الناشر مصطفى المياحي💔
للجواد المهدي شايل رايه
ومعتني ويه الخدم مشايه
.....
يمن كاصد ضريحه ... الك هاي البشاره
ابوصالح حبيبك... رفيقك بالزياره
ابد لا تنسى روحك ... تمعن بالعباره
اذا شافك تمازح .... تزيد ابكلبه ناره
لا تزيد احزانه حزنه اكفايه
.......
يزاير خلي حزنك ... يسولف كلشي عندك
اليعطلك عالمصيبه .... تكله ارخصني ردك
ابو صالح يريدك .... دمعتك تملي خدك
يماشيك ابطريقك .... ابد مو انت وحدك
حاضر يسمعك ابكل احجايه
......
بديك الرايه خلهه .... ترفرف لبو فاضل
الك كل خطوه بيهه .... اجر عابد مقاتل
المشه للكاظمية ... يضل تاريخه حافل
طريق الكاظميه .... طريق اهل المراجل
خلي روحك بالمشي وفايه
......
الف هنياله كلمن .... تشوف المهدي عينه
تشمله الرحمه كلهه ... لحد اخر سنينه
يماشي المهدي جدمه ... ابو الروح الحزينه
ابد ميماشي عاصي ... يدور الوينه وينه
يريد واحد ما يخالف رايه
.......
✍
كلمات : موسى الخادم
كبرتني بعزائك ونسترت بردائك
وانه اطلب دعائك يا حسين
::::
انت العريان وساترني يا قابل بالحر اقلبني
بسجل الخدام تسجلني ممنونك يا مولاي
اول عطشان وساقيني وحدي اعرف متخليني
انه شما اطلب تنطيني ممنونك يا مولاي
لا شفتك بعيوني لا عشت وياك
لكن كلما ادعي يم گلبي الگاك
روحي بأكملها انساها وما انساك
ما عيش انه بلياك
انت حبك حياني انت مالك كياني
عالي ويظل ندائك يا حسين
:::::
اول مذبوح وذابحني انه اعرف مولاي يحبني
حلوه الخدمه من اتعبني يالتعبك راحة بال
عزبت بضلعك للحافر كل هاي وتبچي اعله الكافر
مولاي دخيلك من باچر يالتعبك راحة بال
ماكو مثلك عــــــــزب للخيل ضلوع
صوت ضلوعك يم خيامك مسموع
اول موجوع ويشافي علة موجوع
بالخيمه احرگني شموع
شذره وبلا محابس عايش اعله المجالس
واعله زينب بكائك يا حسين
:::::
يا واهب فطرس جنحانه انه بلا مجلس مو انه
باللوحه شفافك ذبلانه من يرسمك رسام
خادم جبريل يهز مهدك محد يا مولاي بگدك
ليش مثلث صايب جبدك من يرسمك رسام
ليش الرسام من يرسمك مجــــروح
كون من يرسمك عايش مو مذبوح
يرسمك مصيوب سهام ولو مطروح
يمك احچي المسموح
حتى باللوحة ضامي انت مسكي وختامي
انحني يم رثائك يا حسين
:::::
الحب يم بابك لا مو ذله الخير انت وصلا انت اهله
ما حب غيرك هاي العدله دلالي يريد حسين
تنطيني زياده شما اطلب بگلب الضیف یعرفه معزب
من تثگل بأسمك انه اندب دلالي يريد حسين
انه بابك مديت ايدي ومكروب
وبجاهك يم الباري اطيح ذنوب
يا ساتر هاي الوادم بس مسلوب
ماكو غيرك محبوب
انت حبك حقيقي انت نور بطريقي
نجم عالي بسمائك يا حسين
:::::
جون اسود يملك گلب ابیض الحب عالفطره ولا مو عالحض
حسين وحبك ما يتعوض اليخسر حبك غلطان
انت القابل بالنصراني وانت الحبيت الهمداني
انه اخسر لمن تنساني اليخسر حبك غلطان
كون اسمي بسجل الخدام مسجل
يوميــــــه بابك مــــــولاي اتوسل
أعمى وعالفطره بدربك انه اندل
شكرآ لمن تقبل
انه عندي الخدامه سند يوم القيامه
عايش انه بعطائك يا حسين
:::::
علي جبار الكعبي
الفاتحه لوالدي
أنت الجواد المايرد سائل
جفك شبيه بجف ابو فاضل
////////////////.............//////////........
