Jafar Bdran جعفر بدران

#هام
تحديث جديد لتطبيق شام كاش يجلب شكل جديد واستقرار اكبر
يرجى من الجميع تحديثه قبل ايقاف الاصدار القديم
#جعفر_بدران

خلال فترة قصيرة جداً، وكيل الذكاء الاصطناعي الجديد من ميتا ميوز أو موسى متل ما صار البعض يسميه، قدر يلفت الأنظار وينتشر بشكل كبير.
السبب مو بس لأنه جديد، وإنما بسبب القوة اللي أظهرها بالتعامل مع المهام وتنفيذها لانه وكيل بيشتغل معك، مو مجرد ذكاء اصطناعي تسأله ويعطيك جواب.
وهالشي تحديداً هو اللي خلا الناس تبدأ تجربته وتنشر تجاربها بسرعة، خصوصاً مع الإمكانيات الجديدة اللي عم تقدمها ميتا بمجال الوكلاء.
بس في نقطة مهمة للمستخدمين بسوريا:
ميوز حالياً ما بيشتغل بسوريا بسبب بعض العقوبات الي بقيت وللاسف بسبب تطور ميتا ما بتقدر تشغله مع VPN لان الوكيل مرتبط بحساباتك علي ميتا الي يلي بتظهر بدقه البلد الي المقيم فيه صاحب الحساب.
حتى بعض مستخدمي ابل حاولو يبحثو عليه بمتجر التطبيقات ما وجدوه على ابل ستور بسوريا
يعني إذا شفت التجارب المنتشرة وحاولت تستخدمه وما ظهر عندك، أو ظهرت رسالة إن الخدمة غير متاحة أو الانضمام لقائمة الانتظار، فالمشكلة بسبب موقعك الجغرافي. الخدمة نفسها حتى اللحظة مرتبطة بتوفر جغرافي محدد، وميتـا عم توسع إتاحتها بشكل تدريجي.
لهيك لا تستغرب إذا شفت شخص عم يستخدم ميوز بشكل طبيعي، بينما عندك ما عم يشتغل.
يا ريت وزارة الاتصالات تضغط على ميتا حتى تتيح الوكيل عنا بسوريا
الحل الوحيد حتى تشغله هو أنه شخص الك برا سوريا يعملك حساب عليه ويتركه فتره معه حتى ياخد موقع البلد ويعطيك ياه
شاركونا بالتعليقات مين حاول ينزله وما اشتغل معه
#جعفر_بدران

إذا انكشفت كلمة السر تبعك اليوم كم حساب ممكن تخسر معها؟
في ناس لسه بتستخدم نفس كلمة السر لفيسبوك وإنستغرام والبريد الإلكتروني وتلغرام وحسابات تانية، وبتعتبر حالها مرتاحة لأنها حافظة كلمة سر وحدة وما بتنسى.
أنت مو عم تستخدم كلمة سر وحدة لعدة حسابات…
أنت عم تعطي كل هالحسابات مفتاح واحد.
إذا انكشفت كلمة السر من موقع أو تطبيق أو حساب قديم، الشخص اللي حصل عليها ممكن يجربها على حساباتك الثانية.
وأحياناً ما بيكون هدفه الحساب الأول أصلاً.
ممكن يكون هدفه بريدك الإلكتروني، لأنه إذا وصل له، ممكن يحاول يستخدمه لاستعادة حساباتك الثانية.
وهون بتصير القصة متل الدومينو
حساب يروح، وبعده حساب، وبعده حساب.
والأسوأ إنك ممكن تكتشف الموضوع متأخر، بعد ما يتغير رقم الهاتف أو البريد أو كلمة السر وما عاد تقدر تدخل.
أنا بتوصلني حالات لأشخاص خسروا أكتر من حساب بنفس الفترة، والسبب كان بسيط جداً:
نفس كلمة السر مستخدمة بأكتر من مكان.
ما مطلوب منك تحفظ عشرين كلمة سر.
استخدم مدير كلمات مرور موثوق، وخلي لكل حساب مهم كلمة سر مختلفة، وفعّل التحقق بخطوتين.
وخاصة البريد الإلكتروني، لأنه أحياناً بيكون المفتاح اللي بيرجعلك كل حساباتك.
لو انكشفت كلمة السر تبعك هلق كم حساب رح يتأثر؟
#جعفر_بدران

