Bek Olimjon

Guruh bilan velosiped minishdagi ayrim odob va qoidalar
1. Yo'lni, tezlikni, tanaffuslarni oldindan kelishib olish va unga amal qilish
2. Guruh bilan haydashdagi ishoralarni o'rganib olish
3. Imkon qadar bir qator, maksimum ikki qatordan oshmaslik
4. O'z qatorida yurish, o'zgartirmoqchi bo'lsa baland ovoz bilan bildirish
5. Qarama-qarshi yo'nalishdagi velosipedchilarga qo'l ko'tarib salom berish
6. Tupurish yoki burun qoqishda guruh orqasiga o'tish yoki chetga to'xtash
7. Oldindagi velosiped g'ildiragiga tegmaslik (halokat kafolati)
8. Rulni qo'yib yubormaslik
9. Faqat chap tomondan quvib o'tish
10. Parovoz vazifasidan qochmaslik. Boshqalarga ryukzak bo'lmaslik.
Bek Olimjon
26.07.26
Norvegiya

Velosiped minishdagi qoidalar
1. Quloqchin (naushnik) ishlatmaslik
2. Ko'zoynak kaska ipi ustidan taqiladi, tagidan emas
3. Ketayotgan joyingizni yaqinlarga doim ayting, yoki live tracking yoniq bo'lsin
4. Yo'l qoidalariga doim amal qilish
5. Velosipedchi ishora belgilarini o'rganib olish va ishlatish
6. Ehtiyot qismlar (eng kamida zahira kamera, nasos, klyuch) bo'lishi shart
7. Teshilgan kamera almashtirishni bilish shart
8. Orqada o'chib yonuvchi qizil va oldinda oq chiroq bo'lishi. Haydovchilar sizni ko'rishi juda muhim. Qorong'uda refleks bo'lishi
9. O'z chegaralaringizni bilish va har doim qo'shimcha energiya zahirasi bo'lishi
10. Kaskasiz hech qachon velik haydamaslik (Amsterdamda ishga qatnasangiz, mayli, kaskasiz mumkin)
Bek Olimjon
25.07.26
Norvegiya

https://open.substack.com/pub/bekolimjon/p/creating-memories?r=19nsqj&utm_campaign=post-expanded-share&utm_medium=web

Shaxsan o'zim bilan kecha yuz bergan voqeani bo'lishmoqchiman
***********************
Yoshlar orasida sportga qiziqish kuchaymoqda.
Ayniqsa velosportga qiziqish ancha kuchaydi.
Bu juda yaxshi.
***************
Ammo bir holatga tez-tez guvoh bo'lyapman.
Uzbda velosport bilan shug'ullanayotganlar orasida kaska (dubulg'a) kiymaydiganlar ancha ko'p ekan.
Bu juda-juda achinarli holat.
****************
Nima bo'ldi?
Kecha odatdagi velomashg'ulotga chiqdim.
Tezligim baland emas, 25km/s atrofida edi. Juda tekis yo'l. Hech qanday halaqit beradigan narsa yo'q. Haydovchilar velosipedlarni hurmat qiladi.
Uch soniyaga osmondagi samolyotga chalg'idim.
Yo'ldan chiqib ketib, halokatga uchrashimga shu uch soniya yetarli bo'ldi.
Velosiped old g'ildiragi yo'l chetidan chiqib ketib, men rul ustidan oldinga qarab boshim va yelkam bilan yiqildim. Asfalt chetiga tushib yaxshigina urildi.
Telefonim orqa cho'ntagimda edi. Uni 5 metr uzoqdan topdim.
Allohga shukurki, jiddiy jarohat olmadim.
5-6 kunda tuzaladigan yengil lat yeyishlar. Sinish yoki ichki a'zolar jarohati yo'q.
Agar boshimda kaska bo'lmaganida, hozir komada yotgan bo'lish ehtimolim yuqori edi.
Kaska juda muhim azizlar.
Oliftagarchilik juda qimmatga tushishi mumkin.
Bek Olimjon
23.07.26
Norvegiya