؛١
ما يخيب البابك ايدكَـه ابخشوعه
تنقضي حاجاته وي نزلة دموعه
ما يضل حاير ولا حاني ضلوعه
بيده ياخذ طلبته بلحضت رجوعه
طبعك سخي ..تنطي اليكَـصدك ماي العيون
طبعك سخي .. مثل الكفل زينب والاضعون
مضرب مثل صرت أنته للكافل
جفك شبيه بجف ابو فاضل
//////////////////////////////
؛؛٢
الكَـلبه مهموم وأجاك يريد فرحه
تزيح ضلمة ليلته وتشوفه صبحه
منك أيرد الهله متشافي جرحه
ما تعوفه ويه أحزانه التذبحه
يبن الرضا .. كلمن اجاك بدمعته ايزور
يبن الرضا .. لهله ترجعه بكلب مسرور
يا موطن المجنون والعاقل
جفك شبيه بجف ابو فاضل
///////////////////////////
؛؛؛٣
الطايح ابشده وتخلت عنه ناسه
ما يروح الغيرك ولا يحني راسه
يجي البابك سيدي بعبرت انفاسه
يسولف الي صاير بكامل حواسه
ما يلتفت … لا غيرك ايدكَـ سيدي باب
ما يلتفت … لا حاجته ايسولفهه لغراب
بس يمك ايسولف شنو لحاصل
جفك شبيه بجف ابو فاضل
//////////////////////////
؛؛؛؛٤
والتصيبه عله يعجز عن شفاهه
يجي يمك سيدي وياخذ دواهه
أنت مستشفى التشافي من اجاهه
ألأجر كشفيته صلاه عالنبي طه
جم مبتلي … أبعلَّة مرض شافيته بالحال
جم مبتلي … يحجي ابوكَـفتك يبن الابطال
غصباً على كل حاقد وغافل
جفك شبيه بجف ابو فاضل
/////////////////////
؛؛؛؛؛٥
سيدي واليوم اجيتك عندي طلبه
تسهل امري الخدمة حسين الأحبه
كون جدمي ما يزل وابقه اعله دربه
وما أصاحب ناس ما تبجي اعله كَـلبه
الصابه السهم … وراسه برمح شايله الذباح
الصابه السهم … وجبده انقسم نصين من طاح
ياسيدي ابدعواتي متواصل
جفك شبيه بجف ابو فاضل
..........................،،،،،،،،،،،،................
