Мастура Хожи Она Шеърлари

ЧОЛЛАРНИНГ ДИЛ ИЗҲОРИ.
Ҳар кун тонгда уйғонгач чеҳрангга бир қарайман.
“Аҳволинг яхшими?”- деб ҳолу аҳвол сўрайман.
“Қон босиминг ошдими, тузукми қўл оёғинг?”
“Белинг яхшими, кампир, бедардми ҳамма ёғинг?
Анча қариб қолибсан, қадам босишинг мушкул.
Лекин илтимос, кампир, хизматимга яраб тур!
Илгаригидек илдам ўрнингдан туролмайсан.
Шаҳдам, дадил қадамлар ташлаб ҳам юролмайсан.
Битта қўлинг белингда, оқсоқланиб қолибсан.
Биламан, меҳнат, юмуш кўп қилгансан, толибсан.
Касал бўлма жон хотин, сен борсанки мен тирик.
Сенсиз куним ўтмайди, ҳар дам менга сен шерик.
Дориларим берасан меъёрида, вақтида.
Тунда хабар оласан уйқинг бузиб гоҳида.
Қарашим эмас, балки фикрим уқиб оласан.
Нима керак эканин дарров билиб оласан.
Бир нимага қўл урсам сенсиз битмайди ишим.
Ёнимда мадор бўлиб шартдир сенинг туришинг.
Бир қўлингда андава, бир қўлингда тарози.
Сен борсанки оилам тинч, иноқ, сен - бош қози.
Хизматимда қиз, келин, сен дамлаган чой ширин.
Қўлинг теккан таомлар мен учун болдан ширин.
Илиниб бир нималар тутасан тансиқ, тотли.
Шуни ҳам танлаб ейман эрка гўдак мисоли.
Худди ёш бола каби ўжарликлар қиламан.
Барини кўтарасан, буни яхши биламан.
Оғриб қолсам жонкуяр шифокорим- табибим.
Ҳолим сўраб турувчи меҳрибоним, ҳабибим.
Гар йўқ бўлсанг ҳувиллар данғиллама уй, жойим.
“Ютаман” дер ҳовлилар, сен- Қуёшим! Сен - Ойим!
Суҳбатлашгим келади ҳар нарсалар ҳақида.
Аразлашиб қоламиз ўтмай икки дақиқа.
Сенинг ҳам ўз фикринг бор, мен айтгани қўймайман.
Ўзимни ҳаммадан ҳам ақлли деб ўйлайман.
Ёшлигингда чидадинг йўғимгаю боримга.
Баъзан сўкиш, баъзида мушту шапалоғимга.
Бариси учун кечир, юзингга айтолмайман.
Отдан тушганман, лекин эгардан тушолмайман.
Ич- ичимдан сезаман, сенсиз яшай олмайман.
Таом ейишмас, хатто сенсиз нафас олмайман.
Қариб, қилтилласанг ҳам ёнимда бўлгин доим.
Сендан кейин қолмайин, оҳим эшит, Худойим. ,
Мендан кейин яшагин фарзандлар ардоғида.
Фақат ёнимда бўлгин умримнинг адоғида.
Онаси, касал бўлма, сен мен учун тиргаксан.
Кун ҳамроҳ, тун ҳамроҳим, менга жуда кераксан.
Мастура ҳожи она шеъри.
https://t.me/Masturahojionasherlari

Муслимам. Соғ омонмисиз?
Тенгдошим? Жуфтингиз ҳаётмилар? Аллоҳга шукр!
Сезасизми, бир оз гаплашиб ўтирсангиз беш дақиқада суҳбатингиз жанжалга айланади.
Сиз ҳам ақллисиз, ҳаётий тажрибангиз кўп, чолингиз сизданда ақлли.
Икки ақлли бир қўшилса кун қайда бор?
Сиз дарров ён босиб жим бўласиз. Чолингиз ҳам сизга қараб жим бўлади.
Шу вақтда чолингизнинг хаёлидан ўтган сўзларни қоғозга туширдик. Бир ўқиб кўринг.
Эслатиб ўтаман, фақат хаёлидан ўтади, ўзингизга айтмайди. Чунки улар хали ҳам эгарда.

Ўзинг жуфт яратдинг, жуфт юрсин доим,
Бир - бирин десинлар - «Қуёшим - Ойим»
Дилдаги ўтинчим тингла Худойим,
Эркак ҳам, аёл ҳам ёлғиз қолмасин!
Майли соч оқарсин, киприк
қошгача,
Айирма ҳеч йўғи тўқсон ёшгача....
Барибир покиза турмуш бошқача,
Эркак ҳам, аёл ҳам ёлғиз қолмасин!
Айрилиқ дилларга ғам-кайғу солар,
Мехр ва оқибат буткул йўқолар.
Фарзандлар кўзлари жавдираб  қолар.
Эркак ҳам, аёл ҳам ёлғиз қолмасин!
Эй Аллоҳ! Йўл кўрсат,  қалбларимиз оч...
Яхшилик, диёнат уруғини соч.
Эркаксан, аёлсан
жохилликдан қоч,
Эркак ҳам, аёл ҳам ёлғиз қолмасин!
Ёлғизлик-қаритиб эрта сўлдирар,
Ёлғизлик-дилларни дардга тулдирар.
Ёлғизлик-инсонни эрта ўлдирар,
Эркак ҳам, аёл ҳам ёлғиз қолмасин!
Муаллифга ташаккур билдирамиз.
https://t.me/Masturahojionasherlari

