Yurist Imomniyozov

"Siz qayta tayyorlovdan o'tgansiz, shuning uchun mutaxassislardan keyin dars olasiz..."
Agar sizga ham shunday deyishgan bo'lsa, yangi o'zgarishlarni albatta bilishingiz kerak.
✅
2026-yil 1-avgustdan boshlab kuchga kirgan yangi norma qayta tayyorlov diplomi bo'yicha ishlayotgan o'qituvchilarning dars soatlarini taqsimlashdagi huquqiy maqomiga aniqlik kiritdi.
Endi qayta tayyorlov diplomi bo'lgan o'qituvchilar qaysi hollarda mutaxassislar bilan
teng ustuvorlikka ega bo'lishi
qonun bilan belgilandi.
Maqolada ushbu o'zgarishni oddiy misollar orqali tushuntiramiz.

🏢
Quruvchi noqonuniy qavat qurgan bo‘lsa, shartnomani bekor qilib pulni qaytarib olsa bo‘ladimi?
Bu savol so‘nggi paytlarda juda ko‘p berilmoqda.
Tasavvur qiling, siz yangi qurilayotgan uydan xonadon sotib oldingiz. Bir necha oy davomida to‘lovlarni ham qilib boryapsiz. Keyin esa ma'lum bo‘ldiki, binoda
noqonuniy qavatlar qurilgan
, davlat tekshiruv boshlagan va qurilish ishlari to‘xtatilgan.
Shunday vaziyatda tabiiy savol tug‘iladi:
"Endi men shartnomani bekor qilib, to‘lagan pullarimni qaytarib olsam bo‘ladimi?"
Avvalo bitta narsani tushunib olish kerak.
Har qanday muammo shartnomani bekor qilish uchun asos bo‘lavermaydi.
Masalan, qurilish bir necha kun kechiksa yoki mayda kamchiliklar aniqlansa, bu darrov shartnomani bekor qilish degani emas.
Lekin ayrim holatlar borki, qonun ularni
shartnomaning jiddiy buzilishi
deb baholaydi.
"Jiddiy buzilish" degani nima?
Oddiy qilib aytganda, siz shartnoma tuzayotganda nimani sotib olayotgan bo‘lsangiz, oxir-oqibat shundan mahrum bo‘lsangiz, bu jiddiy buzilish hisoblanadi.
Siz pul to‘layotganda qonuniy qurilayotgan, barcha ruxsatnomalari joyida bo‘lgan, foydalanishga topshiriladigan keyinchalik kadastr hujjati olinadigan xonadonni sotib olyapman, deb o‘ylagansiz.
Ammo keyinchalik davlat organlari:
❌
binoda noqonuniy qavatlar borligini;
❌
loyiha tasdiqlangan hujjatlardan chetga chiqqanini;
❌
qurilish to‘xtatilganini aniqlasa, siz shartnoma tuzishda kutgan eng asosiy natija xavf ostida qoladi.
Shuning uchun Fuqarolik kodeksining
382-moddasi
bunday holatda shartnomani bekor qilish imkoniyatini beradi.
Yana bir muhim asos bor.
Ba'zan muammo quruvchining aybi bilan emas, balki keyinchalik yuzaga kelgan vaziyat sabab ham kelib chiqishi mumkin.
Masalan:
🔹
bino suv ostida qolishi;
🔹
davlat tomonidan qurilish to‘xtatilishi;
🔹
loyiha bo‘yicha jiddiy tekshiruv boshlanishi;
🔹
obyektning foydalanishga topshirilishi noma'lum muddatga cho‘zilishi.
Bunday holatlar Fuqarolik kodeksining
383-moddasida "vaziyatning jiddiy o‘zgarishi"
deb ataladi. Bunday holatda, agar taraflar bunday vaziyatni oldindan bilganida, ehtimol bu shartnomani umuman tuzmagan yoki boshqa shartlarda tuzgan bo‘lardi.
Darrov pulni talab qilish mumkinmi?
Bunga ham javob —
yo‘q
. Ko‘pchilik shu yerda xato qiladi.