✍️🏻
كلمات موسى الخادم
@HxzEU1
#قناه_نشر_القصائد_المنبريه
#الناشر_مصطفى_المياحي
الخدامه
الخدامه
يا ابا عبد الله
بالروايه ثبتتهه من گلت يبنَ شبيب
الدمعه مصدر للشفاعه لو ردت تنعى الخضيب
ولجروح
من تنوح
تبدي دمعه
--------------------------------------------
يالرضا انته الگلت*بالروايه اتحدثت
الدمعه عالمذبوح نعمه وبيهه غفران الذنب
هذه صك اومرتسم * الدمعه مفتاح النعم
هيه اكبر كل وسيله اتوصلك الگلب المحب
بالنص گلته يالرضا الراد يبقى ويانه
ولراد تخلص محنته ابيوم الحشر يلگانه
يذرف دموعه اعله السبط وباقي المحن خلصانه
هذه منصوص الروايه اليغرگ بدمعه ويذوب
الدمعه هيه اتصير شافع تشفع اكبار الذنوب
امن الذنوب
من تتوب
الباب دمعه
---------------------------------------
فسرت معنى الدمع*اليبچي دمعه يرتفع
هذه تفسير الروايه ومنهه خل ناخذ عبر
جاه كل دمعه اتهمل*هيه حلقه الكل وصل
حسستني اليبچي دمعه اسمه يم ربه كبر
هذه العطف منكم اجه سر الايلاه ابصِنعه
شنهو الدموع ابلا جرح ولمن تطيح الدمعه
خليتو معنى للبچي وفرحه ابگلب للينعه
صار واضح عندي حچيك وفهمت معنه الحديث
هسه عندي طلبه يمك سيدي بيك استغيث
شگد جبير
من تصير
بعيني دمعه
---------------------------------------
هسه اسولف طلبتي *يالرضا وكل منيتي
بدفتر الخدام اصيرن كون خادم من صدگ
دمعه متفارك جفن* عمري اعيشنه حزن
ولشمول ابدمعه منك كون دمعت محترگ
مو زاهق انه من ردت لاحق بكم قافلتي
وحرمني كلشي سيدي وخلي الدمع سالفتي
ياليتنا كنا معك تتحقق ابخاتمتي
مايهم لو فارگتني الدنيا منهه ما أنول
اشگد جبيره وعندي عبره وبيهه من عندك قبول
ولشمول
بالقبول
مني دمعه
----------------------------------------
منك اطلب منقبه*وضعي انته اترتبه
الدموع اتصير عاده وتترس اشجاني هضم
الخدمه تصبح عيلتي *ولمجالس خيمتي
وتصبح انفاسي نواعي ولنبض صوت اللطم
اسمى درس اصبح الي ام البنين الحره
افضل مقامات اترتقت من البچي ولعبره
اليبچي دمعه اعله النحر بسجل الزچيه اشكبره
ام إلبنين ابدمعهه خلت احساسي يحس
الدمعه يعني افضل عباده هذه عنوان الدرس
اعتلاء
ارتقاء
وهيه دمعه
---------------------------------------
اترس احساسي وفاء*وكلبي فرغه لكربلاء
وخل دمه شرياني خيمه يفتهم معنى الخدر
ارسم بعيني ظعن* من وطن يمشي وطن
وخلي لوعت سبي بگلبي وكون ماتطفي جمر
ماريد دنيا ولا اهل بس دمعتي خليهه
دمعه تطيح ابمجلسك ابعمري انه اشريهه
ارزقني هاي المنزله حسن العواقب بيهه
واخر احچايه بكلامي اسألك انه الدعاء
حاجتي يمك عفته ما اجوز امن البكاء
بالبكاء
بالدعاء
ارزقني دمعه
___
علي سليم الحسناوي
بأرض الغري يالحادي مربينه
خلّي علي يشوف الجره اعلينه
ذبحوا ولينه . واحنه انسبينه
**
چنها هاي الرحله يا حيدر طويله
وانه دمعاتي گضت صارت قليله
بويه ترضاها الشمر يسبي العقيله
منهو غيرك يا علي الي اشتكيله
بيدي الحبل رادو يذلّوني
طگني النذل واسمع يسبوني
مشدوده ادينه . واحنه انسبينه
**
بويه عالغبره عفت كل الغوالي
حتى عبد الله أنذبح ما عندي والي
امشي مسبيه عگب خدري ودلالي
صبري جف وما تجف سود الليالي
دمع ودمه يتشارك بعيني
نار الضمه كل لحظه تچويني
عباسي وينه . واحنه انسبينه
**
حيلي راح وليلي ما اگدر انامه
من بواچيها الأرامل واليتامه
منكم اتنطر چنت يهلي علامه
موسهل كسر الخواطر يانشامه
غاب السند وتشمتوا بينه
وأهل البلد تتفرج أعليه
بغربه انولينه . واحنه انسبينه
**
يابو زينب للنجف جيتك اعاتب
عالتراب بكربله عفت الحبايب
حشّميتك وانته مظهر للعجايب
بيد اجانب سلّمت ضعني النوايب
هذا الدهر ما تگظي لچماته
مثل البشر باع برخص ذاته
يتسلّه بينه . واحنه انسبينه
**
ما هويت الدنيه صرت اتمنى موتي
من شفت بعيوني ذبحوهم اخوتي
المن اندب ما وصل لحسين صوتي
من كلامي ارحم يبوالحمله سكوتي
زينب غريبه بعازت الوالي
دنيه عجيبه التاخذ الغالي
غمّضها عينه . واحنه انسبينه
**
الشاعر أبو إيمان النجار
القاسم عليه السلام
شعرك عالمتن لو ليل..من الحاسد اسملله**
خاف ايحسده حافر خيل.. وعله النبي ما صلى**
راح .راح بخده سالت الگمره
راح.راح يتبختر عله الشگره
..............