Nega Ironman’da qatnashmayapman?
Mendan “Nega Ironman qilmaysiz?” deb so‘rashadi. Yaxshi savol.
Avval Ironman haqida qisqacha: Ironman - bu triatlonning eng mashhur brendi. 3,8 km suzish + 180 km velosiped + 42 km yugurish. Hammasini bir kunda bosib o'tish kerak. Dunyoda yiliga 50 mingdan ortiq odam marrani bosib o‘tadi.
Men triatlon bilan jiddiy shug‘ullana boshlaganimga 1 yildan oshdi. Hozir dunyodagi eng yaxshi murabbiylardan biri bilan ishlayapman. Haftasiga 15 soat atrofida mashq qilaman (10 oy oldin 12 soat edi). Bu hajm suzish, velosiped, yugurish, kuch va yogadan iborat.
Lekin bu 15 soat to‘liq Ironman masofa uchun bu yetarli emas.
Nima uchun?
Uzoq muddatli atlet rivojlanishi degan tushuncha bor. (LTAD - The Long-Term Athlete Development). U 7 bosqichdan iborat jarayon.
1. Active Start - faol ibtido
2. FUNdamentals - asoslar
3. Learn to Train - jismoniy shug'ullanishni o'rganish
4. Train to Train - shug'ullana olish uchun shug'ullanish
5. Train to Compete - raqobatlashish uchun shug'ullanish
6. Train to Win - yutish uchun shug'ullanish
7. Active for Life - butun hayot davomida jismoniy faol bo'lish
Har bir bosqich bir necha oylardan yillargacha davom etadi.
Men ayni vaqtda to'rtinchi bosqichdaman deya olaman. Jiddiy shug'ullanish uchun tanani tayyorlash bilan bandman.
Meni tanam hali Ironman to'liq masofali musobaqada qatnasha olish uchun talab etiladigan jismoniy yuklamani o'zlashtira oladigan darajada emas.
Bunga keyingi yil ham tayyor bo'lmayman. Shunday ekan, 2027 yilda ham to'liq masofada qatnashish rejada yo'q.
Shu o'rinda bir qiziq fakt
Bugun Ironman to'liq masofada ishtirok etsam, uni tugata olamanmi? Albatta. Bunga hech qanday shubham yo'q.
Ammo bu menga nima beradi? Faqat mendagi egoni sug'oradi xolos. Uzoq muddatli jismoniy tayyorgarlikka erisha olmayman. Qisqa yo'lni tanlagan bo'laman. Asosiy maqsadga - uzoq muddatli jismoniy rivojlanishga erisha olmayman.
Mendagi maqsad bitta Ironman tugatish va sportni tashlash emas.
Afsuski, bunday holatni ko'pchilikda ko'ramiz. 5-6 oy tayyorlanadi, Ironmanni bir amallab tugatib oladi va shu bilan sportdan uzoqlashadi. Suhbatlashsangiz jarayondan maza qila olmagan. Tayyorlanish jarayoni va musobaqani qandaydir travma bilan xotirlaydi. Unga qaytgisi kelmaydi.
Bunga sabab balki birinchi o'rindagi maqsadi shunchaki "Ironman tugatish" bo'lgandir.
Aslida buham noto'g'ri maqsad emas, ammo
marra chizig'ida hech narsa yo'qligini
tushunib yetish muhimroq.
Bek Olimjon
22.07.26
Norvegiya

Chemodanda yashash...
Ko'plab musofirlar bilan suhbatda bo'laman.
Juda ko'pi musofirchilikda 15-20 va undan ko'p yillardan beri yashaydi.
Farzandlari shu yerda tug'ilgan, shu yerda hayot qurgan, o'zlari shu yerda karyera qurgan, qadr topgan.
Ular umrining ko'p qismini o'z yurtidan ko'ra chetda o'tkazgan.
Bir qiziq kuzatuv meni doim hayron qoldiradi.
Shu odamlar juda ko'pida qandaydir tushkunlik kayfiyatini sezadi odam.
Yaxshilab surishtirsangiz ular na ona yurtida, na hozir yashayotgan yurtida hayot kechirayotgan bo'ladi.
Ular chemodanda yashashadi.
Tushkunlik kayfiyatida bo'lgani uchun o'zlari tanlab musofir bo'lib kelgan yurtdagi muammolardan noliydi.
Bir vaqt o'zida ona yurtidagi muammolardan ham tinmay noliydi.
Nega maza qilib yashamaysiz ma'nosida savol berasiz.
Ular qachondir qaytaman baribir degan xayol bilan umr o'tkazishayotgan bo'ladi. 20 yil umr.
Shuncha umr "chemodan ichida" o'tib ketadi.
Shu sabab, na u yoqda, na bu yoqda xayot qurishadi.
Umr esa bir onda tugab bo'ladi.
Yechim nima?
Har jamiyat ijobiy va salbiy jihatlari bor.
Yashab turgan jamiyatni imkon qadar ijobiy jihatlariga fokus qilib, bor imkoniyatlardan maksimal foydalanib, bugun o'zimiz va atrofdagilarga foydali bo'lish ustida ishlash.
Yechim qishloqda 20 yildan keyin qaytish uchun 2 qavatli uy qurish emas...
Bek Olimjon
01.07.26
Norvegiya