"O‘zim pul to‘lamay qo‘yaman", "shartnoma bekor bo‘ldi", deb o‘ylash noto‘g‘ri.
Fuqarolik kodeksining
384-moddasi
buning tartibini belgilaydi. Avval quruvchiga yozma ravishda murojaat qilinadi. Unda:
➖
shartnomani bekor qilish;
➖
to‘langan pullarni qaytarish;
➖
bunga sabab bo‘lgan holatlar ko‘rsatiladi.
Agar quruvchi bunga rozi bo‘lmasa yoki 30 kun ichida javob bermasa, shundan keyingina sudga murojaat qilish mumkin.
Agar vakolatli davlat organlari binoda noqonuniy qavatlar qurilganini, loyiha hujjatlaridan chetga chiqilganini yoki obyektni qonuniy ravishda foydalanishga topshirish imkoni yo‘qligini tasdiqlasa, xaridor shartnomani bekor qilish va to‘lagan pullarini qaytarishni talab qilish uchun huquqiy asosga ega bo‘lishi mumkin.
Eng muhimi
, bunday vaziyatda qonunda belgilangan tartibda harakat qilish kerak. Avval yozma talabnoma yuboriladi, natija bo‘lmasa esa sud orqali huquqlar himoya qilinadi.
📲
Telegram
|
Instagram
|
Veb-sayt

Tavsiyanoma olgan maktab maslahatchilari nega ishga kirolmayapti? Qanday yechim bor?
Xabaringiz bor, 6-18-iyul kunlari maktab maslahatchisi lavozimi uchun tanlovning ikkinchi mavsumi — suhbat bosqichi o‘tkazilib, 7 695 ta maktablardagi vakant maslahatchi lavozimi uchun nomzodlar saralab olingandi.
Ammo, maktab maslahatchisi lavozimi uchun o‘tkazilgan tanlov jarayonlari pedagog va rahbar xodimlarning mehnat ta’tili vaqtiga to‘g‘ri kelib qolgani uchun ayrim nomzodlarni ishga qabul qilib bo'lmayapti.
Bundan xavotirga tushgan nomzodlardan kelayotgan murojaatlar soni esa ortib bormoqda.
Xalqtaliminfo.uz
masalaga oydinlik kiritish maqsadida Respublika "Kelajak" markazi hamda huquqshunoslar bilan suhbatlashdi.
Xo’sh, bunday vaziyatda nomzodlarning tavsiyanomasi “kuyib” ketadimi? Huquqshunoslar qanday yechim bermoqda?
Batafsil
—
https://xalqtaliminfo.uz/post/1673
Telegramda o'qish
Ta'limga oid eng so‘nggi yangiliklarni
@xalqtaliminfo
'da kuzatib boring.
Telegram
l
Instagram
l
YouTube

Maktab direktori mehnat ta'tilida bo‘lsa, maktab maslahatchisining tavsiyanomasi bekor bo‘ladimi?
So‘nggi kunlarda maktab maslahatchisi lavozimiga suhbatdan muvaffaqiyatli o‘tgan nomzodlardan ko‘plab murojaatlar kelmoqda. Ayrim hududlarda ularga:
"3 kun ichida maktab direktoriga borib buyruq chiqartiring",
deyilayotgani aytilmoqda.
Xo‘sh, bu qanchalik to‘g‘ri?
Avvalo, maktab direktorlari ham mehnat qonunchiligiga bo‘ysunadi.
Mehnat kodeksining
201-moddasiga
ko‘ra,
dam olish vaqti
xodim mehnat majburiyatlarini bajarishdan ozod bo‘lgan va o‘z ixtiyoriga ko‘ra foydalanishi mumkin bo‘lgan vaqtdir.
Mazkur moddaga muvofiq, har yilgi asosiy va qo‘shimcha mehnat ta'tillari ham dam olish vaqtining turlaridan biri hisoblanadi.
Mehnat kodeksining
216-moddasi
esa har yilgi mehnat ta'tili tushunchasini belgilaydi.
