تبسم راډيو - خبر
د پاکستان پوځ په پاکستان کې د روانې جګړې خلاف د فتوا صادرولو لپاره نن په اسلام اباد کې ملايان او شیخان ټول کړي وو.
دغه کنفرانس ته د وينا پر مهال د پاکستان د پوځ مشر جنرال عاصم منير ويلي، چې په اسلامي رياست کې د جهاد د اعلان او فتوا واک يوازې د حکومت حق دی: «د حق په جګړه کې د الله نصرت شامل وي. علماء زموږ تر څنګ ولاړ دي. الله (ج) د حرمينو شريفينو د ساتلو وياړ پاکستان ته بښلی دی.»
د هېواد علماو او مشایخو غونډې د افغانستان د حریم د نقض په غبرګون کې پرېکړه کړې چې له خپلو حقونو، ارزښتونو او شرعي نظام دفاع فرض عین ده او د تېري پر وړاندې دفاع مقدس جهاد دی.
د علماو غونډه کې له اسلامي امارت هم غوښتنه شوې چې د اسلامي امارت د رهبر د حکم پر بنسټ دې هیچاته اجازه نه ورکول کیږي چې بهر ته د نظامي فعالیت لپاره ولاړ شي.
د شمالي وزیرستان د میرعلي تحصیل په یوه سیمه کي، د یوه مدرسې ته نژدې د بارودي موادو د چاودني له امله دوه ماشومان وژل سوي او ۱۵ تنه نور ټپیان سوي دي، چي پکي پنځه نجوني هم شاملي دي
د ايران د سپاه پاسدارانو درې غړي له وسله والو سره په نښته کې وژل شوي دي.
د ايران تسنيم دولتي خبري اژانس ليکلي، چې هغوی په زاهدان کې پولې ته نږدې د خپل ماموريت ترسره کولو پر مهال وژل شوي دي.
د مخابراتو وزارت ویلي، چي سبا ته د مخابراتي شبکو د بندېدو په اړه آوازې حقیقت نه لري.
کورنیو چارو وزیر، سراج الدین حقاني د ځانګړو ځواکونو د یوه روزنیز سمینار په پایغونډه کې ویلي، چې په هر قیمت د افغانستان له ځمکنۍ بشپړتیا ساتنه کوي.
هغه خپلو ځواکونو ته ویلي، چې د عملیاتو پر مهال په پوره احتیاط کار واخلي، څو د بې ګناه خلکو وینه توی نه شي، ځکه په وینا یې دا د "بشریت قتل" سره ورته ده.
د سعودي عربستان حکومت دوه افغانان او یو پاکستانی د نشه يي موادو د قاچاق په "جرم" اعدام کړي.
د سعودي عربستان د کورنیو چارو وزارت ویلي، دغه افغانان او یو پاکستانی یې د میتامفیتامین او هیرویینو د قاچاق په تور نیولي وو.
کندهار کي د اسعارو نرخونه:
- یو ډالر ۶۶.۳۲ افغانۍ
- یو ډالر ۲۹۷.۱۰ کلداري
- زر افغانۍ ۴۴۸۰ کلداري
د امریکا ولسمشر ډانلډ ټرمپ یو ځل بیا ویلي چې د افغانستان، هایتي او سومالیې په څېر د درېیمې نړۍ له هېوادونو یې د کډوالو منل د تل لپاره درولي دي.
هغه چې پېن سېلوانیا کې یوې غونډې ته خبرې کولې ویلي، ولې باید کډوال تل له داسې هېوادونو امریکا ته ورشي خو د ناروې او ډنمارک په څېر هېوادونو کډوال نه ورځي.
نن کندهار کي د هوا لوړه درجه ۱۹ او کښته ۸ ده، په روانه او راتلونکې اوونۍ کي د شپې او ورځي یخ نور هم کمیږي، دې میاشت کي د لږو بارانونو اټکل هم سته.