Onangizga har kuni telefon qilganingizda har doim ham ko’tarmaydimi?
Bu juda yaxshi belgi…
*********
Bek Olimjon
26.06.26
Norvegiya

Yaqinda bir ukamiz bilan suhbat qurdik.
Juda muloyim, aqlli, farosatli yigit. Yaxshigina natijalarga erishgan.
Ayni vaqtda Germaniyada shifokor.
Soha tanlash, kelajak haqida suhbatlashdik.
Ukamiz bir narsadan qattiq havotirda ekanligini aytdi.
U ham bo'lsa farzand tarbiyasi. Juda o'rinli mavzu.
**************
Suhbat taxminiy mana bunday tarzda bo'ldi:
- Men farzanda tarbiyasidan qattiq havotirdaman.
- Farzand nechta?
- Hali yo'q.
- Qachon oila qurdingiz?
- Hali uylanmaganman
**************
Hali hattoki tutuni ham yo'q olov, ammo uyimizga o't ketishidan havotirlanamiz.
Qiziq paradoks shuki, hozirdan farzand tarbiyasi haqidagi havotiri bor insonda, farzand tarbiyasi bilan muammo bo’lmaydi.
Biz voqe’likdagi muammolardan ko’ra, tasavvurimizdagi muammolardan ko'proq aziyat chekamiz.
Mana shunday havotirlar miyamiz energiyasini egallab oladi va ayni vaqtdagi muhimroq ishlardan bizni chalg'itadi.
Vaqt va energiya cheklangan valyuta. Uni ayni vaqtdagi muhim ishlarga sarflash zarur.
Bek Olimjon
17.06.26
Norvegiya

Qanday qilib uzoq va sifatli umr ko’rish mumkin?
"Alohida mavzu"ning navbatdagi sonida sog‘lom hayot kechirish, uzoq umr ko‘rish sirlari hamda jismoniy faollikning inson salomatligi va hayot sifatiga ta’siri haqida mehmonlarimiz
Bek Olimjon
va
Aziz Rahimov
bilan qiziqarli va foydali suhbat tayyorladik.
Suhbat davomida siz:
• 80 yoshda ham sog'lom bo'lish mumkinmi?
• Ozg'inlik sog'lomlik belgisimi?
• 2 soat sport bilan shug'ullanish yoki piyoda yurish, qaysi biri yaxshiroq?
• Go'sht va yog' foydalimi yoki zararli?
• Uyqusizlik vazn ortishiga sabab bo'ladimi?
• Nima uchun motivatsiya yuqori bo'lganida ko'p xato qilinadi?
• Qarilikni oldindan aniqlash mumkinmi kabi savollarga javob olasiz
❗️
Sog'lom yashashni bugundan boshlang, videoni tomosha qiling:
https://youtu.be/JTboXnqe0xA
@alohidamavzu

Biz chetga shifokorlikka ketishga rosa targ'ib qildik.
Buni natijasini ham ko'ryapmiz.
Germaniyada ko'plab yoshlarimiz shifokorlik maqomiga erishmoqda. Bu juda quvonarli holat. O'zgarishlar katta.
Bu ularni yaxshi mutaxassis bo'lishi bilan birga ko'proq pul topish imkoniyatini bermoqda. Bu ham juda ijobiy holat.
Aksari talabalikdan chiqiboq Germaniyaga kelgan. Ular vatanda pul topmagan yoshlar. Endi Germaniyaga kelib umrida topmagan pulini topishmoqda.
Muammo eng kattasi shuki, ularga hech kim pulni qanday boshqarishni o'rgatmagan.
Natijada xavfli moliyaviy qarorlar qabul qilish ko'p.
"Men pul topyapmanku, to'lay olaman"
deb foizi katta qarzlar olish, mashinalarni kreditga olish, qimmat ijarada yashash, ehtiyoji bo'lmasada katta haridlar qilish holatlari, yoki o'zi uchun sarflamasdan butun topganini uyiga yuborish holatlari ko'p.
Undan tashqari, vatandagi oilasi
"bolam chetda ko'p pul topyapti, pul yuboradi"
deb ahmoqona moliyaviy qarorlar qilish holatlari juda ko'p.
Afsuski bunday holatlar chetda ishlayotgan shifokorlar asosiy maqsadidan chalg'itadi, moliyaviy qopqonga tushib qolishiga sabab bo'ladi va rivojlanishdan to'xtatadi.
Agar real rivojlanmoqchi bo'lsak, pulni faqat topishni emas, balki topgan pulni qanday boshqarishni yaxshi o'rganishimiz shart.
Moliyaviy maslahat sifatida, eng birinchi qadam, kredit karta va foizli qarzlardan uzoq yurish.
Barakasini bersin.
Bek Olimjon
11.06.26
Norvegiya