تغار العيون..واليحسدون.. من جماله*
محله الزلوف..يعشگه الشوف.. يا دلاله*
الهوه الهاب..بوجنته ذاب.. واشتكاله*
هاي قوسين..تحرس العين.. لو هلاله*
يوسف هذا لو جسام..لو نور الله بالحومه**
نظرات العيون اسهام.. تغازل طوله وارسومه**
شال..شال روعه وهيبة الزهره
راح..راح يتبختر عله الشگره
.................
غبشة احساس..چنه عباس.. خيط نوره*
بدهَ اﻻحلام..بين الخيام.. صوره صوره*
بسملة شوگ..بفرض معشوگ.. تانه دوره*
ماخذ اگلوب..خلگ متعوب.. لليزوره*
ترهدن لاحگ عله الموت.. يا ظامي وترف خلگك**
اترس عينه وانته اتفوت.. ذايب گلبه من عشگك**
شوگ.شوگ بسمك هايم ويقرا
راح.راح يتبختر عله الشگره
.................
صدرك امظيف..والزوافيف.. طعن الرماح*
غصن لو مال..تسنده انبال.. يا بدر ﻻح*
كلته غيوم..تشوبش انجوم.. الجدمه من راح*
حنته افياي..زاعل الماي.. والعمر طاح*
يا نشعة عرس مذبوح.. ﻻبش بدلتك دمك**
تاركلك گلب مجروح..يالماخذ حلم أمك**
وين.وين يمخظر ورد حسره
راح.راح يتبختر عله الشگره
..................
ناثر ادموع..طفن اشموع.. ابوداعك*
عنك ايزيح..راكب الريح.. ابشراعك*
امسبل اجروح..مذبل الروح.. مو طباعك*
أخر اوداع..يا حلم ضاع.. ابضياعك*
عمرك يخلص ابلحظات.. يالشايل بخت جدك**
تسجد يمك الكلفات.. واليصعب سهل عندك**
صار.صار بستانك أرض خظره
راح .راح يتبختر عله الشگره
.................
رايح اهناك..ماخذ اوياك.. احلى السنين*
تارك الشيب..هﻻلك ايغيب.. فدوه لحسين*
طش الورود..حلمك اتعود.. تكحل العين*
شوفتك عيد..أمك اتريد.. توفي الدين*
طش اسنينك عله الگاع.. يا اجمل حلم وردي**
عمرك يالولد ينباع.. العمك هالعمر تهدي**
روح.روح عندك موعد وسفره
راح.راح يتبختر عله الشگره
علاء المياحي
الفاتحه لروح والدي
@HxzEU1
#قناه_نشر_القصائد_المنبريه
#الناشر_مصطفى_المياحي
ما عدهم صدگ مولاي
چا المن عليهم جاي
امحظريلك ضمه واجروح
ايحرمونك رذاذ الماي
.........................