Unga ko‘ra, har yilgi mehnat ta'tili xodimga dam olishi va ishlash qobiliyatini tiklashi uchun
ish o‘rni (lavozimi) hamda o‘rtacha ish haqi saqlangan holda ishdan ozod etiladigan vaqt
hisoblanadi.
Bundan tashqari, Mehnat kodeksining
227-moddasi
hamda Vazirlar Mahkamasining
263-son qaroriga
muvofiq, ta'lim tashkilotlari pedagog xodimlariga, jumladan maktab direktorlariga
56 kalendar kun
davom etadigan har yilgi mehnat ta'tili beriladi.
Bu shuni anglatadiki, direktor mehnat ta'tilida bo‘lgan davrda u o‘z xizmat vazifalarini bajarishga majbur emas.
Endi maktab maslahatchisi lavozimiga oid tartibga e'tibor qaratamiz.
Maktabgacha va maktab ta'limi vazirining
2026-yil 8-yanvardagi 7-son buyrug‘i
ga ko‘ra, suhbatdan muvaffaqiyatli o‘tgan nomzodga tanlov komissiyasi tavsiyanoma beradi.
Ushbu tavsiyanoma 3 yil davomida amal qiladi.
Buyruqda tavsiyanoma olingan nomzod 3 kun ichida ishga kirishi shart, degan norma mavjud emas.
Aksincha, tavsiyanomaning uch yil amal qilishi nomzodning huquqi ma'lum muddat davomida saqlanishini anglatadi. Shunday ekan, agar maktab direktori yoki boshqa vakolatli mansabdor shaxs mehnat ta'tilida bo‘lsa va shu sababli mehnat shartnomasini rasmiylashtirish kechiksa, bu holat nomzodning aybi hisoblanmaydi.
Direktor mehnat ta'tilidan qaytgach, mehnat shartnomasi belgilangan tartibda rasmiylashtirilishi mumkin.
Maktab maslahatchisi lavozimiga tanlovda muvaffaqiyatli ishtirok etgan nomzodlar
"3 kun ichida buyruq chiqmasa tavsiyanomam kuyib ketadi",
degan xavotirga tushmasliklari kerak.
Amaldagi tartibga ko‘ra, tanlov komissiyasi tomonidan berilgan
tavsiyanoma 3 yil davomida
amal qiladi. Mehnat ta'tilida bo‘lgan direktor esa qonunga muvofiq o‘z xizmat vazifalarini bajarishdan ozod etilgan bo‘ladi. Shu sababli, direktorning mehnat ta'tilida ekanligi tavsiyanomaning o‘z kuchini yo‘qotishiga asos bo‘la olmaydi.
📲
Telegram
|
Instagram
|
Veb-sayt

Maktab maslahatchisi tanlovi g‘olibi ishga kirmasa, zaxiradagi nomzod ishga qabul qilinadimi?
Bu savol maktab maslahatchisi lavozimiga tanlovlarda eng ko‘p berilayotgan savollardan biri.
Tasavvur qiling:
Siz tanlovda qatnashdingiz, yaxshi natija ko‘rsatdingiz, ammo asosiy g‘olib bo‘la olmadingiz. Shunga qaramay,
zaxira ro‘yxatida 1-o‘rinni egalladingiz.
Oradan biroz vaqt o‘tib, asosiy g‘olib ishga kelmadi yoki mehnat shartnomasini imzolamadi.
Shunda savol tug‘iladi:
"Endi meni ishga olishlari shartmi?"
Javob - ha, agar siz aynan shu maktab bo‘yicha zaxirada 1-o‘rinda turgan bo‘lsangiz.
Maktabgacha va maktab ta’limi vazirining 2026-yil 8-yanvardagi 7-son buyrug‘i
bilan tasdiqlangan tartibga ko‘ra, tanlov g‘olibi belgilangan muddatda mehnat shartnomasini tuzmasa yoki ishga kirishdan bosh tortsa, vakant lavozim navbatdagi munosib nomzodga taklif etiladi.
Bu degani, tanlov qaytadan o‘tkazilmaydi va boshqa maktabdagi zaxira ro‘yxatiga ham murojaat qilinmaydi.