#هام
مشكلة واضحة عم تواجه مستخدمي فيسبوك لايت في سوريا وعدد من الدول، والتطبيق عند كتير من الأشخاص ما عم يفتح أو ما عم يتصل بشكل طبيعي، رغم إن الإنترنت عندهم شغال وباقي التطبيقات عم تشتغل بدون أي مشكلة.
واللافت إن بعض المستخدمين بمجرد ما يشغّلوا VPN، التطبيق بيرجع يشتغل بشكل طبيعي.
يعني المشكلة مو من موبايلك بالضرورة، ومو شرط تكون من حسابك أو من سرعة الإنترنت، خصوصاً إذا كل شي تاني عم يشتغل عندك بشكل طبيعي.
واضح إن في مشكلة مرتبطة بطريقة وصول فيسبوك لايت من بعض الدول والشبكات إلى خوادم Meta، وحالياً بانتظار إصلاح المشكلة من الشركة.
وفي احتمال تكون Meta عم تعمل تغييرات على التطبيق أو على طريقة عرض الإعلانات وتشغيلها ببعض الدول، أو يكون في قيود مؤقتة على الوصول من مناطق معينة، لكن لحد الآن ما في توضيح رسمي من الشركة يؤكد السبب.
لهيك إذا فيسبوك لايت ما عم يشتغل معك، لا تستعجل وتحذف التطبيق أو تغيّر إعدادات موبايلك أو حسابك، لأن المشكلة مو منك
إذا المشكلة صايرة معك، اكتب بالتعليقات الدولة وشركة الاتصالات، وهل فيسبوك لايت بيشتغل عندك مع VPN أو لا، لأن تجاربكم بتساعدنا نعرف مدى انتشار المشكلة.
#جعفر_بدران
انضموا لمجموعة التلغرام حتى تقدرون نشاركوني بتجربتكم وتستفسرو عن مشاكلكم
https://t.me/jbjafarbdran

قبل ما تعطي موبايلك لأي شخص فكر شوي: شو ممكن يعرف عنك خلال دقيقة واحدة؟
اليوم موبايلك مو مجرد جهاز للاتصال. هو تقريباً نسخة كاملة عن حياتك؛ صورك، محادثاتك، حساباتك، بريدك، ملفاتك، وأحياناً تفاصيل عن أشخاص قريبين منك كمان.
وأحياناً ما بدها القصة اختراق ولا برامج تجسس.
إذا كان موبايلك مفتوح وأعطيته لشخص، ممكن خلال دقيقة يشوف إشعار خاص ظهر على الشاشة، يفتح صورة، يقرأ جزء من محادثة، يشوف اسم شخص عم تحكي معه، يلاحظ بريدك الإلكتروني أو حتى يلتقط معلومة صغيرة تساعده يعرف عنك أكتر مما كنت متوقع ( حتى ممكن يسأل شات جي بي تي عنك)
والمشكلة إنك ممكن ما تعرف أصلاً شو شاف.
لهيك لما حدا يقلك: «عطيني موبايلك دقيقة»، لا تعتبرها جملة عادية دائماً.
إذا ما في سبب ضروري، لا تعطي جهازك وهو مفتوح.
وإذا كنت مضطر تعطيه، خليه على الشي اللي بده يستخدمه فقط، ولا تتركه يتصفح جهازك بالكامل.
لأن خصوصيتك ما بتنحفظ بس بكلمة سر قوية.
أحياناً بتنحفظ بقرار بسيط جداً:
مين بيسمح له يشوف موبايلك وهو مفتوح؟
لو أعطيت موبايلك لشخص بتثق فيه لمدة دقيقة… شو أكتر شي ما بتحب يشوفه
#جعفر_بدران