امحظريلك جرح يحسين وانته امحظر اضعونك*
غيمك جايبلهم خير واهمه ابعطش يرمونك*
نثرو عالدرب عاگول خاطر ضعنك ايدوسه*
والطف هذا يهوى الموت بيه باچر يلچمونك*
ما يسوون كسرت خاطر الاطفال*
بسهام العطش تنتظرك الانذال*
حيلك من يطيح اعلیه يدچ خيال*
هاي الوادم ايتانون
اهلك كلهم ايعطشون
من يوم السقيفة ابنار
للطف سيدي ايشعلون
...........................
عبد الله يضل عطشان محد يقبل ايشربه*
واعله ابنك يشح الماي حدّ ما ينفطر گلبه*
ست وردات محسوبات عمر اوليدك الضامي*
اطول منه سهم الموت بيمن حرمله ايطلبه*
يا حيرة رباب اليرجع اتانيه*
ما تدري السهم من رگبته امچويه*
ساكت ما يناغي الطفل ترجع بيه*
تشبع لو تروح اجروح
شايل ابنك ابلا روح
بعبدالله تضل محتار
زغير وبالسهم مذبوح
................................
صبخه وبيهه کلشي ايموت يالجايب ورد ليهم*
اهمه ابريجك ايعطشون وانته اتزخ نده اعليهم*
حظر للرمح عريس واسهام التشوبشله*
بس اجروحك ابعاشور يا ابو اليمه ترضيهم*
وابمصباح عاشورك تهد الخيل*
والفرهود بخيامك يضيع الحيل*
والحيره الچبيره اتصير وكت الليل*
من يوگع چبير الگوم
اجبنهم يضل ايحوم
يا حيرتهن النسوان
ويا عين اليجيهه النوم
............................
صبي عينك تشوفه اهناك فوگ الرمل يتبده*
الاكبر حرح فوگ الگاع باچر ينچوي خده*
كلهم صدگ ايتانون يمه اشلون تمدد*
شمات اشكثر يحسين وانته اتحاول اتگعده*
وابيا حيل گلي اتشيل ماي العين*
وتسمع ضحكة الشمات شوفو حسين*
محني ولا اخو يفزع عليه وايعين*
وانته ابكربلاء اوحيد
حزنك عدهم اكبر عيد
واتفر عينك اعله الناس
ولچماتك تضل اتزيد
...............................
تدري ابكربله النيران لخيامك تچويهه*
واطفالك تطش مولاي محد يلحگ اعليهه*
بالطف كلشي يصبح نار حتى اسوالف الوادم*
ولا هادود الك مولاي حتى ايهد يطفيهه*
للفرهود تدري امحظرين الناس*
وانته ابعيد عنهم والگمر عباس*
يا وسفه اعله وجهك توگع وتنداس*
تدري ابهذا كله ايصير
جسمك ينجمع بحصير
تحچي وانته فوگ الگاع
شكرآ ربي انه ابخير
علاء المياحي
الفاتحه لروح والدي
@HxzEU1
#قناه_نشر_القصائد_المنبريه
#الناشر_مصطفى_المياحي
قصيدة ثگيل لمولاي الإمام المنتظر عجل الله تعالى فرجهُ الشريف
طمني عله حالك زين مو زين
هم بالليل بالله تغمض العين
لو تذكر مصايب جدك حسين
يمهدي يمهدي
.........
مخنوگ لو تشتم هوى. بيا ساعه تنعى النينوى
بالظلمه تنحب سيدي. لحد ما يمر بيك الضوه
يالتنعى گاعد للصبح. ماذا يُهيجك يا جرح
يوميه نحرك يا شهم. مغرب اذا مر ينذبح
يومــيه يالــمهـدي تشــوف
عن جدك تهد الألوف
وتنظر مـهر خـالـي يعـود
وعايف نبي بوسط السيوف
يوميه تعيش الوحشه بالليل
راسك عالوساده وتذكر الخيل
ودمعك يا شهم للعاشر يسيل
يمهدي يمهدي
......................
هم فارگك لحظه القهر . ترتاح هم مثل البشر.