Ko‘pchilik
"zaxirada turibman, qaysi maktabda bo‘sh o‘rin chiqsa, meni chaqirishadi"
, deb o‘ylaydi. Aslida esa bunday emas.
Zaxira ro‘yxati har bir maktab bo‘yicha alohida shakllantiriladi.
Shuning uchun bir maktabdagi zaxira boshqa maktabdagi vakant o‘ringa avtomatik o‘tmaydi.
Misol uchun:
Faraz qilaylik, 45-maktabdagi maslahatchi lavozimi uchun tanlov bo‘ldi.
·        1-o‘rin — Asadbek;
·        2-o‘rin (zaxira №1) — Siz.
Agar Asadbek belgilangan muddatda ishga chiqmasa yoki mehnat shartnomasini imzolamasa,
navbat aynan sizga keladi.
Lekin 46-maktabdagi bo‘sh o‘rin uchun sizning 45-maktabdagi zaxira maqomingiz amal qilmaydi.
Agar siz
aynan shu maktab bo‘yicha zaxirada 1-o‘rinni egallagan bo‘lsangiz
, asosiy g‘olib ishga qabul qilinmagan taqdirda, vakant lavozim sizga taklif etilishi lozim.
📲
Telegram
|
Instagram
|
Veb-sayt

ChQBT rahbari "mutaxassisligi mos emas" degan asos bilan ishdan bo‘shatilishi mumkinmi?
Masalan, bir fuqaro 2019-yildan buyon maktabda Chaqiruvga qadar boshlang‘ich tayyorgarlik (ChQBT) rahbari bo‘lib ishlab kelgan. Endilikda esa unga:
"mutaxassisligingiz mos emas, shu sababli mehnat shartnomangiz bekor qilinadi"
,
deyishmoqda.
Ishga qabul qilingan xodimni yillar o‘tib shu asos bilan ishdan bo‘shatish mumkinmi?
Avvalo, ChQBT rahbari lavozimiga kimlar tayinlanishi mumkinligini ko‘rib chiqamiz.
Amaldagi tartibga ko‘ra, bu lavozimga:
·        "Chaqiriqqacha harbiy ta'lim" yo‘nalishini tamomlagan shaxslar;
·        yoki Qurolli Kuchlar rezervidagi oliy ma'lumotga ega bo‘lgan ayrim harbiy xizmatchilar tayinlanadi.
Agar xodim ushbu malaka talablariga javob bermasa, ish beruvchi
Mehnat kodeksining 161-moddasi ikkinchi qismi 3-bandiga
asosan mehnat shartnomasini bekor qilishi mumkin.
Lekin bu degani, xodimni istalgan vaqtda va istalgan tartibda ishdan bo‘shatish mumkin, degani emas. Qonun bunday holatda ham xodimning huquqlarini himoya qiladi.
Birinchidan,
ish beruvchi mehnat shartnomasini bekor qilish niyati haqida xodimni
kamida ikki hafta oldin yozma ravishda ogohlantirishi
shart.
Ikkinchidan,
ishdan bo‘shatilayotgan kunda xodim bilan
to‘liq hisob-kitob qilinishi
kerak. Ya'ni unga ishlagan davri uchun ish haqi, foydalanilmagan mehnat ta'tili uchun kompensatsiya hamda qonunchilikda nazarda tutilgan boshqa to‘lovlar berilishi lozim.
Uchinchidan,
agar mehnat shartnomasi ish beruvchining tashabbusi bilan bekor qilinayotgan bo‘lsa, xodimga
ishdan bo‘shatish nafaqasi
ham to‘lanadi.
Masalan, xodimning aynan shu ish beruvchidagi mehnat staji 15 yildan ortiq bo‘lsa, unga
kamida ikki oylik o‘rtacha ish haqi miqdorida
ishdan bo‘shatish nafaqasi to‘lanishi kerak.
Bundan tashqari, qonunchilik yana bir muhim kafolatni belgilaydi.
Agar xodim malakasi yetarli emasligi sababli ishdan bo‘shatilgan bo‘lsa, unga ish qidirish davrida
o‘rtacha oylik ish haqi ikki oygacha saqlab qolinadi
.
