib tug‘ilgansan ulfatim.
Qavm-u qarindoshlarim – hammangizdan xafaman,
Endi qay yuz bilan men yashadim deb aytaman.
Bunchalar jo‘n, bir tekis umrdan or qilyapman,
Mo‘min-qobil ekanim mana endi bilyapman.
Yodingizdan chiqibdi chunon sarguzashtlarim,
Og‘zim qurib, suv izlab sarson bo‘lgan dashtlarim.
Tog‘-u toshlar qo‘ynida ko‘rsatgan hunarlarim
Haqidagi kulgili hikoyangiz kutardim.
Tortinib turibsizmi, bormaydimi tilingiz
Yoki jinoyatimda bor edimi qo‘lingiz.
Aytgancha, bu og‘ziga talqon solgan Sharq axir,
Ayollari mazlum-u erkaklari toshbag‘ir.
Bu tergovni kuzatib, ichim to‘lar hasratga,
“Boburnoma”shu uchun kerak bo‘lgan hazratga.
Eshikka bo‘ldim mahtal, shuncha kammi tanishim,
Axir eshik sanashda ado bo‘lgan kalishim.
Bir guvohni kutyapman, qani, nechun kelmaydi,
Menimcha, unga endi eri ruxsat bermaydi.
Buncha tergaysiz meni, buncha qonim ichasiz,
Bir qoshiq qolganida kechirasiz, kechasiz.
Bas, yetar, jallod chorlang, hukm qiling, tiklang dor,
Menda oliy jazoga arziydigan hayot bor!
Mozorimni tepkilang, jasadimni qiling xor,
Menda oliy nafratga arziydigan sabab bor!
Kitoblarimni yoqing, o‘chiring xitobimni,
Xudo bilsa bo‘ldida chekkan iztirobimni.
Siz yolg‘on so‘zlagaysiz, siz ochiq aytmagaysiz,
Siz hukm qilmagaysiz, siz faqat tergagaysiz.
Har kuni o‘tmas pichoq bilan so‘ygaysiz meni,
Bilmadim, qachon butkul so‘yib bo‘lgaysiz meni.
📱
Telegram
📱
Instagram
📱
Veb-sayt
📱
Facebook
#iqtibos
Fikr hamma narsaning ibtidosi! Bas, mukammallikka intilish ham, muvaffaqiyatga intilish ham avvalo fikrlar ustida ishlashdan boshlanishi kerak.
Konfutsiy
📱
Telegram
📱
Instagram
📱
Veb-sayt
📱
Facebook
#olis_yaqin_ovozlar
PALAXMON
Palaxmon ham qoldi yanglishib
Oʻzga uyga otdi bir qizni.
Yangalari yor-yor aytishib
Yigʻlatdilar yuzi hur qizni.
Na koʻnglini soʻradi birov,
Na-da, artdi taqdir yoshini.
Devorlarga urar beayov
Zar doʻppisi qoʻngan boshini.
Hasratlarin soʻzlaydi tunga,
Qismat bilan kurashib oʻtar.
Hech roʻmolcha tutishmas unga
U roʻmolcha ulashib oʻtar.
Sandigʻiga solinmagan baxt.
Sarposiga quvonch qoʻshmagan.
Shoʻrlik qizning avvali hech vaqt
Kulguchidan kulgu tushmagan.
Endi yiģlar chiqmay ovozi,
Dil ohlari koʻkka yetarkan.
Qiz bolani toshga qiyosi –
Toshdek soʻzsiz qolib ketarkan.
Qismatiga yozilgani shu.
Tirnar qalbning nozik yerini.
Shu palaxmon sabab boʻldi u –
Sevganining qoʻshni kelini.
Durdona Bahodirova
📱
Telegram
📱
Instagram
📱
Veb-sayt
📱
Facebook
#gurung
Adabiyotga kirib boriladi…mi?
Bugun she’rning zo‘rligini adabiyotshunos emas, xonandalar belgilayapti! Rost gap. Tuppa-tuzuk shoirlarning she’riyatiga bag‘ishlangan maqolalarni ham bi-ir o‘qib ko‘ring! “So‘nggi yillarda bu shoirning o‘nlab she’rlari qo‘shiq bo‘ldi”, deya e’tirof etiladi. Yozgan she’ringizning qo‘shiq bo‘lishi alohida fazilat sanaladigan bo‘lib qoldi. Xonanda e’tirof qildimi, demak, she’ringiz zo‘r! Yozavering, “kuchliroq sev”avering!
Xo‘sh, bu “xashak”larga nima deysiz? Yana shamollarni kutamizmi? Ungacha o‘zimiz “shamollab” qolsak-chi…
🔗
batafsil
📱
Telegram
📱
Instagram
📱
Veb-sayt
📱
Facebook
#shoir_qalbi
Talabalik kunlari
Bir kun kulib qildilar imo,
Kursdosh qizlar – husnobod qizlar:
“Bu kunlarni sheʼr qiling, Mirzo,
Qoʻshiq qilib aytaylik bizlar”.
U kunlarda... Huv yiroqlardan,
Yashil-zangor nafas kelardi.
Sadalarning butoqlaridan,
Inqilobiy bir sas kelardi.
Savr edi, havo – namzada,
Kulgi istab turmas edik tinch.
Tinmas edi tunlar “Hamza”da,
Kelinlarning qoʻzgʻoloni hech.
Soqollarni qirgancha chala,
Kunduz shoshib, andak ogʻrinib,
Tinglar edik, topib hafsala,
Dotsentlarning saboqlarini.
Yotoqxona orti – bozorcha,
Qop-qop mayiz, olmayu yongʻoq...
Vaqti kelar bizga... Hozircha,
“Piyoz bering, xolajon, bir bog”.
U kunlarda... Qobullik tolib
Qodir bir kun keldi yotoqqa,
Vatanida inqilob boʻlib,
Afgʻon eli qalqmish yoqqa.
U kulardi... Qarardim hayron,
Koʻzidagi yiltiroq yoshga:
Quvonch desam, yigʻiga oʻxshar,
Yigʻi desam, oʻxshar quvonchga...
Soʻng sheʼr oʻqib hayqirdik chunon,
Bedardlarga boʻlsak ham kulgi.
Senda hamma – shoir, onajon,
Oʻzbekiston, sheʼriyat mulki!
Gʻishtin bino – bagʻriga bosgan,
Barcha aybu gunohlarimni.
Turib-turib koʻnglim qoʻmsaydi,
Talabalik yotoqlarini.
Mana, adl sadalar... Javzo...
Yaproqlarda titraydi soʻzlar:
“Bu kunlarni she’r qiling, Mirzo,
Qoʻshiq qilib aytaylik bizlar”.
U kunlarda, daydib, guvranib,
Qayda eding, majnun ovozim?!
Oʻshal uchqur-uchqur kunlarning,
Shiddatida qoldi qasosim!
U kunlardan kamyob omadim,
Koʻz ostida qoldirdi izlar.
U kunlarni she’r qilolmadim,
Qoʻshiq qilib aytmadi qizlar...
Mirzo Kenjabek
📱
Telegram
📱
Instagram
📱
Veb-sayt
📱
Facebook
#iqtibos
Kishi boshiga tushgan har qanday ish uning tili tufayli sodir bo‘ladi, bu til sababli ayrimlar yaxshilik, ayrimlar yomonlik ko‘radi.
Ahmad YUGNAKIY
📱
Telegram
📱
Instagram
📱
Veb-sayt
📱
Facebook