طمني عــن وضعك اذا من عندي يوصلك خبر.
يم يا ضريح ويا صحن. دمعـاتك لأهلـك جرن
في كربلا ام ذي طوى. بيا ديره خلاك الزمن
ما تغفه عينك ما تنام
كل ساعه رايح يم مقام
اهلك گضو سم وجراح
يشرح صعب وضعك كلام
يم نهر الفرات تروح عطشان
وتذكر يمه طاحو اوفه خوان
وتلتم فوگ راسك كل الأحزان
يمهدي يمهدي
..................................
ادري انت مكسور الگلب. ويه الهضم عايش حرب
بشام عندك يل يولي. مدفونه حرمه بنص غرب
يسافر خيالك بل حزن. يم زينب وتبقى تون
ضلت غريـبه بلا اهـل. و فقارك تسله تحن.
من الفجر حد المغيب
تنعى الـغـريبه يا غريب
من ونك يفزع اليموت
جرح صعب لا ما يطيب
مگضيهن حزن عالحره الايام
تدري الحره موش گدارها الشام
وضلت يم زلم ما جنهم زلام
يمهدي يمهدي
.........................
حتى انت تدعي للوعد. جي حزنك لهامك صعد
اهلك كضو سم وذبح. حزنك طغى وبلايه حد
يعينك علي يبن الحسن. بيك انعكس وسفه الزمن
مو انت تبقى بلا اهل. ولا انت تبقى بلا وطن
مخلص حياتك بالله وين
وهم رحمت بحالك سنين
لو هذا وضعك كل زمان
بالوحشه وگليبك حزين
شحالك من يمر يا سيدي غروب
يمكسور الگلب كسرت الگلوب
يمحبوب وفلا ضل يمه محبوب
يمهدي يمهدي
حسن يونس التميمي
@HxzEU1
#قناه_نشر_القصائد_المنبريه
#الناشر_مصطفى_المياحي
للجواد اعلن ولائي
يرتفع عالي ندائي
واجواداه...........واجواداه
*****
****
صاح...گلبي بروحتك نار الحزن تبدي
وياك.......حسرة فاطمه ياسيدي تحدي
انطيت ...كلمات العهد حالف يظل وعدي
الثار......باچر ينتفض بيده ويجي
المهدي
سرمدي يبقى رثائي
للجواد اعلن ولائي
*****
****
تاج.....صارت خدمتي وتعطر انفاسي
دوم ....شايل رايتك بجروحي وحساسي
جنون...شايل يالجواد وعابس
ابراسي
نار......دمي حيدري وبطبعي عباسي
والعشك باقي سمائي
للجواد اعلن ولائي
*****
***
دموع.......تجريلك دمه ماينتهي
حزني
امراد........منك ارتجي ماخيبت ظني
ارتاح.......انه بحضرتك لو دهري
ضيعني
اتشوف...هاي امحبتك والمجلسك
شدني
سيدي ارفع دعائي
*****
****
اتعيش....نارك يالجواد بجمره
دلالي
موت ....فگدك ياشباب وعذبت حالي
ليش ....نايم عالسطح بالغربه يالوالي
راح ...بيك أجمل حلم بالحسره
يالغالي
انه موسم بكائي
*****
***
طاح.......دمعي ابروحتك وتيتم العالم
ادموع....شوك الكاظميه وكلبي ظل هايم
انصيح......ياباب المراد ودمعة الكاظم
شلون ......مسموم الچبد متفطر وصايم
سيدي افدي دمائي
*****
****
اه........طلعت من كلب مجبوره بالحسره
انشوف....بالمجلس تون وام الحسن تقره
وياي.....شفت المهدي واكف منحني ظهره
لاح........بعيوني الحزن لمصيبتك
عبره
بالدمع راسم عزائي
*****
****
تمت بعون الله
خادمكم.... يوسف الفتلاوي
@HxzEU1
#قناه_نشر_القصائد_المنبريه
#الناشر_مصطفى_المياحي