Agar u ishdan bo‘shatilganidan keyin 30 kun ichida bandlik organida ish qidiruvchi sifatida ro‘yxatdan o‘tsa va shu muddat ichida ish topa olmasa, tegishli ma'lumotnoma asosida
uchinchi oy uchun ham o‘rtacha ish haqini olish huquqiga ega bo‘ladi.
Agar ChQBT rahbari lavozimida ishlayotgan shaxs amaldagi malaka talablariga javob bermasa, mehnat shartnomasi bekor qilinishi mumkin. Biroq bunda qonunda belgilangan barcha protsessual talablar: oldindan ogohlantirish, to‘liq hisob-kitob, ishdan bo‘shatish nafaqasi va ish qidirish davridagi kafolatlar to‘liq ta'minlanishi shart.
📲
Telegram
|
Instagram
|
Veb-sayt

Ishdan bo‘shasa, aliment to‘lash to‘xtaydimi?
Oila kodeksiga ko‘ra,
ishdan bo‘shash aliment to‘lash majburiyatini bekor qilmaydi.
Agar aliment to‘lovchi ishlayotgan bo‘lsa, ish beruvchi uning ish haqi yoki boshqa daromadidan alimentni ushlab qoladi va uni 3 kun ichida aliment oluvchiga o‘tkazadi.
Agar aliment to‘lovchi ishdan bo‘shasa-chi?
Oila kodeksiga muvofiq:
✅
ish beruvchi 3 kun ichida mehnat shartnomasi bekor qilinganligi haqida davlat ijrochisi va aliment oluvchini xabardor qilishi shart;
✅
aliment to‘lovchining o‘zi ham yangi ish joyi, yashash joyi yoki boshqa daromadi haqida davlat ijrochisi va aliment oluvchini xabardor qilishi lozim.
Ishsiz davr uchun aliment qanday hisoblanadi?
Agar aliment to‘lovchi ishlamasa yoki daromadini tasdiqlovchi hujjatlarni taqdim etmasa, aliment qarzi
O‘zbekiston Respublikasidagi o‘rtacha oylik ish haqi
asosida hisoblanadi.
Hozirgi kunda MIB aliment kalkulyatorida qo‘llanilayotgan o‘rtacha oylik ish haqi
7 437 251 so‘mni
tashkil etadi.
Shunga ko‘ra, ishlamaydigan shaxs uchun aliment miqdori quyidagicha hisoblanadi:
1 nafar bola uchun
–
1 859 312,75 so‘m
(ish haqining 1/4 qismi);
2 nafar bola uchun
–
2 479 083,67 so‘m
(ish haqining 1/3 qismi);
3 nafar va undan ortiq bolalar uchun
–
3 718 625,50 so‘m
(ish haqining 1/2 qismi).
"Ish topgunimcha kutib turing", degan gap aliment hisoblanishini to‘xtatmaydi. Ishsiz o‘tgan har bir oy uchun aliment qarzi yig‘ilib boradi.
Agar aliment to‘lovchi keyinchalik ishga joylashsa, davlat ijrochisi yangi ish joyiga ijro hujjatini yuboradi va aliment yana ish haqidan ushlab qolinadi.
Ishsizlik alimentdan ozod qilmaydi. Aksincha, ishlamagan davr uchun ham aliment qarzi qonunda belgilangan tartibda hisoblanadi va keyinchalik undiriladi.
📲
Telegram
|
Instagram
|
Veb-sayt

Rotatsiya xodimni roziligisiz boshqa lavozimga o'tkazish uchun asos bo'ladimi?
Amaliyotda ayrim tashkilotlarda "rotatsiya" degan vaj bilan xodimni boshqa lavozimga o'tkazish holatlari uchrab turadi. Biroq rotatsiya xodimni istalgan lavozimga o'tkazish uchun mustaqil huquqiy asos emas. Bunday masala Mehnat kodeksi normalari asosida hal etiladi.
Mehnat qonunchiligiga ko'ra, xodimni boshqa ishga o'tkazish ikki xil tartibda amalga oshirilishi mumkin.