إذا غيّرت رقم موبايلك، لا تتركه مربوط بحساباتك
يمكن هالموضوع بالنسبة إلك بسيط، بس يومياً تقريباً بتوصلني حالات لأشخاص خسروا الوصول لحساباتهم، وبعد التدقيق بيطلع إن رقم قديم ما عاد معهم كان لسه مرتبط بالحساب.
المشكلة إنو أرقام الموبايل ما بتختفي للأبد.
لما تترك رقمك القديم، بعد فترة رح يرجع يتم تخصيصه لشخص تاني.
وإذا كان الرقم لسه مربوط بحسابك كوسيلة لتسجيل الدخول أو استعادة الحساب أو استقبال رموز التحقق، فأنت عم تترك باب ما إله أي داعي مفتوح.
ومن أكتر الطلبات اللي بتوصلني بعد هيك حالات:
بدي احذف الحساب أو الرقم القديم من الحساب، بس ما عم اقدر.
وهون بتبدأ المشكلة الحقيقية، لأن الشخص ممكن يكون فقد الوصول للرقم من زمان، وما عاد يقدر يستقبل رمز التحقق عليه.
لهيك إذا عندك رقم قديم ما عاد معك، لا تأجل الموضوع.
ادخل على حساباتك المهمة اليوم، وراجع أرقام الهاتف المرتبطة فيها.
احذف الرقم القديم بعد ما تضيف وسيلة استرداد بديلة وآمنة، وتأكد من البريد الإلكتروني وطرق التحقق.
والأهم:
لا تنتظر لحد ما يصير معك اختراق حتى تكتشف إن رقمك القديم لسه مربوط بحسابك.
فتّش على فيسبوك، إنستغرام، واتساب، بريدك الإلكتروني، وأي حساب مهم تستخدمه.
كم واحد منكم غيّر رقم موبايله من سنين، ولسه ما بيعرف إذا الرقم القديم موجود ضمن حساباته؟
إذا الرقم القديم لسه مربوط بحسابك، هاد المنشور تذكير إلك… قبل ما يصير الموضوع حالة جديدة.
وفي حال احتجت مساعدة فيك تتواصل معي على اي منصة انا متواجد عليها
#جعفر_بدران

إذا وصلك هالنوع من الرسائل… لا ترد حتى بكلمة.
مو لأن الرسالة فيها فيروس، ومو لأن الشخص اللي بعتها بالضرورة مخترق.
المشكلة إنه بعض المحتالين ما بدهم منك تضغط على رابط من أول رسالة… بدهم بس يعرفو إنك موجود وبترد.
ممكن تبدأ الرسالة بـ:
مرحبا، ممكن دقيقة؟
معي موضوع ضروري بخصوصك.
أنت فلان؟
ممكن تساعدني بشغلة؟
الك ورثه من شخص مجهول وانا المحامي لازم سلمك الورثه
ربحت بمسابقة وهميه مالها وجود
أو حتى رسالة عادية جداً ما فيها أي شي غريب.
إذا رديت، ممكن يبدأ بعدها أسلوب مختلف تماماً:
يحاول يكسب ثقتك، يعرف معلومات عنك، ينقلك لمنصة ثانية، يرسل لك رابط، يطلب صورة، أو يحاول يستدرجك لخطوة ممكن تضرك وتأذي حسابك أو خصوصيتك.
والأخطر إن المحتال ما بيحتاج يكون خبير.
أحياناً كل اللي يحتاجه هو إنك ترد عليه.
لهيك، إذا وصلك تواصل من حساب مجهول وما عندك سبب واضح يخليك تحكي معه، لا تستعجل بالرد.
لو وصلك اليوم حساب غريب وبعتلك مرحبا، بدي أحكي معك بموضوع مهم… بترد عليه ولا بتتجاهله؟
شاركوني رأيكم بالتعليقات.
#جعفر_بدران