Д О Ғ Д А М А Н…..
Нафақага чиқишим кутган эдим.
Кашталар, матолар, ип йиғган эдим.
Ёстиқ жилдлар, фартуклар тиксам дердим.
Авжи тикар, чатар қилар чоғдаман.
Игнага ип ўтказолмай доғдаман.
Ишдан ортиб дам олишга бормадим.
Гап, гаштакка, кафеларга юрмадим.
Юрт кезмадим, чет элларни кўрмадим.
Энди саёҳатга борар чоғдаман.
Узоқ йўлга юра олмай доғдаман.
Бир нималар егим келса еёлмай.
Андишалар қилдим кўнглим айтолмай.
Баъзан етдим, баъзан қолдим етолмай.
Кўнгил тусаганни еяр чоғдаман.
Еганимни ҳазм қилолмай доғдаман.
Китобларни олар эдим дасталаб.
Ўқишга вақт топмасдим бир ҳафталаб.
Лаоқал варақлаб қўймасдим бир қараб.
Бекорчи вақтим кўп, сероб чоғдаман.
Кўзим тиниб, ўқиёлмай доғдаман.
Бешик тепасида ухлаб қолардим.
Дарсда мудраб роса танбеҳ олардим.
Иш кўп, вақт йўқ, уйқуга зор бўлардим.
Тинчман, тўйиб ухлаб олар чоғдаман.
Уйқум ўчса ухлай олмай доғдаман.
Ибодатга вақт етди, гоҳ етмади.
“Қуръон ёд ол!”- деб ҳеч кимса этмади.
Тўлиб қолган хотирам жой бермади.
Туну кун тиловат қилар чоғдаман.
Битта сура ёд ололмай доғдаман.
“Егинг келса е! Боргинг келса тез бор!
Вақт учар, кутиб турмас экан зинҳор!
Истасанг тингла, сўзимга қулоқ сол!”
Ёшларга насиҳат қилар чоғдаман.
“Гапим ёқармикан ?”- дея доғдаман.
Мастура ҳожи она шеъри.
https://t.me/Masturahojionasherlari

Қадрдоним!
Нафақага чиқишдан олдин роса режалар тузганмисиз?
Китоб ўқийман, бир нарсалар тикаман, саёҳатларга чиқаман, энг муҳими- тўйиб ухлайман ва яна бошқа кўп нарсаларни режалаштирганмиз.
Хўш, режаларингиз билан ҳозирги ҳаётингиз бир бирига мос келяптими?
Мақсадингизга эришяпсизми?
Менда озгина фарқ қиляптида

ЎЗИМГА КЕРАКМАН!
Ҳамма иш, ўқишда, уйда бир ўзим.
“Қачон қайтишаркин?”. Эшикда кўзим.
Ўзимга қоровул, қўриқчи - ўзим.
Мен керак эканман ўзимга ўзим.
Ёлғиз қолсам дарров сураман хаёл.
“Умрим қандай ўтди?”- Бераман савол.
Берган саволимга жавобим тайёр:
Мен керак эканман ўзимга ўзим!
Зиналардан чиқиш баъзида мушкул.
Тутқичидан тутсам бўлар сал енгил.
Дейман : “ Тўхтама ҳеч! Олға бос! Интил!”
Мен керак эканман ўзимга ўзим!
Салга қоқиламан, юраман аста.
Елвизак, нам ҳаво тегар бир пасда.
Эҳтиётим қилай бўлмасдан хаста.
Мен керак эканман ўзимга ўзим!
“Хой, пайпоғим қани?”. Хой, ҳассам қани?”
Демасдан топаман қидирганимни.
Оғирлигим тушмас кимгадир мани.
Мен керак эканман ўзимга ўзим!
Таомим тутмасин ҳеч ким оғзимга.
Тўкиб сочсам ҳамки солай оғзимга.
Ичган сувим тиқилмасин бўғзимга.
Мен керак эканман ўзимга ўзим!
Муҳтож бўлмай ҳатто суйган боламга.
Сарғайиб, термулиб боқмай оламга.
Истиғфор айлансин кунлик ноламга.
Мен керак эканман ўзимга ўзим!
Етмиш беш минг Таҳлил айтаман ўзим!
Такбир, Таҳмид, Тасбеҳ айтаман ўзим.
Шунга қодир қилгин Аллоҳим ўзинг!
Мен керак эканман ўзимга ўзим!
Таҳоратга ғайрат, намозга куч бер!
Ҳожатимга ярай оқса ҳамки тер.
Бағрига олмасдан қаро тупроқ - ер!
Мен керак эканман ўзимга ўзим!
Намозимни кимдир ўқиб беролмас.
Рўзамни бировлар тутиб беролмас.
Қабрда бир кеча туриб беролмас.
Мен керак эканман ўзимга ўзим!
Тўрт мучам- кўз, қулоқ, оёғим, қўлим.
Соғ саломат бўлсин! Омон вужудим!
Эшик қоқмасидан Фаришта - ўлим.
Мен керак эканман ўзимга ўзим!
Шаҳодатни айтай кимдирмас, ўзим.
Аллоҳ лафзи бўлсин охирги сўзим.
Гўзал хотимага етишиш учун.
Мен керак эканман ўзимга ўзим!
Мастура ҳожи она шеъри.
https://t.me/Masturahojionasherlari

Ассалому алайкум Қадрдоним!
Омонмисиз?
Тану жонингиз соғми?
Чопқилламасак ҳам секин юряпмиз, таомимизни ўзимиз еяпмиз, ўзимизни ўзимиз эплаб юрибмиз. Беҳисоб шукр!
Аллоҳ умримизнинг охиригача бировга оғирлигимиз тушмасдан, кимгадир муҳтож қилмасдан юришликни насиб қилсин.
Хотимамизни чиройли қилсин.
Ўз коримизга ўзимиз ярайлик!