Birinchi holatda, xodimning roziligisiz mehnat shartlari o'zgartiriladi. Mehnat kodeksining 137-moddasiga muvofiq,
texnologiyadagi o'zgarishlar, ishlab chiqarish va mehnatni tashkil etishdagi o'zgarishlar yoki ish (mahsulot, xizmat) hajmining qisqarishi sababli avvalgi mehnat shartlarini saqlab qolishning imkoni bo'lmasa, ish beruvchi xodimning roziligisiz mehnat shartlarini o'zgartirishga haqli.
Shu o'rinda e'tibor qaratish lozimki, ish beruvchi bu moddani qo'llashi uchun yuqorida nazarda tutilgan holatlar haqiqatda mavjud bo'lishi kerak. Faqatgina "rotatsiya o'tkazilyapti" degan sababning o'zi xodimni roziligisiz boshqa lavozimga o'tkazish uchun yetarli asos hisoblanmaydi.
Ikkinchi holatda esa xodim boshqa ishga o'z roziligi bilan o'tkaziladi. Mehnat kodeksining 140-moddasiga ko'ra,
xodimni boshqa ishga doimiy o'tkazishga faqat uning roziligi bilan yo'l qo'yiladi.
Demak, agar 137-moddada nazarda tutilgan asoslar mavjud bo'lmasa, doimiy boshqa lavozimga o'tkazish faqat xodimning yozma roziligi asosida amalga oshirilishi mumkin.
Shunday qilib, rotatsiya mehnat qonunchiligida alohida huquqiy asos sifatida belgilanmagan. U faqat Mehnat kodeksida nazarda tutilgan tartib va shartlarga rioya qilingan holda amalga oshirilishi mumkin.
Agar ish beruvchi xodimni uning roziligisiz boshqa lavozimga o'tkazayotgan bo'lsa, buning uchun Mehnat kodeksining 137-moddasida nazarda tutilgan asoslar mavjud bo'lishi shart. Ushbu asoslar bo'lmasa, doimiy boshqa ishga o'tkazish faqat xodimning roziligi bilan amalga oshiriladi. Aks holda, bunday qaror qonunga zid hisoblanadi va xodim o'z huquqlarini himoya qilish uchun vakolatli organlarga yoki sudga murojaat qilishga haqli.
📲
Telegram
|
Instagram
|
Veb-sayt

Yer uchastkasi ijara shartnomasida summa ko'rsatilmagan bo'lsa, ijara haqini to'lamaslik mumkinmi?
«Ijara shartnomasida ijara haqi yozilmagan. Shunday ekan, mendan ushbu summani talab qilish noqonuniy»
Birinchi qarashda bu fikr mantiqli ko'rinishi mumkin. Ammo Fuqarolik kodeksi va Soliq kodeksi normalari birgalikda tahlil qilinganda, masalaga boshqacha yondashuv kelib chiqadi.
Avvalo, Fuqarolik kodeksining 544-moddasiga e'tibor qaratamiz. Mazkur moddaning birinchi qismida
ijaraga oluvchi mol-mulkdan foydalanganlik uchun haqni o'z vaqtida to'lab turishi shartligi
belgilangan.
Demak, ijara shartnomasi tuzilgan ekan, ijara haqini to'lash majburiyati ham vujudga keladi.
Endi savol tug'iladi. Ijara haqi albatta aniq pul summasida yozilishi shartmi?
Fuqarolik kodeksining 544-moddasida
ijara haqi faqat qat'iy summa tarzida emas, balki turli shakllarda belgilanishi
mumkinligi ko'rsatilgan. Bundan tashqari, modda oxirida
taraflar haq to'lashning boshqa shakllarini ham nazarda tutishlari mumkinligi
belgilangan.
Demak, qonun taraflardan ijara haqini faqat "n so'm" ko'rinishida belgilashni talab qilmaydi. Muhimi, ijara haqini aniqlash usuli shartnomada belgilangan bo'lishidir.