اذا انت من الأشخاص الي بتشوف QR كود ملزوق على حيط أو عمود بالشارع، وبتقول: خليني امسحو وشوف شو وراه
انتبه هالفترة عم تنتشر أكواد QR مجهولة المصدر، ووصلتني حالات لأشخاص مسحوا أكواد من أماكن عامة، وبعدها تعرضوا لمحاولات اختراق ومشاكل بأجهزتهم وحساباتهم.
المشكلة مو بالـQR كود نفسه، وإنما بالرابط أو المحتوى الموجود وراه.
الكود ممكن يفتح صفحة مزيفة تحاول تسرق كلمة مرورك وبياناتك، أو يطلب منك تنزيل ملف أو تطبيق ضار، أو يستغل ثغرة أمنية موجودة بجهازك. وفي بعض الحالات، ممكن يكون الكود الأصلي انشال وحطوا مكانه كود مزيف بدون ما حدا ينتبه.
والأخطر إنك ما رح تعرف من شكل الكود إذا كان آمن أو لا.
لهيك، إذا شفت QR كود بالشارع أو بأي مكان عام وما بتعرف مصدره، لا تمسحو لمجرد الفضول.
وإذا مسحته بالغلط، لا تدخل أي كلمة مرور أو معلومات شخصية، ولا تحمّل أي ملف أو تطبيق، وانتبه للرابط اللي فتح معك.
اختراق جهازك أو سرقة حسابك ممكن تبدأ من حركة بسيطة جداً… فلا تخلي الفضول يكون السبب.
ابعت هالتنبيه لأهلك وأصحابك، خصوصاً لأي شخص بيمسح أي QR كود بيشوفه.
#جعفر_بدران

سبب انقطاع الانترنت في اللاذقية هو تعرض ثلاث كوابل للاتصالات للانقطاع وما تزال عمليات الإصلاح مستمرة
واوضح مدير فرع الشركة السورية للاتصالات في اللاذقية عن تعرض ثلاثة كوابل للاتصالات للتخريب، ما أدى إلى انقطاع خدمة الإنترنت عن محافظة اللاذقية.
وأن الفرق الفنية التابعة للشركة باشرت العمل بشكل فوري للكشف عن موقع العطل وتحديد الأضرار، والعمل على إصلاح الكوابل وإعادة الخدمة إلى وضعها الطبيعي
وأشار إلى أن عمليات الإصلاح مستمرة، داعيا المشتركين إلى تفهم الظروف الفنية الطارئة، مؤكداً أن الفرق المختصة تبذل جهودا متواصلة لإعادة خدمة الإنترنت إلى جميع المناطق المتأثرة.

بدك تحمي صورك من السرقة أو الابتزاز وخاصة للبنات
يمكن تتوقعي إني رح أحكيلك عن برنامج تشفير أو تطبيق سحري يمنع أي شخص من استخدام صورك، بس الحقيقة أبسط من هيك:
إذا الصورة حساسة وما بدك حدا يقدر يوصل إلها أو يستخدمها ضدك، الأفضل ما تنشريها ولا تبعتيها لحدا.
لأن بمجرد ما تطلع الصورة من جهازك، ما عاد عندك سيطرة كاملة عليها. ممكن تنحفظ، تنعاد مشاركتها، أو يتم التلاعب فيها واستخدامها بالابتزاز أو التشهير، وحتى حذفها من حساباتك ما بيعني إنها انحذفت من الأجهزة أو الملفات اللي وصلت إلها وخاصة أنه البعض بيقفلو ملفاتهم للشخصية وبكون عندهم ٥٠٠٠صديق ما بيعرفهم
وإذا تعرضتِ فعلاً لسرقة صورك أو الابتزاز، لا تحاولي تختفي أو تحلي الموضوع لحالك، ولا تستجيبي للمبتز أو تبعتي له صور أو مصاري إضافية.
احتفظي بالأدلة، وخدي الموضوع بجدية، وإذا ما عرفتي كيف تتصرفي تواصلي مع شخص مختص وموثوق بأسرع وقت. وجود حدا يساعدك بهالمرحلة مهم جداً، لأن الضغط والخوف ممكن يزيدوا مع الوقت إذا بقيتي لوحدك.
#جعفر_بدران