Soliq kodeksining 424-moddasiga ko'ra,
davlat organlari bilan tuzilgan va davlat ro'yxatidan o'tkazilgan yer uchastkasi ijara shartnomasi bo'yicha to'lanadigan ijara to'lovi yer solig'iga
tenglashtiriladi. Shuningdek, bunday ijarachilarga yer solig'i bo'yicha belgilangan stavkalar, hisoblash va to'lash tartibi tatbiq etilishi belgilangan.
Agar shartnomada:
"ijara haqi yer solig'i miqdoridan kelib chiqib belgilanadi"
deb yozilgan bo'lsa, demak taraflar ijara haqining hisoblash usulini kelishib olgan.
Bunday vaziyatda ijara haqining miqdori endi Fuqarolik kodeksi emas, Soliq kodeksida belgilangan yer solig'ini hisoblash qoidalari asosida aniqlanadi.
Shu sababli shartnomada n so'm deb yozilmaganining o'zi ijara haqi mavjud emasligini anglatmaydi. Aksincha, summa Soliq kodeksida belgilangan stavkalar asosida hisoblab chiqiladi.
Agar vakolatli organ shartnomada belgilangan hisoblash tartibidan chetga chiqib, Soliq kodeksiga zid ravishda ijara haqini hisoblagan bo'lsa, ijarachi bunga e'tiroz bildirishi mumkin.
Lekin e'tirozning mazmuni:
"shartnomada summa yozilmagan, shuning uchun umuman to'lamayman"
emas,
"hisob-kitob shartnoma va Soliq kodeksi talablariga muvofiq amalga oshirilmagan"
bo'lishi kerak.
Chunki Fuqarolik kodeksi ijara haqini to'lash majburiyatini belgilaydi, Soliq kodeksi esa yer uchastkasi ijarasida ushbu haq qanday hisoblanishini aniqlaydi. Shu sababli bu ikki normani birgalikda qo'llash zarur.
Xulosa qilib aytganda, agar ijara shartnomasida ijara haqi yer solig'i miqdoriga bog'langan bo'lsa, shartnomada aniq pul summasining ko'rsatilmaganligi ijarachini to'lov majburiyatidan ozod qilmaydi. Bunday holatda vakolatli organning talabi, qoida tariqasida, ijara haqini undirishga emas, balki Soliq kodeksida belgilangan tartibda hisoblangan yer uchun ijara to'lovini undirishga qaratilgan bo'ladi. Nizo esa to'lovning mavjudligi ustida emas, hisob-kitobning to'g'riligi ustida bo'lishi mumkin.
📲
Telegram
|
Instagram
|
Veb-sayt

Attestatsiyada "mutaxassis" lavozimini saqlagan pedagog kasbiy sertifikat topshirishi shartmi?
So'nggi paytlarda pedagoglardan quyidagi mazmundagi savollar tez-tez kelmoqda:
"Attestatsiyada mutaxassis lavozimim saqlangan. Lekin maktab rahbari kasbiy sertifikat olmasangiz, mehnat shartnomangiz bekor qilinadi, deyapti. Bu qanchalik qonuniy?"
Bu savolga javob berish uchun VMning 2024-yil 12-fevraldagi 87-son qarorini tahlil qilish kerak.
Reglamentning 9-bandiga ko'ra,
pedagoglar attestatsiyasida ishtirok etib, kamida "mutaxassis (oliy ma'lumotli o'qituvchi)" lavozimi saqlangan darajada natija ko'rsatgan pedagoglar kasbiy sertifikatlashga jalb etilmaydi.
Bu norma nimani anglatadi?
Misol uchun, pedagog qayta tayyorlash kursini tamomlagan va maktabda o'qituvchi sifatida ishlamoqda. Keyinchalik u attestatsiyada ishtirok etib, masalan, 58 ball oladi va "mutaxassis" lavozimi saqlanadi.
Shu holatda reglamentning 9-bandi ushbu pedagogni
kasbiy sertifikatlashdan ozod qiladi.
Demak, bunday pedagogni "albatta kasbiy sertifikat topshirishingiz shart" deb majburiy sertifikatlashga jalb qilish masalasi, avvalo, aynan 9-band nuqtayi nazaridan baholanishi kerak.
📲
Telegram
|
Instagram
|
Veb-sayt